ڈی آئی خان : موبائل پرحملےکا مقدمہ تھانہ سی ٹی ڈی میں درج کرلیا گیا ، مقدمے میں دہشت گردی کی دفعات شامل کی گئی ہے اور 9 دہشت گردوں کو نامزد کیا گیا ہے۔
تفصیلات کے مطابق ڈی آئی خان میں پولیس موبائل پرحملے کا مقدمہ تھانہ سی ٹی ڈی میں درج کرلیا گیا ، مقدمہ ایس ایچ او کلاچی سب انسپکٹرعطااللہ چوہدری کی مدعیت میں درج کیاگیا، جس میں دہشت گردی کی دفعات شامل کی گئی ہے جبکہ 9دہشت گرد نامزد کئے گئے ہیں۔
مقدمے میں کہا گیا پولیس موبائل انسدادپولیو ٹیم کی ڈیوٹی پرجارہی تھی ، دہشت گردوں نے نصب بم دھماکے کے بعدفائرنگ بھی کی، دہشت گردوں کی فائرنگ سے ایک جوان شہید ہوا۔
گذشتہ روز خیبرپختونخواہ کے شہر ڈیرہ اسماعیل خان کی تحصیل کلاچی میں پولیس موبائل پر بم حملہ کیا گیا تھا حملے کے نتیجے میں ایک اہلکارشہید اور 2زخمی ہوگئے تھے ، پولیس کا کہنا ہے کہ اہلکاروں کو پولیوٹیموں کی سیکورٹی پر بھیجاجارہاتھا۔
مزید پڑھیں : ڈیرہ اسماعیل خان میں پولیس موبائل پر بم حملہ، ایک اہلکار شہید ، 2 زخمی
پولیس کاکہنا تھا کہ شہید اہلکار کی شناخت ریاض کے نام سے ہوئی ہے جبکہ شکیل اورعطااللہ زخمی ہیں ، دھماکے کے بعد سیکیورٹی فورسز نے پہنچ کر علاقے کو گھیرے میں لے لیا اور سرچ آپریشن شروع کردیا۔
یاد رہے چند روز قبل ڈیرہ اسماعیل خان میں سی ٹی ڈی نے بگوانی گاؤں میں مکان پر چھاپہ مارا تو دہشت گردوں نے فائرنگ کردی تھی، سی ٹی ڈی کی جوابی فائرنگ سے 2دہشت گرد مارے گئے تھے۔
دہشت گردوں سے وائر لیس سیٹ، کلاشنکوف، دستی بم اور بارودی مواد برآمد ہوئی تھی، ہلاک دہشت گردوں کا تعلق کالعدم ٹی ٹی پی کھیارہ گروپ سے تھا، مارے گئے دہشت گرد پولیس چیک پوسٹ پر حملے میں ملوث تھے۔
