ARYNews.tv | Urdu – Har Lamha Bakhabar

Tag: pm abbasi

  • وزیراعظم شاہد خاقان عباسی سے نیپال کےسابق وزیراعظم کی ملاقات

    وزیراعظم شاہد خاقان عباسی سے نیپال کےسابق وزیراعظم کی ملاقات

    کٹھمنڈو: وزیراعظم شاہد خاقان عباسی سے نیپال کے سابق وزیراعظم پشپا کمال دھال پراچندا نے ملاقات کی اور باہمی دلچسپی کے امور پرتبادلہ خیال کیا۔

    تفصیلات کے مطابق نیپال کے دارالحکومت کھٹمنڈو میں وزیراعظم شاہد خاقان عباسی سے سابق نیپالی وزیراعظم پشپا کمال دھال پراچندا نے ملاقات کی۔

    دونوں رہنماؤں نے ملاقات میں پاکستان اور نیپال کے مابین بہترین دوستانہ تعلقات پراطمینان کا اظہار کیا اور مستقبل میں باہمی تعاون بڑھانے پراتفاق کیا۔

    نیپال کے سابق وزیراعظم نے وزیراعظم شاہد خاقان عباسی کے دورے کے حوالے سے کہا کہ ان کا دورہ دونوں ملکوں کے درمیان تعلقات کی مضبوطی کا باعث بنے گا۔

    دوسری جانب وزیراعظم شاہد خاقان عباسی نے پشپا کمال دھال کو ان کی جماعت کی کامیابی اور جمہوری عمل کا حصہ رہنے پر مبارکباد دی۔

    وزیراعظم شاہد خاقان عباسی کی نیپالی ہم منصب سے ملاقات

    خیال رہے کہ گزشتہ روز وزیراعظم شاہد خاقان عباسی نے اپنے نیپالی ہم منصب کھدگا پرساد شرما سے ملاقات کی تھی ، اس موقع پرسیاسی، معاشی، دفاعی، ثقافتی شعبوں میں دو طرفہ تعاون بڑھانے پراتفاق کیا گیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں

  • وزیراعظم شاہد خاقان عباسی کی نیپالی ہم منصب سے ملاقات

    وزیراعظم شاہد خاقان عباسی کی نیپالی ہم منصب سے ملاقات

    کھٹمنڈو : وزیراعظم شاہد خاقان عباسی نے اپنے نیپالی ہم منصب کھدگا پرساد شرما سے ملاقات کی، اس موقع پرسیاسی، معاشی، دفاعی، ثقافتی شعبوں میں دو طرفہ تعاون بڑھانے پراتفاق کیا گیا۔

    تفصیلات کے مطابق وزیر اعظم پاکستان شاہد خاقان عباسی جو ان دنوں نیپال کے دو روزہ دورے پر ہیں نے نیپال کے نومنتخب وزیر اعظم کھدگا پرساد شرما سے خصوصی ملاقات کی ہے، دونوں رہنماؤں کی ملاقات میں دوطرفہ اہمیت کے تمام امور پر تبادلہ خیال کیا گیا۔

    اس موقع پر دونوں ممالک کے درمیان سیاسی، معاشی، دفاعی اور ثقافتی شعبوں میں تعاون بڑھانے پر اتفاق بھی کیا گیا، شاہد خاقان عباسی نے کھدگا پرساد شرما کو نیپال کا نیا وزیراعظم منتخب ہونے اور جمہوری عمل کی تکمیل پرمبارکباد دی۔

    اس سے قبل وزیر اعظم شاہد خاقان عباسی دو روزہ دورے پر جب نیپال پہنچے تو ہوائی اڈے پر نیپال کے وزیر خارجہ یوباراج خطیوادا نے ان کا پرتپاک استقبال کیا، اپنے دورے کے دوران وزیراعظم خاقان عباسی نیپال کی صدر بدیادیوی بھنڈاری سے بھی ملاقات کرینگے۔

    بعد ازاں وزیر اعظم کے اعزاز میں ایک استقبالیہ تقریب کا بھی اہتمام کیا گیا جس میں انہیں اکیس توپوں کی سلامی اور گارڈ آف آنر بھی پیش کیا گیا۔

    وزیر اعظم کے دورہ نیپال کے حوالے سے ذرائع کا کہنا ہے کہ وزیراعظم کے دورہ نیپال سے تجارت، تعلیم، سیاحت، دفاع اور عوامی روابط سمیت باہمی دلچسپی کے تمام شعبوں میں دونوں ملکوں کے تعلقات کو فروغ ملے گا اور وہ مستحکم ہونگے۔

    دورے کے موقع پر سارک کو ایک اہم علاقائی تنظیم کی حیثیت سے دوبارہ فعال کرنے کے امور پر بھی غور کیا جائے گا۔

    واضح رہے کہ نیپال خطے کا ایک اہم ملک ہے اور پاکستان کے اس کے ساتھ تعلقات دوستی، باہمی احترام اور مشترکہ مفادات سے عبارت ہیں۔ دونوں ملک باہمی اور کثیرجہتی فورمز پر بھی ایک دوسرے کی حمایت کرتے ہیں۔

  • قانون سازی پارلیمنٹ کا حق ہے، کسی اور کا نہیں، خورشید شاہ

    قانون سازی پارلیمنٹ کا حق ہے، کسی اور کا نہیں، خورشید شاہ

    اسلام آباد : قومی اسمبلی میں قائد حز ب اختلاف اور پیپلز پارٹی کے رہنما سید خورشید شاہ نے کہا ہے کہ قانون سازی پارلیمنٹ کا حق ہے جسے کوئی رد نہیں کرسکتا۔

    ان خیالات کا اظہارانہوں نے قومی اسمبلی میں اجلاس سے خطاب کرتے ہوئے کیا، خورشید شاہ ایوان میں خطاب کے دوران وزیر اعظم کے ہمنوا نظر آئے، انہوں نے کون سا ادارہ کیا فیصلے کرے؟ اس پر عدلیہ اور مقننہ کی مثال بھی دی۔

    انہوں نے کہا کہ کسی کو کوئی حق نہیں پہنچتا کہ ایگزیکٹو کا کام عدلیہ کرے عدلیہ کو بھی ایگزیکٹو کا کام کرنے کا حق نہیں، ہمیں حق ہے کہ ہم پاکستان کی بہتری کیلئے قانون سازی کریں۔

    ایک موقع پر انہوں نے وزیراعظم کو مخاطب کرتے ہوئے کہا کہ کسی اور نے نہیں بلکہ ہم نے خود پارلیمنٹ کا تقدس پامال کیا اور اسے کمزورکیا، بہت دیر ہوگئی یہ بحث پہلے ہونی چاہیے تھی۔

    انیسویں اور20ویں ترمیم پارلیمنٹ نے ہی کی تھی، اس وقت خیال رکھا جاتا کہ پارلیمنٹ سپریم ہے تو20ویں ترمیم کی نوبت نہ آتی، پاناما کے معاملے کی بھی پارلیمنٹ نےحل کی کوشش کی، پارلیمنٹ کا کردار پارلیمنٹ کو ہی ادا کرنا چاہیے۔

    اپوزیشن لیڈر کا کہنا تھا کہ ہرادارہ اپنی حدود میں رہ کر کام کرے تو پاکستان اورعوام کے لئےبہتر ہے، جس ملک کے ادارے کمزور ہونگے تو وہ ملک خود کمزورہوجاتا ہے،

    علاوہ ازیں قومی اسمبلی اجلاس کے بعد اسپیکر چیمبرمیں وزیر اعظم اور خورشید شاہ کے درمیان ملاقات ہوئی، ملاقات میں کیا طے ہوا؟ یہ ابھی واضح طور پر نہیں بتایا گیا البتہ خورشید شاہ ایوان میں اپنی کہی ہوئی بات سے ہٹتے نظر آئے۔

    ذرائع کا کہنا ہے کہ وزیر اعظم اور خورشید شاہ میں نگراں وزیر اعظم کے نام پر بھی مشاورت ہوئی ہے تاہم خورشید شاہ کا کہنا ہے کہ اپوزیشن سےنگران وزیراعظم کیلئےمشاورت کروں گا۔

    ذرائع کے مطابق خورشید شاہ نے عدلیہ مخالف کسی قانون سازی کا حصہ بننے سے صاف انکارکرتے ہوئے کہا کہ کسی فرد واحد کیلئے قانون سازی کا حصہ نہیں بنیں گے، بہت وقت گزرچکا ہے ایک فرد کے بچاؤ کیلئے کارروائی کا حصہ نہیں بنیں گے۔

  • وفاقی حکومت مرحومہ عاصمہ جہانگیر کواعزاز سے نوازے، وزیراعلیٰ سندھ کاوزیراعظم کوخط

    وفاقی حکومت مرحومہ عاصمہ جہانگیر کواعزاز سے نوازے، وزیراعلیٰ سندھ کاوزیراعظم کوخط

    کراچی: وزیراعلیٰ سندھ مرادعلی شاہ کا کہنا ہے کہ وفاقی حکومت مرحومہ عاصمہ جہانگیرکو اعزاز سے نوازے اور سوگ میں سندھ حکومت کو قومی پرچم سرنگوں کرنے کی اجازت دی جائے۔

    تفصیلات کے مطابق وزیراعلیٰ سندھ مرادعلی شاہ نے وزیراعظم شاہدخاقان کو خط لکھا ، جس میں کہا گیا ہے کہ وفاقی حکومت مرحومہ عاصمہ جہانگیر کو اعزاز سے نوازے۔

    خط کے متن میں کہا گیا ہے کہ عاصمہ جہانگیرکے انتقال پر سندھ حکومت نےآج ایک روزہ سوگ کااعلان کیا ہے ، تدفین کے روز سوگ میں سندھ حکومت کو قومی پرچم سرنگوں کرنے کی اجازت دی جائے۔

    اس سے قبل عاصمہ جہانگیر کے انتقال پر سندھ حکومت نے ایک روزہ سوگ کا اعلان کیا تھا اور وزیراعلیٰ کی ہدایت پر محکمہ سروسزاینڈجنرل ایڈمنسٹریشن نے نوٹیفکیشن جاری کیا تھا۔

    وزیراعلیٰ سندھ کا کہنا تھا کہ کل سندھ میں سر کاری سطح پرسوگ منایا جائے گا، عاصمہ جہانگیر ہم سب کے حقوق کیلئےلڑتی تھیں، وزیراعلیٰ ہاؤس اور سندھ سیکریٹریٹ میں عاصمہ جہانگیر کیلئے دعاکی جائیگی۔

    مزید پڑھیں : معروف وکیل ‘ سماجی رہنما عاصمہ جہانگیر انتقال کرگئیں

    یاد رہے گذشتہ روز معروف وکیل اور سماجی کارکن عاصمہ جہانگیر 66 برس کی عمر میں انتقال کرگئیں تھیں، ان کی ساری زندگی جمہوریت کے فروغ اور اعلیٰ انسانی اقدار کے تحفظ کی جدوجہد کرتے گزری۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔

  • نقیب اللہ کا قتل،پختون جرگہ کا 10رکنی وفد آج وزیراعظم سے ملاقات کرے گا

    نقیب اللہ کا قتل،پختون جرگہ کا 10رکنی وفد آج وزیراعظم سے ملاقات کرے گا

    اسلام آباد : اسلام آباد پریس کلب کے باہر نقیب اللہ محسود کے قتل کے خلاف احتجاجی دھرنا چھٹے روز بھی جاری ہے ، آل پختون جرگے کا دس رکنی وفد آج وزیر اعظم سے ملاقات کرے گا، عمائدین کا کہنا ہے مذاکرات کامیاب نہیں ہوئے تو چاروں صوبوں میں دھرنا دینگے۔

    تفصیلات کے مطابق نقیب اللہ محسود کے قاتل اب تک آزاد ہیں ، اہل خانہ اور عمائدین سراپا احتجاج ہیں ، نقیب اللہ محسود کے قتل کے خلاف اسلام آباد میں احتجاجی دھرنا چھٹے روز بھی جاری ہے۔

    پختون جرگہ کا دس رکنی وفد آج وزیراعظم شاہد خاقان عباسی سے ملاقات کرے گا۔

    ذرائع کے مطابق وزیراعظم شاہد خاقان عباسی خود معاملات آگے بڑھائیں گے، پختون جرگہ نے پانچ بنیادی مطالبات پیش کئے ہیں، جن میں نقیب اللہ محسود کی ماورائے عدالت قتل میں ملوث راؤ انوار کو ساتھیوں سمیت پھانسی کی سزاء کا مطالبہ سر فہرست ہے۔

    گزشتہ روز جرگے کے ساتھ ملاقات کے بعد امیر مقام اور طارق فضل چوہدری نے وزیراعظم کو آگاہ کیا۔

    قبائلی عمائدین کا کہنا ہے کہ چھ فروری تک مطالبات تسلیم نہ کیے گئے تو پارلیمنٹ کے سامنےاحتجاج کیا جائے گا اور مطالبہ کیا کہمعاملے کی تحقیقات کیلئےجوڈیشل کمیشن بنایا جائے اور کیس روزانہ کی بنیاد پر چلایا جائے۔

    تحریک انصاف کےچیئرمین عمران خان اورجماعت اسلامی کے امیرسراج الحق بھی اظہار یکجہتی کیلئے دھرنےمیں پہنچے اور شرکاء سے خطاب کیا اور دھرنےوالوں کو بھرپور ساتھ دینے کی یقین دہانی کرائی۔

    مزید پڑھیں : نقیب اللہ قتل کیس، راؤانوار کی گرفتاری کے لیے مزید 10 دن کی مہلت

    دوسری جانب سپریم کورٹ کی جانب سے راؤ انوار کی گرفتاری کےلیے دس دن کی نئی مہلت کوبھی چار دن گزرگئے لیکن سابق پولیس افسر کا دور دور تک پتہ نہیں۔

    واضح رہے 13 جنوری کو ایس ایس پی ملیر راؤ انوار کی سربراہی میں خطرناک ملزمان کی گرفتاری کے لیے شاہ لطیف ٹاؤن میں چھاپے کے لیے جانے والی پولیس پارٹی پر دہشت گردوں نے فائرنگ کردی تھی جس پر پولیس نے جوابی فائرنگ کرتے ہوئے 4 دہشت گردوں کو موت کے گھاٹ اتار دیا تھا، ہلاک ہونے والوں میں نوجوان نقیب اللہ بھی شامل تھا۔

    نقیب اللہ کی ہلاکت اور انصاف کے لیے لگایا جانے والا محسود قبیلے کا جرگہ پولیس کے خلاف شکایتی مرکز بن گیا تھا جہاں دیگر لاپتہ افراد  کے اہل خانہ بھی شکایات لے کر پہنچے تھے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔

     

  • اہل پاکستان اور اہل کشمیر کے دل ایک ساتھ دھڑکتے ہیں،وزیراعظم

    اہل پاکستان اور اہل کشمیر کے دل ایک ساتھ دھڑکتے ہیں،وزیراعظم

    مظفر آباد : وزیراعظم شاہدخاقان عباسی کا کہنا ہے کہ پاکستان مقبوضہ کشمیر سے متعلق اپنے مؤقف سے پیچھے نہیں ہٹے گا، 70 سال سےآزادی کی جنگ لڑنےوالوں کادرد سمجھتے ہیں ، اہل پاکستان اور اہل کشمیر کے دل ایک ساتھ دھڑکتے ہیں، پاکستان کےتمام لیڈر کشمیر کے معاملے پر متفق ہیں اور رہیں گے۔

    تفصیلات کے مطابق وزیراعظم شاہد خاقان عباسی نے آزاد کشمیر قانون ساز اسمبلی اور کشمیر کونسل کے مشترکہ اجلاس سے خطاب کرتے ہوئے کہا کہ کشمیری قوم نے آزادی کیلئے بڑی قربانیاں دی ہیں، ملک میں بہت اختلافات ہیں لیکن کشمیرکازپرسب متفق ہیں، پاکستان مقبوضہ کشمیرسےمتعلق اپنےمؤقف سے پیچھےنہیں ہٹےگا، پاکستان کشمیریوں کی سیاسی،سفارتی اوراخلاقی حمایت جاری رکھے گا۔

    شاہد خاقان عباسی کا کہنا تھا کہ کشمیرکے معاملے پر تمام جماعتیں اور قوم متحد ہے، کشمیری ہمارے بھائی ہیں، دل ان کیلئے دھڑکتے ہیں، پاکستان کےتمام لیڈر کشمیر کے معاملے پر متفق ہیں اوررہیں گے، کشمیری اکیلے نہیں پاکستان کی20کروڑ عوام آپ کے ساتھ ہے۔

    وزیراعظم نے کہا کہ ایل اوسی پر پاکستانی شہری اور پاک فوج قربانیاں دے رہی ہے، مقبوضہ کشمیر میں بھی ہمارے بھائی قربانیاں دے رہے ہیں، ہم متحد رہے تو کشمیری بھائیوں کی جدوجہد کو تقویت ملے گی،کشمیرمیں مسلمان بھارتی مظالم برداشت کر رہے ہیں۔

    انکا کہنا تھا کہ 70سال سے آزادی کی جنگ لڑنے والوں کا درد سمجھتے ہیں ، سی پیک آزاد کشمیر کی عوام کےلئےسنگ میل ثابت ہوگا، ایل اوسی پر بنکرز کی تعمیر کے لئے حکومت فنڈز مہیا کرے گی، جہاں ساری دنیا فیل ہوئی پاکستانی فوج نےفتح حاصل کی۔

    مزید پڑھیں :  کشمیر کی ہرصورت حمایت جاری رکھیں گے: وزیراعظم

    شاہد خاقان عباسی نے کہا کہ آزاد کشمیرانتخابات میں وفاقی حکومت نےکوئی مداخلت نہیں کی، نوازشریف نے کہا جو کشمیری عوام کا فیصلہ ہوگا قبول کرینگے، آزاد کشمیر کی ترقی کے لئے جو وسائل چاہئے وہ فراہم کرینگے، مسئلہ کشمیر کےپرامن حل کیلئےکل بھی کوشاں تھے آج بھی ہیں۔

    وزیراعظم کا کہنا تھا کہ آزادکشمیر کےعوام کوبہترگورننس دینا حکومت کی ذمےداری ہے، مسئلہ کشمیرکو عالمی سطح پر اجاگر کرتے رہنا بھی ہماری ذمے داری ہے، اہل پاکستان اور اہل کشمیر کے دل ایک ساتھ دھڑکتے ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔

  • وزیراعظم شاہد خاقان عباسی کا دورہ چترال موسم کی خرابی کے باعث ملتوی

    وزیراعظم شاہد خاقان عباسی کا دورہ چترال موسم کی خرابی کے باعث ملتوی

    اسلام آباد : وزیراعظم شاہد خاقان عباسی کا ہفتہ کو چترال کا دورہ موسم کی خرابی کے باعث ملتوی کردیا گیا، وزیراعظم کو گولن گول ہائیڈرو پاورپراجیکٹ کے پہلے مرحلے کا افتتاح کرنا تھا۔

    تفصیلات کے مطابق وزیراعظم کادورہ چترال موسم کی خرابی کے باعث ملتوی کردیا گیا ، وزیراعظم کا ہیلی کاپٹرچترال لینڈ نہ کرسکا، جس کے بعد واپس اسلام آباد پہنچ گئے۔

    وزیراعظم شاہد خاقان عباسی کا گولن منصوبے کا افتتاح کرنا تھا ، منصوبے کا پہلایونٹ آپریشنل ہوگیا دوسرا مارچ اور تیسرا مئی میں فعال ہوگا، پہلے یونٹ سے حاصل بجلی چترال اور ملحقہ علاقوں کو فراہم کی جائے گی۔

    منصوبے کی تکمیل سے قومی خزانےکو3ارب 70کروڑ روپے سالانہ فائدہ ہوگا۔

    منصوبےکےتحت 36میگاواٹ کے تین یونٹس سے108میگاواٹ بجلی حاصل ہوگی، منصوبے سے108 میگاواٹ بجلی اگست تک قومی نظام میں شامل ہوجائے گی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پرشیئر کریں۔

  • سی پیک موجودہ اورآنے والی نسلوں کیلئے چینی صدر کا تحفہ ہیں، وزیراعظم

    سی پیک موجودہ اورآنے والی نسلوں کیلئے چینی صدر کا تحفہ ہیں، وزیراعظم

    گوادر : وزیراعظم شاہدخاقان نے گوادرمیں پہلی بین الاقوامی ایکسپوکا افتتاح کردیا ، شاہد خاقان کا کہنا ہے کہ سی پیک پاکستان اورچین کی لازوال دوستی کاثبوت ہے، منصوبے موجودہ اور آنے والی نسلوں کیلئے چینی صدر کا تحفہ ہیں۔

    تفصیلات کے مطابق وزیراعظم شاہدخاقان نے گوادرمیں پہلی بین الاقوامی ایکسپوکا افتتاح کردیا، نمائش میں غیرملکی شخصیات،سفیر،غیرملکی تاجرنمائندے شریک ہیں۔

    نمائش کےموقع پرگوادرفری زون کے پہلے حصے کا افتتاح بھی کیا جائیگا، گوادر فری زون کا پہلا حصہ سی پیک کے گیٹ وے پر قائم کیا گیا ہے۔

    وزیراعظم شاہدخاقان نے پہلے بین الاقوامی گوادرایکسپو کی افتتاحی تقریب سے خطاب کرتے ہوئے کہا کہ آج چینی صدراورنوازشریف کے وژن کوعملی جامہ پہنانے کا دن ہے، سی پیک پاکستان اورچین کی لازوال دوستی کاثبوت ہے، سی پیک خطے کیلئےگیم چینجراورترقی کی جانب اہم قدم ہے۔

    شاہدخاقان کا کہنا تھا کہ اقتصادی راہداری منصوبہ آج حقیقت بن رہاہے، منصوبےموجودہ اورآنےوالی نسلوں کیلئےچینی صدرکاتحفہ ہیں، مواصلات کومستقبل کی ضرورت سےہم آہنگ کیا جارہا ہے، سی پیک سےصرف پاکستان یا چین کو نہیں پورے خطے کوفائدہ ہوگا۔

    انھوں نے کہا کہ سی پیک میں خطے کے دیگرممالک بھی اپنا حصہ ڈال سکتےہیں، گوادر ایکسپو حکومت کا زبردست اقدام ہے، پاکستان ریلویز کو بھی جدید تقاضوں سے ہم آہنگ کیا جارہا ہے، گوادرسے پشاور اور پھر چینی شہروں تک سڑکوں کا جال بچھایا جارہا ہے۔

    وزیراعظم کا کہنا تھا کہ بلوچستان کا مستقبل صوبائی لیڈرشپ کے ہاتھ میں ہے،وفاق تعاون کریگا، توانائی اوردیگرمنصوبےملک میں لوگوں کو روزگارفراہم کریں گے، گوادرپورٹ، فری زون، ایسٹ وے دیگرمنصوبے آج حقیقت ہیں، سی پیک اوردیگرمنصوبے خطےمیں بھی خوشحالی کاسبب بنیں گے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • نوازشریف، مریم نواز، شاہد خاقان کےخلاف توہین عدالت کی درخواست، وفاقی حکومت اور پیمرا سے جواب طلب

    نوازشریف، مریم نواز، شاہد خاقان کےخلاف توہین عدالت کی درخواست، وفاقی حکومت اور پیمرا سے جواب طلب

    لاہور : لاہور ہائیکورٹ نے سابق وزیر اعظم میاں نواز شریف، وزیراعظم شاہد خاقان عباسی اور مریم نواز کے عدلیہ مخالف بیانات کے خلاف دائر درخواست پر وفاقی حکومت اور پیمرا کو نوٹس جاری کرتے ہوئے 14 فروری تک جواب طلب کرلیا۔

    تفصیلات کے مطابق  لاہور ہائیکورٹ کے جسٹس شاہد کریم نے کیس کی سماعت کی، درخواست گزار آمنہ ملک نے موقف اختیار کیا کہ سابق وزیر اعظم میاں نواز شریف، وزیراعظم شاہد خاقان عباسی اور مریم نواز نے پانامہ کیس کے فیصلے کے بعد عدلیہ مخالف بیان بازی کر رہے ہیں جو توہین عدالت ہے۔

    انہوں نے کہا کہ اسپیکر قومی و صوبائی اسمبلی ن لیگ سے تعلق رکھتے ہیں اسی لئے عدلیہ مخالف بیان بازی پر ان کے خلاف لئے کارروائی نہیں کررہے، ن لیگی رہنماوں کے بیانات سے ملک میں انتشار پھیل رہا ہے اور عدلیہ کی ساکھ متاثر ہو رہی ہے۔

    انہوں نے کہا کہ عدالت نے پیمرا کو عدلیہ مخالف تقاریر کو میڈیا پر نشر کرنے سے روکنے کا حکم دیا مگر اس پر عمل نہیں ہو رہا، لہذا عدالت وزیراعظم شاہد خاقان عباسی , میاں نواز شریف اور مریم نواز کے خلاف کارروائی کرے اور عدلیہ مخالف بیانات نشر کرنے پر پابندی عائد کرے۔

    عدالت نے وفاقی حکومت اور پیمراء کو نوٹس جاری کرتے ہوئے پندرہ فروری کو جواب طلب کرلیا۔

    گذشتہ روز دائر درخواست میں مؤقف اختیار کیا گیا تھا کہ نواز شریف اورمریم نوازنے ہری پورجلسےمیں عدلیہ مخالف تقاریر کیں، نواز شریف،مریم نواز،شاہد خاقان مسلسل عدلیہ مخالف تقاریرکررہےہیں۔

    مزید پڑھیں :  نوازشریف، مریم نواز اور شاہدخاقان کے خلاف توہین عدالت کی درخواست دائر

    درخواست گزار کا کہنا ہے کہ پیمراعدلیہ مخالف تقاریرروکنے کے اقدامات نہیں کر رہا۔

    دائر درخواست میں استدعا کی گئی ہے کہ عدالت پیمرا کوعدلیہ مخالف تقاریر نشر کرنے سےروکے اور شاہدخاقان عباسی، نوازشریف، مریم نواز کے خلاف کارروائی کا حکم دے۔

    یاد رہے کہ ہری پور جلسے میں سابق وزیراعظم نوازشریف نے عدلیہ پرتنقید کرتے ہوئے کہا ہے کہ چند افراد نے مجھےاقامے پر گھربھیج دیا، ان ججزکوسلام پیش کرتا ہوں، جنہوں نےعمران کوصادق اورامین قراردیا۔

    مزید پڑھیں : چند افراد نے مجھےاقامے پر گھربھیج دیا، نواز شریف

    مریم نواز نے عدلیہ پر تنقید کرتے ہوئے کہنا تھا کہ منتخب کردہ وزیراعظم کو5ججزنےاقامہ پرگھربھیجا، سازشوں کےباوجود ہرانتخابات میں عوام نے نوازشریف کو منتخب کیا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • وزیراعظم کی نوازشریف سےجاتی امرا میں ملاقات

    وزیراعظم کی نوازشریف سےجاتی امرا میں ملاقات

    لاہور: وزیراعظم شاہد خاقان عباسی نے مسلم لیگ ن کے صدر میاں نوازشریف سے جاتی امرا میں ملاقات کی جس میں ملکی سیاسی صورت حال پرتبادلہ خیال کیا گیا۔

    تفصیلات کے مطابق وزیراعظم شاہد خاقان عباسی نے نا اہل وزیراعظم نوازشریف سے جاتی امرا میں ملاقات کی جس میں ملکی سیاسی صورت حال سمیت مسلم لیگ ن کی آئندہ کی سیاسی حکمت عملی پرغورکیا گیا۔

    اس موقع پر وزیراعلیٰ پنجاب، وزیرریلوے خواجہ سعد رفیق، پرویزرشید، وزیرمملکت برائے اطلاعات ونشریات مریم اورنگزیب، مریم نواز، وفاقی وزیربرائے توانائی اویس لغاری، مشیرخزانہ مفتاع اسماعیل بھی موجود ہیں۔

    اجلاس میں وزیراعظم کے پرنسپل سیکرٹری فواد حسن فواد سمیت چیف سیکرٹری پنجاب، پنجاب انرجی کمیشن سیکرٹری بھی موجود ہیں۔

    ملاقات میں ملکی سیاسی صورت حال، ترقیاتی منصوبوں اور اپوزیشن جماعتوں کے گزشتہ روز ہونے والے جلسے پر تبادلہ خیال کیا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔