لاہور: وزیراطلاعات پنجاب فیاض الحسن چوہان نے کہا ہے کہ گذشتہ کئی ہفتوں سےنیب کے خلاف ہرزہ سرائی کی جارہی ہے، آج بھی شاہد خاقان عباسی نے نیب پر الزامات لگائے.
تفصیلات کے مطابق وزیراطلاعات پنجاب نے میڈیا سے بات کرتے ہوئے ن لیگی ارکان کے رویے پر تنقید کی اور کہا کہ ن لیگ والے چاہتے ہیں کہ ان کی کرپشن پر کارروائی نہ کی جائے.
[bs-quote quote=” ن لیگ والے چاہتے ہیں کہ ان کی کرپشن پر کارروائی نہ کی جائے” style=”style-7″ align=”left” author_name=”فیاض الحسن چوہان”][/bs-quote]
انھوں نے کہا کہ نیب جب اپنا مؤقف دے رہی ہے ،تو ان کی چیخیں نکل رہی ہیں، اپوزیشن کی جانب سے نیب کو سخت تنقید کا نشانہ بنایا جاتا ہے، جو افسوس ناک ہے۔
ان کا مزید کہنا تھا کہ حمزہ شہباز اور شہبازشریف کے حواری بھی نیب کو نشانہ بناتے رہے، شہبازشریف نے اسمبلی میں نیب کے کردار کو مشکوک بنانے کی کوشش کی.
مانچسٹر: لاہور سے برطانیہ پہنچنے پر برطانوی پولیس نے اسلحہ رکھنے کے جرم میں ن لیگی رہنما زبیرگل کے بیٹے سلمان گل گرفتار کرلیا۔
تفصیلات کے مطابق ن لیگی رہنما زبیر گل کے بیٹے سلمان گل کو لاہور سے مانچسٹر پہنچنے پر گرفتار کیا گیا، برطانوی پولیس سلمان گل کو رواں سال کے مہینے اگست سے تلاش کر رہی تھی۔
برطانیہ کی نیشنل کرائم ایجنسی نے مانچسٹر ایئرپورٹ پر کارروائی کی جس کے باعث سلمان گل کی گرفتاری عمل میں آئی۔
سلمان گل پر لوگوں کو نقصان پہنچانے کی نیت سے ہتھیار رکھنے کا الزام ہے۔
دوسری جانب والد سلمان گل کا کہنا ہے کہ جھگڑے میں ہتھیار ملا جس کی ملکیت کا شک میرے بیٹے پر ظاہر کیا گیا۔
والد کا مزید کہنا تھا کہ پولیس کو ملنے والے اسلحے سے میرے بیٹے کا کوئی تعلق نہیں ہے۔
خیال رہے کہ ستمبر 2012 میں رہنما مسلم لیگ (ن) زبیر گل کو ہیتھرو ایئر پورٹ لندن سے ایک دوسرے پاکستانی کو دھمکیاں دینے کے الزام میں گرفتار کیا گیا تھا۔
بعد ازاں مقامی مجسٹریٹ کی طرف سے ضمانت لیے جانے پر رہا کردیا گیا تھا، البتہ ان پر یہ پابندی عائد کی گئی تھی کہ وہ مقدمہ کے اختتام تک شہر نہیں چھوڑیں گے۔
اسلام آباد: ن لیگی رہنما سعدیہ عباسی اور ہارون اختر کی سینیٹ رکنیت کالعدم قرار دے دی گئی.
تفصیلات کے مطابق سپریم کورٹ نے دونوں رہنماؤں کی رکنیت کالعدم قرار دیتے ہوئے موقف اختیار کیا کہ سعدیہ عباسی اور ہارون اختر کاغذات جمع کراتے وقت دہری شہریت کے حامل تھے.
چیف جسٹس نے ریمارکس دیتے ہوئے کہا کہ دونوں کو دہری شہریت پرسینیٹ کی رکنیت سے نااہل قراردیا جاتا ہے.
سپریم کورٹ کی جانب سے الیکشن کمیشن کو دونوں رہنماؤں کی رکنیت منسوخ کرنے کا حکم جاری کر دیا.
اس کیس کی سماعت سپریم کورٹ کے7 رکنی بینچ نے کی، جس کی سربراہی چیف جسٹس آف پاکستان کر رہے تھے.
دونوں رہنماؤں کا تعلق مسلم لیگ ن سے ہے. عدالتی حکم کے مطابق دونوں نشستوں پر دوبارہ الیکشن کروایا جائے گا۔
واضح رہے کہ ہارون اختر پی ٹی آئی رہنما اور معروف کاروباری شخصیت ہمایوں اختر کے بھائی ہے.
ہمایوںاختر نے ضمنی الیکشن میں عمران خان کی چھوڑی ہوئی نشست پر پی ٹی آئی کے ٹکٹ پر الیکشن لڑا تھا. الیکشن میں انھیں خواجہ سعد رفیق کے ہاتھوں شکست ہوئی.
لاہور: پیراگون ہاؤسنگ اسکینڈل میں نامزد سابق وفاقی وزیر ریلوے خواجہ سعد رفیق اور سلمان رفیق سے قومی احتساب بیورو کے افسران نے ایک گھنٹہ تک پوچھ گچھ کی۔
تفصیلات کے مطابق پیراگون ہاؤسنگ اسکینڈل میں نامزد ملزمان خواجہ سعد رفیق اور اُن کے بھائی سلمان رفیق نیب لاہور کے دفتر میں پیش ہوئے جہاں اُن سے ایک گھنٹے تک پوچھ گچھ کی گئی۔
یاد رہے کہ قومی احتساب بیورو نے سابق وفاقی وزیر ریلوے اور صوبائی وزیر صحت کو نیب میں پیش ہوکر پیراگون ہاؤسنگ سے متعلق تمام دستاویزات اور منی ٹریل پیش کرنے کی ہدایت کی تھی۔
ذرائع کے مطابق نیب کی 3 رکنی تحقیقاتی ٹیم نے خواجہ سعد رفیق اور سلمان رفیق سے الگ الگ تحقیقات کی اور دونوں بھائی ایک گھنٹے تک پوچھ گچھ کی جس کے دوران وہ افسران کو مطمئن نہیں کرسکے۔
خواجہ برادران اس سے قبل بھی 3 بار نیب کے روبرو پیش ہوکر اپنا بیان ریکارڈ کرواچکے ہیں جس کے بعد انہیں قومی احتساب بیورو کی جانب سے سوالنامہ بھیجا گیا تھا۔
یہ بھی یاد رہے کہ گذشتہ روزسابق وزیر ریلوے خواجہ سعد رفیق اور ان کے بھائی نے ممکنہ گرفتاری سے بچنے کے لیے لاہور ہائی کورٹ میں درخواست دائر کی، جس پر عدالت نے دونوں کی 24 اکتوبر تک عبوری ضمانت منظور کرتے ہوئے 5، 5 لاکھ کے مچلکے جمع کروانے کا حکم دیا تھا۔
لاہور ہائی کورٹ میں سماعت کے دوران وکیل صفائی نے اپنے دلائل میں مؤقف اختیار کیا تھا کہ نیب نے سعد رفیق اور سلمان رفیق کو تحقیقات کے لیے طلب کیا، خدشہ ہے انہیں حراست میں لے لیا جائے گا۔
قبل ازیں گرفتاری ے بچنے کے لیے سابق وزیرریلوے نے اسلام آباد ہائی کورٹ میں بھی درخواست دائر کی تھی، جسے مسترد کردیا گیا تھا ۔
خیال رہے آشیانہ سوسائٹی کی تحقیقات میں یہ انکشاف ہوا تھا کہ وفاقی وزیر ریلوے خواجہ سعد رفیق کے پیراگون سوسائٹی سے براہ راست روابط ہیں، پنجاب لینڈ ڈویلپمنٹ کمپنی کے ذریعے آشیانہ اسکیم لانچ کی گئی تھی۔
واضح رہے کہ مسلم لیگ ن کے صدر کو نیب نے آشیانہ اسکینڈل میں گرفتار کیا تھا، وہ صاف پانی کیس میں نیب میں پیش ہوئے تھے اور نیب لاہورنے آشیانہ ہاؤسنگ کیس میں گرفتار کیا، آشیانہ ہاؤسنگ کیس میں یہ سب سے بڑی گرفتاری ہے۔
لاہور: سابق وزیر ریلوے اور مسلم لیگ ن کے رہنما خواجہ سعد رفیق نے کہا ہے کہ عوامی امنگوں کے مطابق الیکشن کے فیصلے آنے چاہئیں، ہم کسی سے لڑائی جھگڑا نہیں چاہتے، ن لیگ کی حمایت پر پیپلزپارٹی اور ایم ایم اے کاشکریہ ادا کرتے ہیں۔
ان خیالات کا اظہار انہوں نے لاہور میں میڈیا سے گفتگو کرتے ہوئے کیا، خواجہ سعد رفیق کا کہنا تھا کہ اللہ کے فضل سے ضمنی انتخاب میں مثالی کامیابی ملی، قومی اور صوبائی اسمبلی کی 2،2 نشستیں ن لیگ کے نام رہی۔
انہوں نے کہا کہ فیصل آباد، اٹک سے بھی قومی اسمبلی کی نشستیں ہمارے حصے میں آئی ہیں، راولپنڈی سے بھی ن لیگ کے جیتنے کی اطلاع ہے، عوامی مینڈیٹ کا راستہ نہیں روکا جانا چاہیے۔
ن لیگی رہنما کا کہنا تھا کہ پاکستان میں شفاف اور آزادانہ جمہوریت کا سورج طلوع ہوگا، جمہوریت اور آئین کے مطابق چلنے والا پاکستان ہمارا خواب ہے، آج، کل یا پرسو ہمارے اس خواب کی تعبیر پوری ہوگی۔
ان کا کہنا تھا کہ عمران خان کیسے حکمران ہیں ہر وقت آستینیں چڑھا کر اپوزیشن کو للکارتے ہیں، نوازشریف اور شہبازشریف کی قیادت میں کاروان جمہوریت آگے بڑھتا رہے گا۔
ان کا مزید کہنا تھا کہ شہبازشریف، حنیف عباسی اور انجینئر قمرالسلام سمیت تمام سیاسی قیدی رہا کیے جائیں، لیول پلیئنگ فیلڈ نہیں ملے گی تو قانون کے تحت اصلاح کرنا ذمہ داری ہے۔
لاہور: مسلم لیگ ن کے رہنما حمزہ شہباز نے وزیر اعظم پر شدید تنقید کرتے ہوئے کہا کہ حکومت نے 50 دن میں ہی گیس اور بجلی مہنگی کردی، نیازی صاحب صرف قوم سے جھوٹ بولنا جانتے ہیں۔
ان خیالات کا اظہار انہوں نے صحافیوں سے گفتگو کرتے ہوئے کیا، حمزہ شہباز کا کہنا تھا کہ ڈالر 9 روپے مہنگا ہونے سے 900 ارب کا قرضہ قوم پر چڑھ گیا، گلی گلی میں لوگ کہہ رہے ہیں یہ کھلاڑی نہیں اناڑی ہیں۔
انہوں نے کہا کہ نوازشریف نے اندھیرے دور کیے، عزت خدمت سے ملتی ہے، کنٹینر پر چڑھ کر جھوٹ بولنے، ووٹ چوری کرنے سے عزت نہیں ملتی۔
ان کا کہنا تھا کہ شہبازشریف نے صحت کی پرواہ کیے بغیر صوبے کی خدمت کی، شہبازشریف کو گرفتار کرلو، ہم ڈرنے والے نہیں ہیں۔
لیگی رہنما کا کہنا تھا کہ نواز شریف نے موٹر وے بنائی، ایٹمی دھماکے کر کے بھارت کو جواب دیا، نواز شریف نے بھاشا ڈیم کے لیے زمین خریدی۔
ان کا مزید کہنا تھا کہ نیازی چندہ مانگتا رہے گا اور نوازشریف بھاشاڈیم بنائے گا۔
خیال رہے کہ گذشتہ دنوں حمزہ شہباز نے کہا تھا کہ 10 سال میں شہباز شریف نے نیند اور اپنے آرام کو نہیں دیکھا، حکومت نے گیس اور بجلی کی شکل میں مہنگائی کا طوفان برپا کردیا ہے۔
انہوں نے یہ بھی کہا تھا کہ لاہور میں میٹرو بس چلی، ملتان میں میٹرو بس چلی ہے، نواز شریف نے وعدہ کیا 2018 میں اندھیرے ختم کردوں گا آج ملک سے بجلی کا بحران ختم ہوگیا ہے۔
لاہور: سابق وزیر ریلوے اور مسلم لیگ ن کے رہنما خواجہ سعد رفیق نے کہا ہے کہ نئے پاکستان کا خواب دکھانے والوں کو عوام ضمنی انتخابات میں مسترد کردیں گے، ہماری جماعت کامیاب ہوگی۔
ان خیالات کا اظہار انہوں نے صحافیوں سے گفتگو کرتے ہوئے کیا، سعد رفیق کا کہنا تھا کہ 14 اکتوبر کا ضمنی الیکشن عوامی ریفرنڈم ہے، عوام بتادیں گے کہ وہ کس کے ساتھ ہیں۔
ان کا کہنا تھا کہ چودہ اکتوبر غریب عوام کو تکلیف دینے والوں کی چھٹی کا دن ہوگا، عمران خان کو پتہ چلے گا جھوٹ بولیں گے تو عوام مسترد کریں گے۔
لیگی رہنما کا مزید کہنا تھا کہ مخالف گرفتار ہوتا ہے تو وہ بہت خوش ہوتے ہیں، یہ خوشی عارضی ہے، قوم سب جانتی ہے۔
خیال رہے کہ گذشتہ ہفتے خواجہ سعد رفیق نے موجودہ حکومت پر تنقید کرتے ہوئے کہا تھا کہ ایک کروڑ نوکریاں، پچاس لاکھ گھر اور اربوں درخت کہاں ہیں؟
لاہور میں ضمنی الیکشن مہم کے دوران کارکنان سے خطاب کرتے ہوئے انہوں نے کہا تھا کہ عمران خان جو کہتے ہیں وہ کرتے نہیں، اور جو کرتے ہیں وہ بتاتے نہیں ہیں۔
واضح رہے کہ انہوں نے یہ بھی کہا تھا کہ جو ووٹ سے آئے گا وہ ملک کی قسمت کا فیصلہ کرے گا، ضمنی الیکشن میں عمران خان میرے مقابلے میں کسی سیاسی شخصیت کو کھڑا کرتے۔
کراچی: سابق وفاقی وزیر خزانہ اور مسلم لیگ ن کے رہنما مفتاح اسماعیل نے کہا ہے کہ ڈالر کی قدر میں 9روپے اضافے کی وجہ سے ڈیم کی تعمیری لاگت 153 ارب روپے بڑھ گئی۔
اے آر وائی کے پروگرام پاور پلے میں میزبان ارشد شریف کے ساتھ گفتگو کرتے ہوئے مفتاح اسماعیل کا کہنا تھا کہ ہم یہ نہیں کہتے کہ پی ٹی آئی حکومت کی نیت پر کوئی شک نہیں مگر اب تحریک انصاف کو تسلیم کرنا چاہیے کہ وہ ملک کی سربراہ جماعت ہے۔
اُن کا کہنا تھا کہ ڈالر کی قدرمیں 9روپے کا اضافہ بڑی بات اور نااہلی ہے مگر تحریک انصاف کے لوگ یہ کیسے کہہ سکتے ہیں کہ ڈالر کی قیمت 140 روپے تک جائے گی۔
مفتاح اسماعیل کا کہنا تھا کہ عمران خان کیوں نہیں بتارہے ڈالر بڑھنے سے900ارب کانقصان کس وجہ سےہوا، روپے کی قدر میں کمی کے باعث ڈیم کی تخمینہ لاگت بھی 153 ارب روپے تک بڑھ گئی۔
ڈالر کی قیمتوں کو ماضی میں مصنوعی طریقے سے روکا گیا، عثمان ڈار
دوسری جانب وزیراعظم نوجوان پروگرام کے چیئرمین اور تحریک انصاف کے رہنما عثمان ڈار کا کہنا تھا کہ انٹرنیشنل مارکیٹ میں ڈالر مستحکم ہوگیا، ماضی میں امریکی کرنسی کو مصنوعی طریقے سے روکا گیا۔
اُن کا کہنا تھا کہ حکومت جو اقدامات کررہی ہے اُس کے ثمرات ایک سے ڈیڑھ سال میں سامنے ضرور آئیں گے، مفتاح اسماعیل کو پاکستان سے محبت ہے تو وہ اسحاق ڈار کو واپس لے آئیں، ہماری بدقسمتی ہے کہ سابق وزیرخزانہ اشتہاری ہے۔
عثمان ڈار کا کہنا تھا کہ قوم کویقین دلاتاہوں کم از کم وزیرخزانہ اسدعمرملک چھوڑ کر نہیں بھاگیں گے، اسحاق ڈار کو وطن واپس لاکر پوچھنا چاہتے ہیں 13ہزار سے قرضہ 30ہزار ارب تک کیسے پہنچا؟۔
تحریک انصاف کے رہنما کا کہنا تھا کہ ن لیگ حکومت نے 480ارب سرکلر ڈیٹ کو1.3کھرب پر پہنچادیا۔ پی ٹی آئی حکومت ابھی آئی ہے ہم اپنی پالیسی مرتب کررہےہیں۔
اُن کا مزید کہنا تھا کہ مفتاح اسماعیل جس عرصے میں تھے اس عرصہ میں معاشی دھماکےکے لیے کام ہوا جس کا اشارہ نوازشریف نے بھی دیا تھا، موجودہ صورتحال اسی کا تسلسل ہے۔
پی ٹی آئی رہنما کا کہنا تھا کہ 50لاکھ گھر، ایک کروڑ نوکریوں کی بات کی تو مذاق اڑایاگیا، عمران خان نے آج پالیسی سامنے رکھ دی ، جو مشکل ضرور ہے مگر ناممکن نہیں، روٹی،کپڑا اور مکان کا نعرہ پیپلزپارٹی کا تھا جسے ہم پورا کرنے جارہے ہیں۔
لاہور: قومی احتساب بیورو نے سابق وفاقی وزیرریلوے خواجہ سعد رفیق اور اُن کے بھائی کو 16 اکتوبر کو طلب کرلیا، وزیراطلاعات پنجاب فیاض الحسن چوہان نے تصدیق کی ہے کہ دونوں افراد کا نام ای سی ایل میں شامل کردیا بعد ازاں وفاقی وزیر اطلاعات نے اس کی تردید کی۔
ذرائع کے مطابق نیب نےخواجہ سعدرفیق اور اُن کے بھائی خواجہ سلمان رفیق کوپیراگون ہاؤسنگ سوسائٹی کرپشن اسکینڈل میں طلب کیا، قومی احتساب بیورو نے ہدایت کی کہ تمام دستاویزات اور منی ٹریل لے کر آئیں۔
ذرائع کے مطابق اگر 16 اکتوبر کو سعد رفیق مطلوبہ دستاویزات فراہم نہ کرسکے تو اُن کی بھی گرفتاری کا امکان ہے۔
دوسری جانب وزیراطلاعات فیاض الحسن چوہان نے اے آر وائی نیوز سے گفتگو کرتے ہوئے تصدیق کی کہ خواجہ سعد رفیق اور اُن کے بھائی کا نام ایگزیٹ کنٹرول لسٹ میں ڈال گیا اور اب وہ ملک نہیں چھوڑ سکیں گے۔
اُن کا کہنا تھا کہ پیراگون ہاؤسنگ سوسائٹی آشیانہ اسکیم کی بینفشری ہے، فوادحسن فوادآشیانہ ہاؤسنگ اسکیم میں وعدہ معاف گواہ بن چکے اس لیے شہباز شریف کی گرفتاری عمل میں لائی گئی۔
وفاقی وزیراطلاعات کی تردید
بعد ازاں وفاقی وزیر اطلاعات نے خواجہ سعد رفیق اور اُن کے بھائی کا ای سی ایل میں شامل کرنے کی تردید کرتے ہوئے کہا کہ حکومت نے فی الحال کوئی فیصلہ نہیں کیا، نیب آزاد ادارہ ہے وہ جو بھی فیصلہ کرے گا اُس پر وفاق قانون کےتحت معاونت پیش کرے گی۔
واضح رہے کہ سابق وزیر ریلوے خواجہ سعد رفیق، ان کے بھائی اور سابق صوبائی وزیر برائے صحت خواجہ سلمان رفیق کو نیب لاہور نے پیراگون ہاؤسنگ سوسائٹی اسکینڈل کیس میں پوچھ گچھ کے لیے 5 اگست کو طلب کیا تھا۔
اس ضمن میں ذرائع کا کہنا ہے کہ حکم نامے میں دونوں شخصیات کو ہدایت کی گئی تھی کہ اپنے ساتھ پیراگون ہاؤسنگ سوسائٹی کا ریکارڈ لے کرآئیں۔
واضح رہے کہ سابق وزیر اعلیٰ پنجاب شہباز شریف کو صاف پانی اسکینڈل کی تحقیقات کے لیے نیب میں پیشی کے لیے آئے تھے اور انہیں آشیانہ کمپنی کیس میں کرپشن کے الزامات میں حراست میں لے لیا گیا۔
نیب کے ترجمان کا کہنا تھا کہ شہباز شریف کی گرفتاری آشیانہ ہاؤس اسکینڈل میں غیرقانونی ٹھیکے دینے پر عمل میں آئی ہے کل انہیں عدالت میں پیش کیا جائے گا۔
