اسلام آباد : وزیرِاعظم نے انسدادِ دہشت گردی کی حکمت عملی پر اتفاق رائے کیلئے کل آل پارٹیز کانفرنس طلب کرلی ہے، نوازشریف نے قومی سلامتی سے متعلق اجلاس میں دہشت گردی کے خلاف ممکنہ اقدامات کا بھی جائزہ لیا۔
دہشتگردوں کو کس طرح کیفر کردار تک پہنچایا جائے؟ وزیرِاعظم نے قانونی ماہرین کی ٹیم کے ساتھ بیٹھک کی، اسلام آباد میں قومی سلامتی سے متعلق امور کا جائزہ لینے کیلئے وزیرِاعظم نے دن بھر کی مصروفیات ترک کردیں۔
قومی سلامتی سے متعلق اجلاس کے پہلے دور میں انسدادِ ہشتگردی کے ممکنہ اقدامات کا تکنیکی جائزہ لینے کے ساتھ فوری اقدامات پر بھی غور کیا گیا۔
وزیراعظم نےکل آل پارٹیز کانفرنس بھی طلب کرلی ہے تاکہ دہشت گردی کیخلاف حکمت عملی پر اتفاق رائے پیدا کیا جاسکے، اے پی سی میں تمام پارلیمانی جماعتوں کے رہنماؤں کو شرکت کی دعوت دی گئی ہے۔
وزیرِاعظم نے اجلاس سے خطاب میں کہا کہ دہشت گردی اور اس کی بنیادی وجوہات کا خاتمہ کیا جائے گا، سانحہ پشاور، کوئٹہ، واہگہ کو کبھی نہیں بھلائیں گے اور ملوث دہشتگردوں کسی صورت معاف نہیں کیا جائے گا۔
وزیراعظم نے کہا کہ مذہب اور نسل سے بالاتر ہو کر ہر شہری کا تحفظ یقینی بنایا جائے گا۔
