اسلام آباد : جاویدہاشمی کی پارٹی رکنیت معطل کردی گئی اورانہیں شوکازنوٹس جاری کر کے جواب طلبی کیلئےعمران خان نے انتیس ستمبرکواسلام آباد بلالیاہے۔
پاکستان تحریک انصاف کی اعلیٰ قیادت کا اہم اجلاس ہوا جس میں پارٹی صدر جاوید ہاشمی کو معطل کرنے کا فیصلہ کیا گیا، سیکریٹری جنرل پی ٹی آئی نے باغی رہنماء کو شوکاز نوٹس بھیج جاری کردیا ہے۔
جاوید ہاشمی کو جاری کئے گئے شوکاز نوٹس میں کہا گیا ہے کہ 29 ستمبر کو انضباطی کمیٹی کے سامنے پیش کر اپنے خلاف الزامات کا جواب دیں۔
ملتان: تحریک انصاف کے سابق صدر جاوید ہاشمی نے کہا ہے کہ میں شاہ محمود قریشی کو چیلنج کرتا ہوں کہ میرے مقابلے میں این اے ایک سو پچاس پر الیکشن لڑیں، ملتان کے عوام اچھی طرح جانتے ہیں کہ کون باغی ہے اور کون داغی۔میں نذرانے وصول نہیں کرتا اور نہ نذرانے لینے والوں کو پیر سمجھتا ہوں۔
ان خیالات کا اظہار انہوں نے ملتان میں پریس کانفرنس سے خطاب کرتے ہوئے کیا ،جاوید ہاشمی کا کہنا تھا کہ ضمنی انتخابات کے لئے کاغذات نامزدگی کل جمع کراؤں گا، میں کسی کے بارے میں جھوٹ نہیں بولتا۔
عمران خان کو ہمیشہ کہا کہ آپ کو استعمال کیا جا رہا ہے، طاہرالقادری بھی استعمال ہو گئے نوجوان کہاں جائیں؟ انہوں نے کہا کہ میں دھرنوں کا حامی نہیں اب بات آگے جا چکی ہے۔
ان کا کہنا تھا کہ عوام کو بتایا جائے کہ خورشید محمود قصوری کس کے کہنے پر تحریک انصاف میں آئے، پی ٹی آئی کے سابق رہنماء کا کہنا تھا کہ جب تک زندہ ہوں جمہوریت کی حفاظت کروں گا، کسی میں ہمت نہیں کہ میرے سامنے جمہوریت کا مذاق اڑائے۔
انہوں نے مزید کہا کہ شاہ محمود قریشی کو وائس چیئر مین بنانے کیلئے شیریں مزاری کو نکالا گیا، جولوگ اس نظام کو درست نہیں سمجھتے پہلے وہ اپنے استعفوں پر وضاحت دیں۔
پاکستان پیپلز پارٹی کے رہنماء چوہدری اعتزازاحسن نے اپنے ایک بیان میں کہاہے کہ ان پر الزامات نہ لگتے تو وہ بھی تقریرنہ کرتے، وہ اپنے اوپر لگائے گئے الزامات کو میڈیا ہو یا کمیشن ہر فورم پر غلط ثابت کرسکتے ہیں، اعتزاز احسن کاکہناہےایل پی جی کوٹا اورکرپشن کے الزامات بے بنیا دہیں۔
پیپلزپارٹی کے رہنما اور سینیٹ میں قائد حزب اختلاف اعتزاز احسن کا کہنا ہے کہ وزیر داخلہ چوہدری نثار کی جانب سے مجھ پر لگائے جانے والے الزامات کو کمیشن اور میڈیا کے سامنے غلط ثابت کرسکتا ہوں۔
اسلام آباد میں وفاقی وزیر داخلہ چوہدری نثار نے پریس کانفرنس کرتے ہوئے کہا کہ جو بھی کھیل کھیلوں گا دو نمبر نہیں کھیلوں گا، یہ میری زندگی کی مختصر ترین پریس کانفرنس ہے ۔
انہوں نے ابتداء میں صحافیوں کو مخاطب ہوتے ہوئے کہا کہ پریس کانفرنس کے بعد کوئی سوال نہیں لوں گا، تاخیر کے لئے معازرت چاہتا ہوں۔
ان کا کہنا تھا کہ گزشتہ روز پارلیمنٹ میں ایک طوفان کھڑا ہوگیا تھا، پارلیمنٹ میں پاکستان کی سیاست پربحث ہو رہی تھی کہ اچانک میں موضوع بن گیا، میرے اور میرے بھائی کے خلاف جو کہا گیا اس کے جواب کا حق رکھتا ہوں ، پارلیمنٹ میں مجھ پر جو قانلانہ حملہ کیا گیا وہ ایک بیان کے ردِعمل پر کیا گیا۔
انہوں نے کہا کہ سب جانتے ہیں پارلیمنٹ میں نوک جھوک ہوتی رہتی ہیں، میری جماعت اوردیگررہنماء کا کہنا تھا کہ میں معاملے کو ٹھنڈا کروں، میں اپنے ضمیر کی سنتا ہوں، حکومت میں ہوں اوراپوزیشن کا قرض نہیں رکھتا، میری پارٹی مجھے تیس گھنٹے سے ردِعمل دینے سے روکتی رہی، جس سیاست میں عزت نہ ہو اس میں رہنے کا حق نہیں، نواز شریف کی پیٹھ کے پیچھے ان کا سب سے بڑا حامی ہوں، واحد پارلیمنٹرین ہوں جو 8 مرتبہ منتخب ہوا۔
چوہدری نثار کا کہنا تھا کہ ذاتی عزتِ نفس اور ملک کے مستقبل کے درمیان فیصلہ کرنا مشکل کام تھا، میں گزشتہ تیس گھنٹوں سے ایک کرب سے گزر رہا تھا، جمہوریت اور ملکی مستقبل کے خاطرذاتی انا کو قربان کرتا ہوں۔
اعتزاز احسن کے الزمات پران کا کہنا تھا کہ اعتزازاحسن کے الزمات کو درگزر کرتا ہوں، اعتزاز احسن کے بیان کو ایف آئی آر تصور کیا جائے اور کمیٹی بنائی جائے کسی بھی جج سے تحقیقات کرالیں ،اگر ایک فیصد الزام بھی درست ثابت ہوگیاتو میں وزارت عظمیٰ اور قومی اسمبلی سےاستعفیٰ دے کر سیاست بھی چھوڑ دوں گا۔
اسلام آباد: وفاقی وزیر ِداخلہ چوہدری نثارعلی خان نے آئندہ روز پریس کانفرنس میں اعتزاز احسن کو جواب دینے کا اعلان کردیا ہے، انھوں نے کہا ہےکہ اپنی ذات پر ہونے والے حملوں کا جواب دینا میرا حق ہے، دوسری جانب پیپلز پارٹی کے شریک چیئرمین آصف علی زردای نے چوہدری نثار سے معافی مانگنے کا مطالبہ کردیا ہے۔
چوہدری نثار پارلیمنٹ کے مشترکہ اجلاس میں خطاب سے روکے جانے پر ناراض ہوگئے ہیں، مسلم لیگ ن کے رہنماؤں کی چوہدری نثار کو منانے کی کوششیں بھی رنگ نہ لاسکیں، پرویز رشید، خواجہ سعد رفیق ، ایاز صادق، حمزہ شہباز، شیخ آفتاب اور فواد حسن نے چوہدری نثار سے ملاقات کے دوران معاملہ حل کرنے کی درخواست کی ہے۔
چوہدری نثار کا کہنا تھا کہ اپنی ذات پر کئے گئےحملوں کا جواب دینا میرا حق ہے، میری ذات پر حملہ کیا گیا ہے، کل پریس کانفرنس میں جواب ضرور دوں گا۔
انہوں نے کہا کہ میرے مرحوم بھائی کو بھی نہیں چھوڑا گیا یہ برداشت نہیں کرسکتا، ہمیں آستین کا سانپ کہا گیا حقائق میاں نواز شریف یا خدا کی ذات جانتی ہے، پہلی بار پارٹی ڈسپلن توڑنے لگا تھا لیکن خاموش ہوگیا۔
اسی حوالے سے سابق صدر آصف علی زرداری نے بھی اعتزاز احسن پر الزامات لگانے پر چوہدری نثار سے معافی مانگنے کا مطالبہ کیا ہے، آصف زرداری کا کہنا تھا کہ اعتزاز احسن کی جمہوریت کیلئے خدمات پر فخر ہے۔
کوئٹہ: آل پارٹیزالائنس نے بلدیاتی حکومتوں کے قیام میں تاخیر کے خلاف اجتماعی استعفوں کی دھمکی دیدی ، نوابزادہ لشکری رئیسانی کے مطابق صوبائی الیکشن کمیشن سیاسی جماعت کی ایماء پر مخصوص نشستوں میں دھاندلی کیلئے انتخابی تاخیر کرارہی ہے۔
کوئٹہ پریس کلب میں بلدیاتی حکومتوں کے حوالے سے تشکیل دی گئی آل پارٹیز ڈیموکریٹک الائنس میں شامل دیگر سیاسی جماعتوں کے نمائندوں کے ہمراہ پریس کانفرنس کرتے ہوئے نوابزادہ لشکری رئیسانی کا کہنا تھا کہ بلوچستان حکومت میں شامل دو جماعتوں کی شکست کی وجہ سے دس ماہ گزرنے کے باوجود بلدیاتی حکومتیں تشکیل نہیں دی گئیں۔
انہوں نے الزام عائد کیا کہ صوبائی الیکشن کمیشن اس دھاندلی میں ملوث ہے، وفاق چیف الیکشن کمشنربلوچستان سمیت تمام ممبران کو برطرف کرے اور جلد مقامی حکومتیں تشکیل دی جائیں ،ورنہ اجتماعی استعفے دیئے جائیں گے۔
لاہور : الیکشن کمیشن آف پاکستان کے سابق ممبر جسٹس (ر) ریاض کیانی نے کہا ہے کہ ای سی پی کے سابق ایڈیشنل سیکریٹری افضل خان کا انٹرویو فکس میچ ہے۔یہ سب کچھ پری پلان کیا گیا، ان خیالات کا اظہار انہوں نے لاہور میں پریس کانفرنس سے خطاب کرتے ہوئے کیا ۔
انہوں نے کہا کہ افضل خان کو یہ سب باتیں چودہ ماہ بعد کیوں یاد آئیں ؟ انتخابات پر شکایات تھیں تو کسی کو کیوں آگاہ نہیں کیا گیا ؟میرے اور دیگر افراد کے خلاف الزامات سوچی سمجھی سازش ہے، جسٹس (ر) ریاض کیانی کا ایک سوال کے جواب میں کہنا تھا کہ اپنے خلاف لگائے گئے الزامات کیخلاف چیف الیکشن کمشنر اور دیگر سینئر ارکان سے مشورے کے بعد قانونی کارروائی کروں گا۔
انہوں نے الزام لگایا کہ افضل خان اپنی مدت ملازمت میں توسیع اور ترقی کرانا چاہتے تھے، منع اس لئے کیا گیا کہ ایک سال میں دو ترقیاں نہیں ہو سکتی تھیں، افضل خان نے میری تنخواہ دس لاکھ بتائی جو سراسر غلط ہے،جسٹس (ر) ریاض کیا نی نے کہا کہ الیکشن کمیشن کا ممبر بننا کیرئیر کی سب سے بڑی غلطی تھی۔
انہوں نے کہا کہ افضل خان ثابت کریں کہ الیکشن کے نوے فیصد بگاڑ کا میں ذمہ دار ہوں، کوئی فیصلہ اکیلے نہیں کیا تمام فیصلے ممبران کی مشاورت سے کئے، ایک سوال کے جواب میں انہوں نے کہا کہ میں نے کبھی شریف برادران یا اتفاق فاؤنڈری کا کیس نہیں لڑا، اور نہ کسی مقدمے میں ان کی وکالت کی،اس حوالے سے عمران خان کا بیا ن سراسر جھوٹ ہے۔
کراچی:وزیراطلاعات سندھ شرجیل میمن نےکہا ہےنواز شریف کا غیرسنجیدہ رویہ لمحہ فکریہ ہے، سیاسی جماعتوں کو انتقام کا نشانہ نہ بنایا جائے۔
کراچی سےجاری ایک بیان میں شرجیل میمن نےکہا ہے پیپلزپارٹی ملک میں جمہوریت کو پھلتا پھولتا دیکھنا چاہتی ہے، نوازشریف کا غیرسنجیدہ رویہ لمحہ فکریہ ہے،ان کا کہنا تھا کہ احتجاج سیاسی جماعتوں کا جمہوری حق ہے سیاسی جماعتوں کو انتقام کا نشانہ بناکر ،نوازشریف آمریت کےدورکی یاد کو تازہ کررہے ۔
شرجیل میمن کا کہنا تھا کہ احتجاج کی آڑ میں ملک میں کوئی ایڈونچر ہوا تووفاقی حکومت ذمےدارہوگی۔
لاہور : ق لیگ کے رہنما چوہدری شجاعت حسین نے کہا ہے کہ ماڈل ٹاؤن کا نام جلیانوالہ ٹاؤن رکھ دیا جائے۔
لاہور میں پریس کانفرس کے دوران صحافیوں کے سوالوں کا جواب دیتے ہوئے چوہدری شجاعت حسین کا کہنا تھا کہ حکومت اوچھے ہتھکنڈوں پر اتر آئی ہے، عوامی تحریک کے چودہ شہید کارکنوں کی ایف آئی آر ابھی تک درج نہیں کی گئی، انہوں نےکہا کہ گرفتاریوں سےنہیں ڈرتے، قید و بند کی صعوبتیں پہلے بھی برداشت کی ہیں۔
چوہدری شجاعت حسین کا کہنا تھا کہ پرامن یوم شہداء کی کال دی گئی ہے جبکہ حکومت دہشت گردی پر اتر آئی ہے، ق لیگ کےسربراہ کا کہنا تھا کہ پنجاب کے وزیراعلی شہباز شریف کے خلاف اگر مقدمات درج کئے جائے تو انکے مقدمات کی تعداد تین سو سے چارسو کے قریب ہوگی۔