پشاور: معاون خصوصی برائے اطلاعات و نشریات فردوس عاشق اعوان کا کہنا ہے کہ قائد اعظم کا سپاہی عمران خان کشمیریوں کے لیے جدوجہد جاری رکھے گا، یوم سیاہ صرف پاکستان میں ہی نہیں عالمی سطح پر منایا جارہا ہے۔
تفصیلات کے مطابق معاون خصوصی برائے اطلاعات و نشریات فردوس عاشق اعوان اور خیبر پختونخواہ کے وزیر اطلاعات شوکت یوسفزئی نے پشاور پریس کلب میں نیوز کانفرنس سے خطاب کیا۔ معاون خصوصی فردوس عاشق اعوان کا کہنا تھا کہ یوم سیاہ پر پاکستان بھر میں ریلیاں نکل رہی ہیں، یوم سیاہ صرف پاکستان میں ہی نہیں عالمی سطح پر لوگ منا رہے ہیں۔
معاون خوصی کا کہنا تھا کہ آج عالمی سطح پر بھارت کی مذمت کی جارہی ہے، عوام کشمیریوں کے ساتھ اظہار یکجہتی کرتے ہوئے ریلیاں نکال رہے ہیں۔ وزیر اعظم نے ثابت کیا کشمیر کے بغیر یوم آزادی کی خوشیاں کم ہیں، کشمیر کو بالآخر پاکستان کے ساتھ جڑنا ہے، قائد اعظم کا سپاہی عمران خان کشمیریوں کے لیے جدوجہد جاری رکھے گا۔
انہوں نے کہا کہ کشمیر کی آزادی کے بغیر برصغیر کی تقسیم کا ایجنڈا نامکمل ہے، بھارت نے سیکولر ہونے کا دعویٰ کیا تھا، اقلیتوں کے ساتھ سلوک دیکھ لیں۔ بھارت میں اقلیتوں کا قتل عام کیا جا رہا ہے۔ آج قائد اعظم کے دو قومی نظریے کی جیت ہوئی ہے۔ مودی کی آج کی تقریر بھارتی عوام کی آنکھیں کھولنے کے لیے کافی ہے، مودی نے خطے میں تھانیدار بننے کی کوشش کی ہے۔
معاون خصوصی کا کہنا تھا کہ بھارتی عوام اقلیتوں کے ساتھ خصوصاً کشمیریوں کے ساتھ سلوک دیکھ رہے ہیں، وزیر اعظم عمران خان کشمیر کے لیے جدوجہد کر رہے ہیں۔ وزیر اعظم عمران خان نے کل للکار کر بھارتی قیادت کو جواب دیا ہے۔ کل وزیر اعظم نے کہا جارحیت کی تو اینٹ کا جواب پتھر سے دیں گے۔
انہوں نے مزید کہا کہ وزیر اعظم عمران خان نے مسئلہ کشمیر پر دنیا کو جھنجوڑا، عمران خان کی وجہ سے مسئلہ کشمیر پر اقوام متحدہ اجلاس ہونے جا رہا ہے۔ پہلی مرتبہ روس نے بھارت کے خلاف جانے کا فیصلہ کیا ہے۔ روس نے مسئلہ کشمیر پر اقوام متحدہ کی قراردادوں کی حمایت کی ہے۔
