ARYNews.tv | Urdu – Har Lamha Bakhabar

Tag: pims

  • کیا پمز میں سانپ کے کاٹے کی ویکسین نہیں ہے؟ زیر گردش ویڈیو کے حقائق سامنے آ گئے

    کیا پمز میں سانپ کے کاٹے کی ویکسین نہیں ہے؟ زیر گردش ویڈیو کے حقائق سامنے آ گئے

    اسلام آباد (02 اگست 2025): وزیر اعظم میاں شہباز شریف نے سوشل میڈیا پر پمز اسپتال سے متعلق سانپ کے کاٹے کی زیر گردش ویڈیو کا نوٹس لے لیا ہے، اور اسپتال انتظامیہ سے واقعے پر رپورٹ طلب کر لی ہے، ذرائع کا کہنا ہے کہ پمز انتظامیہ نے واقعے کی انکوائری رپورٹ تیار کر لی جو وزیر اعظم آفس کو جمع کرائی جائے گی۔

    دوسری طرف سوشل میڈیا پر پمز اسپتال کی زیر گردش ویڈیو کے حقائق بھی سامنے آ گئے ہیں، سانپ کے کاٹے کے کیس سے متعلق اسپتال کا الیکٹرانک ریکارڈ اے آر وائی نیوز نے حاصل کر لیا ہے۔

    ذرائع کے مطابق سانپ کے کاٹے سے متاثرہ بچہ شاہ اللہ دتہ کے علاقے سے 31 جولائی صبح 8:35 پر پمز لایا گیا تھا، شعبہ ایمرجنسی میں ڈاکٹرز نے بچے کا معائنہ کیا، اور 17 منٹ کے اندر بچے کا معائنہ اور ٹیسٹ کے لیے سیمپلز بھجوائے جا چکے تھے۔

    متاثرہ بچے کو اینٹی وینم ویکسین کے 10 انجکشن لگائے گئے، بچے کو دیگر ادویات بھی شروع کرائی گئی تھیں، اور بچے کی حالت بگڑنے پر مزید 10 اینٹی وینم ویکسین انجکشن لگائے گئے، جب کہ اس ویکسینیشن کے دوران سینئر فزیشن اور آئی سی یو ٹیم نے بچے کا معائنہ کیا۔

    ڈاکٹرز نے حالت بگڑنے پر بچے کو وینٹی لیٹر پر ڈالنے کا فیصلہ کیا، بچے کو سانس لینے میں شدید دشواری کا سامنا تھا، لیکن پمز اسپتال میں وینٹی لیٹر خالی نہ ہونے پر بچے کو ریفر کرنے کا فیصلہ کیا گیا، اور پھر ریفرنگ سے قبل نجی اسپتال سے وینٹی لیٹر دستیابی کی تصدیق لی گئی۔

    ذرائع کے مطابق ڈاکٹرز نے وینٹی لیٹر کی عدم دستیابی پر بچے کو ریفرل لیٹر جاری کیا تھا، جب کہ پمز کے اسٹاک میں اینٹی وینم ویکسین کے 680 سے زائد وائلز موجود ہیں۔

  • پمز اسپتال کے جدید ترین آپریشن تھیٹرز سے متعلق اہم معلومات

    پمز اسپتال کے جدید ترین آپریشن تھیٹرز سے متعلق اہم معلومات

    اسلام آباد: پاکستان انسٹیٹیوٹ آف میڈیکل سائنسز (پمز) نے منفرد اعزاز اپنے نام کر لیا ہے، پمز ’ماڈیولر آپریشن تھیٹرز‘ کا حامل ملک کا پہلا سرکاری اسپتال بن گیا۔

    ذرائع وزارت صحت کے مطابق پمز میں اپنی نوعیت کے جدید ترین آپریشن تھیٹرز کی تعمیر مکمل ہو گئی ہے، اسپتال میں 7 ماڈیولر آپریشن تھیٹرز تیار کیے گئے ہیں، ماڈیولر او ٹیز منصوبہ سربراہ پمز پروفیسر عمران سکندر کی زیر نگرانی مکمل ہوا۔

    یہ ماڈیولر او ٹیز جدید ترین سہولیات سے آراستہ ہیں، اس منصوبے پر 1 ارب 40 کروڑ روپے لاگت آئی ہے، وزیر اعظم رواں ہفتے پمز ماڈیولر آپریشن تھیٹرز کا افتتاح کریں گے، انھیں یورپین طرز پر تیار کیا گیا ہے اور یہ آپریشن تھیٹرز جرمنی سے درآمد کیے گئے ہیں۔

    ذرائع وزارت صحت کا کہنا ہے کہ ماڈیولر آپریشن تھیٹر ایک سے دوسری جگہ منتقل کیے جا سکتے ہیں، اس میں سٹیریلائزر یونٹ کی سہولت دستیاب ہے، تین پری آپریٹ رومز اور 6 پوسٹ آپریٹ ریکوری رومز ماڈیولر آپریشن تھیٹر کا حصہ ہیں، بلڈ، ڈرگ اینڈ یوٹیلیٹی اسٹورز بھی اس کا حصہ ہوں گے۔

    پمز آپریشن تھیٹر پمز آپریشن تھیٹر

    ذرائع کے مطابق میل، فی میل چینجنگ، اسکرب روم، ویٹنگ ایریا بھی ان ماڈیولر او ٹیز کا حصہ ہیں، ماڈیولر آپریشن تھیٹرز جراثیم سے دیرپا حفاظتی اور آٹومیٹک خصوصیات کے حامل ہیں، ان میں آڈیو اور ویڈیو ریکارڈنگ اور مانیٹرنگ ممکن ہوگی، اسکرینیں بھی نصب کی گئی ہیں۔

    پمز

    پمز اسپتال ذرائع کا کہنا ہے کہ ماڈیولر آپریشن تھیٹر میں بجلی بندش پر بیک اپ بیٹریز استعمال کی جا سکیں گی، یہ الٹرا سونک کلینر، پیکنگ، اور کنٹنگ آلات سے لیس ہیں، ان میں میڈیکل گیسز ٹمپریچر کنٹرول نظام کے ساتھ ساتھ سرجری میں مددگار جدید ترین وائرلیس کیمرے نصب ہیں۔

    312 ایکس زوم کیمرے سے دوران سرجری اندرونی اعضا کی مانیٹرنگ ہوگی، آپریشن تھیٹر سے ملحق کونٹیکٹ سینسر ڈسپنسر قائم کیے گئے ہیں، اور ساتھ ہی آٹومیٹک سرجیکل اسکرب ڈس انفیکشن اسٹیشنز بھی قائم ہیں۔

  • چوہدری پرویز الہٰی کے سینے میں درد کی شکایت دور نہ ہو سکی

    چوہدری پرویز الہٰی کے سینے میں درد کی شکایت دور نہ ہو سکی

    اسلام آباد: ذرائع کا کہنا ہے کہ چوہدری پرویز الہٰی کے سینے میں درد کی شکایت دور نہیں ہو سکی ہے۔

    تفصیلات کے مطابق پمز اسپتال میں زیر علاج پرویز الہٰی سینے میں بدستور درد کی شکایت کر رہے ہیں، جس پر ان کا اہم کارڈیک ٹیسٹ تھیلیم اسکین کرانے کا فیصلہ کیا گیا ہے۔

    اسپتال ذرائع کے مطابق پرویز الہٰی کا تھیلیم اسکین آئندہ ہفتے پمز کارڈیک سینٹر میں ہوگا، تھیلیم اسکین سے دل کی شریانوں، والوز کی کارکردگی مانیٹر ہوگی، اور دل کی اندرونی حالت جانچی جائے گی۔ میڈیکل بورڈ نے پرویز الہٰی کو مزید زیرعلاج رکھنے کا فیصلہ کیا ہے، اور ایک ہفتہ پمز میں ان کے زیر علاج رہنے کا امکان ہے۔

    اسپتال ذرائع کا کہنا ہے کہ چوہدری پرویز الہٰی کا 5-2004 میں بائی پاس ہو چکا ہے، ایکو کارڈیوگرام اور کارڈیک بلڈ ٹیسٹ رپورٹس نارمل ہیں، شوگر اور بلڈ پریشر لیول معمول کے مطابق ہے، تین ماہ قبل آر آئی سی میں تھیلیم اسکین بھی ہو چکا ہے جس کی رپورٹ نارمل آئی تھی۔

    چوہدری پرویز الہٰی کی پسلیوں کے درد میں نمایاں کمی آئی ہے، ڈاکٹروں کا کہنا ہے کہ فریکچر جلد مکمل ٹھیک ہو جائے گا۔ یاد رہے کہ پرویز الہٰی کو 3 اپریل کو اڈیالہ جیل سے پمز اسپتال منتقل کیا گیا تھا، جہاں وہ کارڈیک سینٹر کے پرائیویٹ روم میں زیر علاج ہیں۔

  • شہباز گل کو مزید زیر علاج رکھنے یا ڈسچارج کرنے کا فیصلہ آج ہوگا

    شہباز گل کو مزید زیر علاج رکھنے یا ڈسچارج کرنے کا فیصلہ آج ہوگا

    اسلام آباد: سابق وزیر اعظم عمران خان کے چیف آف اسٹاف شہباز گل کو مزید زیر علاج رکھنے یا ڈسچارج کرنے کا فیصلہ آج ہوگا۔

    تفصیلات کے مطابق گزشتہ پمز کے ڈاکٹرز نے شہباز گل کو طبی معائنے کے بعد آج صبح تک کارڈیک سینٹر میں زیر علاج رکھنے کا فیصلہ کیا تھا۔

    اسپتال ذرائع کا کہنا ہے کہ شہباز گل کی میڈیکل رپورٹ پر ڈاکٹرز کی مشاورت جاری ہے، اس وقت ان کی مجموعی طور پر صحت تسلی بخش ہے، اور انھیں بدستور لو فلو آکسیجن دی جا رہی ہے، شہباز گل کے کچھ ٹیسٹ کے نتائج آنا باقی ہیں، جن میں کرونا رپورٹ بھی شامل ہے۔

    شہبازگل کو سانس لینے میں دشواری، اسپتال منتقل

    میڈیکل بورڈ آج صبح شہباز گل کا دوبارہ معائنہ کرے گا، اور پھر میڈیکل رپورٹ پولیس کے حوالے کی جائے گی، ذرائع کے مطابق ڈاکٹر نعیم ملک، ڈاکٹر شجیع، ڈاکٹر عاطف میڈیکل بورڈ کا حصہ ہیں۔

    شہباز گل کی میڈیکل رپورٹ آج سیشن عدالت کے ڈیوٹی مجسٹریٹ راجہ فرخ علی خان نے طلب کر رکھی ہے، اڈیالہ جیل سے واپس آنے کے بعد تفتیشی افسر کو ملزم شہباز گل کا جلد میڈیکل کروانے کا حکم دیا گیا تھا، تفتیشی افسر میڈیکل رپورٹ آج صبح عدالت کے سامنے پیش کریں گے۔

    گزشتہ رات ڈاکٹرز کی تجویز پر شہباز گل کی ای سی جی ٹیسٹ کیا گیا تھا، اسپتال ذرائع کا کہنا تھا کہ ان کی ای سی جی مکمل طور پر نارمل نہیں ہے، شہباز گل کو طویل عرصہ سے سانس کا عارضہ لاحق ہے۔

  • اسپتالوں میں مریضوں کو سہولتیں دینے کے اقدامات کر رہے ہیں: ڈاکٹر فیصل سلطان

    اسپتالوں میں مریضوں کو سہولتیں دینے کے اقدامات کر رہے ہیں: ڈاکٹر فیصل سلطان

    اسلام آباد: معاون خصوصی برائے صحت ڈاکٹر فیصل سلطان نے پمز اسپتال کا دورہ کیا، ان کا کہنا تھا کہ اسپتالوں میں مریضوں کو سہولتیں دینے کے اقدامات کر رہے ہیں۔

    تفصیلات کے مطابق معاون خصوصی برائے صحت ڈاکٹر فیصل سلطان نے پمز اسپتال کا دورہ کیا، ڈاکٹر فیصل سلطان نے علاج کے لیے آنے والے مریضوں سے بات چیت کی۔

    انہوں نے مریضوں سے مشکلات بھی دریافت کیں۔

    اس موقع پر ان کا کہنا تھا کہ مریضوں کو بہترین سہولتوں کی فراہمی ہماری ترجیح ہے، اسپتالوں میں مریضوں کو سہولتیں دینے کے اقدامات کر رہے ہیں۔

    ڈاکٹر فیصل سلطان کا کہنا تھا کہ کرونا وائرس ایس او پیز پر عملدر آمد کا فقدان ہے، ملک بھر میں ویکسی نیشن کا عمل جاری ہے۔

  • کرونا میں مبتلا نومولود سے متعلق اچھی خبر

    کرونا میں مبتلا نومولود سے متعلق اچھی خبر

    اسلام آباد: پمز اسپتال میں کرونا پازیٹو نومولود سے متعلق اچھی خبر آ گئی، پمز ذرائع کا کہنا ہے کہ بچہ صحت یاب ہو گیا۔

    تفصیلات کے مطابق اسلام آباد کے اسپتال پمز میں زیر علاج کرونا میں مبتلا نومولود صحت یاب ہو گیا ہے، اسپتال میں بچہ ایک ہفتے سے زائد زیر علاج رہا۔

    پمز اسپتال ذرائع کا کہنا ہے کہ اب کرونا سے صحت یاب نومولود کو ڈسچارج کر دیا گیا ہے، نومولود کی ماں کرونا کی مریضہ تھی، جن سے کرونا وائرس بچے کو منتقل ہو گیا تھا۔

    پمز اسپتال کے مطابق نومولود کو چند روز تک آئی سی یو میں رکھا گیا تھا، کڑی نگرانی میں اب بچہ پوری طرح صحت یاب ہو چکا ہے۔

    دوسری طرف چلڈرن اسپتال میں ڈیڑھ سالہ کرونا میں مبتلا بچی بھی زیر علاج ہے، پمز اسپتال کا کہنا ہے کہ کرونا میں مبتلا ڈیڑھ سالہ بچی معذوری کا شکار ہے۔

    نومولود میں بھی کرونا وائرس کی تصدیق ہو گئی

    اسپتال ذرائع کے مطابق پمز میں تاحال 20 بچوں میں کرونا کی تصدیق ہو چکی ہے، جب کہ اب تک کرونا انفیکشن سے ایک نومولود کی موت واقع ہوئی ہے، کرونا سے جاں بحق نومولود پیدائش کے وقت جاں بر نہیں ہو سکا تھا۔

    واضح رہے کہ وفاقی دارالحکومت اسلام آباد میں کرونا وبا نے تیسری لہر کے دوران تشویش ناک صورت اختیار کر لی ہے، اور 10 سال تک کے 5497 بچے کرونا مثبت ہو چکے ہیں۔

  • اسلام آباد کے سب سے بڑے سرکاری اسپتال کی سروسز محدود کرنے کا اعلان

    اسلام آباد کے سب سے بڑے سرکاری اسپتال کی سروسز محدود کرنے کا اعلان

    اسلام آباد: پمز اسپتال نے سروسز محدود کرنے کا اعلان کرتے ہوئے اسپتال میں مرکزی او پی ڈی سروس بند کر دی۔

    تفصیلات کے مطابق پاکستان انسٹی ٹیوٹ آف میڈیکل سائنسز (پمز) کے ترجمان ڈاکٹر وسیم خواجہ نے کہا ہے کہ اسپتال کی مرکزی او پی ڈی بند کر دی گئی ہے، یہ فیصلہ کرونا وبا کی صورت حال کے باعث کیا گیا ہے۔

    ترجمان نے بتایا کہ شعبہ زچہ بچہ اور چلڈرن اسپتال کی او پی ڈیز کھلی رہیں گی، موجودہ حالات میں پمز کا شعبہ ایمرجنسی بھی فعال رہےگا، تاہم مین او پی ڈی کی بندش کا فیصلہ کرونا صورت حال کے باعث کیا گیا ہے۔

    ڈاکٹر وسیم خواجہ کے مطابق اسپتال میں ایمرجنسی کے علاوہ کوئی سرجری نہیں ہوگی، جب کہ کرونا صورت حال میں بہتری پر او پی ڈی سروس بحال کی جائے گی۔

    پمز اسپتال اسلام آباد کا عملہ کرونا وائرس کا شکار ہونے لگا

    ادھر صوبہ سندھ کے بڑے شہر اور ملک کے صنعتی حب کراچی میں بھی اسپتالوں میں کرونا مریضوں کی تعداد بڑھتی جا رہی ہے، جناح اسپتال میں کرونا کے 48 مریض زیر علاج ہیں جب کہ مختص بستروں میں 50 کی گنجائش باقی ہے۔

    لیاری جنرل اسپتال میں 28 بیڈ خالی ہیں، ٹراما سینٹر میں 7 مریض زیر علاج ہیں اور 18 بستر خالی ہیں، التمش اسپتال میں 17 بستر خالی اور 3 مریض زیر علاج ہیں، ایکسپو سینٹر میں کل 74 مریض داخل ہیں، ضیاالدین اسپتال میں 17 بستر خالی اور 18 مریض زیر علاج ہیں۔

    سندھ انفیکشنز ڈیزیز اسپتال نیپا میں 44 مریض زیر علاج ہیں، انڈس اسپتال میں 3 مریض آئی سی یو اور 12 ایچ ڈی یو میں زیر علاج ہیں، انڈس میں ایمرجنسی میں 13 بستر بھی مریضوں سے بھر چکے ہیں۔

  • پمز اسپتال اسلام آباد کا عملہ کرونا وائرس کا شکار ہونے لگا

    پمز اسپتال اسلام آباد کا عملہ کرونا وائرس کا شکار ہونے لگا

    اسلام آباد: پاکستان انسٹی ٹیوٹ آف میڈیکل سائنسز (پمز) اسپتال کے ہیلتھ کیئر ورکرز پر کرونا وائرس کے وار جاری ہیں، ایک ماہ میں پمز اسپتال کے 71 ملازمین کرونا پازیٹو ہو چکے ہیں۔

    اے آر وائی نیوز کے مطابق پمز اسپتال اسلام آباد کے ملازمین تیزی سے کرونا وائرس کا شکار ہو رہے ہیں، گزشتہ ایک ماہ میں کرونا سے متاثر ہونے والے 71 ملازمین میں سب سے زیادہ تعداد ڈاکٹرز کی ہے۔

    ذرایع کا کہنا ہے کہ کرونا پازیٹو ہونے والے 71 پمز ملازمین میں 54 ڈاکٹرز، 10 نرسز، اور 7 نان میڈیکل اسٹاف شامل ہے۔

    پمز اسپتال ذرایع کا یہ بھی کہنا ہے کہ کرونا میں مبتلا بیش تر ڈاکٹر زیر تربیت ہیں، ان میں 14 میڈیکل افسر بھی شامل ہیں، کرونا سے متاثر ہونے والا عملہ کارڈیک سینٹر، ڈائیلائسز سینٹر اور یورالوجی وارڈ تعینات تھا۔

    ملک میں کرونا وائرس کے 707 نئے کیسز رپورٹ

    دیگر کرونا پازیٹو ہیلتھ ورکرز سرجیکل وارڈ، میڈیکل وارڈ، چلڈرن اور زچہ بچہ شعبے، ایمرجنسی اور بلڈ بینک میں تعینات تھے۔

    واضح رہے کہ گزشتہ 24 گھنٹوں کے دوران ملک میں کرونا وائرس کے 707 نئے کیسز سامنے آئے جب کہ 3 مریض جاں بحق ہوئے ہیں، نیشنل کمانڈ اینڈ آپریشن سینٹر کے مطابق ملک میں کرونا وائرس سے اموات کی تعداد 6 ہزار 739 ہوگئی ہے۔

    ملک میں مجموعی کرونا کیسز کی تعداد 3 لاکھ 28 ہزار 602 ہوچکی ہے، جب کہ کرونا وائرس کے فعال کیسز کی تعداد 10 ہزار 788 ہے۔

  • وزیر اعظم کے معاون خصوصی کا بھیس بدل کر پمز اسپتال کا دورہ

    وزیر اعظم کے معاون خصوصی کا بھیس بدل کر پمز اسپتال کا دورہ

    اسلام آباد: وزیر اعظم کے معاون خصوصی برائے صحت ڈاکٹر ظفر مرزا نے بھیس بدل کر پمز اسپتال کا دورہ کیا، ان کا کہنا ہے کہ مریضوں کی باتیں سن کر انہیں دلی تکلیف ہوئی۔

    تفصیلات کے مطابق وزیر اعظم کے معاون خصوصی برائے صحت ڈاکٹر ظفر مرزا نے پمز اسپتال کا دورہ کیا۔ معاون خصوصی نے بھیس بدل کر اسپتال کا دورہ کیا۔

    بعد ازاں میڈیا سے گفتگو کرتے ہوئے ان کا کہنا تھا کہ پمز اسپتال کے مختلف وارڈز کا دورہ کیا ہے، کافی شعبوں میں مریضوں سے علاج کی معلومات لی ہیں۔ مریضوں کی باتیں سن کر دلی تکلیف ہوئی۔

    معاون خصوصی نے کہا کہ پمز اسپتال میں بہتری کے لیے کافی کام کرنے کی ضرورت ہے، انتظامیہ و ڈاکٹرز دستیاب وسائل میں ہر ممکن خیال رکھ رہے ہیں۔ پمز اسپتال کی او پی ڈی سروسز کی توسیع سمیت عملے کی کمی دور کرنا ہے۔

    انہوں نے کہا کہ پمز اسپتال کی ایمرجنسی کے حالات متاثر کن نہیں ہیں، آنے والے کچھ ماہ میں پمز میں بہتری کی امید ہے۔

    خیال رہے کہ ڈاکٹر ظفر اللہ مرزا نے اپریل میں اپنی ذمہ داریاں سنبھالی تھیں۔

    ترجمان وزارت قومی صحت کے مطابق ڈاکٹر ظفر اللہ کی تعیناتی صحت کے شعبے میں حکومت کے وژن اور اہداف کے حصول کے حوالے سے انتہائی اہمیت کی حامل ہے۔ عالمی صحت کے حلقوں نے بھی ان کی تعیناتی خوش آئند قرار دی تھی۔

  • نواز شریف کو پمز سے اڈیالہ جیل منتقل کر دیا گیا

    نواز شریف کو پمز سے اڈیالہ جیل منتقل کر دیا گیا

    راولپنڈی: اڈیالہ جیل کے قیدی سابق وزیرِ اعظم نواز شریف کو صحت بہتری پر اسپتال سے واپس جیل کی کوٹھری منتقل کر دیا گیا۔

    تفصیلات کے مطابق پمز کے ڈاکٹروں نے آج ایک بار پھر تفصیلی معائنے کے بعد نواز شریف کی صحت تسلی بخش قرار دی، جس کے بعد انھیں جیل منتقل کر دیا گیا۔

    پمز اسپتال کے ذرائع کا کہنا ہے کہ نواز شریف کے میڈیکل ٹیسٹ کی رپورٹس کلیئر آئی ہیں، مریض کی حالت بہتر ہونے کی وجہ سے واپس اڈیالہ جیل منتقل کیا گیا۔

    پمز کے ایگزیکٹو ڈائریکٹر نے اے آر وائی نیوز سے خصوصی گفتگو کرتے ہوئے کہا کہ نواز شریف کا بلڈ پریشر اور شوگر لیول ہائی تھا جس کی وجہ سے انھیں اسپتال داخل کیا گیا تھا۔

    اے آر وائی نیوز کے پروگرام آف دی ریکارڈ میں ایگزیکٹو ڈائریکٹر پمز کا کہنا تھا کہ نواز شریف کا بلڈ پریشر اور شوگر لیول نارمل ہو گیا ہے، مریض کو مزید کوئی شکایت نہیں تھی اس لیے انھیں ڈسچارج کر دیا گیا۔

    نوازشریف کی طبیعت بتدریج بہتر ہونے لگی

    قبل ازیں پمز میڈیکل بورڈ نے مجرم نواز شریف کا دوبارہ تفصیلی طبی معائنہ کیا، ڈاکٹرز کی تجویز پر مریض کا الٹرا ساؤنڈ، ایکو اور بلڈ ٹیسٹ کیے گئے۔

    ڈاکٹرز نے معائنے کے بعد نواز شریف کو کمرے میں چہل قدمی کی بھی ہدایت کی، میڈیکل بورڈ نے کلینکل ٹیسٹ کی رپورٹس پر مشاورت کے بعد نواز شریف کو ڈسچارج کرنے کا فیصلہ کیا۔

    میڈیکل بورڈ کی رپورٹ اے آر وائی نیوز پر

    پمز کے میڈیکل بورڈ کی مکمل رپورٹ اے آر وائی نیوز نے نشر کر دی، میڈیکل بورڈ نے نواز شریف کو مکمل صحت مند قرار دے دیا، میڈیکل رپورٹ میں کہا گیا ہے کہ مریض کے تمام کلینیکل ٹیسٹ نارمل ہیں۔

    رپورٹس کے مطابق نواز شریف کا بی پی، شوگر، کریٹنین، یوریا لیول نارمل ہونے کے ساتھ ساتھ نبض کی فی منٹ رفتار بھی نارمل ہے، جب کہ ای سی جی، ایکو کارڈیو گرام اور الٹرا ساؤنڈ بھی نارمل آیا ہے۔

    مریض کے لیے ہدایات

    پمز کے پانچ رکنی میڈیکل بورڈ نے اڈیالہ کے قیدی نواز شریف کو متعدد ہدایات بھی جاری کر دی ہیں، ان ہدایات کے مطابق مریض کو روزانہ خالی پیٹ شوگر لیول مانیٹر کرنی ہے۔

    ڈاکٹرز نے کہا کہ نواز شریف پہلے سے زیرِ استعمال ادویات جاری رکھیں، ڈاکٹرز حسبِ ضرورت مریض کا چیک اپ کرنے اڈیالہ جائیں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔