اسلام آباد : صدرِ مملکت آصف علی زرداری اور وزیر اعظم شہباز شریف کی جانب سے یوم استحصال کےموقع پر قوم کے نام خصوصی پیغام جاری کیا گیا ہے۔
صدرآصف زرداری نے کہا کہ بھارت کے غیر قانونی اور یکطرفہ اقدامات کو 6سال مکمل ہورہے ہیں،
بھارت نے 5اگست 2019کو جموں و کشمیر کی خصوصی حیثیت ختم کی۔
انہوں نے کہا کہ بھارتی اقدام کا مقصد کشمیر کی متنازع حیثیت اور حق خودارادیت کو کمزور کرنا تھا،
6سال میں بھارت نے آبادیاتی ساخت اور سیاسی نقشہ تبدیل کرنے کےاقدامات کیے۔
صدرمملکت نے کہا کہ غیرکشمیریوں کو ووٹر لسٹ میں شامل کرنا بھارتی حکمت عملی کا حصہ ہے،
من مانی حلقہ بندیاں اور باہر کے افراد کو ڈومیسائل دینا سازش کا حصہ ہے۔
وزیراعظم شہبازشریف کا اپنے پیغام میں کہنا ہے کہ حکومت پاکستان کشمیری عوام سے غیرمتزلزل یکجہتی کا اعادہ کرتی ہے، 5اگست2019کے بھارتی غیر قانونی اقدامات کی شدید مذمت کرتے ہیں۔
بھارتی اقدامات اقوام متحدہ کی قراردادوں اور عالمی قوانین کی کھلی خلاف ورزی ہیں، بھارتی اقدام مقبوضہ جموں و کشمیر میں آبادیاتی، سیاسی منظرنامے کی تبدیلی کی سازش ہے۔
وزیراعظم شہبازشریف کا کہنا تھا کہ یوم استحصال بھارتی بربریت اور امن کے انکار کی سنجیدہ یاد دہانی ہے، کشمیریوں کےانسانی حقوق اور شناخت سے انکار علاقائی عدم استحکام کی وجہ ہے۔
انہوں نے کہا کہ بھارت جموں وکشمیر پر غیرقانونی قبضہ برقرار نہیں رکھ سکتا، بھارت نے ریاستی دہشت گردی اور جبر میں تقریبا ً8 دہائیوں سے دوگنا اضافہ کردیا۔
