کراچی: رینجرز اور پولیس سے مقابلوں میں ایک ملزم ہلاک جبکہ ایک زخمی حالت میں گرفتار کر لیا گیا ہے، اورنگی ٹاون میں فائرنگ سے ایک شخص زخمی ہوگیا۔
ترجمانِ رینجرز کے مطابق کراچی کے علاقے سہراب گوٹھ میں پولیس اور رینجرز نے مشترکہ کارروائی کی، قانون نافذ کرنے والے اداروں کے اہلکاروں کو دیکھتے ہی ملزمان نے فائرنگ شروع کر دی، مبینہ مقابلے میں ایک ملزم ہلاک ہوگیا۔
ترجمانِ رینجرز کے مطابق ہلاک دہشت گرد کی شناخت عزیز افغانی کے نام سے ہوئی ہے، ملزم اغواء برائے تاوان سمیت دیگر سنگین وارداتوں میں ملوث تھا۔
دوسری طرف ڈیفنس میں مبینہ پولیس مقابلے میں ایک ملزم کو زخمی حالت میں گرفتار کر لیا گیا، زخمی ملزم کے قبضہ سے اسلحہ بھی برآمد ہوا، اورنگی ٹاؤن قطر اسپتال کے قریب نامعلوم افراد کی فائرنگ سے ایک شخص زخمی ہوگیا۔
دوسری جانب کراچی کے علاقے اورنگی ٹاوٴن الطاف نگر میں بائیس افراد کی ٹارگٹ کلنگ میں ملوث ملزم فرار کی کوشش کرتے ہوئے مبینہ مقابلے میں مارا گیا، ملزم عبید الرحمان کو گزشتہ روز میڈیا کے سامنے پیش کیا گیا تھا۔
پولیس حکام کا دعوی ہے کہ ملزم کو ساتھیوں کی نشاندہی کے لئے سرجانی ٹاوٴن سے اورنگی ٹاوٴن لایا جارہا تھا، پولیس کے بقول ملزم پولیس اہلکار سے بندوق چھین کر فرار ہونے کی کوشش میں مارا گیا جبکہ دو طرفہ فائرنگ کے نتیجے میں ایک پولیس اہلکار زخمی ہوا۔
گزشتہ روز پولیس نے ٹارگٹ کلر عبید الرحمان کو میڈیا کے سامنے پیش کیا تھا کہ پریس کانفرنس میں ڈی آئی جی ویسٹ طاہر نوید کا کہنا تھا کہ ملزم نے آٹھ پولیس اہلکار اور بائیس شہریوں کو قتل کیا۔
ملزم عبیدالرحمان نے بھی میڈیا کے سامنے اپنے جرائم کا اعتراف کیا تھا ساٹ پولیس کے مطابق ملزم عبید الرحمان کی فائرنگ سے پولیس اہلکار بھی زخمی ہوا۔
