لاہور : چنبہ ہاؤس میں پراسرار طور پر ہلاک ہونے والی ن لیگ کی کارکن متوفیہ سمعیہ چوہدری کی پوسٹ مارٹم رپورٹ آگئی۔ جس کے مطابق خاتون کے پھیپڑوں میں سیاہ دھبے پائے گئے۔

تفصیلات کے مطابق لاہور کے چنبہ ہاؤس میں لیگی کارکن کی سمعیہ کی پراسرار ہلاکت کے بعد پوسٹ مارٹم رپورٹ سامنے آگئی ہے، رپورٹ کے مطابق خاتون کے پھیپھڑوں پر سیاہ دھبے پائے گئے ہیں۔ جبکہ متوفیہ کے جسم پر تشدد کا کوئی نشان نہیں۔

نمونے فرانزک لیبارٹری بھجوادیئے گئے ہیں، ڈاکٹروں کا کہنا ہے کہ سمعیہ چوہدری کی موت کی وجہ کا تعین فرانزک رپورٹ آنے پر کیا جائے گا۔ پولیس کے مطابق سمعیہ چوہدری کیس میں نوے افراد کو شامل تفتیش کیا گیا ہے۔

چنبہ ہاؤس میں خاتون کو ضمانت پر کمرہ دلوانے والے ملازم سلامت کو بھی حراست میں لے لیا گیا ہے، واضح رہے کہ لیگی کارکن 35 سالہ سمعیہ چوہدری چند روز قبل چنبہ ہاؤس کے ایک کمرے میں مردہ پائی گئی تھیں۔ مذکورہ کمرہ ن لیگ کےایم این اے چوہدری اشرف کا ہے۔

اس حوالے سے چوہدری اشرف کا کہنا تھا کہ وہ اس بارے میں نہیں جانتے کہ خاتون کو کمرہ کس نے دیا۔ انہوں نے بتایا کہ سمعیہ کےشوہرنے فون کرکے اپنی اہلیہ سے متعلق پوچھا تھا۔

مزید پڑھیں : رکن قومی اسمبلی کے کمرے سے لیگی خاتون کارکن کی لاش برآمد

پولیس ذرائع کے مطابق جس کمرے میں سمیعہ مقیم تھی وہ اسے ایم این اے چودھری محمد اشرف نے نہیں بلکہ چنبہ ہاؤس کے ملازم سلامت نے اپنی ضمانت پر دلوایا تھا۔

گاڑی کا مالک بھی کوئی اشرف نامی شخص نکلا۔ دونوں افراد پولیس کی حراست میں ہیں جن سے تفتیش جاری ہے۔ چنبہ ہاؤس میں سمعیہ کی خدمت پر مامور ملازم زین العابدین کو بھی حراست میں لے لیا گیا ہے۔