Tag: plane

انڈونیشیا میں طیارہ حادثے پر پاکستان کا اظہار افسوس

اسلام آباد: انڈونیشیا میں طیارہ حادثے پر پاکستان نے اظہار افسوس کرتے ہوئے کہا ہے کہ ہلاک افراد کے اہلخانہ کے غم میں برابر کے شریک ہیں۔

تفصیلات کے مطابق انڈونیشیا کی نجی ایئر لائن کا طیارہ جی ٹی 610 سمندر میں گر کر تباہ ہوگیا، ریسکیوں ٹیموں نے 6 مسافروں کی لاشیں برآمد کرلی جبکہ باقی کی تلاش جاری ہے۔

ترجمان دفترخارجہ کی جانب سے جاری کردہ بیان میں کہا گیا ہے کہ حادثے کے شکار افراد کے اہلخانہ کے غم میں برابر کے شریک ہیں۔

انڈونیشیا: نجی ایئرلائن کا طیارہ سمندر میں گرکر تباہ، 6 مسافروں‌ کی لاشیں برآمد

خیال رہے کہ آج انڈونیشیا کے دارالحکومت جکارتہ کے ہوائی اڈے سے اڑان بھرنے والا نجی ایئر لائن کا مسافر بردار طیارہ نامعلوم وجوہات کے باعث ہوائی اڈے سے اڑان بھرنے کے کچھ دیر بعد اچانک سمندر میں گر کر تباہ ہوگیا۔

انڈونیشیا کی نجی ایئر لائن ’لاوئن ایئر‘ کا مسافر بردار طیارہ ’جی ٹی 610‘ 189 مسافروں کو دارالحکومت جکارتہ سے جزیرہ سماٹرا کے شہر پنگ کل پنانگ لے جار ہا تھا۔

یاد رہے کہ سنہ 2014 میں بھی لوئن ایئر لائن کا مسافر بردار طیارہ 904 حادثے کے باعث سمندر میں گرکر تباہ ہوگیا تھا، جس میں 108 افراد سوار تھے تاہم خوش قسمتی میں جہاز میں سوار تمام مسافر زندہ بچ گئے تھے۔

اکتوبر 30, 2018
شام میں روسی جنگی طیارے کی تباہی کے بعد ماسکو حکام کا بڑا فیصلہ

ماسکو: شام میں گذشتہ ہفتے روسی جنگی طیارے کی تباہی کے بعد ماسکو حکام نے بڑا فیصلہ کرلیا، روس شامی فوج کو جدید ترین فضائی دفاعی نظام سے لیس کرے گا۔

تفصیلات کے مطابق گذشتہ ہفتے شام میں روسی جنگی طیارے کو مار گرایا گیا تھا جس کا الزام روس نے اسرائیل پر عائد کیا تھا، بعد اسرائیل نے الزامات کی تردید کی تھی۔

غیر ملکی خبر رساں ادارے کے مطابق روسی حکام نے شامی فوج کو جدید ترین فضائی دفاعی نظام سے لیس کرنے کا اعلان کیا ہے، 2 ہفتے میں شامی فوج کو ایس 300 میزائل سسٹم فراہم کرے گا۔

غیر ملکی خبر رساں ادارے کا کہنا ہے کہ دوسری جانب اسرائیل اور امریکا کی جانب سے متوقع روسی اقدام کی مخالفت سامنے آئی ہے۔

روس شام میں اپنے جاسوس طیارے کی تباہی کا ذمہ دار اسرائیل کو قرار دے چکا ہے، ماضی میں اسرائیلی دباؤ پر روس شام کو ایس 300 نظام دینے سے گریزاں رہا۔

روسی طیارے کی تباہی، پیوٹن کا اسرائیلی وزیراعظم سے ٹیلی فونک رابطہ

واضح رہے کہ روسی طیارہ گذشتہ ہفتے شام میں مشن سے واپس لوٹتے ہوئے لاپتہ ہوا تھا، جس کے بعد طیارے کی تباہی کی خبر ملی، روسی جنگی طیارے میں 14 افراد سوار تھے۔

یاد رہے رواں سال مارچ میں بھی شامی شہر لتاکیا میں روس کا ایک فوجی طیارہ حميميم کے فوجی اڈے پر گر کر تباہ ہو گیا تھا، جہاں سے روس شام میں ہونے والی تمام فوجی کارروائیاں کرتا ہے۔

فرروی 2018 میں باغیوں نے ادلب صوبے میں روس کا سخوئی 25 طیارہ مار گرانے کا دعوی کیا تھا، جنگی طیارہ تباہ ہونے سے پہلے پائلٹ طیارے سے نکلنے میں کامیاب ہوگیا تھا تاہم پائلٹ جب زمین پرپہنچا تو اس کی باغیوں سے جھڑپ ہوئی اور وہ فائرنگ کے تبادلے میں مارا گیا۔

ستمبر 25, 2018
شام میں اسرائیلی حملے روسی مفاد کے خلاف ہیں، ماسکو کی اسرائیل کو تنبیہ

ماسکو : شام میں روسی طیارے کو ہدف بنانے کے بعد ماسکو نے اسرائیل کو خبردار کیا ہے کہ اسرائیل کا شامی اہداف کو نشانہ بنانا خطے میں روسی اہداف کے خلاف ہے۔

تفصیلات کے مطابق روسی حکام کی جانب سے اسرائیل کے سینئر سیکیورٹی حکام کو خبر دار کیا گیا ہے کہ شام میں اہداف کو نشانہ بنانا خطے میں ماسکو کے مفادات کے خلاف ہے۔

روسی حکام کے مطابق اسرائیلی فورسز کے حملوں نے بشار الااسد کی حکومت کو کمزور کر دیا ہے اور ملک میں جاری جنگ کے خاتمے کی کوششوں کو شدید نقصان پہنچایا ہے۔

اسرائیل کے سیکیورٹی حکام کا کہنا تھا کہ روس نے پیغام دیا تھا کہ روس بشار الااسد کی حکومت کو مضبوط بنانا چاہتا ہے اور اسرائیلی فوجیوں کی جانب سے شام میں اہداف کو نشانہ بنانا روسی مقاصد کے خلاف ہے۔

اسرائیلی خبر رساں ادارے کا کہنا تھا کہ روسی حکام کی جانب سے واضح پیغام موصول ہونے کے بعد بھی شام سے متعلق اسرائیل کی پالیسی تبدیل نہیں ہوئی اور ایسا خیال ہے کہ روس ایرانی اہداف پر حملوں کو نظر انداز کررہا ہے جس کا مقصد شام میں اسلامی جمہوریہ کی موجودگی اور حزب اللہ کو اسلحے کی منتقلی روکنا تھا۔

اسرائیلی خبر رساں ادارے کا کہنا تھا کہ روس اور اسرائیل کو دونوں ملکوں کے درمیان سیکیورٹی کورڈینیشن کے حوالے سے اپنے فیصلے پر نظر ثانی کرنی چاہیئے جو اسرائیل کے لیے تشویش کا باعث ہوگا۔

اسرائیلی دفاعی فورسز کو معلوم ہے کہ روسی صدر طیارہ حادثے کے بعد شام میں نئے قوانین لاگو کرے گا اور خطے میں اپنا کنٹرول مزید مستحکم بنائے گا تاکہ اپنے کنٹرول کے ذریعے خانہ جنگی کو نقصان پہنچا سکے۔

اسرائیلی میڈیا کے مطابق روس اسرائیل کے لیے حملے کرنا مزید مشکل کردے گا لہذا اسرائیلی فورسز کو مذکورہ علاقے کو چلانے کے لیے نئے راستے تلاش کرنے ہوں۔

خیال رہے کہ ماسکو کی جانب سے ایک ہفتہ قبل بھی روسی طیارے کو نشانہ بنانے سے پہلے بھی اسرائیل کو خبردار کیا گیا تھا۔

ستمبر 24, 2018
جنوبی سوڈان میں طیارہ حادثے کا شکار، 17 مسافر ہلاک

جوبا : سوڈان میں 22 مسافروں ہمراہ اڑان بھرنے والے والا مسافر بردار طیارہ سوڈانی شہر یرول میں حادثے کا شکار ہوگیا، جس کے نتیجے میں 17 افراد ہلاک ہوگئے۔

تفصیلات کے مطابق سوڈان کے دارالحکومت جوبا کے عالمی ہوائی اڈے سے پرواز بھرنے والا مسافر بردار طیارہ جنوبی سوڈان میں اچانک حادثے کا شکار ہوگیا، حادثے کے نتیجے میں 17 مسافر ہلاک، 3 زخمی ہوگئے جبکہ 2 افراد لاپتہ ہیں۔

غیر ملکی خبر رساں ادارے کا کہنا ہے کہ زخمی ہونے والے مسافروں میں اٹلی سے تعلق رکھنے والا ڈاکٹر بھی شامل ہے جو سوڈان میں سماجی تنظیم کا ملازم ہے، اطالوی شہری کی حالت تشویش ناک بتائی جارہی ہے۔

حادثے کے عینی شاہدین کا کہنا ہے کہ طیارہ دریا میں گر کر حادثے کا شکار ہوا ہے، طیارہ حادثے میں ہلاک ہونے والوں کی لاشیں دریا سے نکالی گئی ہیں۔

غیر ملکی خبر رساں ادارے کا کہنا ہے کہ 22 مسافروں میں تین بچے بھی شامل ہیں۔

خیال رہے کہ اس سے قبل بھی سوڈان میں متعدد مرتبہ طیارے حادثے کا شکار ہوچکے ہیں جبکہ سنہ 2017 میں خراب موسم کے باعث ایک طیارہ حادثے کا شکار ہوا تھا جس کے نتیجے میں 4 مسافر زخمی ہوگئے تھے۔

یاد رہے کہ سنہ 2015 میں بھی جوبا کے عالمی ہوائی اڈے سے پرواز کرنے والا روسی طیارہ فنی خرابی کے باعث گرکر تباہ ہوگیا تھا طیارہ حادثے میں درجنوں مسافر ہلاک ہوگئے۔

ستمبر 9, 2018
ایران جلد نیا لڑاکا طیارہ متعارف کرائے گا: ایرانی وزیر دفاع

تہران: ایرانی وزیر دفاع بریگیڈیئر جنرل عامر حتامی نے کہا ہے کہ ایران جلد نیا لڑاکا طیارہ متعارف کرائے گا جو قومی دن کے موقع پر پرواز کرے گا۔

تفصیلات کے مطابق ایک جانب امریکا ایران کو مشرقی وسطیٰ کے لیے خطرناک قرار دیتے ہوئے اسے اپنے جارحانہ اقدامات بند کرنے کا کہہ رہا ہے تو دوسری طرف ایران نے ایک نیا لڑاکا طیارہ متعارف کرانے کا اعلان کردیا ہے۔

غیر ملکی خبر رساں ادارے کے مطابق ایرانی وزیر دفاع نے اپنے جاری کردہ بیان میں کہا ہے کہ ایران اگلے ہفتے ایک نیا لڑاکا طیارہ متعارف کروانے والا ہے، جو ملکی یوم دفاع کے موقع پر پرواز کرے گا۔

ان کا کہنا تھا کہ تہران حکومت اپنے میزائل پروگرام کو بھی ترجیحی بنیادوں پر جاری رکھے گی، جبکہ ایران میں اگلے ہفتے یوم دفاع منایا جائے گا اسی موقع پر نیا لڑاکا طیارہ ’ایف 313‘ متعارف کرایا جائے گا۔

امریکا نے ایران کے حوالے سے نیا ایکشن گروپ تشکیل دے دیا

بریگیڈیئر جنرل عامر حتامی کا مزید کہنا تھا کہ ہم امریکی پابندیوں کو خاطر میں نہیں لارہے، ایران مستحکم پوزیشن میں ہے، ہم اپنے میزائل پروگرام بھی جاری رکھیں گے۔

خیال رہے کہ نئی امریکی پابندیوں کو رد کرتے ہوئے ایرانی بحریہ نے بھی گذشتہ روز اعلان کیا تھا کہ امریکی فوج کی خطے میں موجودگی اور کشیدگی کے تناظر میں وہ اپنے ایک جنگی بحری جہاز پر جدید دفاعی نظام نصب کر رہی ہے۔

واضح رہے کہ امریکی صدر ڈونلڈ ٹرمپ نے ایران کے ساتھ طے کردہ عالمی جوہری معاہدے سے دست بردری کے بعد تہران کے خلاف پابندیوں کی بحالی کا اعلان کر دیا تھا، اس تناظر میں دونوں ممالک کے درمیان تعلقات میں کشیدگی دوبارہ شدید ہوچکی ہے۔

اگست 20, 2018
امریکی باسکٹ بال کھلاڑی کا اُڑتے طیارے سے بال کو باسکٹ میں ڈالنے کا شاندار مظاہرہ

نیو جرسی : امریکی مایہ ناز باسکٹ بال کھلاڑ ی بُل بلارڈ کی عمدہ پرفارمنس نے سب کے دل موہ لیے، اُڑتے طیارے سے بال کو باسکٹ میں ڈال کر سب کوحیران کردیا۔

تفصیلات کے مطابق امریکی ریاست نیوجرسی کےبین الاقوامی ہوائی اڈے کے رن وے پر فراٹے بھرتے چھوٹے طیارےسے بال کو کامیابی سے باسکٹ میں ڈال کر معروف باسکٹ بال کھلاڑی بُل بلارڈ نے ایک بار پھر سب کو حیران کر دیا اور دیکھنے والے بھی تعریف کئے بنا رہ نہ سکے۔

گزشتہ سال بھی بلارڈ نے ہیلی کاپٹر اور اسکائی کوسٹر کی مدد کئی فٹ فضا میں جھولتے ہوئے بال کو باسکٹ میں ڈالنے کا منفرد اعزاز حاصل کیا تھا ۔

اگست 9, 2018
کیلیفورنیا میں چھوٹا طیارہ حادثے کا شکار، 5 افراد ہلاک

واشنگٹن : امریکی ریاست کیلیفورنیا میں چھوٹا مسافر طیارہ اڑان بھرنے کے فوراً بعد 1.6 کلومیٹر کے فاصلے پر شاپنگ مال میں گرکر تباہ ہوگیا، جس کے نتیجے میں 5 افراد ہلاک ہوگئے۔

تفصیلات کے مطابق امریکی ریاست کیلیفورنیا میں واقع اسٹرپ نامی شاپنگ مال کی کار پارکنگ میں اچانک چھوٹا طیارہ انجن میں فنی خرابی کے باعث گر کر تباہ ہوگیا، حادثے کے نتیجے میں جہاز میں سوار پانچ افراد موقع پر ہی ہلاک ہوگئے تھے۔

غیر ملکی خبر رساں ادارے کا کہنا تھا کہ مذکورہ طیارہ دو انجن والا کیسنا 414 تھا جو جان وائن ایئر پورٹ کے رن وے سے اڑان بھرنے کے فوراً بعد 1.6 کلو میٹر کے فاصلے پر شاپنگ مال کی پارکنگ میں کھڑی لال رنگ کی گاڑی پر گر کر تباہ ہوگیا۔

امریکی خبر رساں ادارے کا کہنا تھا کہ طیارے کے پرواز کرنے کے بعد ہی پائلٹ نے کنٹرول روم کے عملے کو جہاز میں فنی خرابی سے آگاہ کردیا تھا تاہم کچھ دیر بعد ہی طیاہ حادثے کا شکار ہوگیا۔

کیلی فورنیا پولیس کے ترجمان کا کہنا ہے کہ جہاز گذشتہ روز 12 بج کر 28 منٹ پر حادثے کا شکار ہوا تھا اور خوش قسمتی سے طیارے کی زد میں آنے والی کار کا مالک چند لمحے قبل ہی گاڑی سے اتر کر مال میں گیا تھا۔

پولیس کا کہنا تھا کہ فیڈرل ایوی ایشن اور نیشنل ٹرانسپورٹ سروس کی جانب سے طیارہ حادثے کی تحقیقات کا آغاز کردیا گیا ہے۔ تاہم حادثے میں ہلاک ہونے والوں کی تاحال شناخت نہیں ہوسکی ہے۔

میکسیکو میں مسافر طیارہ حادثے کا شکار، 85 افراد زخمی

خیال رہے کہ چند روز قبل بھی امریکی ریاست میکسیکو کے شہر ڈورانگو میں ایرو میکسیکو نامی فضائی کمپنی کا مسافر بردار طیارہ اے ایم 2431 رن وے سے اڑان بھرنے کے فوراً بعد 10 کلو میٹر کے فاصلے پر گر کر تباہ ہوگیا جس کے نتیجے میں 85 افراد زخمی ہوگئے تھے۔

غیر ملکی خبر رساں ادارے کے مطابق حادثے کا شکار ہونے والے طیارے میں97 مسافروں سمیت 101 افراد سوار تھے، جائے حادثہ سے 85 زخمیوں کو اسپتال منتقل کر دیا گیا ہے۔

اگست 6, 2018
شکاگو: انجن میں خرابی، پائلٹ نے طیارہ ہائی وے پر اتار دیا

واشنگٹن : امریکی شہر شکاگو میں پائلٹ نے انجن میں خرابی کے باعث چھوٹے طیارے کو شہر کے مصروف ترین ہائی وے پر اتار دیا۔

تفصیلات کے مطابق جمعے کے روز دورانِ پرواز چھوٹے طیارے کے انجن میں خرابی پیدا ہوگئی، جس کے باعث پائلٹ نے طیارے کو شکاگو کے مصروف ترین لیک شور ڈرائیو ہائی وے پر اتارنے کا فیصلہ کیا۔

امریکی خبر رساں اداروں کا کہنا تھا کہ طیارے کی لینڈنگ کے دوران قریب میں گاڑیاں موجود ہیں جبکہ طیارے کا پائلٹ اور خاتون مسافر بلکل محفوظ رہے اور کوئی جانی نقصان بھی نہیں ہوا۔

غیر ملکی خبر رساں ادارے کا کہنا ہے کہ طیارے کی ہائی وے پر لینڈنگ کے باعث ٹریفک کی روانی معطل ہوگئی اور گاڑیوں کی لمبی قطاریں لگ گئیں، تاہم موقع کے امدادی خدمات انجام دینے والے رضا کاروں نے طیارے کو دھکیل کر سائڈ پر کرکے ٹریفک کی روانی بحال کی۔

عینی شاہد کا کہنا ہے کہ مجھے یقین نہیں ہورہا ہے کہ پائلٹ نے یہ کر کیسے لیا، یہ منظر براہ راست دیکھنے کے بعد بھی یقین نہیں آرہا ہے کہ طیارہ ہائی وے پر اتار لیا گیا ہے۔

امریکی میڈیا کے مطابق طیارے نے مصروف ترین ہائی وے پر شام 3:15 منٹ پر ایمرجنسی لینڈنگ کی، پولیس کا کہنا ہے کہ پائلٹ نے بتایا ہے کہ طیارے کے انجن میں خرابی ہوگئی تھی اور ایئرپورٹ بھی دور تھا اس لئے سڑک پر طیارے کو اتارنا مجبوری تھی۔

ایف ایف اے انویسٹی گیشن کی جانب سے پائلٹ اور خاتون مسافر کا نام ظاہر نہیں کیا گیا ہے تاہم قرب و جوار میں رہائش پذیر لوگوں کا کہنا ہے کہ خوش قسمتی سے کوئی جانی نقصان نہیں ہوا۔

عینی شاہد کے مطابق پائلٹ نے کمال مہارت سے طیارے کو لینڈ کیا اور ٹریفک رواں دواں ہونے کے باوجود کسی گاڑی اور کسی شخص کو کوئی نقصان نہیں پہنچا۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

جولائی 28, 2018
اسرائیل شام تنازع، اسرائیلی فورسز نے شامی طیارہ مار گرایا

تل ابیب: اسرائیل اور شام کے درمیان تنازعے میں مزید شدت آگئی، اسرائیلی فوج نے شامی جنگی طیارے کو مار گرایا۔

تفصیلات کے مطابق شام اور اسرائیل کے درمیان تنازع انتہائی سخت ہوچکا ہے، اسرائیلی فوج نے سرحدی حدود کی خلاف ورزی کرنے پر شامی جنگی طیارے کو مار گرایا ہے۔

غیر ملکی خبر رساں ادارے کے مطابق اسرائیلی فوج کی جانب سے جاری کردہ بیان میں کہا گیا ہے کہ ایک ایسا شامی جنگی طیارہ مار گرایا، جو اسرائیلی فضائی حدود میں داخل ہو گیا تھا، مذکورہ طیارے کو میزائلو سے نشانہ بنایا گیا۔

اسرائیل فوج نے موقف اختیار کیا ہے کہ جنگی طیارہ اسرائیلی فضائی حدود کی طرف بڑھ رہا تھا، جس وقت اس شامی جنگی طیارے کو پیٹریاٹ میزائلوں سے ٹارگٹ کیا گیا، اس وقت وہ اسرائیلی حدود میں دو کلومیٹر اندر تک آ چکا تھا۔

شامی فورسز کا گولان کی پہاڑیوں کے قریب قبضہ، اسرائیل کے لیے بڑا چیلنج

بیان میں مزید کہا گیا ہے کہ گذشتہ روز شامی علاقے سے اسرائیل پر دو راکٹ بھی فائر کیے گئے تھے، جنہیں فضا میں ہی تباہ کر دیا گیا تھا۔

خیال رہے کہ گذشتہ دنوں اسرائیل کے سرحد کے قریب ایک ڈرون دیکھا گیا تھا جسے اسرائیلی فوج نے کارروائی کرتے ہوئے تباہ کردیا تھا، اس سے متعلق کہا جارہا ہے کہ مذکورہ ڈرون شام کی جانب سے بھیجا گیا تھا۔

یاد رہے کہ یہ واضح نہیں کہ اس ڈرون کو کس مشن پر اور کس نے بھیجا تھا، تاہم شامی سرحد کے قریب گولان کی مقبوضہ پہاڑیوں کے علاقے میں اسرائیلی فوج کی طرف سے بجائے گئے خطرے کے سائرن بھی سنائی دیے ہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

جولائی 25, 2018
امریکا: کمپیوٹر ہارڈ ڈسک میں اژدھا لے جانے کی کوشش ناکام

واشنگٹن : امریکی شہر میامی کے بین الااقوامی ہوائی اڈے پر کسٹم حکام نے خفیہ طور پر کمپیوٹر ہارڈ ڈسک میں اژدھا لے جانے والے مسافر کو پرواز سے روک دیا۔

تفصیلات کے مطابق امریکی ریاست فلوریڈا کے شہر میامی کے بین الااقوامی ہوائی اڈے پر امریکی کسٹم حکام نے مسافر کے سامان کی تلاشی لینا شروع کی تو کسٹم اہلکار کو سامان میں مشکوک چیز کی موجودگی کا احساس ہوا، جب مزید تلاشی لی گئی تو سامان میں سے اژدھا برآمد ہوا۔

غیر ملکی خبر رساں ادارے کا کہنا تھا کہ میامی کے بین الااقوامی ہوائی اڈے سے باربا ڈوس جانے والے مسافر کے سامان میں موجود کمپیوٹر ہارڈسک کو چیک کیا گیا تھا تو اندر سے چھوٹا سا اژدھا برآمد ہوا۔

میامی کے ٹرانسپورٹیشن سیکیورٹی اور ایڈمنسٹریشن کے ترجمان کا کہنا تھا کہ مسافر ہارڈ ڈسک اژدھے کو چھپاکر بارباڈوس لے جارہا تھا، حکام نے اژدھے کو امریکا کے محکمہ وائلڈ لائف کے حوالے کردیا تاکہ اسے حفاظت سے رکھا جاسکے۔

غیر ملکی خبر رساں ادارے سے گفتگو کرتے ہوئے ہوائی اڈے کے حکام نے بتایا کہ باربا ڈوس جانے والے مسافر کو سامان میں سے اژدھے کے برآمد ہونے پر جہاز میں سوار ہونے روک دیا اور خطرناک جانور بغیر اطلاع دیئے خفیہ طور پر جہاز میں لے جانے پر جرمانہ بھی عائد کیا گیا۔

غیر ملکی خبر رساں ادارے کا کہنا تھا کہ امریکی کسٹم کے حکام کی جانب سے خفیہ طور پر اژدھے کو جہاز میں لے جانے والے مسافر کا نام صیغہ راز میں رکھا ہوا ہے، حکام کے مطابق مسافر کی جانب سے اژدھا لے جانے کی وجوہات کا تاحال علم نہیں ہوسکا ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

جولائی 12, 2018