کراچی : وزیرِاعظم نوازشریف نے کراچی میں کینپ کے ایٹمی تواناِئی کے منصوبے کے ٹو کا افتتاح کردیا، وزیرِاعظم گورنر ہاؤس میں امن وامان کے سلسلے میں اعلیٰ سطح کے اجلاس کی صدارت بھی کریں گے۔
تفصیلات کے مطابق کراچی میں جوہری توانائی منصوبہ کےٹو کی افتتاحی تقریب سےخطاب میں وزیر اعظم کا کہنا تھا کہ کے ٹو منصوبے سے پاک چائنا دوستی مزید پروان چڑھے گی، یہ منصوبہ پاکستان اور چین کے تعلقات کا منہ بولتا ثبوت ہے۔
وزیراعظم نواز شریف کا کہنا تھا کہ کینپ گزشتہ 45 سال سے بجلی کی فراہمی کے عمل کو جاری رکھے ہوئے ہے جو کہ ایک خوش آئند بات ہے۔
انھوں نے کہا کہ ملک سے لوڈ شیڈنگ اوردہشتگردی کا خاتمہ انکی حکومت کی اولین ترجیح ہے، انہوں نے کہا کہ نیشنل ایکشن پلان پرمؤثر طریقے سے عمل درآمد جاری ہے، جس سے دہشتگردوں کے حوصلے پست ہوئےہیں۔
وزیراعظم نے کہا کہ حکومتی اقدامات سے سرمایہ کاروں کا اعتماد بحال ہورہا ہے، حکومتی اقدامات کے باعث بین الاقوامی اداروں میں پاکستان کے حوالے سے بہتر تاثر قائم ہوا ہے اور ہم اسے مزید بہتر بنانے کی کوشش کر رہے ہیں تا کہ ملک میں مزید سرمایہ کاری لائی جا سکے۔
وزیراعظم کا کہنا تھا کہ نیشنل ایکشن پلان پر سرگرم عمل وزیر داخلہ پنجاب شجاع خانزادہ کی شہادت سے ان کا مشن رکنے والا نہیں جب کہ کراچی میں ممبر قومی اسمبلی رشید گوڈیل پر بھی قاتلانہ حملہ کیا گیا لیکن اس قسم کی بزدلانہ کارروائیوں سے ہمارےعزائم میں کمی نہیں آئے گی اور دہشت گردوں کے خلاف آپریشن جاری رہے گا۔
یاد رہے کہ کراچی کے ساحل پر ایٹمی بجلی گھر کینپ 1972 میں قائم کیا گیا تھا، اس کی پیداواری صلاحیت 150 میگاواٹ اور مدت 2002 تک تھی مگر بعد ازاں اس کو اپ گریڈ کرکے دوبارہ فعال کر دیا گیا، جبکہ رواں برس کینپ ٹو اور کینپ تھری بنانے کی منصوبہ بندی کی گئی، یہ دونوں بجلی گھر 1100 ، 1100 میگاواٹ بجلی پیدا کر سکیں گے، جبکہ پلانٹس کی تکمیل 2019 اور 2020 تک ہو سکے گی۔
وزیرِاعظم نواز شریف ایک روزہ دورے پر آج کراچی پہنچ گئے ہیں، وزیراعظم نواز شریف وفاقی وزیر دفاع خواجہ آصف اور وفاقی وزیر داخلہ چوہدری نثار کے ہمراہ ایک روزہ دورے پر کراچی پہنچے تو وزیراعلیٰ سید قائم علی شاہ اور گورنر ڈاکٹر عشرت العباد سمیت اہم شخصیات نے ایئرپورٹ پر ان کا استقبال کیا۔
وزیراعظم نواز شریف کینیپ کے ایٹمی بجلی کے ٹو کا افتتاح کریں گے ایٹمی بجلی گھر کے افتتاح کے بعد وزیراعظم نواز شریف گورنر ہاؤس جائیں گے، جہاں وہ امن و امان کی صورت حال اور کراچی آپریشن کے حوالے سے بریفنگ لیں گے۔
اس کے علاوہ وزیراعظم نیشنل ایکشن پلان پر عملدرآمد کا بھی جائزہ لیں گے۔
