کراچی : جرائم پیشہ عناصر کے خلاف گھیرا تنگ ہوتا جارہا ہے۔ سہراب گوٹھ افغان بستی میں مقابلے کے بعد کالعدم تنظٰیم کے دو دہشت گرد مارے گئے، چار فرار ہونے میں کامیاب ہوگئے۔
تفصیلات کے مطابق سہراب گوٹھ افغان بستی سے متصل مچھر کالونی میں حساس اداروں کی نشاندہی پر دہشت گردوں کے خلاف کارروائی کی گئی، کارروائی ایس ایس پی ملیر راؤ انوار کی سربراہی میں کی گئی۔
ایس ایس پی ملیر کا کہنا تھا کہ دہشت گردوں کی تعداد چھ تھی، ملزمان نے پولیس کو دیکھتے ہی فائرنگ کردی، پولیس کی جوابی فائرنگ میں دو دہشت گرد ہلاک جبکہ 4 فرار ہونے میں کامیاب ہوگئے۔
ایس ایس پی راؤ انوار کے مطابق ہلاک دہشت گردوں کا تعلق کالعدم تنظیم سے ہے، ہلاک دہشت گرد عبداللہ عرف کوبرا اور اس کا ساتھی دہشت گردی کی کئی وارداتوں میں ملوث ہیں۔
ملزمان 16 دسمبر کو کراچی میں دہشت گردی کی منصوبہ بندی کر رہے تھے، راؤ انوار کا کہنا تھا ملزمان سچل تھانے کے 2 سپاہیوں کو شہید کرنے میں بھی ملوث ہو سکتے ہیں۔
حتمی طور پر ملنے والے اسلحے کی فارنسک رپورٹ کے بعد ہی بتایا جا سکے گا،ملزمان کے قبضےسے اسلحہ، دستی بم اور موٹرسائیکل برآمد کرلی گئی۔
