اسلام آباد : سابق صدر آصف زرداری سے ان کی بیٹی آصفہ بھٹو اور وکلاء نے ملاقات کی، خاندانی، قانونی اور سیاسی امور پر تبادلہ خیال کیا گیا، ملاقات تین گھنٹے سے زائد جاری رہی۔

تفصیلات کے مطابق پمز اسپتال میں آصف زرداری سے ان کی صاحبزادی آصفہ بھٹو نے ملاقات کی ہے، ملاقات میں اس کے وکلاء فاروق ایچ نائیک اور لطیف کھوسہ بھی موجود تھے۔

آصف زرداری سے آصفہ بھٹو اور وکلا کی ملاقات تین گھنٹے سے زائد جاری رہی، اس موقع پر خاندانی، قانونی اور سیاسی امور پر تبادلہ خیال کیا گیا۔

دوسری جانب پمز اسپتال کے ذرائع کا کہنا ہے کہ میڈیکل بورڈ کی تجویز پر سابق صدر زرداری کا ایم آر آئی ٹیسٹ کر لیا گیا ہے۔

بورڈ نے آصف زرداری کو سروائیکل و لمبر سپائن ایم آرآئی تجویز کی تھی، سابق صدر کی گردن اور کمر میں تکلیف کی شکایت پر ایم آر آئی کا فیصلہ کیا گیا۔

اسپتال ذرائع کا کہنا ہے کہ سابق صدر کی گردن کے مہروں میں فاصلہ کم ہونے سے شدید کھچاؤ کی شکایت ہے، آصف زرداری کو گردن و کمر تکلیف پر فزیو تھراپی کرائی جارہی ہے۔

؎واضح رہے کہ پیپلز پارٹی کی اعلیٰ قیادت کی جانب سے سابق صدر زرداری کی صحت کے حوالے سے سخت تشویش کا اظہار کیا جارہا ہے۔

پیپلز پارٹی کے سینیئر رہنما سابق صدر کے علاج میں ذاتی معالجین کی شمولیت اور پرائیویٹ بورڈ تشکیل دینے کے خواہاں ہیں۔

اس کے علاوہ پیپلز پارٹی آصف زرداری کی بگڑتی ہوئی صحت کے پیش نظر درخواست ضمانت دینا چاہتی ہے جس کے لیے سابق صدر ابھی تیار نظر نہیں آتے۔