ملتان: سابق وزیر اعظم نواز شریف کی صاحبزادی مریم نواز نے کہا ہے کہ نواز شریف کے خلاف نیب کا نیا نوٹس مذاق بن چکا ہے، کوئی کہے گا نواز شریف نے مریخ پر 4 ہزار ارب بھیجے تو نیب پھر پیچھے پڑ جائے گا۔
ان خیالات کا اظہار انہوں نے ملتان میں مسلم لیگ ن کے جلسے سے خطاب کرتے ہوئے کیا، مریم نواز نے کہا کہ نواز شریف کا مقابلہ ان سے ہے جن کے حکم پر عمران خان چلتے ہیں، ان کو ووٹ اس لئے نہیں ملتا کیونکہ وہ عوام کے ووٹ کی پرچی سے غیبی مخلوق کے جوتے صاف کرتے ہیں۔
انہوں نے کہا کہ عمران خان کے پی سے ملنے والے ووٹ کی پرچی کو آصف زرداری کو بیچ دیتے ہیں، عوام بلے پر ووٹ لگاتے ہیں وہ اپنے لوگوں کو کہتے ہیں تیر پر مہر لگاؤ، عمران خان آج اداروں کے پیچھے چھپتے ہیں کل دھاندلی کا رونا رو کر کنٹینر پر چڑھ کر انہیں برا کہیں گے۔
مریم نواز کے مطابق رسی کے ایک طرف خلائی مخلوق، مہرے اور سازشی کھڑے ہیں، رسی کے دوسری طرف اکیلا نواز شریف اور عوام کھڑے ہیں، خلائی مخلوق رسی کو کھینچتی ہے تو عوام زیادہ مضبوطی سے نواز شریف کا ہاتھ پکڑتے ہیں، نواز شریف نااہلی کے بعد بھی خلائی مخلوق اور ان کے مہروں پر بھاری ہے۔
انہوں نے کہا کہ کچھ لوگ دھرنے، کرپشن اور کچھ انگلی کے اشاروں پر ناچتے ناچتے تھک گئے، کوئی نہیں تھکا تو وہ میرا اور آپ کا لیڈر نواز شریف ہے، 5 سال سے سازشوں کا مقابلہ کررہے ہیں، عدالتوں میں ہماری 70 پیشیاں ہوچکی ہیں مگر تھکے نہیں، حساب لینے والے تھک گئے سر پکڑ کر بیٹھ گئے مگر نواز شریف نہیں تھکا۔
مریم نواز کا کہنا تھا کہ سازشیں تیز ہوتی جارہی ہیں، میاں صاحب وی لویو کی سدا بھی بڑھ رہی ہے، نواز شریف نے عوام کے ووٹ کی طاقت کو جھکنے نہیں دیا، ناہلی، سازش اور بیٹی پر الزامات کو برداشت کیا، وزارت عظمیٰ سے ہٹانا، دھرنے برداشت کیے، ووٹ کو عزت دینے کا مقدمہ 70 سال پرانا ہے، ووٹ کو عزت دلانے والا نواز شریف کی صورت میں پیدا ہوگیا ہے۔
انہوں نے کہا کہ مخالفین کے چہرے بتا رہے ہیں 2018 میں ن لیگ فتح یاب ہوگی، مسلم لیگ ن الیکشن جیتے تو میاں صاحب سے کہوں گی کھیل کے اصول بدلنے تک اقتدار کو ہاتھ نہیں لگانا، ووٹ سے آؤ، ووٹ سے جاؤ، اس کے علاوہ عوام کو کوئی سازش منظور نہیں ہے۔
جاوید ہاشمی کا مسلم لیگ ن میں شمولیت کا اعلان
جاوید ہاشمی نے ملتان جلسے میں مسلم لیگ ن میں شمولیت کا اعلان کرتے ہوئے کہا کہ مسلم لیگی ہوں، پارٹی لیڈر شپ کا فیصلہ ماننے کا اعلان کرتا ہوں، نواز شریف نے ووٹ کی توہین کرنے والوں کے خلاف آواز اٹھائی ہے۔
انہوں نے کہا کہ ووٹ کی توہین کرنے والوں کے خلاف نواز شریف کے ساتھ ہوں، نواز شریف کے ساتھ کوئی کھڑا رہے یا نہ رہے میں رہوں گا، ووٹ کی عزت خراب کرنے والوں کے خلاف بغاوت کا پرچم اُٹھایا ہے۔
ایسا لیڈر تاریخ نے کہیں نہیں دیکھا، ووٹ کی جس تحریک سے پاکستان بنا تھا اس کی حرمت کو بچانے کی کوشش کررہے ہیں، نواز شریف میرے لیڈر تھے ہیں اور رہیں گے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
