اسلام آباد : وزیراعظم نوازشریف نے بلوچستان ڈیولپمنٹ فورم سے خطاب کرتے ہوئے کہا ہے کہ وفاق نے بلوچستان کو 100فیصد ترقیاتی فنڈ فراہم کیے ہیں، گوادربندرگاہ کی تعمیرخطے کی معاشی ترقی میں اہم کردار اداکرے گی۔
ان کا کہنا تھا کہ بلوچستان کی ترقی مجھے ذاتی طورپرعزیزہے گوادرکی تعمیراس خطے میں سرمایہ کاری لائے گی اورگوادرتوانائی اورتجارت کا مرکزبن جائے گا۔
انہوں نے یہ بھی کہا کہ 300 میگا واٹ پیدا کرنے کی صلاحیت رکھنے والا پاور پلانٹ گوادرمیں لگایا جارہا ہے۔
ان کا کہنا تھا کہ 4 ارب کی لاگت سے زلزلے سے متاثرہ افراد کے لئے مکان تعمیر کیے جارہے ہیں۔
ان کا کہنا تھا کہ گوادر قدرتی وسائل کی دولت سے مالا مال ہے ریکوڈک سے متعلق مسائل جلد حل کیے جائیں گے۔
انہوں نے کہا کہ وفاق نے صوبائی حکومت کو 100 فیصد ترقیاتی فنڈ فراہم کیے رواں سال بھی 162 ارب میں سے 80ارب فراہم کیے جاچکے ہیں۔
انہوں نے کہا کہ نئی سڑکوں کی تعمیر کرکے بلوچستان کو ملک کے دوسرے علاقوں سے منسلک کیا جارہاہے۔
وزیراعظم نے کہا کہ بلوچستان میں بلدیاتی انتخابات ہوچکے ہیں ، بنیادی ڈھانچے کے قیام میں صوبائی حکومت کا کردار قابلِ تعریف ہے۔
وزیراعظم نے یہ بھی کہا کہ پاکستان کی سرزمین کسی کو بھی پاکستان کے خلاف استعمال نہیں کرنے دیں گے۔
انہوں نے اس عزم کا اظہار کیا کہ بلوچستان ڈیولپمنٹ فورم صوبے کے لئے نئے ترقیاتی منصوبوں پرکام کرے گا۔
