اسلام آباد : حکومت نے سگریٹ پینے والوں کی حوصلہ شکنی کےلیے سگریٹ پیکٹ پرنئی تصویری وارننگ تیار کرلی ،جو یکم جون سےنافذالعمل ہوگی، تصویری وارننگ سرطان زدہ منہ کےبجائے گینگرین زدہ پیر کی ہے۔
تفصیلات کے مطابق حکومت نے سگریٹ پینے والوں کی حوصلہ شکنی کےلیے بڑا اقدام اٹھاتے ہوئے سگریٹ پیکٹ پرنئی تصویری وارننگ تیار کر لی گئی ، نئی تصویری وارننگ وزارت قومی صحت کی تیار کردہ ہے۔
ذرائع کا کہنا ہے وزارت صحت نےتصویری وارننگ تمباکوانڈسٹری کوجاری کر دی ہے ، نئی تصویری وارننگ یکم جون سےنافذالعمل ہو گی۔
وزارت صحت کے ذرائع کے مطابق سگریٹ پیکٹ پرتصویری وارننگ میں نمایاں تبدیلیاں کی گئی ہیں، تصویری وارننگ کے حجم میں 10 فیصد اضافہ ہوگا جبکہ نئی تصویری وارننگ کا حجم سگریٹ پیکٹ کا60 فیصد ہوگا۔
ذرائع کا کہنا ہے کہ سگریٹ پیکٹ پر وارننگ کی تصویر بھی تبدیل کر دی گئی ہے ، تصویری وارننگ سرطان زدہ منہ کےبجائے گینگرین زدہ پیر کی ہے۔
مزید پڑھیں :حکومت کا سگریٹ پینے والوں پر گناہ ٹیکس لگانے کا فیصلہ
یاد رہے اس سے قبل دسمبر 2018 میں حکومت نے صحت کے شعبے میں ایک اور انقلابی قدم اٹھاتے ہوئے سگریٹ پینے والوں پر گناہ ٹیکس لگانے کا فیصلہ کیا تھا۔
بعد ازاں وزارت صحت نے گناہ ٹیکس کی سمری کابینہ ڈویژن کو ارسال کی تھی، سمری میں سفارش کی گئی تھی کہ سگریٹ پیکٹ پر 10 روپے گناہ ٹیکس عائد کیا جائے، سگریٹ کی تمام کیٹگریز پر گناہ ٹیکس عائد کیا جائے گا۔
وزارتِ قومی صحت کے مطابق ملک میں سالانہ 4 ارب سے زائد سگریٹ کی ڈبیا فروخت ہوتی ہیں، اس طرح سِن ٹیکس کی مد میں سالانہ 50 ارب روپے تک آمدن متوقع ہے۔
واضح رہے کہ پاکستان سگریٹ پر گناہ ٹیکس لگانے والا دنیا کا دوسرا ملک ہے اس سے قبل فلپائن سگریٹ پر گناہ ٹیکس لگانے والا دنیا کا پہلا ملک ہے۔
