ARYNews.tv | Urdu – Har Lamha Bakhabar

Tag: Prince Harry

  • میگھن مارکل شاہی خاندان کے الزامات پر برہم

    میگھن مارکل شاہی خاندان کے الزامات پر برہم

    نیو یارک : برطانیہ کے منحرف شہزادہ ہیری کی اہلیہ میگھن مارکل کا کہنا ہے کہ ان کے سسرال بکنگھم پیلس کی جانب سے ان کے اور ان کے شوہر کے بارے میں مسلسل جھوٹ بولا جا رہا ہے۔

    غیر ملکی خبر رساں ادارےکے مطابق یہ بات انہوں نے مشہور امریکی ٹی وی شو میزبان اوپرا ونفرے کے پروگرام میں گزشتہ رات کو کہی ہے۔

    میگھن مارکل نے اوپرا ونفرے کے ایک سوال کے جواب میں کہا کہ مجھے نہیں پتہ کیسے وہ توقع کر رہے تھے کہ دی فرم (یعنی شاہی خاندان) ہمارے بارے میں جھوٹ پر سرگرم رہے گی اور ہم خاموش رہیں گے۔

    شو کی فوٹیج ایک ایسے وقت سامنے آئی ہے جب بکنگھم پیلس نے کہا کہ وہ اخبار کی ان خبروں پر تحقیقات کرے گا جس کے بارے میں کہا جا رہا ہے کہ میگھن مارکل پر الزام ہے کہ انہوں نے کینسنگٹن پیلس میں رہنے کے دوران وہاں پر کام کرنے والے اسٹاف کو پریشان کیا تھا۔

    تاہم اوپرا ونفرے کا شو ان الزامات کے سامنے آنے سے قبل ریکارڈ کیا گیا تھا۔

    بدھ کو بکنگھم پیلس کی جانب سے جاری ایک بیان میں کہا گیا تھا کہ شاہی خاندان کو برطانوی اخبار دی ٹائمز میں شائع ہونے والے الزامات پر تشویش ہے جو کہ میگھن مارکل اور شہزادہ ہیری کے لیے کام کرنے والے سابق اسٹاف کے دعوؤں کے پیش نظر عائد کیے گئے ہیں۔

    مزید پڑھیں  : شہزادہ ہیری اور میگھن کے نئے انٹرویو پر برطانوی میڈیا بے چین

    واضح رہے کہ دی ٹائمز اخبار کے دعوے اکتوبر 2018 کے ہیں۔ شاہی محل کا کہنا تھا کہ اسٹاف میں اس وقت کام کرنے والے افراد کو بلا کر ان سے پوچھا جائے گا، کیونکہ شاہی خاندان کسی قسم کی ہراسگی اور کسی کو پریشان کرنے کو برادشت نہ کرتا ہے نہ کرے گا۔

    میگھن مارکل کی جانب سے اس وقت جاری ایک بیان میں انہوں نے اپنے کردار پر کیے جانے والے حملے پر افسردگی کا اظہار کیا۔ ٹی وی انٹرویو سے پہلے میگھن مارکل اور شہزادہ ہیری نے کہا تھا کہ دی ٹائمز اخبار کو مکمل طور پر جھوٹا بیان پھیلانے کے لیے استعمال کیا جا رہا ہے۔

  • شہزادہ ہیری اور میگھن کے نئے انٹرویو پر برطانوی میڈیا بے چین

    شہزادہ ہیری اور میگھن کے نئے انٹرویو پر برطانوی میڈیا بے چین

    برطانیہ کے منحرف شاہی جوڑے شہزادہ ہیری اور ان کی اہلیہ میگھن مرکل نے معروف امریکی میزبان اوپرا ونفرے کو ایک انٹرویو دیا ہے جس کی جھلکیاں سامنے آنے پر انہیں سخت تنقید کا نشانہ بنایا جارہا ہے۔

    اوپرا ونفرے کو دیے گئے اس انٹرویو کے چند ٹیزرز سامنے آئے ہیں جس کے بعد شاہی خاندان سمیت برطانوی میڈیا اور عوام کافی اضطراب میں مبتلا نظر آرہے ہیں۔

    شہزادہ ہیری اور میگھن کے انٹرویو کے ٹیزر سے متعلق مختلف حلقوں کا کہنا ہے کہ ہیری اور میگھن کے اس تفصیلی انٹرویو میں اس جوڑے کی جانب سے اپنی علیحدگی کی وجہ بتاتے ہوئے شاہی خاندان کو عوام کے سامنے بطور ایک مافیا پیش کیا گیا ہے۔

    انٹرویو کے ٹیزر میں دیکھا جا سکتا ہے کہ میزبان اوپرا میگھن سے پوچھ رہی ہیں کہ آپ خاموش تھیں یا آپ کو خاموش کروایا گیا تھا؟ انٹرویو کے دوران میگھن کو اس سوال پر خاموش دکھایا گیا ہے اور اس دوران ٹیزر میں ایک افسردہ دھن بھی چلائی گئی ہے۔

    اس ٹیزر پر تبصرہ نگار رابرٹ جابسن کی جانب سے رد عمل دیتے ہوئے اس انٹرویو کی ریکارڈنگ کو ڈرامہ قرار دیا گیا اور اس میں استعمال کی گئی افسردہ دھنوں پر شدید تنقید کی گئی ہے۔

    رابرٹ جابسن نے کہا کہ اوپرا انٹرویو میں شاہی خاندان کو مافیا کی طرح پیش کیا گیا ہے، یہ تقریباً بیوقوفی ہے۔

    ایک اور ٹیزر میں شہزادہ ہیری اپنی والدہ کا ذکر کرتے ہوئے کہتے ہیں کہ میں بہت خوش ہوں کہ میری اہلیہ میرے ساتھ ہیں لیکن میری والدہ نے اکیلے ایک مشکل وقت گزارا ہے، یہ وقت ہمارے لیے بھی مشکل تھا لیکن کم از کم ہم ایک ساتھ تھے۔

    ایک اور ٹیزر میں دکھایا گیا ہے کہ اوپرا میگھن سے پوچھتی ہیں کہ انہیں کیسا محسوس ہورہا ہے کہ شاہی محل انہیں اس وقت سچ بولتے ہوئے سن رہا ہوگا، جس پر میگھن نے کہا کہ ہم اتنے عرصے سے خاموش تھے میں نہیں جانتی اب اس کے بعد مزید ان (شاہی خاندان) کی کیا توقعات ہیں۔

  • پرنس ہیری، میگھن سوشل میڈیا سے دل برداشتہ، وجہ سامنے آ گئی

    پرنس ہیری، میگھن سوشل میڈیا سے دل برداشتہ، وجہ سامنے آ گئی

    لندن: شاہی خاندان کو خیرباد کہنے والے پرنس ہیری اور ان کی اہلیہ میگھن مرکل نے دلبرداشتہ ہو کر سوشل میڈیا کا استعمال ترک کر دیا۔

    تفصیلات کے مطابق پرنس ہیری اور میگھن مرکل نے سوشل میڈیا کا استعمال ترک کر دیا ہے، ایک طویل عرصے سے انھوں نے سوشل میڈیا پلیٹ فارمز پر کوئی چیز شیئر نہیں کی۔

    میڈیا رپورٹس کے مطابق ٹویٹر اور فیس بُک پر دکھائی جانے والی نفرت نے پرنس ہیری اور میگھن کو دل برداشتہ کیا ہے، صارفین کی جانب سے پوسٹس میں نفرت آمیز الفاظ اور بیانات کی وجہ سے شاہی جوڑا سوشل میڈیا کا استعمال ترک کرنے پر مجبور ہوا۔

    بتایا جا رہا ہے کہ ان کی سوشل میڈیا پلیٹ فارمز پر واپسی کی کوئی امید نہیں ہے، برطانیہ کی ملکہ الزبتھ دوئم کے پوتے ڈیوک پرنس ہیری اور ان کی اہلیہ ڈچز مگھن اپنی این جی او آرچویل کے لیے بھی سوشل میڈیا کے استعمال کا ارادہ نہیں رکھتا۔

    پرنس ہیری فیس بک پر کیا کرتے تھے؟ دلچسپ انکشاف

    یاد رہے کہ 2019 میں صحت کے عالمی دن کے موقع پر پرنس ہیری کی امریکی اہلیہ میگھن نے انٹرویو میں کہا تھا کہ وہ سوشل میڈیا پر دنیا میں سب سے زیادہ چیخ و پکار کا سامنا کرنے والی شخصیت ہیں اور یہ چیز ناقابل برداشت ہے۔

    پرنس ہیری نے بھی کہا تھا کہ سوشل میڈیا نفرت، صحت اور حقیقت کے بحران کی تخلیق میں مدد کرتا ہے۔

    پرنس ہیری کی زندگی پر شریک حیات نے کیا اثرات مرتب کیے؟

    واضح رہے کہ پرنس ہیری نے سماجی رابطے کی ویب سائٹ فیس بک پر اپنا ایک خفیہ اکاؤنٹ ’اسپائک‘ کے نام سے بھی بنایا ہوا تھا، جسے وہ عام صارفین کی طرح استعمال کرتے تھے۔

  • شہزادہ ہیری و میگھن اور شہزادی ڈیانا کی الم ناک زندگی میں کیا مماثلت ہے؟

    شہزادہ ہیری و میگھن اور شہزادی ڈیانا کی الم ناک زندگی میں کیا مماثلت ہے؟

    لندن: اگرچہ اب شہزادہ ہیری اور ان کی اہلیہ میگھن مارکل کے شاہی خاندان سے سارے ناتے ٹوٹ چکے ہیں لیکن عالمی میڈیا میں یہ بازگشت سنائی دے رہی ہے کہ ان کی زندگی میں لیڈی ڈیانا کی الم ناک زندگی کی مماثلت دکھائی دینے لگی ہے۔

    یہی وجہ ہے کہ ہیری اور میگھن کو شہزادی ڈیانا کی زندگی سے سبق سیکھنے کا مشورہ دیا جانے لگا ہے۔

    شہزادی ڈیانا نے برطانیہ کے شاہی خاندان میں کیسی الم ناک زندگی گزاری، اس داستان سے آگاہی رکھنے والے اب شاہی خاندان کو خیرباد کہہ کر امریکا جا بسنے والے پرنس ہیری اور میگھن مارکل کی جوڑی کی زندگی میں بھی وہی نقوش دیکھ رہے ہیں۔

    کچھ لوگ پرنس ہیری کو انھی راستوں پر گامزن ہونے پر تنبیہ بھی کر رہے ہیں، جن راہوں پر ان کی والدہ نے شاہی زندگی کے ہنگامہ خیز دور میں قدم رکھا تھا، اور پھر انھیں ایک افسوس ناک انجام سے دوچار ہونا پڑا۔

    تو کیا پرنس ہیری واقعی شہزادی ڈیانا کے نقش قدم پر چل پڑے ہیں؟ ڈیلی میل سے گفتگو کرتے ہوئے آنجہانی لیڈی ڈیانا کے سابق پرائیویٹ سیکریٹری پیٹرک جیفسن نے کہا اس وقت کے شاہی خاندان کے کچھ افراد کے رجحانات پینوراما انٹرویو کے بعد والی شہزادی ڈیانا کے ہیں۔

    لیڈی ڈیانا کے حوالے سے پرانا تنازع دوبارہ کھڑا ہوگیا

    یاد رہے کہ 1995 میں لیڈی ڈیانا نے بی بی سی کو ایک انٹرویو دیا تھا جو پینوراما انٹرویو کے نام سے مشہور ہے، اس میں ڈیانا نے کھل کر بات کی تھی اور اپنے ساتھ پیش آنے والے سخت اور تلخ واقعات سمیت شاہی محل کی صورت حال سے مفصل طور پر دنیا کو آگاہ کیا تھا۔

    ڈیانا کے مشیر پیٹرک جیفسن نے واضح طور پر کہا کہ جو رجحانات لیڈی ڈیانا تھے اب وہ ان کے چھوٹے بیٹے میں بھی دریافت ہو رہے ہیں۔ جیفسن نے اس بات پر تنقید بھی کی کہ محل سے دور جانے پر آپ کو ویسا احترام اور شہرت نہیں مل سکتی۔

    انھوں نے تنبیہ کی کہ شارٹ کٹ لینا اگرچہ بہت آسان ہے، پبلک ریلیشن ماہرین کی مدد سے آپ لوگوں کو اپنی طرف متوجہ کر لیں گے لیکن یاد رہے کہ آپ وہ حد بھی پار کر سکتے ہیں جسے پار کرنا اچھا نہیں ہوتا۔

  • شاہی پروٹوکول کی خلاف ورزی پر شہزادہ ہیری اور میگھن تنقید کی زد میں

    شاہی پروٹوکول کی خلاف ورزی پر شہزادہ ہیری اور میگھن تنقید کی زد میں

    برطانوی شاہی خاندان کے چشم و چراغ شہزادہ ہیری اور ان کی اہلیہ میگھن مرکل کو امریکی انتخابات میں ووٹ ڈالنے کی تاکید کو سخت تنقید کا نشانہ بنایا جارہا ہے۔

    شہزادہ ہیری اور ان کی اہلیہ میگھن مرکل اس وقت امریکی ریاست کیلی فورنیا میں 14 ملین ڈالرز مالیت کے ایک محل میں رہائش پذیر ہیں۔ جوڑے نے امریکی انتخابات میں عوام سے ووٹ ڈالنے کی اپیل کی ہے۔

    2 روز قبل جوڑے نے اے بی سی ٹیلی ویژن کے اپنے پہلے پرائم ٹائم ٹی وی شو کے موقع پر امریکی شہریوں پر زور دیا کہ وہ اپنے ووٹ کے حق کا استعمال کریں۔

    جوڑے کو شاہی پروٹوکول کی اس خلاف ورزی پر سخت تنقید کا سامنا ہے۔

    شہزادہ ہیری نے ووٹرز سے کہا کہ وہ نفرت پر مبنی تقریر، غلط اطلاعات اور آن لائن منفی چیزوں کو مسترد کردیں، جبکہ میگھن نے ووٹرز سے کہا کہ صدارتی انتخابات ان کی زندگی کے اہم پولز میں شامل ہیں۔ اس موقع پر شاہی جوڑے نے کسی بھی امیدوار کی توثیق نہیں کی۔

    اس معاملے کے بعد دونوں کو کڑی تنقید کا سامنا ہے کیونکہ برطانوی روایات کے مطابق شاہی خاندان سے یہ امید کی جاتی ہے کہ وہ سختی کے ساتھ سیاست سے اجتناب کریں گے۔

    سوشل میڈیا پر جوڑے کی اس حرکت پر انہیں تنقید کا نشانہ بنایا گیا جبکہ کچھ افراد نے ان کی تعریف بھی کی۔

  • میگھن مارکل پھوٹ پھوٹ کر رو پڑیں، وجہ کیا بنی ؟

    میگھن مارکل پھوٹ پھوٹ کر رو پڑیں، وجہ کیا بنی ؟

    کیلیفورنیا : شاہی خاندان کے سینیئر رکن کی حیثیت سے دستبرداری کے موقع پر ڈچز آف سسیکس میگھن مارکل اپنے جذبات پر قابو نہ رکھ سکیں اور پھوٹ پھوٹ کر رو دیں۔ یہ بات فائنڈنگ فریڈم نامی کتاب کے مصنفین نے بتائی۔

    کتاب کے مصنفین کے مطابق میگھن مارکل اپنے شوہر پرنس ہیری کے ساتھ اپنی آخری شاہی مصروفیت کے موقع پر ویسٹ منسٹر ایبے میں ہونے والی کامن ویلتھ سروس میں شرکت سے قبل ایسوسی ایشن آف کامن ویلتھ یونیورسٹیز کے طلبہ سے بکنگھم پیلس میں ملاقات کے دوران ان کی آنکھیں بھر آئی تھیں۔

    یاد رہے کہ شہزادہ ہیری اور میگھن مارکل نے اس سال جنوری میں شاہی خاندان کے سینیئر رکن کی حیثیت سے دستبرداری اختیار کرنے کا اعلان کیا تھا اور دونوں نے مارچ 2020 میں ویسٹ منسٹر ایبے میں اپنی آخری شاہی تقریب میں شاہی خاندان کے رکن کی حیثیت سے شرکت کی تھی۔

    پرنس ہیری اور میگھن مارکل سرکاری طور پر اپریل 2020 میں شاہی خاندان کے سینیئر ارکان کی حیثیت سے باقاعدہ دستبردار ہوگئے تھے۔

    دریں اثنا اطلاعات کے مطابق پرنس ہیری اور میگھن مارکل پرائم ٹائم ٹیلی ویژن پروگرام میں شامل ہونے کے لیے مکمل طور پر تیار ہیں۔ جس میں ٹائم میگزین ک جانب سے دنیا کے انتہائی بااثر افراد کی سالانہ فہرست کے حوالے سے ایک تقریب ہوگی۔

    اس کے علاوہ شاہی جوڑے کو ای نیوز کے ایک پرومو میں ان کے شاہی خطاب ڈچز آف سسیکس کے بجائے عام سے انداز میں صرف ہیری اور میگھن کے ناموں سے متعارف کرایا گیا ہے تاہم ٹائم کے مضمون میں جس میں اس ایونٹ کو ہائی لائٹ کیا گیا ہے اس میں ان کے شاہی خطاب کو شامل کیا گیا ہے۔

  • ہیری اور میگھن کا نیٹ فلیکس سے معاہدہ، ملکہ برطانیہ ناراض

    ہیری اور میگھن کا نیٹ فلیکس سے معاہدہ، ملکہ برطانیہ ناراض

    لندن: ملکہ برطانیہ الزبتھ دوم اپنے پوتے شہزادہ ہیری اور ان کی اہلیہ میگھن مرکل کے نیٹ فلیکس کے ساتھ معاہدے پر ناراض ہوگئیں۔

    غیرملکی خبررساں ادارے کی رپورٹ کے مطابق برطانیہ کی ملکہ الزبتھ دوم اپنے پوتے شہزادہ ہیری اور میگھن مرکل کے امریکی ٹیکنالوجی، میڈیا سروسز پرووائیڈر اور پروڈکشن کمپنی نیٹ فلیکس کے ساتھ کروڑوں ڈالر کے معاہدے پر سخت ناراض ہوگئیں۔

    شہزادہ ہیری اور میگھن مرکل نے گزشتہ ہفتے اعلان کیا تھا کہ ان کی پروڈکشن کمپنی کا نیٹ فلیکس (اسٹیرمنگ جائنٹ فلم پروڈکشن اور ڈاکومینٹری بنانے والے امریکی ادارے) کے ساتھ کروڑوں ڈالر کا معاہدہ ہوگیا ہے۔

    رپورٹ کے مطابق 35 سالہ شہزادہ ہیری اور ان کی اہلیہ 39 سالہ میگھن اس معاہدے کے ذریعے 15 کروڑ ڈالر کمائیں گے۔

    مزید پڑھیں: ’’ملکہ برطانیہ، کیٹ اور شہزادہ ولیم کی شادی کیخلاف تھیں‘‘

    برطانوی اخبار کے مطابق ملکہ الزبتھ ثانی شہزادہ ہیری اور ان کی اہلیہ میگھن کے نیٹ فلیکس کے ساتھ اس معاہدے کے سخت خلاف ہیں۔

    برطانوی اخبار نے شاہی خاندان کے اندروںی ذرائع کے حوالے سے بتایا ہے کہ اگرچہ ملکہ برطانیہ اس ڈیل سے سخت ناخوش ہیں، لیکن وہ جانتی ہیں کہ وہ شہزادہ ہیری اور میگھن کا ذہن تبدیل نہیں کرپائیں گی، کیونکہ اب اس حوالے سے بہت تاخیر ہوچکی ہے۔

    یاد رہے کہ اس سے قبل یہ اطلاعات بھی تھیں کہ شہزادہ ہیری اور میگھن نے اپنے اس معاہدے کے حوالے سے ملکہ برطانیہ کو آگاہ نہیں کیا تھا جبکہ انہیں معاہدے کی اطلاع ان کے معاونین نے دی تھی۔

  • میگھن مرکل کیا چاہتی تھیں؟ دوست کے سنسنی خیز انکشافات

    میگھن مرکل کیا چاہتی تھیں؟ دوست کے سنسنی خیز انکشافات

    لندن: برطانوی شہزادہ ہیری کی اہلیہ میگھن مرکل کی دوست نے ان کے رازوں سے پردہ اٹھا دیا۔

    غیرملکی خبررساں اددارے کی رپورٹ کے مطابق میگھن کی ایک پرانی دوست نے میگھن کے عزائم بتا دیے، انہوں نے بتایا کہ میگھن ہمیشہ ڈیانا جیسی بننا چاہتی تھی، اِس وقت میگھن مارکل کی زندگی بھی اُسی مقام پر ہے جہاں لیڈی ڈیانا کی برطانوی شاہی خاندان سے علیحدہ ہونےکے بعد تھی۔

    میگھن کی دوست نے کہا کہ فرق یہ کہ میگھن شہزادہ ہیری کی اہلیہ ہونے کے باوجود شاہی ذمہ داریوں سے علیحدہ اور ڈیانا شہزادہ چارلس کی طلاق ہونے کے بعد بھی تمام تر زمے داریاں بخوبی نبھاتی رہی تھیں۔

    مزید پڑھیں: کیا شاہی خاندان میگھن مرکل کے خلاف کوئی سازش کر رہا تھا؟

    میگھن کی دوست نے شہزادے ہیری کونصیحت کہ میگھن تو اپنا کردار بخوبی نبھائیں گی، لیکن ہیری میگھن کے ساتھ محتاط رہیں۔

    دوسری جانب شہزادی ڈیانا کا مجسمہ ان کی رہائش گاہ کنسگٹن پیلس میں نصب کرنے کی تیاریاں جاری ہیں، آئندہ برس جولائی میں ڈیانا کی ساٹھویں سالگرہ کے موقع پر مجسمہ نصب کردیا جائے گا۔

    واضح رہے کہ اپنی والدہ کے مثبت کردار کو اجاگر کرنے کے لیے لیڈی ڈیانا کی یاد میں مجسمہ تعمیر کروانے کے احکامات 2017 میں دونوں برطانوی شہزادوں نے دئیے تھے۔

    خیال رہے کہ ڈیانا اور دودی الفائد اپنے ڈرائیور سمیت اکتیس اگست 1997, میں پیرس انڈر بائی پاس میں ایک کار حادثے میں ہلاک ہو گئے تھے۔

  • کرونا وائرس: شہزادہ ہیری اور میگھن مرکل نے خطیر رقم عطیہ کردی

    کرونا وائرس: شہزادہ ہیری اور میگھن مرکل نے خطیر رقم عطیہ کردی

    لندن: برطانوی شہزادے ہیری اور ان کی اہلیہ میگھن مرکل نے اپنی شادی سے حاصل ہونے والی 90 ہزار پاؤنڈز کی خطیر رقم کرونا وائرس کے خلاف اقدامات کے لیے عطیہ کردی۔

    بین الاقوامی خبر رساں ادارے کے مطابق جوڑے نے یہ رقم ایک فلاحی ادارے فیڈنگ بریٹین کو دی ہے جو اس بحران کے دنوں میں لوگوں کو کھانا فراہم کر رہا ہے۔

    رپورٹ کے مطابق یہ پہلے ہی طے تھا کہ جوڑے کی شادی پر نشریاتی اداروں کی جانب سے جو منافع حاصل ہوگا وہ جوڑا اپنی مرضی سے کسی بھی ادارے کو عطیہ کرسکے گا۔

    یہ رقم دراصل شادی کو نشر کرنے کے حقوق کی فروخت سے حاصل ہوئی ہے جس کا بڑا حصہ برطانوی نشریاتی ادارے بی بی سی سے حاصل ہوا ہے۔

    دوسری جانب جوڑے نے اس رقم کو عطیہ کرنے کے لیے جس ادارے کا انتخاب کیا ہے وہ کسی اور کا نہیں بلکہ کنٹربری چرچ کے اس بشپ کا ہے جنہوں نے جوڑے کی شادی کی رسومات ادا کیں۔

    ہیری اور میگھن نے چند ماہ قبل مذکورہ ادارے کی سرگرمیوں کا جائزہ بھی لیا تھا، جبکہ رقم عطیہ کرنے سے پہلے انہوں نے بشپ سے فون پر گفتگو بھی کی جنہوں نے کرونا وائرس کے بحران کے دوران ادارے کی امدادی سرگرمیوں کے بارے میں آگاہ کیا۔

    بشپ نے خطیر رقم عطیہ کرنے پر جوڑے کا شکریہ ادا کیا ہے اور امید ظاہر کی ہے کہ اس رقم سے ان کی امدادی سرگرمیوں میں مزید وسعت پیدا ہوگی۔

    بشپ کا ادارہ اس سے قبل متوسط طبقے کے اسکولوں میں بچوں کو ناشتہ اور ظہرانہ فراہم کر رہا تھا تاہم اب کرونا وائرس کے بحران میں ادارے نے خاندانوں کو کھانا دینا شروع کردیا ہے۔

  • ہیری اور میگھن نے شاہی زندگی کو الوداع کہہ دیا

    ہیری اور میگھن نے شاہی زندگی کو الوداع کہہ دیا

    برطانوی شاہی جوڑے شہزادہ ہیری اور ان کی اہلیہ میگھن مرکل نے بالآخر شاہی زندگی کو الوداع کہہ دیا، اپنی آخری پوسٹ میں جوڑے نے سب کا شکریہ ادا کیا ہے۔

    ہیری اور میگھن مرکل کے شاہی جوڑے کی حیثیت سے استعمال کیے جانے والے انسٹاگرام اکاؤنٹ سے آخری پوسٹ شیئر کردی گئی۔

    سسکیس رائل کے اکاؤنٹ سے جوڑے کی جانب سے شیئر کی گئی پوسٹ میں کہا گیا، اس کمیونٹی کا شکریہ، سپورٹ کرنے کے لیے، متاثر کرنے کے لیے اور دنیا کو بہتر بنانے میں مدد کرنے کے لیے۔

     

    View this post on Instagram

     

    As we can all feel, the world at this moment seems extraordinarily fragile. Yet we are confident that every human being has the potential and opportunity to make a difference—as seen now across the globe, in our families, our communities and those on the front line—together we can lift each other up to realise the fullness of that promise. What’s most important right now is the health and wellbeing of everyone across the globe and finding solutions for the many issues that have presented themselves as a result of this pandemic. As we all find the part we are to play in this global shift and changing of habits, we are focusing this new chapter to understand how we can best contribute. While you may not see us here, the work continues. Thank you to this community – for the support, the inspiration and the shared commitment to the good in the world. We look forward to reconnecting with you soon. You’ve been great! Until then, please take good care of yourselves, and of one another. Harry and Meghan

    A post shared by The Duke and Duchess of Sussex (@sussexroyal) on

    اپنی پوسٹ میں جوڑے نے کہا کہ وہ انہیں مزید یہاں (انسٹاگرام) پر نہیں دیکھ سکیں گے تاہم ان کی فلاحی خدمات جاری رہیں گی۔

    جوڑا آج یعنی 31 مارچ کو اپنے شاہی لقب یعنی سسکیس رائل سے دستبردار ہوجائے گا اور اس کے ساتھ ہی گزشتہ کئی ماہ سے شہ سرخیوں میں رہنے والے اس شاہی تنازعے کا بھی اختتام ہوجائے گا۔

    ہیری اور میگھن نے گزشتہ برس شاہی خاندان سے علیحدگی اور معاشی طور پر خود مختاری کا اعلان کیا تھا۔

    شاہی جوڑے نے اپنے بیان میں کہا تھا کہ وہ شاہی پروٹوکول چھوڑ کر عام انسانوں کی طرح زندگی بسر کرنا چاہتے ہیں اور اب وہ مستقبل میں اپنے فلاحی و دیگر کاموں پر توجہ دیں گے۔

    شاہی خاندان سے علیحدگی کے بعد ہیری اور میگھن ’ہز اینڈ ہر رائل ہائی نیس‘ کے شاہی القابات، سرکاری مالی امداد اور دیگر شاہی مراعات سے محروم ہوچکے ہیں۔

    دونوں اپنے شیر خوار بیٹے آرچی کے ساتھ پہلے کینیڈا منتقل ہوئے تاہم اب کہا جارہا ہے کہ جوڑا امریکی ریاست کیلی فورنیا منتقل ہونے جارہا ہے۔