لاہور : وزیراعلی پنجاب سردار عثمان بزدار نے کہا کہ آئندہ کابینہ کے اجلاس میں پلاسٹک کے تھیلوں پرپابندی کی منظوری لی جائیگی۔ ماحول کی بہتری کیلئے پورے صوبے میں وسیع پیمانے پر پودے لگائے جائیں گے۔
ان خیالات کا اظہار انہوں نے لاہور میں پلانٹ فار پاکستان مہم کی تقریب سے خطاب کرتے ہوئے کیا۔ تفصیلات کے مطابق اسلام آباد کی طرح پنجاب حکومت نے بھی صوبے میں پلاسٹک کے تھیلوں پر پابندی لگانے کا فیصلہ کرلیا ہے۔
وزیراعلی پنجاب سردار عثمان بزدار نے پلاسٹک کے تھیلوں پر پابندی سے متعلق سمری منظور کرنے کا عندیہ دے دیا۔ تقریب سے خطاب کرتے ہوئے وزیراعلی پنجاب سردار عثمان بزدار نے کہا کہ آئندہ کابینہ کے اجلاس میں پلاسٹک کے تھیلوں پرپابندی کی منظوری لی جائیگی۔
انہوں نے کہا کہ پنجاب میں وسیع پیمانے پر پودے لگائے جائیں گے،پاکستان کی تاریخ میں ایسی شجرکاری کی مثال نہیں ملتی،حکومت پنجاب شجرکاری کیلئے سرگرم ہے،شجرکاری پروجیکٹ کیلئے خطیر رقم مختص کی گئی ہے،جنگلات میں اضافے کا ہدف پورا کریں گے، پاکستان کو سرسبز و شاداب بنائیں گے۔
وزیراعلی پنجاب سردار عثمان احمد خان بزدار نے مزید کہا کہ شجرکاری مہم پاکستان تحریک انصاف کی اولین ترجیح ہے، شجرکاری مہم ایک گیم چینجر ثابت ہو گی، شجرکاری مہم میں طلبا و دیگر شعبہ ہائے زندگی کے افراد کو شامل کیا جا رہا ہے۔
انہوں نے کہا کہ بلین ٹری سونامی کے تحت چھبیس ارب روپے مختص کئے گئے ہیں، اگلے چار سالوں میں بیالیس کروڑ پودے لگائے جائیں گے جو ریکارڈ ہوگا، گرین اور سر سبز پنجاب کیلئے ایسے تاریخی منصوبے کی مثال نہیں ملتی۔
مزید پڑھیں: سندھ حکومت کا پلاسٹک کی تھیلیوں پر پابندی کا اعلان
عثمان بزدار نے کہا کہ پنجاب حکومت پہلی بار سرکاری زمینوں پر قبضے سے واگزار کروا رہی ہے، اس مہم سے ہزاروں ایکٹر واگزار کروا کر سرکاری اداروں کو واپس کیاجارہاہے جسے شجر کاری کیلئے مختص کر د یا گیا ہے۔
