اسلام آباد : بیرون ملک ٹریڈ افسران کی تعیناتی کے حوالے سے اہم پیشرفت سامنے آئی ہے، حکومت نے 40نئے افسران کی تعیناتی کیلئے پالیسی کی منظوری دے دی۔
تفصیلات کے مطابق وزیراعظم پاکستان شہباز شریف نے بیرون ملک 40 نئے ٹریڈ افسران کی تعیناتی کیلئے پالیسی کی منظوری دے دی ہے۔
اس حوالے سے ذرائع کا کہنا ہے کہ گریڈ 20 کی آسامی پر بیرون ملک 8 ٹریڈ افسران تعینات کیے جائیں گے جبکہ گریڈ 19 کی آسامی پر 23 اور گریڈ 18 کی آسامیوں پر9 ٹریڈ افسران تعینات ہوں گے۔
ذرائع کے مطابق ٹریڈ افسران کی تعیناتی میں اوورسیز پاکستانیز و نجی شعبے کیلئے10فیصد کوٹہ مختص کیا گیا ہے، اسامیوں میں کامرس اینڈ ٹریڈ گروپ گریڈ20کیلئے 40فیصد کوٹہ مختص ہے۔
اس کے علاوہ کامرس اینڈ ٹریڈ گروپ گریڈ 19 کیلئے50، گریڈ18کیلئے60فیصد کوٹہ مختص کیا گیا ہے جبکہ ٹریڈ افسران کی تعیناتیوں کیلئے عمر کی بالائی حد 56سال مقرر کی گئی ہے۔
ذرائع کا کہنا ہے کہ مذکورہ ٹریڈ افسران کی تعیناتیاں تین سال کیلئے کی جائیں گی، تعیناتیوں کیلئے امیدواروں کو ٹیسٹ، انٹرویوز کے عمل سے گزرنا ہوگا، ٹریڈ افسران سڈنی، ہانگ گانگ، شنگھائی، جکارتہ، ریاض میں تعینات ہوں گے۔
اس کے علاوہ واشنگٹن، لندن، قندھار، ٹوکیو، نئی دہلی، بنکاک، نیویارک، میڈرڈ اور جدہ سمیت دیگر مختلف اسٹیشنز پر ٹریڈ افسران تعینات کیے جائیں گے۔