لاہور: ملک بھر میں گیارہ مجرمان کو پھانسی دیدی گئی، لاہور میں دو ، فیصل آباد میں دو جبکہ ملتان، ساہیوال ،سرگودھا،جہلم ،ٹوبہ ٹیک سنگھ ،گوجرانولہ اور مچھ میں ایک ،ایک مجرم کو تختہ دار پر لٹکادیا گیا۔
قتل کے مجرمان کو ان کے منطقی انجام تک پہنچانے کا سلسلہ جاری ہے، لاہور میں دو مجرمان کو کوٹ لکھپت جیل میں پھانسی دیدی گئی، مجرم شیرعلی نے دوہزار دو میں دو افراد کو قتل کیا تھا، مجرم شکیل انیس سو ستانوے میں ایک شخص کے قتل میں ملوث تھا۔
فیصل آباد سینٹرل جیل میں افتخار عرف پاشی اور آصف زیب کوتختہ دار پر لٹکا دیا گیا، افتخار عرف پاشی نے دوہزار ایک میں دو بھائی اور ان کے بہنوئی کوقتل کیا تھا ، مجرم آصف زیب نے انیس سو چھیانوے میں اپنے مخالف کو نشانہ بنایا تھا۔
ساہیوال میں مجرم اسحاق اور گوجرانولہ میں محمد نواز کو پھانسی دیدی گئی۔
ٹوبہ ٹیک سنگھ میں مجرم نور احمد اپنے انجام کو پہنچا، مجرم نے دوہزار چھ میں ایک ہی خاندان کے چھ افراد کو قتل کیا تھا، سرگودھا جیل میں تہرے قتل کے مجرم امجد کو تختہ دار پر لٹکا دیا گیا۔
ملتان میں قتل کے مجرم محمد فریاد بھی اپنے منتطقی انجام کو پہنچ گیا جبکہ مچھ جیل میں بھی سزائے موت کے منتظر قیدی ابراہیم جوگیزئی کو پھانسی دیدی گئی، جہلم میں محمد افضل کو تختہ دار پر لٹکا دیا گیا۔
