اسلام آباد: سابق وفاقی وزیر داخلہ اور مسلم لیگ ن کے سینئر رہنما احسن اقبال نے کہا ہے کہ سنجیدگی اور خلوص سے متفقہ صدارتی امیدوار لانے کی کوشش کر رہے ہیں، امید ہے پی پی قیادت اس اہمیت کو سمجھے گی۔
ان خیالات کا اظہار انہوں نے اسلام آباد میں میڈیا سے گفتگو کرتے ہوئے کیا، احسن اقبال کا کہنا تھا کہ اپوزیشن اتحاد مضبوط بنانے کے لیے متفقہ امیدوار لانا چاہتے ہیں۔
انہوں نے کہا کہ پیپلزپارٹی وفد کو تجاویز دی ہیں، ہم چاہتے ہیں ایسا صدارتی امیدوار ہو جس پر کسی کو تحفظات نہ ہوں، اپوزیشن میں ن لیگ کی سب سے زیادہ نشستیں ہیں۔
احسن اقبال کا کہنا تھا کہ امید ہے صدارتی امید وار کے حوالے سے پیپلز پارٹی کی قیادت اہمیت کو سمجھے گی، مشترکہ امیدوار آنا اپوزیشن اتحاد کے لیے اہم ہے۔
مشترکہ صدارتی امیدوار کے معاملے پر اپوزیشن میں ڈیڈ لاک برقرار
ان کا مزید کہنا تھا کہ اگر کوئی فریق ایک مؤقف پر اڑا رہا تو نتیجہ نہیں نکلے گا، خاموش ڈپلومیسی سے کام لے رہے ہیں، جلد فیصلے نظر آجائیں گے۔
خیال رہے کہ مشترکہ صدارتی امیدوار کے معاملے پر اپوزیشن میں ڈیڈ لاک برقرار ہے، ذرائع کے مطابق پیپلزپارٹی نے اعتزاز احسن کا نام واپس لینے سے انکار کردیا ہے، آصف زرداری کے فیصلے سے پیپلزپارٹی نے فضل الرحمان کو آگاہ کردیا۔
واضح رہے کہ پاکستان تحریک انصاف نے عارف علوی کو اور پیپلزپارٹی نے اعتزاز احسن کو صدارتی امیدوار نامزد کیا ہے جبکہ مسلم لیگ ن کے صدر شہباز شریف جلد اپوزیشن کے امیدوار کا اعلان کریں گے۔
