پشاور: پاکستانی تحریک انصاف کی منحرف رہنماء عائشہ گلالئی نے کہا ہے کہ نواز شریف شیخ مجیب الرحمان بننے کی کوشش کر رہے ہیں، وہ عوام کو فوج کے خلاف بھڑکا رہے ہیں۔
ان خیالات کا اظہار انہوں نے پریس کانفرنس کرتے ہوئے کیا، عائشہ گلالئی کا کہنا تھا کہ شریف برادران ملک میں خانہ جنگی پیدا کرنا چاہتے ہیں، وہ ان دنوں پنجاب میں جلسے کر رہے ہیں جس کا مقصد عوام کو فوج کے خلاف بھڑکانا ہے۔
نواز شریف مکار اور عمران خان سے زیادہ خطرناک ہیں، عائشہ گلالئی
انہوں نے کہا کہ نااہل وزیر اعظم رونی صورت بنا کر کہتے ہیں مجھے کیوں نکالا، میں چیف جسٹس سے اپیل کرتی ہوں کہ جو شخص آپ کے خلاف نازیبہ زبان استعمال کر رہا ہے اس کے خلاف سخت قانونی کارروائی کریں۔
ان کا کہنا تھا کہ جس طرح کی صورت حال پیدا کی جارہی ہے اس سے یہی لگتا ہے کہ جب آپ کے خلاف فیصلہ آئے تو عدلیہ کے فیصلے کی مخالفت کرتے ہوئے جلسے کرنا شروع کردو، یہ شریف خاندان کی سازش ہے۔
عائشہ گلالئی کا مزید کہنا تھا کہ ملک میں تعصب کی ہوا دے کر نواز شریف پنجابی کو پنجابی سے لڑانا چاہتے ہیں، ان چوروں لٹیروں کو جیل میں ہونا چاہیے۔
عائشہ گلالئی کا الزام، مسلم لیگ ن کا قانونی کارروائی کا فیصلہ
یاد رہے گذشتہ دنوں تحریک انصاف کی منحرف رکن قومی اسمبلی عائشہ گلالئی نے الزام عائد کرتے ہوئے کہا تھا کہ مسلم لیگ (ن) نے انہیں فوج کے خلاف بات اور تنقید کرنے کے عوض سینیٹ کا ٹکٹ دینے کی پیش کش کی تھی۔
دوسری جانب الزامات پر ردِ عمل دیتے ہوئے مسلم لیگ (ن) کے ترجمان کا کہنا تھا کہ ان کا بیان مضحکہ خیز، بے بنیاد اور جھوٹ پر مبنی ہے وہ کس کی زبان بول رہی ہیں اس بات کا پتا لگانا بے حد ضروری ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
