ARYNews.tv | Urdu – Har Lamha Bakhabar

Tag: Police violence

  • پولیس تشدد سے نوجوان کا پیٹ پھٹ گیا، آنتیں باہر نکل آئیں، دردناک ویڈیو

    پولیس تشدد سے نوجوان کا پیٹ پھٹ گیا، آنتیں باہر نکل آئیں، دردناک ویڈیو

    بہار : بھارتی ریلوے پولیس اہلکاروں نے مسلمان نوجوان پر وحشیانہ تشدد کرکے اس کا پیٹ پھاڑ دیا، آنتیں باہر نکل گئیں۔

    بھارتی ریاست بہار کے ریلوے اسٹیشن پر پولیس اہلکاروں نے فرعونیت کی مثال قائم کردی، ٹرین کی سیٹیں بیچنے کے الزام پر نوجوان پر اس سفاکیت سے تشدد کیا کہ اس کا پیٹ پھٹ گیا اور آنتیں باہر نکل آئیں۔ نوجوان کا گزشتہ سال پیٹ کا آپریشن ہوا تھا کہ ٹانکے پھٹ گئے۔

    بھارتی میڈیا رپورٹ کے مطابق زخمی ہونے والے فرقان نامی نوجوان نے ریلوے پولیس کی جانب سے ٹرینوں میں سیٹوں پر قبضہ کرکے انہیں بھاری رقوم کے عوض بیچنے پر احتجاج کیا تھا، جس پر اہلکاروں نے اس کا یہ حال کردیا وہ اپنی خالہ کو اسٹیشن چھوڑنے آیا تھا۔

    سوشل میڈیا پر وائرل ہونے والی اس ہولناک واقعہ کی ویڈیو نے دیکھنے والوں کو بھی غم و غصے میں مبتلا کردیا۔

    میڈیا رپورٹ کے مطابق یہ واقعہ جمعرات کی شام اس وقت پیش آیا جب ممبئی جانے والی کربھومی ایکسپریس ٹرین جنک پور روڈ ریلوے اسٹیشن پر پہنچی اور مسافروں کے دو گروپوں کے درمیان ٹرین میں سیٹوں کے حوالے سے بحث شروع ہوگئی، جس پر جی ریلوے پولیس اہلکاروں نے مداخلت کی۔

    اس دوران مسافروں اور پولیس اہلکاروں کے درمیان بحث و تکرار ہوگئی عینی شاہدین نے الزام لگایا کہ پولیس اہلکاروں نے مسافروں پر لاٹھی چارج کیا اور ایک پولیس اہلکار نے فرقان کے پیٹ پر زور دار لاٹھی ماری جس سے اس کی آنتیں باہر نکل گئیں۔

    دریں اثنا مظفر پور پولیس نے کہا ہے کہ دونوں اہلکاروں کو معطل کرکے لاک اپ کردیا ہے جبکہ واقعے کے بعد مقدمہ درج کرکے تحقیقات کا آغاز کردیا گیا ہے۔

  • ایم پی اے کو سڑکوں پر گھسیٹ کر پارلیمان کا تقدس پامال کیا گیا، عمران اسماعیل

    ایم پی اے کو سڑکوں پر گھسیٹ کر پارلیمان کا تقدس پامال کیا گیا، عمران اسماعیل

    کراچی : گورنر سندھ عمران اسماعیل نے کہا ہے کہ متحدہ قومی موومنٹ پاکستان کی ریلی پر پولیس تشدد قابل مذمت ہے۔

    ایم کیوایم کارکن محمد اسلم کی فاتحہ سوئم میں گورنر سندھ عمران اسماعیل نے بھی شرکت کی اور مرحوم کے اہل خانہ سے اظہار تعزیت کیا۔

    گورنرسندھ عمران اسماعیل نے محمد اسلم مرحوم کے اہل خانہ اور ایم کیوایم قیادت سے ملاقات کی اس موقع پر گورنر سندھ نے ایم کیو ایم کی پرامن ریلی پر تشدد کی شدید الفاظ میں مذمت کی۔

    عمران اسماعیل کا کہنا تھا کہ ایم کیو ایم پاکستان کے پرامن احتجاج کے دوران پولیس کی جانب سے بہیمانہ تشدد کیا گیا، ایم پی ایز کو سڑکوں پر گھسیٹ کر پارلیمان کا تقدس پامال کیا گیا۔

    گورنرسندھ نے کہا کہ ڈکٹیٹروں سے بھی زیادہ سخت معاملات سندھ میں ہورہے ہیں، سندھ حکومت کو چاہئے، محمد اسلم کی شہادت پر اس کے اہل خانہ کو معاوضہ ادا کرے۔

    ان کا مزید کہنا تھا کہ سندھ حکومت تمام معاملات افہام وتفہیم سے حل کرسکتی ہے اور ایم کیو ایم میں بھی سمجھدار قیادت موجود ہے۔

  • سیہون: پولیس کے مبینہ تشدد سے نوجوان ہلاک، لواحقین سراپا احتجاج

    سیہون: پولیس کے مبینہ تشدد سے نوجوان ہلاک، لواحقین سراپا احتجاج

    دادو: پولیس حراست میں نوجوان کی ہلاکت پر ایس ایس پی جامشورو نے نوٹس لیتے ہوئے ایس ایچ او سمیت چھ پولیس اہلکاروں کو معطل کردیا ہے۔

    تفصیلات کے مطابق واقعہ گذشتہ روز پیش آیا تھا، جہاں سید عبداللّٰہ شاہ انسٹیٹیوٹ آف میڈیکل سائنس میں موٹر سائیکل چوری ہوئی تھی، چوری کے الزام میں پولیس نے راشد لاشاری نامی نوجوان کو حراست میں لیا۔

    پولیس کےمطابق لاک اپ میں نوجوان کی طبیعت بگڑنے پر اسے بھان سعید آباد ہیلتھ سینٹر منتقل کیا گیا، لیکن دورانِ علاج وہ انتقال کرگیا، متوفی کے ورثا نے الزام عائد کیا ہے کہ نوجوان کی ہلاکت پولیس تشدد سے ہوئی ہے۔

    واقعے کے بعد ورثا نے لاش سیہون انڈس ہائی وے روڈ پر رکھ کر دھرنا دیا، احتجاج کے باعث لاڑکانہ سے حیدرآباد آنے جانے والا ٹریفک کئی گھنٹوں سے متاثر ہے۔

    ایس ایس پی جامشورو نے واقعے کا نوٹس لیتے ہوئے ایس ایچ او سیہون ذوالفقاراوڈہانو کو معطل کردیا ہے، اور ان کے خلاف مقدمہ بھی درج کرلیا گیا ہے، مقدے میں میں ایس ایچ او سیہون سمیت چھ افراد کونامزد کیا گیا ہے۔

  • آئی ایس اوکی امریکہ مردہ باد ریلی، شرکاء پر پولیس کا لاٹھی چارج

    آئی ایس اوکی امریکہ مردہ باد ریلی، شرکاء پر پولیس کا لاٹھی چارج

    کراچی : نمائش چورنگی پر پولیس اور آئی ایس او کی امریکہ مردہ باد ریلی کے شرکاء کے درمیان گھمسان کی جنگ ہوگئی، لاٹھی چارج ، آنسو گیس اور واٹر کینن کے استعمال  کے باعث علاقہ میدان جنگ کا منظر پیش کرنے لگا۔

    تفصیلات کے مطابق امریکی صدر ڈونلڈ ٹرمپ کے حالیہ پاکستان مخالف بیان کیخلاف آئی ایس او کی جانب سے امریکہ مردہ باد ریلی نکالی گئی،آئی ایس او کی ریلی کے منتظمین نے امریکی قونصلیٹ جانے کااعلان کیا تھا۔

    ریلی کے شرکاء امریکا مردہ باد کے نعرے لگارہے تھے، ریلی کے شرکاء اپنا احتجاج ریکارڈ کرانے کیلئے امریکی قونصلیٹ جانا چاہتے تھے کہ نمائش چورنگی پر شرکاء کو امریکی قونصلیٹ تک جانے سے روکنے کیلئے پولیس نے لاٹھی چارج اور شیلنگ کی۔

    ریلی کےشرکا پرپولیس نے لاٹھی چارج کے علاوہ واٹر کینن کا بھی استعمال کیا، صورتحال کشیدہ ہونے پر ہوائی فائرنگ بھی کی گئی۔ جس کے رد عمل میں شرکاء کی جانب سے بھی پولیس پر پتھراؤ کیا گیا۔

    گھمسان کی یہ جنگ تقریباً آدھا گھنٹے تک جاری رہی، مظاہرین آنسو گیس اور لاٹھی چارج سے بچنے کیلئے امام بارگاہ شاہ خراساں کی جانب چلے گئے، اس دوران پولیس نے متعدد مظاہرین کو گرفتار بھی کرلیا۔

    پولیس نے ریلی کا ساؤنڈ سسٹم جو ایک ٹرک پر نصب تھا اس کو بھی قبضے میں لے لیا، قونصلیٹ جانے والے تمام راستے بند کر دیئے گئے۔

    ایڈیشنل آئی جی کا کہنا ہے کہ امریکی قونصلیٹ جانے کیلئے تین سے چار لوگوں کو اجازت دی جا سکتی ہے تاکہ وہ اپنا احتجاج ریکارڈ کراسکیں۔

    بعد ازاں دونوں جانب سے مذاکرات کے بعد شرکاء منتشر ہوگئے، آخری اطلاعات تک پولیس اور مظاہرین کے درمیان مذاکرات کے بعد طے پایا گیا کہ نماز مغرب کے بعد شرکاء از خود منتشر ہوجائیں گے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔