لاہور: برطانوی شہزادہ ولیم اور شہزادی کیٹ مڈلٹن دورہ لاہور کو یادگار بنا کر اسلام آباد واپس روانہ ہوگئے۔
تفصیلات کے مطابق برطانوی جوڑے نے آج لاہور میں ایس او ایس ولیج کا دورہ کیا جہاں انہوں نے بےسہارا بچوں کے ساتھ وقت گزارا اور تحائف بھی تقسیم کیے۔
شاہی جوڑے نے آدھے گھنٹے سے زائد ایس او ایس ولیج میں وقت گزارا، بعد ازاں شہزادہ اور شہزادی ایس او ایس ولیج سے ایئرپورٹ روانہ ہوئے۔
شاہی جوڑے نے گزشتہ روز بھی ایس او ایس ولیج کا دورہ کیا تھا۔ شاہی جوڑے نے بچوں کے ساتھ مل کر خوب رنگ جمایا اور ہنستے مسکراتے رہے۔
برطانوی شاہی جوڑے نے گزشتہ روز نیشنل کرکٹ اکیڈمی کا بھی دورہ کیا تھا، جہاں چیف ایگزیکٹوپی سی بی وسیم خان نے انہیں بریفنگ دی اور کھلاڑی بھی شاہی جوڑے سے گرم جوشی سے ملے تھے۔
یاد رہے کہ گزشتہ روز پاکستانی روایتی سفید شلوار قمیض میں ملبوس ہوکر برطانوی شہزادی اور شہزادہ زندہ دلان شہر لاہور پہنچنے پر گورنر اور وزیراعلیٰ پنجاب نے ان کا ریڈ کارپٹ پر شاندار استقبال کیا تھا۔
شاہی جوڑا بھی کرکٹ کا شوقین، نیشنل کرکٹ اکیڈمی میں بیٹنگ کے جوہر
بعد ازاں برطانوی شاہی جوڑے سے گورنر اور وزیراعلیٰ پنجاب نے ایئرپورٹ لاؤنج میں ملاقات کی، وزیراعلیٰ پنجاب نے شہزادہ ولیم کو زیتون کی لکڑی سے بنی چھڑی اور پینٹگ اور شہزادی کیٹ میڈلٹن کو شال تحفے میں دی تھی۔
گورنر پنجاب چوہدری محمد سرور نے بھی معزز مہمانوں کو تحائف پیش کیے۔
