گجرات : پیپلزپارٹی بھٹو شہید کی چیر پرسن غنویٰ بھٹو نے کہا ہے کہ زرداری اور نواز شریف نے سامراجی قوتوں کے ہاتھوں ملک کے تمام سرکاری ادارے فروخت کر دیئے ہیں اگر ملکی ادارے اسی طرح فروخت ہوتے رہے تو ملک کیسے قائم رہ سکے گا۔
ان خیالات کا اظہار انہوں نے گجرات کے شہر ڈنگہ میں ورکر کنونشن سے خطاب کرتے ہوئے کیا۔ غنویٰ بھٹو کا کہنا تھا کہ بھٹو نے اپنی زندگی میں کہا تھا کہ پاکستان میں دو بھٹو ہیں ایک میں اور دوسرے عوام مگر آج پارلیمنٹرینز نے پیپلزپارٹی پر قبضہ کر کے اسے عوام کا دشمن بنا دیا ہے۔
بھٹو کی پارٹی پر جنرل ضیاء الحق کے دور سے پابندی ہے کیونکہ بھٹو کا نشان تلوار تھا، انہوں نے کہا کہ میں انیس سالوں سے جبر اور ظلم برداشت کر رہی ہوں۔
سندھ کے عوام کبھی بھی پنجاب کے مخالف نہیں رہے مگر پانی کی تقسیم پر انصاف ہونا چاہیئے، غنویٰ بھٹو کا کہنا تھا کہ بھٹو شہید نے غریب عوام کو شعور دیا روزگاردیا، بولنے کی طاقت دی بڑے بڑے ملکی اداروں کو نیشلائز کیا مگر آج زرداری اور نواز شریف نے ملک کے تمام ادارے نجکاری کے نام پر فروخت کر دیئے ہیں۔
انہوں نے کہا کہ پیپلز پارٹی کے نام پر لوٹ مار کر کے ملک سے فرار ہونے والوں کو بھٹو شہید کے ساتھ کوئی تعلق نہیں ہے اگرعوام چاہتے ہیں تو وہ زرداری اور نواز شریف کے خلاف گھروں سے نکل کر سڑکوں پر آ جائیں جب تک عوام بیدار نہیں ہوں گے اس وقت تک بھٹو شہید کا نام لینے والے پستے رہیں گے۔
