کراچی :وزیرِاعظم میاں نواز شریف آج کراچی پہنچ رہے ہیں، جہاں وہ تجارتی نمائش ایکسپو پاکستان دو ہزار پندرہ کا افتتاح کرینگے۔
نویں چار روزہ بین الاقوامی تجارتی نمائش ایکسپو پاکستان دو ہزار پندرہ آج سے کراچی ایکسپو سینٹر میں شروع ہورہی ہے ۔ نمائش کا افتتاح وزیرِاعظم محمد نواز شریف کریں گے ۔
نمائش یکم مارچ تک جاری رہے گی۔
نمائش میں بھارت، امریکا، سعودی عرب، برطانیہ اور چین سمیت ستر سے زائد ممالک شرکت کر رہے ہیں، ان ممالک کی کمپنیاں پانچ سو سے زائد اسٹالز پر اپنی مصنوعات پیش کریں گی۔
اسلام آباد :وزیرِاعظم نوازشریف سے سینیٹ انتخابات کے طریقہ کار میں تبدیلی اور سیاسی رابطوں کیلئے قائم کابینہ کمیٹی نے ملاقات کی، وزیرِاعظم نے کمیٹی کو سیاسی جماعتوں سے رابطے تیز کرنے کی ہدایت کردی۔
کابینہ کمیٹیاں سینٹ الیکشن میں ہارس ٹریڈنگ روکنے اور آئین میں ترمیم کے لئے سیاسی جماعتوں سے رابطوں کے لئے تشکیل دی گئی تھیں۔
وزیرِاعظم سے سیاسی رابطوں کے لئے کابینہ کمیٹی نے ملاقات کی، رابطوں سے متعلق رپورٹ وزیرِاعظم کو پیش کی۔ ملاقات کے دوران وزیرِاعظم نے کمیٹی کو سیاسی جماعتوں کے ساتھ رابطوں کا سلسلہ تیز کرنے کی ہدایت کی۔
وزیرِاعظم نواز شریف کا کہنا تھا کہ سینیٹ انتخابات سے قبل ہارس ٹریڈنگ روکنےکے لئے مؤثر اقدامات کئے جائیں اور آئین میں ترمیم کی جائے۔
ملاقات میں فیصلہ کیا گیا کہ سیاسی جماعتوں کی قیادت سے وزیرِاعظم خود رابطہ کریں گے، ملاقات کے دوران کابینہ کمیٹی نے وزیرِاعظم کو سینیٹ انتخابات کے حوالے سے کیے گئے اقدامات سے آگاہ کیا۔
وزیراعظم نے ہدایت کی کہ سینیٹ انتخابات کے طریقہ کار سے متعلق امور پر سیاسی جماعتوں کو اعتماد میں لیا جائے۔
وزیرِاعظم سے مہتاب عباسی ، احسن اقبال ، سعد رفیق ، انوشے رحمان ، خواجہ ظہیر ، اسحاق ڈار، جام کمال ، بیرسٹر ظفر اللہ نے ملاقات کی
اسلام آباد: وزیراعظم میاں محمد نواز شریف نے سابق جسٹس رانا بھگوان داس انتقال پر گہرے دکھ اورافسوس کا اظہارکیا ہے۔
رانا بھگوان داس کی اہلیہ کے نام لکھے گئے خط میں وزیراعظم کا کہنا تھا رانا بھگوان داس محب وطن انسان، دیانتدار اور اعلیٰ کردار خصوصیات کے حامل تھے۔
رانا بھگوان داس میں جذبہ حب الوطنی اور قوم سے محبت کا جذبہ کوٹ کوٹ کے بھرا ہوا تھا میری دعا ہے کہ رانا بھگوان داس کی روح کوابدی زندگی میں دائمی سکون حاصل ہو۔
اپنے خط میں وزیراعظم نے کہا کہ رانا بھگوان داس بہترین انسانی خوبیوں سے مالا مال با وقار شخصیت تھے۔ وزیراعظم نے کہا کہ وہ بے داغ کردار بے عیب راستبازی اور بلند پایہ منصب کی ذمے داریوں سے بخوبی اگاہ تھے۔
اسلام آباد: وزیرِاعظم نواز شریف کی زیر صدارت وفاقی کابینہ کا اجلاس ہوا، وفاقی کابینہ کو قومی ایکشن پلان پرعملدر آمد اور معاشی صورت حال پر بریف کیا گیا۔
وزیرِاعظم نوازشریف کی زیرِصدارت وفاقی کابینہ کے اجلاس میں سینیٹ انتخابات میں ہارس ٹریڈنگ پر تشویش کا اظہار کیا گیا، اجلاس میں فیصلہ کیا گیا کہ سینیٹ انتخابات کا طریقہ کار تبدیل کرتے ہوئے الیکشن خفیہ بیلٹ کے بجائے شو آف ہینڈ کے ذریعے کرانے کے لیے سیاسی جماعتوں کو قائل کیا جائے گا۔
اجلاس میں آئین میں ترمیم کےلیے خصوصی کمیٹی تشکیل دے دی گئی ہے، جو سیاسی جماعتوں سے رابطے کرے گی، کمیٹی میں اٹارنی جنرل سلمان بٹ ، خواجہ ظہیر اور انوشہ رحمان شامل ہیں، کمیٹی آج سے رابطوں کا آغاز کرے گی۔
کابینہ کے اجلاس سے وزیراعظم نوازشریف کا کہنا تھا کہ ہارس ٹریڈنگ کی خبروں سے پارلیمنٹ کا استحقاق مجروح ہورہا ہے، سینیٹ انتخابات کیلئے قوانین میں تبدیلی پراعتراض نہیں ہوگا۔
وزیرِاعظم نے ہدایت کی کہ قوانین میں ترامیم کیلئے سیاسی جماعتوں سے رابطے کئے جائیں۔
کراچی : طیارہ جدہ سے خالی کیوں آیا، وزیرِاعظم نواز شریف نے اے آر وائی نیوزکی خبر کا نوٹس لیتے ہوئے واقعے کی تحقیقات کا حکم دے دیا ہے۔
قومی ایئرلائن کے مارکیٹنگ ڈیپارٹمنٹ کا ایک اور کارنامہ سامنے آگیا، ذرائع کے مطابق جدہ سے کراچی آنیوالی خصوصی پرواز پی کے7313 کے ایئر بس 310کے ذریعے دو مسافروں کو لیکر کراچی پہنچایا گیا، جہاز میں دو سو سے زائد مسافروں کے بیٹھنے کی گنجائش ہوتی ہے۔
ذرائع کے مطابق اضافی پرواز مسافروں کی مطلوبہ تعداد مکمل ہونے پر ہی آپریٹ کی جاتی ہے، دو مسافروں کو لیکر آنے سے ایئر لائن کو کروڑوں روپے کا نقصان اٹھانا پڑا۔
ڈائریکٹر مارکیٹنگ کی ناقص حکمت عملی کی وجہ سے عمرہ آپریشن میں پی آئی اے کو پہلے ہی نقصان ہوا تھا۔
قومی ایئرلائن کے افسران کی ناقص حکمت عملی کی وجہ سے ایئرلائن کو تین سو ارب روپے سے زائد خسارے کا سامنا ہے۔
اس خبر کے اے آروائی پر چلنے کے بعد وزیرِاعظم نواز شریف نے نوٹس لے کر شجاعت عظیم کو تحقیقات کا حکم دیدیا ہے، ذرائع کے مطابق وزیرِاعظم خالی پرواز سے ہونے والاخسارہ ذمے دار افسران کی تنخواہوں سے پورا کرنے کی بھی ہدایت کی ہے۔
کراچی: اپیکس کمیٹی کی ذیلی عمل درآمد کمیٹی نے سندھ سے27لاکھ افغان مہاجررواں برس واپس بھیجنے کا اعلان کردیا ،صوبے میں اب کوئی مدرسہ، مسجد، عبادت گاہ اجازت کے تعمیر نہیں ہوسکے گی۔
کراچی میں اپیکس کمیٹی کی ذیلی عمل درآمد کمیٹی کے اجلاس میں غیر قانونی طورپرمقیم افغان باشندوں کی واپسی کے لیے آخری ڈیڈلائن رواں سال دسمبر دیدی گئی۔ محکمہ داخلہ سندھ میں ہونے والے اجلاس میں محکمہ داخلہ، پولیس ، رینجرز، افغان رفیوجیز ، کمشنراور دیگر قانون نافذ کرنے والے اداروں کے افسران نے شرکت کی۔
اجلاس کو بتایا گیا کہ سندھ سے 64 مقدمات ملٹری کورٹس میں چلانے کیلئے وفاقی وزارت داخلہ بھیجوادیے گئے ہیں، جبکہ مزید بیس مقدمات جائزے کیلئے وفاقی وزارت داخلہ کو ارسال کیے گئے ہیں۔ اجلاس کو بریفنگ دیتے ہوئے بتایا گیا کہ اس وقت تقریباً 27لاکھ افغانی موجود ہیں ،ان میں 67ہزار کی رجسٹریشن ہوچکی ہے جبکہ 85ہزار کیمپوں میں مقیم ہیں ۔اجلاس میں بتایا گیا کہ تقریباً 25ہزار افغانیوں نے غیر قانونی طور پر قومی شناختی کارڈز حاصل کررکھے ہیں ، اس سلسلے میں بہت جلد ان کے کارڈز منسوخ کردیئے جائیں گے۔
اجلاس میں بتایا گیا کہ صوبے میں اس وقت تقریباً ایک ہزار مدارس رجسٹرڈ ہیں ،جہاں پر تقریباً 2848غیر ملکی طلباء تعلیم حاصل کررہے ہیں ۔واضح رہے کہ صوبے میں ایکشن پلان سیل محکمہ داخلہ میں قائم کردیا گیا ہے ،سیل صوبے میں قومی ایکشن پلان پر عملدرآمد کی نگرانی کرے گا۔
صوبائی اپیکس کمیٹی کی سب کمیٹی کے اجلاس کے بعد سیکریٹری داخلہ عبدالکبیر قاضی کا میڈیا سے گفتگو میں کہنا تھا سندھ حکومت نے نادرا کے ساتھ کرائم ٹریکنگ کا معاہدہ کرلیا ہے، جس کے ذریعے جرائم میں ملوث افراد کا ڈیٹا رکھا جاسکے گا۔
صوبے میں انسداد دہشتگردی کا محکمہ بھی قائم کردیا گیا ہے، جس کا مرکز کراچی میں ہوگادہشتگردوں کو رکھنے کیلئے الگ جیل کے قیام کا بھی فیصلہ کرلیا گیا ہے۔
جس میں فیصلہ کیا گیا کہ قومی ایکشن پلان کے تحت انسداد دہشتگردی کے دفاتر قائم کیے جائینگے،جس کا مرکز کراچی ہوگا جبکہ حیدرآباد اور سکھر میں ریجنل مراکز ہونگے ۔
اجلاس میں یہ فیصلہ بھی کیا گیا ہے کہ صوبے میں کوئی مدرسہ، مسجد، یا عبادت گاہ اجازت کے بغیر نہیں بن سکے گی اور اس سلسلے میں ضروری قانون سازی کی جائیگی۔
کوئٹہ : وزیرِاعظم نواز شریف اور آرمی چیف بلوچستان کی انسدادِ دہشتگردی فورس کی پاسنگ آوٹ پریڈ کی تقریب میں شرکت کیلئے کوئٹہ چھاؤنی پہنچ گئے ہیں۔
کوئٹہ انسدادِ دہشت گردی کے دستے کی پاسنگ آؤٹ پریڈ میں نواز شریف اور آرمی چیف بطور مہمانِ خصوصی کی حثییت سے شرکت کر رہے ہیں جبکہ گورنر محمدخان اچکزئی، وزیراعلی ڈاکٹرعبدالمالک، کمانڈر سدرن کمانڈ لیفٹیننٹ جنرل ناصر خان جنجوعہ، اسپیکر بلوچستان اسمبلی اور میر ثنااللہ زہری بھی تقریب میں موجود ہیں۔
تقریب کا باقاعدہ آغاز تلاوتِ قرآن پاک سے کیا گیا ، پاک آرمی کی تربیت یافتہ انسدادِ دہشتگردی فورس بلوچستان کے پہلے دو سو جوان دہشتگردوں سے نمٹنے کیلئے میدان میں آگئے، پاس آؤٹ دستے میں اٹھارہ خواتین بھی شامل ہیں۔
پاسنگ آؤٹ پریڈ میں دہشتگردوں سے نمٹنے اور ان پر جھپٹنے کا عملی مظاہرہ کیا گیا اور چھپے ہوئے دہشتگردوں کو نشانہ بنانا ہویا معصوم شہریوں کو ان کے چنگل سے آزاد کرانا انسدادِ دہشتگردی فورس نے ہر خطرناک اقدام کا عملی مظاہرہ کیا۔
وزیراعظم اور آرمی چیف نے مشقوں کا معائنہ کیا، انسداد دہشتگردی فورس کے 2سواہلکاروں کو ایک ماہ تربیت دی گئی ہے ،تربیت پانیوالوں میں بلوچستان پولیس اورکانسٹبلری کےافسران اور اہلکارشامل ہیں جن میں 18 خواتین بھی ہیں، جنہوں نے تربیت کا عملی مظاہرہ بھی کیا ۔
یاد رہے کہ وزیرِاعظم کوئٹہ کے دو روزہ دورے پر ہیں، نواز شریف اکبر بگٹی کےصاحبزادے کی رہائشگاہ جائیں گے۔
اسلام آباد: مشیر خارجہ سرتاج عزیز سے یورپی پارلیمنٹ اور امریکی آرمڈ سروسزکمیٹی کے وفد نے ملاقاتیں کی،دوطرفہ تعلقات اورخطے کی صورتحال سمیت دیگرامورپرتبادلہ خیال کیا گیا۔
وفاقی دارالحکومت میں جین لیمبرٹ کی قیادت میں یورپی پارلیمنٹ کے وفد نے مشیرخارجہ سرتاج عزیز سے ملاقات کی اور دوطرفہ تجارتی تعلقات سمیت باہمی دلچسپی کے امورپربات ہوئی ۔
مشیرخارجہ نے یورپی یونین سے تجارتی روابط میں مزید بہتری کی خواہش کا بھی اظہار کیا، اس سے قبل امریکی آرمڈ سروسز کمیٹی کے رکن سینیٹر جیک ریڈ کی قیادت میں سینیٹ آرمڈ سروسز کمیٹی کے سینئر حکام نے سرتاج عزیز سے ملاقات کی جس میں خطے کی علاقائی صورتحال کا جائزہ لیا۔
سرتاج عزیز نے دہشت گردی اور انتہا پسندی کے خاتمے کے حوالے پاکستان کے جامع اقدامات سے سینیٹ کی آرمڈ سروسز کمیٹی کو آگاہ کیا، امریکی سینٹر جیک ریڈ نے دہشتگردی کیخلاف جنگ میں پاکستان کے کردار کو سراہتے ہوئے خراج تحسین پیش کیا۔
کراچی: وزیراعظم نوازشریف کی زیرصدارت اپیکس کمیٹی کا اجلاس گورنر ہاوس کراچی میں ہوا، ڈی جی رینجرز اور آئی جی سندھ نے اجلاس کو نیشنل ایکشن پلان پرعملدرآمد کے بارے میں بریفنگ دی۔
وزیراعظم نوازشریف کی زیرصدارت کراچی کے گورنر ہاوس میں ایپکس کمیٹی کا اجلاس میں سابق صدر آصف زرداری ، گورنر اور وزیراعلی سندھ ، آرمی چیف اور ڈی جی آئی ایس آئی سمیت اعلی حکام نے شرکت کی۔
وزیراعظم کی زیرصدارت ایپکس کمیٹی کے اجلاس میں کراچی آپریشن بلاتفریق اورنتائج کےحصول تک جاری رکھنےکافیصلہ کیا گیا،اجلاس میں کراچی آپریشن سندھ کےدوسرے شہروں تک بڑھایا جائےگا،ایپکس کمیٹی مذہبی منافرت،لاؤڈاسپیکر،وال چاکنگ کی پابندی پرسختی سےعمل درآمدہوگا، وفاقی حکومت سندھ کووسائل فراہم کرے گی۔
چیف سیکرٹری سندھ سجاد سلیم نے وزیر اعظم کو قومی ایکشن پلان اور کراچی ٹارگٹڈ آپریشن پر بریفنگ دی، ان کا کہنا تھا کہ کے سانحہ بلدیہ ٹاؤن کی ارسرنو تحقیقات کے لئے عدالت سے رجوع کا فیصلہ کیا ہے۔
وزیر اعظم نے آئی جی سندھ کو ہدایت کی کہ سانحہ بلدیہ تحقیقات جلد مکمل کریں اور اب تک کی پیش رفت کی جامع رپورٹ پندرہ روز میں پیش کریں۔
اجلاس میں آئی جی سندھ نے اسلحہ اور ٹیکنالوجی کا مطالبہ کیا جس پر آرمی چیف جنرل راحیل شریف نے کہا کہ عسکری اداروں سے رابطے میں رہیں جس چیز کی بھی ضرورت ہوگی دیں گے اس کے ساتھ ہی آرمی چیف نے کہا کہ اگر چاہتے ہیں تو سندھ پولیس کی ٹریننگ فوج کریں تو آگاہ کریں۔
ڈی جی رینجرز جنرل بلال اکبر نے کراچی آپریشن پر بریفننگ دی، سابق صدر آصف علی زرداری کا کہنا تھا کہ اپنے دور حکومت میں دہشت گردی کے خلاف آپریشن کو تیز کیا اورسوات آپریشن پیپلزپارٹی کے دور حکومت میں ہوا،ان کا کہنا تھا دہشت گردی کے خلا ف جنگ میں افواج پاکستان اور حکومت کے ساتھ ہیں ، پاک فوج نے بہت قربانیاں دی ہیں۔
کراچی : وزیرِاعظم نوازشریف کی زیرِصدارت اپیکس کمیٹی کا اجلاس گورنر ہاوس کراچی میں ہوا، ڈی جی رینجرز اور آئی جی سندھ نے اجلاس کو نیشنل ایکشن پلان پرعملدرآمد کے بارے میں بریفنگ دی ۔وزیراعظم نواز شریف نواز شریف کا کہنا ہے کہ ایکشن پلان سےٹھوس نتائج کی توقع ہے۔
وزیرِاعظم نے اجلاس میں شریک حکام کو ہدایت کی کہ کہ اداروں میں انٹیلی جنس شیئرنگ کو بہتر بنایا جائے۔
نوازشریف نے کہا ہے کہ دہشتگردوں کا خاتمہ ریاست کا حتمی فیصلہ ہے، قبائلی علاقوں سمیت ملک کے ہر کونے سے دہشتگردی کا خاتمہ کردیں گے۔
اجلاس میں آرمی چیف راحیل شریف نے کہا ہے کہ جرائم پیشہ افرادکیخلاف آپریشن کسی تفریق کے بغیر کیا جارہا ہے، آپریشن سیاسی ، مذہبی لسانی تفریق کےبغیر جاری ہے۔
ایپکس کمیٹی کے اجلاس میں سابق صدر آصف زرداری ، وزیرِاعلی سندھ قائم علی شاہ ، گورنر سندھ ڈاکٹرعشرت العباد خان ، آرمی چیف جنرل راحیل شریف ، ڈی جی آئی ایس آئی لیفٹیننٹ جنرل رضوان اختر ، کورکمانڈر کراچی سمیت اعلی حکام نے شرکت کی۔
وزیرِاطلاعات سندھ شرجیل میمن ، چیف سیکریٹری سندھ ، سیکریٹری داخلہ سندھ بھی اجلاس میں موجود تھے۔
اس سے قبل وزیرِ اعظم محمد نواز شریف نے کراچی آمد کے فورََا بعد کور ہیڈ کوارٹر کا دورہ کیا، جہاں انہیں سندھ اور کراچی میں جاری آپریشن پر کور کمانڈر کراچی لیفٹیننٹ جنرل مختار نوید نے مکمل بریفنگ دی۔
ڈی جی آئی ایس پی آر کے مطابق وزیرِاعظم سے آرمی چیف اور کور کمانڈر کراچی نے ملاقات کی۔
بعد ازاں وزیرِاعظم سے پیپلز پارٹی کے شریک چیئرمین اور سابق صدر آصف علی زرداری نے گورنر ہاؤس میں ملاقات کی، جس میں کراچی اور پورے ملک میں امن و امان سمیت دیگر امور پر تبادلہ خیال کیا، گورنر اور وزیرِاعلٰی سندھ نے بھی نوازشریف سے ملاقات کی۔
واضح رہے کہ وزیرِاعظم کی آمد اور وی آئی پی موومنٹ کے باعث شاہراہ فیصل کے اطراف کی سڑکوں پر ٹریفک کی روانی شدید متاثر رہی۔