Tag: ppp-karachi-rally

  • کراچی میں نفرت اور تقسیم کی سیاست کی اجازت نہیں دینگے، بلاول بھٹو

    کراچی میں نفرت اور تقسیم کی سیاست کی اجازت نہیں دینگے، بلاول بھٹو

    چیئرمین پاکستان پیپلز پارٹی کا کہنا ہے کہ جو مزہ کراچی میں آتا ہے کہیں اور نہیں آتا، کیونکہ یہ میرا اپنا شہر ہے، میں کراچی میں پیدا ہوا اور والدہ شہید بینظیر بھٹو بھی اسی شہر میں پیدا ہوئی تھیں۔

    چیئرمین پیپلز پارٹی بلاول بھٹو زردراری کا کراچی سے نکالی جانے والی انتخابی ریلی سے خطاب کرتے ہوئے کہنا تھا کہ میں کراچی کی ترقی میں کردار ادا کرنا چاہتا ہوں تو مطلب اپنے گھر کا خیال رکھنا چاہ رہا ہوں۔

    بلاول بھٹو نے کہا کہ کراچی کے عوام نے بلدیاتی الیکشن میں پی پی پر اعتماد کیا، کراچی کے عوام نے پہلی بار میئر جیالہ منتخب کرایا، انہوں نے کہا کہ 8 فروری کو ملک میں عام انتخابات ہونے جارہے ہیں۔

    بلاول بھٹونے کہا کہ کراچی کے عوام مجھ پر اعتماد کرکے قومی، صوبائی نمائندوں کو منتخب کرائیں گے، یہ پہلی بار ہوگا کہ بلدیاتی حکومت سمیت صوبائی حکومت ہمارے پاس ہوگی۔

    آپ مجھے ووٹ دیں گے تو وفاق میں بھی پی پی کی حکومت ہوگی، تمام 20سیٹیں پی پی کو دلوائیں تو 5سال میں کراچی کا نقشہ بدل دینگے، وفاق میں پی پی کی حکومت بنی تو کراچی شہر سے کام شروع ہوگا۔

    بلاول بھٹو نے کہا کہ آپ ساتھ ملکر صوبائی حکومت بھی بنواتے ہیں تو کراچی کی نمائندگی کابینہ میں بھی ہوگی، ہم ساتھ مل کر کراچی کے عوام کی خدمت کرینگے، باقی سیاسی جماعتیں اس الیکشن میں اپنے مقصد کیلئے حصہ لے رہی ہیں۔

    کراچی کے عوام ساتھ دیتے ہیں تو کام بھی کراچی میں ہوگا، آپ اپنے دوستوں کو سمجھائیں کہ پی پی اور باقی جماعتوں کا موازنہ کرلیں، باقی سیاسی جماعتیں نفرت اور تقسیم کی سیاست کررہی ہیں۔

    انہوں نے کہا کہ ہر کوئی اپنا چورن بیچ رہا ہے، کوئی مذہب کوئی لسانیت، فرقہ واریت کی بنیاد پر کراچی کو تقسیم کرنا چاہتا ہے، کراچی کے عوام 8 فروری کو تیر پر مہر لگا کر تمام قوتوں کو جواب دیں۔

    مجھے نکالنے والے چلے گئے، میں آج وہی کھڑا ہوں، نوازشریف

    بلاول بھٹو نے کہا کہ یہ نا تیرا نا میرا یہ سب کا کراچی ہے، کراچی میں نفرت، تشدد اور تقسیم کی سیاست کی اجازت نہیں دینگے، کراچی نے جو قربانیاں دی ہیں وہ تاریخ کا حصہ ہے۔

  • پیپلز پارٹی کا نشتر پارک میں جلسہ :  آج کون کون سے راستے بند ہوں گے؟

    پیپلز پارٹی کا نشتر پارک میں جلسہ : آج کون کون سے راستے بند ہوں گے؟

    کراچی : ٹریفک پولیس نے پیپلز پارٹی کے نشتر پارک میں جلسے کے پیش نظر روٹ پلان جاری کردیا، سینٹرل سے آنے والے شرکا براستہ لیاقت آباد سے آسکیں گے۔

    تفصیلات کے مطابق کراچی میں پاکستان پیپلز پارٹی کے نشتر پارک میں جلسے کے لئے ٹریفک پولیس کی جانب سے روٹ پلان جاری کردیا گیا۔

    ٹریفک پولیس کا کہنا ہے کہ شرکا کے لیے دو پارکنگ لاٹس تیار کردی گئی جبکہ طائی کراٹے سینٹر اور جناح گراونڈ میں پارکنگ کا انتظام کیا گیا ہے۔

    پلان میں بتایا گیا کہ سینٹرل سے آنے والے شرکا براستہ لیاقت آباد سے آسکیں گے ، ڈاکخانہ اور گرومندر سے نمائش تک کا راستہ کھولا جائے گا، شرکا اپنی گاڑیاں پارک کر کے جلسہ کے مقام پر جا سکتے ہیں۔

    ٹریفک پولیس کے مطابق ساؤتھ اور ویسٹ سے آنے والے شرکابراستہ ایم اے جناح سے آسکیں گے، کیپری سے ہوتے ہوئے نمائش کے قریب پارکنگ گراؤنڈ جاسکیں گے۔

    پلان کے تحت ضلع ملیر اور ایسٹ سے آنے والے شرکابراستہ شارع فیصل آسکیں گے جبکہ شارع قائدین سے سوسائٹی سگنل اور پھر نمائش چورنگی جاسکیں گے۔

    ٹریفک پولیس کا کہنا تھا کہ شہریوں کے لیے متبادل راستے بھی بنا دیے گئے ہیں، بس، منی بس اور دیگر ٹریفک کو نمائش جانے کی اجازت نہیں ہوگی، ہر قسم کی ہیوی ٹریفک کا داخلہ نمائش چورنگی کی جانب ممنوع ہوگا۔