نیویارک: اقوام متحدہ میں پاکستان کے مستقل مندوب منیر اکرم کا کہنا ہے کہ سلامتی کونسل عالمی امن کو درپیش خطرات سے نمٹنے میں مفلوج ہے، سلامتی کونسل کو زیادہ نمائندہ، جوابدہ، جمہوری اور شفاف بنایا جائے۔
تفصیلات کے مطابق اقوام متحدہ میں پاکستان کے مستقل مندوب منیر اکرم نے سلامتی کونسل کی اصلاحات سے متعلق اجلاس سے خطاب کیا۔ اپنے خطاب میں منیر اکرم کا کہنا تھا کہ سلامتی کونسل عالمی امن کو درپیش خطرات سے نمٹنے میں مفلوج ہے۔
منیر اکرم کا کہنا تھا کہ سلامتی کونسل کے مستقل ممبرز میں تناؤ موجود ہے، سلامتی کونسل میں اصلاحات کو کثیر الجہتی نظام کی وسیع بحالی کا حصہ ہونا چاہیئے۔
انہوں نے مزید کہا کہ سلامتی کونسل کو زیادہ نمائندہ، جوابدہ، جمہوری اور شفاف بنایا جائے۔
اس سے قبل ایک موقع پر منیر اکرم نے کہا تھا کہ پاکستان جوہری ہتھیاروں سے پاک دنیا کے مقاصد کے لیے پرعزم ہے اور سماجی و اقتصادی ترقی کے لیے امن و اسٹریٹجک استحکام کا خواہاں ہے۔
انہوں نے کہا تھا کہ پاکستان اسلحے کی دوڑ سے بچنا چاہتا ہے، خطے میں پریشان کن سلامتی کی حرکیات سے غافل نہیں رہ سکتے، پاکستان اپنی سیکیورٹی یقینی بنانے کے لیے تمام ضروری اقدامات کرے گا۔
منیر اکرم نے مزید کہا تھا کہ خطے میں امن پاک بھارت تنازعات حل کر کے ہی حاصل کیا جا سکتا ہے۔
