کراچی: بلاول بھٹو زرداری نے کہا کہ سندھ حکومت نے 24 ہزار سے زائد لیڈی ہیلتھ ورکرزکو مستقل کرنے کے احکامات جاری کردیے ہیں۔
وزیراعلیٰ ہاؤس کراچی میں لیڈی ہیلتھ ورکرزکومستقل کرنے کے آرڈر دیے جانے کی تقریب سے خطاب میں پیپلزپارٹی کے چیئرمین بلاول بھٹو نے کہا کہ آج بہت خوشی ہورہی ہے شہید بے نظیر بھٹو کا خواب آج پورا ہوا ہے،انہوں نے کہا کہ آج ہزاروں خواتین کو مستقل روزگارمیس ہوا ہے جس کاکریڈٹ پاکستان پیپلزپارٹی کی موجودہ حکومت کوجاتا ہے۔
بلاول بھٹو زرداری کاکہنا تھا کہ روزگارکی فراہمی پی پی کے پروگرام کا حصہ ہے، ہم پرفرض ہے کہ قوم کی خدمت کریں، انہوں نے کہا کہ شہید بے نظیر بھٹو کا خواب آج پورا ہوا ہے، انہوں نے کہا کہ اس 18 اکتوبر کو یہ نعرہ دیں گے بی بی کا آصف آئے گا روزگار لائے گا،بی بی کا بلاول آئے گا روزگار لائے گا، اس موقع پر بلاول بھٹو زرداری نے مرسوں مرسوں سندھ نہ ڈیسوں، پاکستان نہ ڈیسوں کے نعرے بھی لگائے۔
اس موقع پروزیراعلیٰ سندھ سید قائم علی شاہ کاکہنا تھا کہ بے نظیر بھٹو کا مشن تھا کے عورتیں مردوں کے شانہ بشانہ کھڑی ہو انہوں نے کہا کہ مستقل ہونے میں لیڈی ہیلتھ ورکرزکی اپنی جدوجہد بھی شامل ہے۔
وزیراعلیٰ سندھ کاکہنا تھا کہ سی سی آئی کے اجلاس میں صوبوں کے وزیراعلیٰ نے لیڈی ہیلتھ ورکرز کو مستقل کرنے کی مخالفت کی،مین نے تینوں وزراء اعلیٰ کوکہا اگر اس پروگرام کو ختم کیا تو یہ خواتین تم کو نہیں چھوڑیں گی،اس موقع پر سیکریٹری صحت اقبال درانی نے بتایا کہ ایک لاکھ خواتین کی ڈلیوری کے دوران 500 بچے جاں بحق ہوجاتے تھے جو اب 180 تعداد ہوگئی ہے ۔
