لاہور : مسلم لیگ ن کے مرکزی رہنما عطا تارڑ نے کہا ہے کہ کسی کو مینڈیٹ چرانے کا موقع نہیں دینگے، پنجاب اسمبلی کو تحلیل نہ کرنے کیلئے آخری حد تک جائیں گے۔
تفصیلات کے مطابق لاہور میں شہباز شریف کی زیرصدارت مسلم لیگ ن کے رہنماؤں کا اہم اجلاس ہوا، اجلاس کے بعد عطا تارڑ اور عظمیٰ بخاری نے میڈیا سے گفتگو میں اہم تفصیلات بیان کیں۔
اجلاس کے بعد عطا تارڑ نے صحافیوں سے گفتگو کرتے ہوئے کہا کہ آج کے اجلاس میں پنجاب اسمبلی میں تحریک عدم اعتماد سے متعلق بات چیت ہوئی، کل اس حوالے سے اتحادی جماعتوں سے بھی مشاورت کی جائے گی۔
انہوں نے کہا کہ صوبائی اسمبلیوں کی مدت مکمل ہوگی اور کسی کو بھی مینڈیٹ چرانے کا موقع نہیں دیں گے، مسلم لیگ ن آخری حد تک جائے گی۔
عطا تارڑ کا کہنا تھا کہ پنجاب اسمبلی کو تحلیل نہ کرنے کیلئے ہم آخری حد تک جائیں گے، ہم کوشش کریں گے کہ حمزہ شہباز کی پنجاب حکومت کو دوبارہ بحال کریں، ن لیگ عوامی مینڈیٹ کو متاثر نہیں ہونے دے گی۔
ایک سوال کے جواب میں ان کا کہنا تھا کہ پنجاب اسمبلی کے اسپیکر الیکشن سے متعلق عدالت کو درخواست دی تھی، کیس سے متعلق کچھ بھی فیصلہ آئے لیکن ہمارے اس کیس کو سنا جائے۔
ن لیگی رہنما کا مزید کہنا تھا کہ ہم پُرعزم ہیں، پنجاب اسمبلی کی مدت کو پورا کرایا جائے، اس سلسلے میں حمزہ شہباز پیپلزپارٹی کے رہنماؤں سے جلد ملاقاتیں کریں گے۔
پنجاب اسمبلی کسی کی جاگیر نہیں، عظمیٰ بخاری
اس موقع پر خاتون لیگی رہنما عظمیٰ بخاری نے کہا کہ پنجاب اسمبلی میں پی ٹی آئی اور ن لیگ کے ارکان کی تعداد برابر ہے، پنجاب اسمبلی کسی کی جاگیر نہیں، پرویزالٰہی کو پتہ نہیں کیا غلط فہمی ہوگئی ہے۔
عظمیٰ بخاری نے کہا کہ چوہدری پرویزالٰہی کو عمران خان کے دباؤ میں آکر کوئی غیرآئینی اقدام نہیں کرنے دیں گے، حمزہ شہباز کی ریویو پٹیشن6 ماہ سے پینڈنگ میں ہے اسے سنا جائے، پرویزالٰہی ایک غیرقانونی وزیراعلیٰ ہیں۔
