ARYNews.tv | Urdu – Har Lamha Bakhabar

Tag: prime-minister-imran-khan

  • وزیراعظم عمران خان نےایئرسیال کا افتتاح کردیا

    وزیراعظم عمران خان نےایئرسیال کا افتتاح کردیا

    سیالکوٹ: وزیراعظم عمران خان نے سیالکوٹ کے صنعت کاروں کا دیرینہ خواب پورا کرتے ہوئے ایئر سیال کا افتتاح کردیا ہے۔

    تفصیلات کے مطابق وزیراعظم عمران خان مختصر دورے پر سیالکوٹ پہنچے، وزیراعلیٰ پنجاب سردار عثمان بزدار، معاون خصوصی عثمان ڈار، وفاقی وزیرحماداظہر، رزاق داؤد، گورنر پنجاب غلام سرور سمیت عامرکیانی وزیراعظم کےساتھ تھے۔

    سیالکوٹ پہنچنے پر وزیراعظم نے ایئر سیال کا افتتاح کیا، لائسنس یافتہ ایئر لائن ایئر سیال سیالکوٹ چیمبر آف کامرس اینڈ انڈسٹری کے اراکین کی سوچ کا نتیجہ ہے جنہوں نے اپنے پہلے اقدام سیالکوٹ انٹرنیشنل ایئرپورٹ لمیٹڈ کی کامیابی کے بعد اس منصوبے کا آغاز کیا ہے۔

    اپنے دورہ سیالکوٹ میں وزیر اعظم 17 ارب روپے کے ترقیاتی منصوبوں کا اعلان کریں گے، ان منصوبوں کے تحت کلین اینڈ گرین پاکستان مہم کے تحت 5 نئے پارکس قائم کیے جائیں گے، اس کے علاوہ شہریوں کو صاف پانی کی فراہمی کے منصوبے کا بھ افتتاح کیا جائے گا، منصوبے سے پہلے مرحلے میں چار لاکھ شہریوں کو پینے کا صاف پانی مہیا کیا جائے گا،جبکہ کامیاب نوجوان پروگرام کے تحت چیک بھی تقسیم کیے جائیں گے۔

    یہ بھی پڑھیں:  وزیراعظم کا ملک کے بڑے صنعتی شہروں کو بڑی مراعات دینے کا فیصلہ

    وزیر اعظم عمران خان کے دورہ سیالکوٹ کے بعد شہر میں ٹریفک مسائل کے حل کےلیے بھی منصوبہ شروع کیا جائے گا۔

    عمران خان کے معاون خصوصی عثمان ڈار کا کہنا ہے کہ وزیراعظم کے منصوبے سیالکوٹ کی تقدیر بدل دیں گے، ترقیاتی پیکج کی منصوبہ بندی ویژن 2050 پلان کے پیش نظر کی گئی، سیالکوٹ سے ڈھائی ارب ڈالر کی ایکسپورٹ کی جاتی ہے، سیالکوٹ10 ارب سے زیادہ ٹیکس دینے والا شہر ہے۔

  • ہم نے بہترپالیسیاں بنائی ہیں، آج دنیا تعریف کرتی ہے، وزیراعظم عمران خان

    ہم نے بہترپالیسیاں بنائی ہیں، آج دنیا تعریف کرتی ہے، وزیراعظم عمران خان

    اسلام آباد : وزیر اعظم عمران خان نے اپنے خطاب میں کہا کہ ملک میں بیوروکریسی کا ایسا نظام بن گیا تھا کہ سزا اور جزا کا قانون تھا ہی نہیں۔

    ان خیالات کا اظہار وزیر اعظم عمران خان نے دارالحکومت اسلام آباد میں گرین ایوارڈ کی تقریب سے خطاب کرتے ہوئے کیا، ان کا کہنا تھا کہ ہمیں جنگلات کی مہم کے ساتھ دیگر منصوبوں پر بھی توجہ دینی ہے، کیونکہ ہم ہوائی آلودگی اور دریاوں میں جو گندگی جارہی ہے اسے روکنا ہے۔

    عمران خان نے کہا کہ ہمیں مائنڈ سیٹ تبدیل کرنا ہے، ہریالی کی طرف جانا ہے، لاہور میں 20 سال میں 70 فیصد درخت کاٹے گئے اور شہر کا 70 فیصد گرین ایریا ختم کیا گیا۔

    انہوں نے کہا کہ ہریالی نہ ہوتو نومبر اور دسمبر میں آلودگی زیادہ پھیلتی ہے۔

    عمران خان کا کہنا تھا کہ میں نے پاکستان کے جنگلات کو تباہ ہوتے دیکھا ہے اور مجھے خوف ہے اگر ایسے جنگلات کی کٹائی ہوتی رہی تو ہمیں آکسیجن کے مسائل کا سامنا کرنے پڑے گا۔

    پشاورخوبصورت شہر ہوتا تھا، لوگ پشاور کے پانی کو منرل واٹر سمجھ کر پیتے تھے، لاہور کی خوبصورتی دیکھنے لوگ آتے تھے۔

    وزیراعظم نے کہا کہ پورے پاکستان میں گھوما ہوں اور ہر کونہ دیکھا ہے، کسی پاکستان کو ایسے نہیں دیکھا جیسے میں نے دیکھا ہے، پاکستان وہ خوش قسمت ملک ہے جہاں رفاہ عامہ کے کاموں میں بھرپور حصہ لیا جاتا ہے لیکن بدقسمتی سے پاکستانی عوام کے جذبے سے بھرپور فائدہ نہیں اٹھایا جاتا۔

    انہوں نے کہا کہ تبدیلی پہلے ذہنوں میں آتی ہے پھر زمینی سطح پر ہوتی ہے، ہمیں عوام کے ذہنوں میں ڈالنا ہے کہ ہریالی ختم کرنے کا مطلب ہم تباہی کررہے ہیں۔

    وزیر اعظم عمران خان نے گرین ایوارڈ کی تقریب سے خطاب کرتے ہوئے مزید کہا کہ ہم نےبہترپالیسیاں بنائی ہیں، آج دنیا تعریف کرتی ہے،کورونا سے متعلق پالیسی دیکھ لیں، دنیاکہتی ہے پاکستان سے سیکھو،کورونا پالیسی میں وبا پر کنٹرول کیساتھ معاشی لحاظ سے بھی  بہتر قدم اٹھایا۔

  • انضمام شدہ قبائلی علاقوں میں ترقیاتی کام موجودہ حکومت کی ترجیح ہے: وزیر اعظم

    انضمام شدہ قبائلی علاقوں میں ترقیاتی کام موجودہ حکومت کی ترجیح ہے: وزیر اعظم

    اسلام آباد: وزیر اعظم عمران خان نے اقوام متحدہ کے ریزیڈنٹ ایڈیٹر نیل بوہن سے ملاقات کے دوران کہا کہ حکومت بچوں کی گروتھ پر خصوصی توجہ دے رہی ہے، انضمام شدہ قبائلی علاقوں میں ترقیاتی کام موجودہ حکومت کی ترجیح ہے۔

    تفصیلات کے مطابق وزیر اعظم عمران خان سے اقوام متحدہ کے ریزیڈنٹ ایڈیٹر نیل بوہن کی ملاقات ہوئی۔ ملاقات میں وزیر اعظم کو اقوام متحدہ کی جانب سے مختلف حکومتی شعبوں میں تعاون پر بریفنگ دی گئی۔

    ملاقات کے دوران ملک میں گڈ گورننس، تعلیم و صحت اور یوتھ کے شعبوں میں اقوام متحدہ کے کردار پر بات چیت کی گئی۔ ریزیڈنٹ ایڈیٹر نے حکومت کی جانب سے گڈ گورننس کے لیے اقدامات کی تعریف بھی کی۔

    نیل بوہن کا کہنا تھا کہ ماضی کی حکومتوں میں بہت سے اقدامات کو نظر انداز کیا جاتا رہا، موجودہ حکومت کی اسٹنٹتھ گروتھ، صحت اور درخت لگانے میں سنجیدگی قابل تعریف ہے۔ ماحولیاتی چیلنج اور غربت کے خاتمے کے لیے منصوبہ بندی بہترین ہے۔

    وزیر اعظم عمران خان نے بھی حکومتی ترجیحات سے متعلق نیل بوہن کو آگاہ کیا۔ وزیر اعظم کا کہنا تھا کہ حکومت بچوں کی گروتھ پر خصوصی توجہ دے رہی ہے، انضمام شدہ قبائلی علاقوں میں ترقیاتی کام موجودہ حکومت کی ترجیح ہے۔ انضمام شدہ قبائلی علاقوں کے لیے فنڈز کا اجرا کیا ہے۔

    وزیر اعظم نے احساس پروگرام سے بھی نیل بوہن کو آگاہ کیا، انہوں نے پروگرام میں اقوام متحدہ کے تعاون کو سراہا۔ انہوں نے کہا کہ آبادی میں اضافہ بچوں کی بنیادی تعلیم اور بنیادی صحت سےجڑا ہوا ہے۔

    ملاقات کے دوران ملک میں پولیو کے خاتمے سے متعلق اقدامات بھی ملاقات میں زیر بحث آئے، وزیر اعظم نے بلین ٹری سونامی پروجیکٹ سے نیل بوہن کو آگاہ کیا۔ وزیر اعظم نے کہا کہ 10 ارب درخت لگنے سے ماحولیاتی تبدیلی پر مثبت اثرات پڑیں گے۔

    نیل بوہن نے اقوام متحدہ کے تمام اداروں کی جانب سے مکمل تعاون کا یقین بھی دلایا۔

  • وزیراعظم عمران خان اتوار کو دبئی کی عالمی کانفرنس میں‌ خطاب کریں‌گے

    وزیراعظم عمران خان اتوار کو دبئی کی عالمی کانفرنس میں‌ خطاب کریں‌گے

    اسلام آباد: وزیر اعظم عمران خان شیخ راشد المکتوم کی دعوت پر دبئی کا ایک روزہ دورہ کریں گے جہاں وہ  ورلڈ گورنمنٹ سمٹ میں نہ صرف شرکت بلکہ  خطاب کر کے خوشحال اور مضبوط پاکستان کا وژن بھی اجاگر کریں گے۔

    ترجمان وزیراعظم کی جانب سے جاری اعلامیے کے مطابق عمران خان 10 فروری کو ایک روزہ دورے پر دبئی روانہ ہوں گے، اس دورے کی دعوت دبئی کے حکمران نے دی۔

    وزیر اعظم کے ترجمان کی جانب سے جاری بیان میں کہا گیا ہے کہ عمران خان کو راشد المکتوم نے ساتویں عالمی حکومتی کانفرنس میں شرکت کی دعوت دی جس میں وہ مضبوط اور خوشحال پاکستان کے لیے اپنا وژن پیش کریں گے۔

    عمران خان متحدہ عرب امارات کے حکمرانوں سے ملاقاتیں کر کے پاکستان میں مختلف شعبوں میں سرمایہ کاری کرنے پر اُن کی مزید حوصلہ افزائی بھی کریں گے۔

    مزید پڑھیں: ابوظہبی کے ولی عہد کا دورہ پاکستان، خصوصی جھلکیاں انسٹا گرام پرپوسٹ کردیں

    اسی سے متعلق: ولی عہد محمد بن زید النہیان کے دورہ پاکستان پر وفاقی حکومت کا اعلامیہ جاری

    ترجمان وزیر اعظم کے مطابق وفاقی وزیر خارجہ شاہ محمود قریشی، وزیر خزانہ اسد عمر، وزیر بحری امور علی زیدی اور مشیر برائے تجارت بھی اس دورے میں عمران خان کے ہمراہ ہوں گے۔

    ترجمان وزیراعظم کے مطابق عمران خان کی سربراہی اجلاس میں شرکت علم پر مبنی معیشت، مصنوعی ذہانت، ترقی اور شرح نمو کے حصول کے لیے جدت کی اہمیت کے حوالے سے پاکستان کی دلچسپی ظاہر کرتی ہے۔

    یاد رہے کہ وزیراعظم عمران خان نے وزارتِ عظمیٰ کا منصب سنبھالنے کے بعد نومبر میں بھی متحدہ عرب امارات کا کامیاب دورہ کیا تھا جس کے دوران انہوں نے اماراتی ہم منصب سے ملاقات کی تھی۔

    یہ بھی پڑھیں: سعودی ولی عہد کا دورہ پاکستان، 15 ارب ڈالر کی سرمایہ کاری کا اعلان متوقع

    دونوں ممالک کے سربراہان کی ملاقات میں باہمی دلچسپی کے امور، عالمی اور علاقائی مسائل پر گفتگو ہوئی تھی۔ علاوہ ازیں وزیراعظم پاکستان نے متحدہ عرب امارات کے ولی عہد شیخ زید بن سلطان النہیان سے بھی ملاقات کی تھی۔

  • وزیراعظم عمران خان نے صحت انصاف کارڈ کے پہلے مرحلے کا آغاز کردیا

    وزیراعظم عمران خان نے صحت انصاف کارڈ کے پہلے مرحلے کا آغاز کردیا

    اسلام آباد : وزیراعظم عمران خان نے صحت انصاف کارڈکے پہلے مرحلے کا آغاز کردیا ، صحت کارڈ سے عام آدمی سات سےنولاکھ روپے تک کا علاج کرواسکے گا۔

    تفصیلات کے مطابق عوام کو صحت اور مفت علاج معالجے کے حوالے سے بہتر سہولیات کی فراہمی کیلئے وزیراعظم عمران خان نے صحت انصاف کارڈکے پہلے مرحلے کا آغاز کردیا۔

    صحت کارڈ کے ذریعے عام آدمی سوا 7 لاکھ تک کا علاج کرواسکے گا، جس میں مریض کی انجیو پلاسٹی، برین سرجری سمیت کینسر اور دیگر امراض کا مفت علاج کیا جائے گا۔

    پہلے مرحلے میں اسلام آباد میں صحت کارڈ تقسیم کیے جائیں گے اور آئندہ ماہ قبائلی علاقوں اور پھر ملک بھر میں صحت کارڈ تقسیم ہوں گے۔

    ذرائع کا کہنا ہے کہ صحت کارڈ سے ملک کے ڈیڑھ کروڑ غریب خاندان مستفید ہوں گے، کارڈ ہولڈر کو7 لاکھ 20 ہزار روپے تک کے اخراجات کی سہولت دستیاب ہوگی، جبکہ مریض 150 سے زائد سرکاری و نجی اسپتالوں میں علاج کرواسکیں گے۔

    وفاقی وزیرفوادچوہدری کا کہنا ہے کہ ایسے غریب لوگ جو صحت کی سہولتوں سے استفادہ حاصل نہیں کرسکتے، وہ 7 سے 9 لاکھ روپے تک کا علاج مفت کروا سکیں گے، جس سے ان کی زندگیوں میں انقلاب آئے گا۔

    مزید پڑھیں: حکومتی صحت کارڈ سے عام آدمی کتنے روپے تک کا علاج کرواسکے گا؟

    یاد رہے 30 جنوری کو وفاقی حکومت نے وزیر اعظم نیشنل ہیلتھ پروگرام کا نام تبدیل کر کے “صحت سہولت پروگرام ” رکھ دیا تھا جبکہ ہیلتھ کارڈ کانام تبدیل کر کے”صحت انصاف کارڈ” رکھا گیا۔

    وفاقی وزیر صحت عامر کیانی کا کہنا تھا کہ صحت سہولت پروگرام کادائرہ ملک بھر میں پھیلا دیا ہے، ڈیڑھ کروڑخاندانوں کوصحت سہولت پروگرام کا حصہ بنا دیا ہے، ملک بھرمیں 9کروڑ افرادصحت انصاف کارڈ سےمستفید ہوں گے۔

    مزید پڑھیں : وفاقی حکومت نے وزیر اعظم نیشنل ہیلتھ پروگرام کا نام تبدیل کر دیا

    گذشتہ سال دسمبر میں  وزیراعظم عمران خان کی زیر صدارت صحت سے متعلق اہم اجلاس میں صحت کی بہترین سہولیات کیلئے پبلک ہیلتھ مینجمنٹ اتھارٹی کے قیام کا فیصلہ کیا گیا تھا۔

    وزیراعظم کا مزید کہنا تھا کہ ہیلتھ مینجمنٹ کے شعبے کو ملک بھر میں نظرانداز کیا جاتا رہا ہے، اب ملک میں ہیلتھ مینجمنٹ کا جامع نظام لانا ہوگا، عوام کو صحت کی بہترین سہولتیں فراہم کریں گے۔

  • رواں ماہ کی طرح اس مہینے بھی پیٹرول کی قیمت میں کمی کا امکان

    رواں ماہ کی طرح اس مہینے بھی پیٹرول کی قیمت میں کمی کا امکان

    اسلام آباد :رواں ماہ کی طرح اس مہینے بھی پیٹرول کی قیمت میں کمی کا امکان ہے، اوگرا نے تجویز ارسال کردی، جس میں 50 پیسے کمی کی سفارش کی گئی ہے ، حتمی قیمتوں کا اعلان آج کیا جائے گا۔

    تفصیلات کے مطابق پی ٹی آئی حکومت نے مہنگائی سے پریشان عوام کو ریلیف دینے کی تیاری کرلی ہے، رواں ماہ کی طرح فروری میں بھی پیرولیم مصنوعات کی قیمتوں میں کمی کاامکان ہے۔

    آئل اینڈ گیس ریگولیٹری اتھارٹی (اوگرا) نے قیمتوں میں کمی کی تجویز ارسال کردی ہے ، اوگرا کیجانب سےارسال کی گئی سمری میں پٹرول کی قیمت میں پچاس پیسے فی لیٹرجبکہ ہائی اسپیڈ ڈیزل کی قیمت میں چار روپے فی لیٹرکمی کی سفارش کی گئی ہے۔

    اس کےعلاوہ لائٹ ڈیزل کی قیمت میں ایک روپےفی لیٹرکمی جبکہ مٹی کاتیل دو روپے فی لیٹرسستا کرنے کی سفارش کی گئی ہے۔

    وزیراعظم کی منظوری کے بعد پٹرولیم مصنوعات کی نئی قیمتوں کااعلان ہوگا، نئی قیمتوں کا اطلاق کل سے ہوگا۔

    مزید پڑھیں : حکومت کا پیٹرولیم مصنوعات کی قیمتوں‌ میں‌ کمی کا اعلان

    خیال رہے پیڑولیم مصنوعات کی قیمت میں کمی کی وجہ عالمی منڈی میں خام تیل کی قیمتوں میں کمی ہے۔

    یاد رہے سال نو کے آغاز پر وزیراعظم عمران خان کی جانب سے پیٹرولیم مصنوعات کی قیمتیں‌ کم کر دی گئی تھیں، پیٹرول کی قیمت میں فی لیٹر 4 روپے 86 پیسے کی کمی، ہائی اسپیڈ ڈیزل کی قیمت میں فی لیٹر 4 روپے 26 پیسے کی کمی کی گئی جبکہ مٹی کے تیل کے نرخوں‌ میں 52 پیسے فی لیٹرکمی کردی گئی تھی۔

  • وزیر اعظم عمران خان کے ساتھ کام کرنے کا خواہش مند ہوں، امریکی رکن کانگریس

    وزیر اعظم عمران خان کے ساتھ کام کرنے کا خواہش مند ہوں، امریکی رکن کانگریس

    واشنگٹن : امریکی رکن کانگریس الیگزینڈر الگرین نے کہا ہے کہ عمران خان میں لوگوں کےلیے کچھ کرنے کا عزم ہے۔

    تفصیلات کے مطابق ڈیموکریٹ رکن کانگریس الگرین نے وزیر اعظم پاکستان عمران خان کی کوششوں کو سراہتے ہوئے کہا ہے کہ وزیر اعظم عمران خان کے ساتھ کام کرنے کا خواہش مند ہوں۔

    ڈیموکریٹ رکن کانگریس کا کہنا تھا کہ پاکستان اور امریکا میں روایتی طور پر اچھے تعلقات ہیں، اس وقت پاکستان میں نئی قیادت ہے۔

    الگرین کا کہنا ہے کہ وزیر اعظم عمران خان ایک عظیم کرکٹر ہے اور اس کے ساتھ ساتھ عمران خان نے اسپتال بھی بنایا۔

    الیگزینڈر الگرین کا کہنا تھا کہ ایک دوسرے سے دور ہونا دونوں ممالک کے مفاد میں نہیں، کاروباری، عوامی سطح پر تعلقات سے دونوں ممالک قریب آسکتے ہیں۔

    ڈیموکریٹ رکن کانگریس کا مزید کہنا تھا کہ دونوں ممالک میں تعلقات کی بہتری کےلیے کانگریس میں کافی محنت کرنا پڑے گی۔

    اس سے قبل ان کا کہنا تھا کہ عمران خان پاکستان کے مستقبل کے لئے ایک بڑی امید ہیں اور پاک امریکا تعلقات کیلئے ایک امید کی حیثیت رکھتے ہیں۔

    امریکی رکن کانگریس نے کہا تھا کہ عمران خان قوم کا درد رکھتےہیں، عمران خان کے امریکا میں بہت سےدوست اور خیرخواہ ہیں، عمران خان جمہوری اقدار پر یقین رکھتے ہیں، ہم کانگریس میں پاکستان کے کیس کو مضبوط کریں گے۔

  • بل گیٹس کا پولیو کے خاتمے کی کاوشوں پروزیراعظم عمران خان کوخراج تحسین

    بل گیٹس کا پولیو کے خاتمے کی کاوشوں پروزیراعظم عمران خان کوخراج تحسین

    اسلام آباد: مائیکروسافٹ کے بانی بل گیٹس نے پولیو کے خاتمے کی کاوشوں پر وزیراعظم عمران خان کوخراج تحسین پیش کیا اور مختلف شعبوں میں تعاون جاری رکھنے کی یقین دہانی کرائی۔

    تفصیلات کے مطابق وزیراعظم عمران خان اور بل گیٹس کے درمیان ٹیلی فونک رابطہ ہوا، ٹیلی فون کال 30 منٹ تک جاری رہی، کال کے دوران وزیراعظم کے پولیو معاون بابر عطا بھی موجود تھے۔

    بل گیٹس نے انتخاب جیتنے اور منصب سنبھالنے پر وزیراعظم کو مبارکباد دی اور پولیو کے خاتمے کی کاوشوں پر عمران خان کوخراج تحسین پیش کیا۔

    بل گیٹس کی جانب سے مختلف شعبوں میں تعاون جاری رکھنے کی یقین دہانی کرائی جبکہ پاکستان میں آئی ٹی کےشعبےکوتقویت دینے کےلیے تبادلہ خیال کیا گیا۔

    وزیراعظم نے بل گیٹس کاسماجی شعبے میں تعاون پر شکریہ ادا کیا۔

    مزید پڑھیں: وزیراعظم نے پولیو کے خاتمے کے لیے 5 سالہ پلان کی منظوری دے دی

    یاد رہے اکتوبر کے آغاز میں وزیراعظم عمران خان نے ملک کے طول و عرض سے پولیو کے خاتمے کے لیےپانچ سالہ پلان کی منظوری دی تھی اور ہدایت کی تھی کہ ہنگامی اقدامات کیے جائیں گے۔

    خیال رہے پاکستان ،افغانستان اور نائجیریا دنیا کے آخری تین ممالک ہیں، جہاں پولیو جیسی بیماری آج بھی موجود ہے، کچھ مہینے قبل عالمی ادارہ صحت نے اعلان کیا تھا کہ دنیا پولیو کے خاتمے کے قریب پہنچ چکی ہے، اس لیے عالمی برادری کو پولیو وائرس کے مکمل خاتمے کے لیے مؤثر کردار ادا کرنا ہوگا۔

    اسی سلسلے میں پاکستان پر سفری پابندیاں بھی عائد کی گئیں تھیں اور پاکستان کا کوئی بھی شہری بغیر پولیو کلیئرنس اور ویکسین لیے بغیر بین الاقوامی سفر نہیں کرسکتا۔

    عالمی ادارہ صحت کے مطابق پاکستان اور افغانستان بدستور پولیو وائرس کے پھیلاؤ میں ملوث ہیں، پاک افغان سرحدی مہاجرین پولیو پھیلاؤ کا سبب بن رہے ہیں۔

  • وزیراعظم کا دورہ پشاور، وزیراعلیٰ سے ملاقات

    وزیراعظم کا دورہ پشاور، وزیراعلیٰ سے ملاقات

    پشاور: وزیراعظم پاکستان عمران خان ایک روزہ دورے پر پشاور پہنچ گئے.

    تفصیلات کے مطابق وزیراعظم اس وقت پشاور میں موجود ہیں، جہاں ان کی وزیراعلیٰ‌ محمود خان سے ملاقات جاری ہے.

    اس اہم  ملاقات میں خیبرپختون خوا کی صوبائی کابینہ کے علاوہ وزیر دفاع پرویز خٹک اورارباب شہزاد بھی موجود ہیں.

    پارٹی ذرایع کے مطابق اس ملاقات میں وزیراعظم کوصوبائی حکومت کے100روزہ پلان سے آگاہ کیا جائے گا.

     مزید پڑھیں: وزیراعظم عمران خان کی آرمی چیف اور ڈی جی آئی ایس آئی سے ملاقات

    وزیراعظم دورے کے دوران قبائلی اضلاع میں اصلاحات کا بھی جائزہ لیں گے. ساتھ ہی وزیراعظم فاٹا ٹاسک فورس کے اجلاس کی بھی صدارت کریں گے.

    یاد رہے کہ آج وزیراعظم عمران خان نے آرمی چیف جنرل قمر جاوید باجوہ اور ڈی جی آئی ایس آئی سے ملاقات کی تھی. اس اہم ملاقات میں خطے میں سیکیورٹی و استحکام سے متعلق بات چیت کی گئی۔

  • پاکستان میں تبدیلی، بھارتی اداکار اور کرکٹر نے الیکشن لڑنے کا عندیہ دے دیا

    پاکستان میں تبدیلی، بھارتی اداکار اور کرکٹر نے الیکشن لڑنے کا عندیہ دے دیا

    نئی دہلی: بھارتی اداکار اکشے کمار اور کرکٹر گوتم گھمبیر نے سیاسی میدان میں قدم رکھ دیا، دونوں آئندہ عام انتخابات میں بھارتیہ جنتا پارٹی کے ٹکٹ پر الیکشن لڑیں گے۔

    بھارتی میڈیا کی رپورٹ کے مطابق کرکٹر گوتم گھمبیر نے عمران خان کی جدوجہد اور کامیابی سے متاثر ہوکر سیاسی میدان میں قدم رکھنے کا فیصلہ کیا وہ جلد حکمراں جماعت بھارتیہ جنتا پارٹی میں شمولیت اختیار کریں گے۔

    رپورٹ کے مطابق حکمراں جماعت بے جے پی گوتم گھمبیر کو آئندہ عام انتخابات میں نئی دہلی کی نشست سے ٹکٹ جاری کرے گی، اس وقت دلی میں عام آدمی پارٹی کی حکومت ہے۔

    دوسری جانب ایکشن اداکار اکشے کمار نے بھی بی جے پی سے اپنے روابط بڑھاتے ہوئے غیر اعلانیہ شمولیت اختیار کرلی تاہم وہ باضابطہ اعلان آئندہ چند دنوں میں کرنے کا ارادہ رکھتے ہیں۔

    مزید پڑھیں: کنگنا کی تقریب میں وزیراعلیٰ اور پارٹی صدر کی شرکت، تصویر وائرل

    بالی ووڈ اداکار کے قریبی ذرائع کا کہنا ہے کہ اکشے کمار مودی کی زندگی پر بنائی جانے والی فلم میں کردار ادا کررہے ہیں، گزشتہ دنوں اُن کی بھارتی وزیراعظم سے ملاقات ہوئی تو انہوں نے بی جے پی میں شمولیت کی دعوت دی۔

    قبل ازیں بالی ووڈ اداکارہ کنگنا رناوت بھی سیاسی میدان میں انٹری دینے کا اشارہ دے چکی ہیں، گزشتہ دنوں ایک تقریب کے دوران انہوں نے خواہش ظاہر کی تھی کہ اگر مضبوط پلیٹ فارم ملے تو سیاست کے ذریعے عوام کی خدمت کروں گی۔

    ئی دہلی میں ہونے والی سرکاری تقریب کے دوران انہوں نے مستقبل میں سیاست شروع کرنے کا عندیہ دیا تھا۔ اس پروگرام میں نریندر مودی بھی موجود تھے، بالی ووڈ اداکارہ نے اُن کی شان میں قصیدہ گوئی بھی کی اور انہیں ملک کا سب سے بہترین بھارتی وزیراعظم قرار دیا تھا۔

    یہ بھی پڑھیں: آنجہانی وزیراعظم ’واجپائی‘ نے شادی کیوں نہیں کی؟

    بعد ازاں میڈیا سے گفتگو کرتے ہوئے اُن کا کہنا تھا کہ ’مودی بھارت کے جمہوری وزیراعظم ہیں جن کی قیادت میں ملک درست سمت پر گامزن ہے، ہمیں چار سال کی کارکردگی کو نہیں بلکہ ماضی کو دیکھ کر بی جے پی کی حکومت کا موازانہ کرنا چاہیے‘۔