Tag: PPP

اسلام آباد: پاکستان پیپلز پارٹی کی قیادت نے انتخابات سے قبل پنجاب پر فوکس کرنے کا فیصلہ کیا ہے، اور سی ای سی اجلاس لاہور میں منعقد کیا جائے گا، جس کے لیے آصف زرداری اور بلاول بھٹو جلد لاہور کا دورہ کریں گے۔

پیپلز پارٹی ذرائع کے مطابق سی ای سی اجلاس کے انعقاد کے سلسلے میں پی پی قیادت نے پنجاب آنے کا فیصلہ صوبائی قیادت کی ناکامی پر کیا ہے، اور لاہور میں سی ای سی کا مقصد پنجاب میں پارٹی فعال کرنا ہے۔

ذرائع کا کہنا ہے کہ آصف زرداری لاہور میں پارٹی رہنماؤں اور عہدے داروں سے ملاقاتیں کریں گے، اور صوبے میں پارٹی عہدوں پر تعیناتیوں پر مشاورت کی جائے گی، الیکشن سے قبل عوامی رابطہ مہم کے لیے حکمت عملی بھی طے ہوگی، آصف زرداری کے دورہ لاہور میں پارٹی کنونشن کرانے کی تجویز بھی زیر غور ہے۔

پارٹی قیادت پیپلز پارٹی پنجاب کی کارکردگی پر شدید مایوسی کا شکار ہے، ذرائع کا کہنا ہے کہ الیکشن سے قبل پیپلز پارٹی پنجاب میں بڑی کامیابی حاصل نہیں کر سکی، پی پی قیادت کو پنجاب سے اہم شخصیات کی شمولیت کی امید تھی لیکن پی پی پنجاب قیادت صوبے میں پارٹی فعال کرنے میں ناکام رہی ہے۔

پنجاب قیادت صوبے میں تاحال پارٹی کا مستقل صدر بھی تلاش نہیں کر سکی، ذرائع کے مطابق قیادت کی عدم دل چسپی کی وجہ سے پنجاب میں پارٹی کا مستقل صدر مقرر نہیں ہو سکا ہے، عارضی صدر پی پی پنجاب رانا فاروق سعید صوبے میں پارٹی فعال نہیں کر سکے ہیں۔

بتایا جا رہا ہے کہ پنجاب میں پیپلز پارٹی عہدیداروں کی باہمی چپقلش کا شکار ہے، پنجاب کے عہدیداروں کے جھگڑوں سے پارٹی متاثر ہو رہی ہے، ان معاملات کے پیش نظر پی پی قیادت نے لاہور میں سی ای سی اجلاس منعقد کرنے کا فیصلہ کیا ہے، تاہم پی پی قیادت کا گزشتہ دورہ لاہور مطلوبہ نتائج دینے میں ناکام رہا تھا۔

کراچی: شہر قائد کے علاقے سپر ہائی وے بسم اللہ مارکیٹ کے قریب ڈاکوؤں نے اسپیئر پارٹس کے تاجر کو لوٹنے کے بعد قتل کر دیا، مقتول محمد عارف محسود پاکستان پیپلز پارٹی کا علاقائی ذمہ دار تھا۔

تفصیلات کے مطابق کراچی میں سپر ہائی وے بسم اللہ مارکیٹ کے قریب ایک کار پر فائرنگ سے ایک شخص جاں بحق ہو گیا، پولیس حکام کا کہنا ہے کہ فائرنگ سے جاں بحق شخص کی شناخت محمد عارف محسود کے نام سے ہوئی ہے۔

عارف محسود پیپلز پارٹی کا علاقائی ذمہ دار اور اسپیئر پارٹس، ٹائروں کی دکان کا مالک تھا، عارف محسود جیسے ہی دکان سے نکل کر گاڑی میں بیٹھا ڈاکو آ گئے، جنھوں نے مقتول سے 25 ہزار روپے اور موبائل فون چھینا، اور جاتے ہوئے سر پر ایک گولی مار دی۔

پولیس حکام کے مطابق فائرنگ کے وقت گاڑی میں ایک اور شخص بھی موجود تھا جس کا بیان لے لیا گیا، فائرنگ کے وقت اطراف میں لوگ موجود تھے، موٹر سائیکل سوار 2 ملزمان نے فرار ہوتے ہوئے بھی ہوائی فائرنگ کی۔

واقعے کے فوراً بعد پولیس، رینجرز اور کرائم سین یونٹ موقع پر پہنچ گئے تھے، پولیس حکام کا کہنا ہے کہ واقعے سے متعلق مزید تفتیش جاری ہے، جائے وقوع سے تیس بور پستول کے 2 خول ملے ہیں۔

معلوم ہوا ہے کہ مقتول کی نیو سبزی منڈی کے قریب اسپئر پارٹس اور ٹائروں کی دکان ہے، مقتول کے پاس لائسنس یافتہ اسلحہ بھی موجود تھا۔

اسلام آباد: ذرائع کا کہنا ہے کہ پاکستان پیپلز پارٹی کی قیادت کو اسمبلیاں توڑنے کے معاملے پر پارٹی مخالفت کا سامنا ہے، پی پی قیادت اتحادیوں کے دباؤ پر اسمبلیوں کی تحلیل کے لیے رضامند ہوئی۔

پیپلز پارٹی کے ذرائع کا کہنا ہے کہ قومی و سندھ اسمبلی قبل از وقت توڑنے کے معاملے پر پی پی قیادت کو پارٹی مخالفت کا سامنا ہے، پارٹی رہنما سمجھتے ہیں کہ قیادت اتحادیوں کے دباؤ پر اسمبلیوں کی تحلیل کے لیے رضامند ہوئی ہے۔

پیپلز پارٹی قیادت نے فیصلہ لینے کے بعد پارٹی رہنماؤں سے مشاورت کی تھی جس میں رہنماؤں نے قیادت کے فیصلے کی کھل کر مخالفت کی، ذرائع کا کہنا ہے کہ سنیئر پی پی رہنما اسمبلیوں کی مقررہ مدت پوری کرنے اور انتخابات کے جلد از جلد انعقاد کے حامی ہیں، کیوں کہ ان کا کہنا ہے کہ الیکشن میں تاخیر کا پیپلز پارٹی کو آن گراؤنڈ شدید نقصان ہوگا، پی پی ذرائع کے مطابق الیکشن میں تاخیر طویل ہونے کے خدشات موجود ہیں۔

ذرائع نے کہا کہ پیپلز پارٹی کو خیبر پختون خوا میں زبردست عوامی پذیرائی ملی ہے، جسے وہ الیکشن میں کیش کرانا چاہتی ہے، ذرائع کا کہنا ہے کہ پیپلز پارٹی خیبر پختونخوا میں اے این پی کا متبادل بن چکی ہے، جب کہ تحریک انصاف موجودہ صورت حال میں شدید دباؤ کی شکار ہے، جس کی وجہ سے وہ کھل کر الیکشن نہیں لڑ سکے گی۔

پی پی ذرائع کے مطابق پی ڈی ایم عوامی مقبولیت نہ ہونے پر الیکشن سے فرار چاہتی ہے، جب کہ پیپلز پارٹی بروقت الیکشن ہونے پر سیاسی حالات سے فائدہ اٹھا سکتی ہے، الیکشن تاخیر کا سیاسی جماعتوں کو ناقابل تلافی نقصان ہوگا، اس سلسلے میں پی پی رہنما پارٹی قیادت کو جلد فیصلے پر نظر ثانی کی تجویز دیں گے، ایک طرف اگر اسمبلیوں کی مقررہ مدت پوری کرنے سے جمہوری عمل مضبوط ہوگا، تو دوسری طرف الیکشن میں تاخیر جمہوریت کے لیے نیک شگون نہیں ہوگا۔