نئی دہلی : بھارت کے سابق نائب صدر پرناب مکھرجی بھی کورونا وائرس کا شکار ہوگئے، اس سے قبل بھارت کی کئی اہم شخصیات بھی اس مہلک وبا میں مبتلا ہوچکی ہیں۔
تفصیلات کے مطابق بھارت کے سینئر سیاستدانوں امیت شاہ، شیوراج سنگھ چوہان اور بی ایس یدی یورپا کے بعد اب سابق صدر جمہوریہ پرناب مکھرجی کا کورونا ٹیسٹ پازیٹو آیا ہے، اس بات کی تصدیق انہوں نے سماجی رابطے کی ویب سائٹ ٹوئٹر پر اپنے تازہ پیغام کے ذریعہ دی ہے۔
اپنے ٹوئٹر پیغام میں انہوں نے لکھا ہے کہ میں کسی اورٹیسٹ کے لیے اسپتال پہنچا تھا، میرا کورونا ٹیسٹ پازیٹو آیا ہے، ساتھ ہی پرناب مکھرجی نے یہ بھی لکھا کہ "میں گزارش کرتا ہوں کہ گزشتہ ایک ہفتے کے دوارن جتنے افراد بھی مجھ سے رابطے میں رہے ہیں وہ خود کو آئسولیٹ کریں اور اپنا کورونا ٹیسٹ لازمی کروائیں۔
On a visit to the hospital for a separate procedure, I have tested positive for COVID19 today.
I request the people who came in contact with me in the last week, to please self isolate and get tested for COVID-19. #CitizenMukherjee— Pranab Mukherjee (@CitiznMukherjee) August 10, 2020
اس حوالے سے ذرائع کا کہنا ہے کہ گزشتہ دنوں جب ایک روٹین چیک اَپ کے لیے پرناب مکھرجی اسپتال پہنچے تو ان میں کورونا کی کچھ علامتیں پائی گئیں جب ان کا کورونا ٹیسٹ کرایا گیا تو اس کی رپورٹ پازیٹو آئی۔
جس کے بعد فوری طور پر سابق صدر کو دہلی میں واقع آرمی اسپتال میں داخل کیا گیا ہے، تاہم اب ان کی جسمانی حالت کافی بہتر بتائی جا رہی ہے اور وہ ڈاکٹروں کی سخت نگرانی میں ہیں۔
دوسری جانب84سالہ پرناب مکھرجی کا کورونا ٹیسٹ پازیٹو آنے کے بعد ان کی جلد صحت یابی کے لیے سیاسی حلقوں میں دعائیں کی جا رہی ہیں۔
کانگریس کے قومی ترجمان رندیپ سنگھ سرجے والا نے بھی اس تعلق سے ایک ٹوئٹ کیا ہے جس میں انھوں نے سابق صدر جمہوریہ کے جلد از جلد شفایاب ہونے کی دعا کی ہے۔
