اسلام آباد : تحریک انصاف کے مرکزی رہنما فواد چوہدری نے کہا ہے کہ اعظم سواتی اور اہلیہ سے ظلم پر انسانیت سسک رہی ہے، اگر وزیرعظم میں رتّی برابر شرم ہوتی تو تراش خراش پر مبنی بیانیہ نہ پیش کرتا۔
میڈیا سے گفتگو کرتے ہوئے فواد چوہدری نے کہا ثابت ہوا کہ سیاست کے لبادے میں مجرموں کا گروہ اقتدار پر قابض ہے، بے شرم سرکار کے کٹھ پتلی سربراہ نے اپنا بیانیہ پیش کرنے کی بھونڈی کوشش کی۔
انہوں نے کہا کہ آج کا دن پاکستان کی سیاسی وسماجی تاریخ کاسیاہ ترین دن ہے، شہبازشریف کے بیانیے کو قوم پہلے ہی ردی کی ٹوکری میں ڈال چکی ہے۔،
فوادچوہدری کا کہنا تھا کہ آج منی لانڈرنگ اور ضمیر فروشی جیسے جرائم میں ملوث شخص وزیراعظم ہے، رتّی بھرشرم ہوتی تو ملک کا وزیراعظم تراش خراش پرمبنی بیانیہ نہ پیش کرتا۔
پی ٹی آئی رہنما نے کہا کہ اعظم سواتی اور اہل خانہ پرڈھائی جانے والی قیامت کے ذمہ داروں کا تعین کرنا ہوگا، اعظم سواتی اور اہلیہ سے ظلم پر انسانیت کرب سے سسک رہی ہے۔
انہوں نے کہا کہ انسانی حقوق کی پامالی کی سیاہ تاریخ رقم ہورہی ہے، مجرموں کا ٹولہ خرافات کی تشہیر میں مصروف ہے، افواجِ پاکستان پر عالمی سطح پرحملے اور مہم شہباز شریف کی سیاسی وخاندانی تاریخ ہے۔
تحریک انصاف کے رہنما نے کہا کہ امپورٹڈ وزیراعظم کی بھتیجی خود اپنے جلسوں میں افواج پاکستان کیخلاف نعرے لگواتی رہی۔
فوادچوہدری نے کہا کہ اس شخص کا مفرور بھائی آرمی چیف کا نام لے کر ان پر کیچڑ اچھالتا رہا، ڈان لیکس کو بھارت نے اپنے جاسوس کے حق میں بطور ثبوت پیش کیا تھا۔
ان کا کہنا تھا کہ عمران خان پر قاتلانہ حملے کے ذریعے ملک کو انتشار کی آگ میں ڈالنے کی کوشش کی گئی، شہباز شریف اس سازش کے مرکزی کردار ہیں۔
پی ٹی آئی رہنما نے کہا کہ پریس کانفرنس کے ذریعے معصومیت ثابت کرنے کی کوشش کی گئی، سازشوں کو جھوٹ کے بوجھ تلے دبانےکی کوشش کامیاب نہیں ہوگی۔
انہوں نے کہا کہ ملک میں انتشار و تقسیم کو ہوا دینے کی مزید اجازت قوم نہیں دے گی، شہباز شریف اپنے مجرم وزیرداخلہ سمیت فوری مستعفی ہوں۔
