وطن عزیز اس وقت بدترین سیاسی و معاشی صورتحال کے حوالے سے مشکل دور سے گزر رہا ہے، ایک طرف معاشی مسائل نے بری طرح ملک کو اپنی لپیٹ میں لیا ہوا ہے تو دوسری جانب سیاسی عدم استحکام کے باعث عوام کی پریشانیوں میں بھی اضافہ ہورہا ہے۔
ملک بھر میں ہونے والی ہوشربا مہنگائی کی وجہ سے عوام میں شدید بےچینی اور اضطراب پایا جاتا ہے، نہ صرف غریب بلکہ متوسط طبقہ بھی اس صورتحال سے بہت پریشان ہے ماہرین معاشیات اس سیاسی اور معاشی صورتحال کو بحران کی بڑی وجہ قرار دے رہے ہیں۔
اے آر وائی نیوز کے پروگرام سرعام کے میزبان اقرار الحسن نے لاہور کے مختلف علاقوں میں تاجر برادری سے ان کا مؤقف جاننے کی کوشش کی اس موقع پر تاجروں نے ملک کے سیاسی ومعاشی حالات سے متعلق اپنے خیالات کا اظہار کیا۔
اے آر وائی نیوز سے بات کرتے ہوئے تاجروں نے موجودہ سیاسی اور اقتصادی حالات کا قصور وار سیاسی جماعتوں اور پچھلی حکومتوں کو ٹھہراتے ہوئے اپنے شدید تحفظات کا اظہار کیا۔
ایک تاجر کا کہنا تھا کہ ملک سے کرپشن کے خاتمے کیلیے چین کے طرز پر کام کرنا پڑے گا، ہماری دعا ہے کہ اگلے الیکشن کے نتائج جیسے بھی ہوں لیکن جو بھی آئے اس ملک اور قوم کیلیے اچھا ہو۔
ایک اور تاجر نے گزشتہ پی ٹی آئی دور حکومت کو حالات کا قصور وار ٹھہراتے ہوئے کہا کہ جس روز ن لیگ کو حکومت ملی سارے مسائل حل ہوجائیں گے۔
جس کے جواب میں ایک تاجر نے کہا کہ پی ٹی آئی کے تین سال میں جو کچھ ہوا اس کو ایک طرف رکھیں لیکن جو گزشتہ 16 ماہ میں ہوا اس کی مثال 30 سال میں نہیں ملتی۔ پی ٹی آئی کی حکومت گرتے ہی مہنگائی کے نئے طوفان نے جنم لیا۔
انارکلی بازار کے ایک مقامی تاجر نے کہا کہ بدقسمتی سے پاکستان میں کوئی ایسا سیاستدان نہیں جس پر اعتبار کیا جائے کیونکہ یہ سب لوگ انفرادی طور پر تو ترقیاں کرلیتے ہیں لیکن مجموعی طور قوم جہاں تھی آج بھی وہیں کھڑی ہے۔
شفاف اور غیر جانبدارانہ انتخابات کے حوالے سے سوال کا جواب ایک تاجر نے شعر سنا کر دیا کہ
حق بات کو زمانے سے چھپا رکھا ہے
عجب تماشا سرعام لگا رکھا ہے
انہوں نے کہا کہ ہر شہری کو اپنا کردار ادا کرتے ہوئے محب وطن پاکستانی بننا ہوگا، یہان ہر چیز کو بدلنا ہوگا تب جاکر صحیح معنوں میں جمہوریت پروان چڑھے گی۔
