مظفر آباد: وزیر اعظم شاہد خاقان عباسی نے کہا ہے کہ سپریم کورٹ سے آج بھی ایک فیصلہ آیا ہے، ، بدقسمتی سے جو ملک میں کام کرتے ہیں انہیں ہی عدالتوں میں گھسیٹا جاتا ہے، سیاست دان کی عزت نہیں ہوگی تو ملک میں ترقی مشکل ہے ۔

ان خیالات کا اظہار انہوں نے مظفر آباد میں نیلم جہلم منصوبے کے یونٹ کی افتتاحی تقریب سے خطاب کرتے ہوئے کیا، شاہد خاقان عباسی نے کہا ہے کہ قومیں ان لوگوں کو یاد رکھتی ہیں جو ان کے مسائل حل کرتے ہیں۔

وزیر اعظم نے کہا کہ حکومت سنبھالی تو ملک میں سنگین توانائی بحران کا سامنا کرنا پڑا، صرف باتیں نہیں کام کرکے دکھایا ہے، 5 سال کے ترقیاتی کام 65 سال پر حاوی ہیں، حکومت نے بجلی کی طلب و رسد میں فرق ختم کردیا ہے، لوڈشیڈنگ صرف ان علاقوں میں ہوتی ہے جہاں بجلی چوری ہورہی ہے۔

شاہد خاقان عباسی نے کہا کہ کوشش ہے کہ بجلی سستی اور پورے ملک کے لیے ہو، ملک میں 10 ہزار 400 میگا واٹ بجلی کے منصوبے لگ چکے ہیں، چیئرمین واپڈا کی کاوشوں سے آج نیلم جلہم منصوبہ پایہ تکمیل تک پہنچا ہے، نیلم جہلم 969 میگا واٹ بجلی پیدا کرنے کی صلاحیت کا حامل ہے۔

انہوں نے کہا کہ منصوبے سے قومی خزانے کو سالانہ 55 ارب روپے کی آمدن حاصل ہوگی، نیلم جلہم منصوبے سے 4500 افراد کو روزگار حاصل ہوگا، کسی سابق حکومت نے 2 ہزار میگا واٹ بجلی پیدا نہیں کی ہے۔

وزیر اعظم نے کہا کہ کشمیر انسانی حقوق کا ایک مسئلہ ہے جو پوری دنیا کے لیے انسانی حقوق کا چیلنج ہے، ہم کشمیر کے مسئلے کو نہیں بھلا سکتے، ہم نے ہر سطح پر اس مسئلے کو اُٹھایا ہے، ہم کشمیری عوام کی سفارتی، سیاسی اور اخلاقی حمایت جاری رکھیں گے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

اسلام آباد: وزیر اعظم شاہد خاقان عباسی نے کہا ہے کہ نواز شریف کو چار دفعہ ووٹ دیا، ان کو وزیر اعظم سمجھتا ہوں تاہم ان کی گرفتاری کا حکم ہوا تو گرفتار کریں گے۔

ان خیالات کا اظہار انہوں نے نجی ٹی وی سے گفتگو کرتے ہوئے کیا، شاہد خاقان عباسی نے کہا کہ نیب کے اربوں روپے فراڈ کے کیسز کی مہینے میں دو سماعتیں ہوتی ہیں، نواز شریف کے خلاف نیب کیس کی روزانہ سماعت ہوتی ہے، نیب کی عدالت میں نواز شریف کو انصاف نہیں ملے گا تاہم انصاف ہوتا نظر آنا چاہئے، عوام اور عدالتی تاریخ نواز شریف کے خلاف فیصلہ قبول نہیں کرے گی، نواز شریف اور ہم نے بہت جیلیں دیکھی ہیں۔

وزیر اعظم نے کہا کہ چیئرمین سینیٹ کو نکالنے کی بات نہیں کی، سینیٹ فیڈریشن کی نمائندگی کرتا ہے اس کے وقار میں کمی ہوئی ہے، سینیٹ الیکشن میں اس دفعہ گھوڑے نہیں اصطبل بکا ہے، سینیٹ کا وقار بحال کرنے میں بہت وقت لگے گا۔

شاہد خاقان عباسی نے کہا کہ سینیٹ الیکشن میں ہم نے ایک پیسہ لیا نہ دیا ہے، ایک پارٹی کے سربراہ نے کہا 14 ایم پی ایز بکے، ہمارے کسی ممبر نے ایسا کیا تو اسے سینیٹر شپ چھوڑ دینی چاہئے۔

انہوں نے کہا کہ سپریم کورٹ یا فوج سے کوئی جھگڑا نہیں ہے، چیف جسٹس سے ملاقات میں سب کچھ مثبت تھا، کچھ لوگوں نے ملاقات کے وقت اعتراض کیا، ملاقات ملک کے مفاد میں تھی، ایسی ملاقاتیں ہونی چاہئے۔

وزیر اعظم نے کہا کہ بلوچستان حکومت گرانے میں شاہ صاحب کا حصہ نہیں تھا، کچھ لوگوں کو آخری سال نیا صوبہ یاد آگیا ہے، ان لوگوں کے نام نوٹ کرلیں، دیکھیں ان کے ساتھ الیکشن میں کیا ہوتا ہے۔

شاہد خاقان عباسی نے کہا کہ جس نے جانا ہے وہ جائے، ان کو اپنی سیاست مبارک ہو، ہماری پارٹی مضبوط ہے ہمیں اور امیدوار مل جائیں گے، چوہدری نثار اپنی جماعت چھوڑ کر کہاں جائیں گے؟ انہوں نے پارٹی چھوڑنی ہوتی تو چھوڑ چکے ہوتے، ناراضی میں کوئی پارٹی نہیں چھوڑتا ہے پارٹی چھوڑنا ان کا اختیار ہے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔