اسلام آباد: آئندہ دو روز میں وزیرِاعظم نوازشریف سے سیاسی جرگے کی ملاقات متوقع ہے، ملاقات میں ملک میں جاری سیاسی بحران کے حل کے لیے تجاویز پیش کی جائیں گی۔
ملک میں جاری سیاسی بحران کے حل کے لئے سیاسی جرگے نے سرگرمیاں تیز کر دی ہیں، آئندہ دو روز میں وزیرِاعظم سے سیاسی جرگے کی ملاقات متوقع ہے، اس ملاقات میں سیاسی تعطل کے حل کے لئے مختلف تجاویز پیش کی جائیں گی۔
اسی تناظر میں پیپلز پارٹی کے شریک چئیرمین آصف علی زرداری نے اپنے وفد کے ہمراہ منصورہ میں جماعتِ اسلامی کے امیر سراج الحق سے ملاقات کی، دونوں رہنماؤں نے ملک میں جاری بحران کو مذاکرات سے حل کرنے پر زور دیا ہے، سیاسی جرگے میں سراج الحق ، رحمان ملک او ر دیگر شامل ہیں۔
