Tag: PLAN CRASH

کراچی : وفاقی وزیر ہوا بازی غلام سرور خان نے کہا ہے کہ کراچی سانحے میں جاں بحق افراد کے لواحقین کو فی کس10لاکھ روپے دیے جائیں گے، کراچی کے شہریوں کا جذبہ قابل دید تھا۔

ان خیالات کا اظہار انہوں نے کراچی میں میڈیا سے گفتگو کرتے ہوئے کیا، انہوں نے کہا کہ بدقسمت طیارے کپتان نے اپنی طرف سے انسانی جانیں بچانے کی جتنی کوشش ہوسکی اس نے کی، پائلٹ نے گلی کے بیچ طیارہ اتارنے کی کوشش کی جس پرخراج عقیدت پیش کرتے ہیں۔

یہ قومی سانحہ ہے، حادثے کے بعد ریسکیو اداروں نے لاشیں اور زخمیوں کو نکالنے اور آگ بجھانے کے عمل میں حصہ لیا، اس موقع پر کراچی کے شہریوں کا جذبہ بھی قابل دید تھا جس پر انہیں خراج تحسین پیش کرتا ہوں۔

غلام سرور نے کہا کہ کراچی سانحے میں جاں بحق افراد کے لواحقین کو فی کس10لاکھ روپے اور سانحے کے2زخمیوں کو فی کس5لاکھ روپے دیے جائینگے، انہوں نے بتایا کہ حقیقی امداد5ملین روپے متاثرین کو جلد سے جلد پہنچائی جائے گی۔

وفاقی وزیرغلام سرور کا کہنا تھا کہ حادثے کی تحقیقات کیلئے ایئرفورس کے تجربہ کار افسران پر مشتمل انکوائری کمیٹی قائم کی گئی ہے، ایئربس کمپنی کے فرنچ اور جرمنی کے ایکسپرٹ بھی آئیں گے، پوری کوشش ہے کہ حقائق قوم اور پارلیمنٹ کے سامنے رکھے جائیں اور کمیٹی کم سے کم وقت میں انکوائری مکمل کرے۔

انہوں نے کہا کہ لوگوں کی گاڑیوں کے نقصان کا بھی ازالہ کیا جائے گا، ہماری پہلی ذمہ داری ہے کہ ڈی این اے ٹیسٹ کے بعد میتیں لواحقین کےحوالے کی جائیں،حادثے میں متاثر ہونے والے ہرگھر کی مرمت اور بحال کرنے کا خرچہ حکومت برداشت کرے گی۔

طیارہ سانحے کی سو فیصد شفاف انکوائری ہوگی، یہ 100انسانی جانوں اور انسانیت کا مسئلہ ہے اس پرکوئی اجارہ داری نہیں ہوگی، انکوائری میں منسٹر پر ذمہ داری ثابت ہوگی تو احتساب کیلئے خود کو پیش کردوں گا۔