سعودی عرب میں موجود ادارہ امور حرمین شریفین کے زیر انتظام ماہ رمضان المبارک میں مسجد نبویؐ شریف میں 73 لاکھ سے زائد افطار پیکٹس تقسیم کیے گئے۔
سعودی خبر رساں ادارے کی رپورٹ کے مطابق مسجد نبویؐ شریف کی انتظامیہ کی جانب سے ماہ صیام میں روزہ داروں کو افطار کرانے کے لیے خصوصی انتظامات کیے گئے تھے، افطار دسترخوانوں کی تیاری اور روزہ داروں کے لیے صحت مند افطار کی فراہمی شامل تھا۔
افطار پیکٹس میں آب زم زم کی بوتل، اعلی کوالٹی کی کھجوروں کا پیکٹ، زمزم کی ایک چھوٹی بوتل، لسی پیک، رمضان میں استعمال ہونے والا خصوصی چاٹ مصالہ (دقہ)، دہی کا پیکٹ، ٹشو پیپر اور کھجور والا بسکٹ شامل ہوتا ہے۔
مسجد نبوی کی انتظامیہ کے مطابق یومیہ بنیادوں پر مسجد نبوی شریف کے اندرونی و بیرونی صحنوں میں 2 لاکھ 27 ہزار افطار پیکٹس تقسیم کیے گئے۔
اس سے قبل سعودی عرب میں مسجد الحرام اور مسجد نبوی صلی اللہ علیہ وآلہ وسلم آنے والے زائرین کے لئے اہم ہدایت جاری کی گئی تھیں۔
رپورٹ کے مطابق سعودی وزارتِ حج وعمرہ نے زائرین سے کہا ہے کہ حرمین شریفین میں سونے اور راہداریوں میں بیٹھنے سے اجتناب برتیں۔
سوشل میڈیا پلیٹ فارم ایکس پر وزارتِ حج وعمرہ نے ہدایت جاری کی ہے کہ حرمین شریفین کے تقدس کا خیال رکھیں۔ راہداریوں میں بیٹھنے سے لوگوں کو دشواری کا سامنا کرنا پڑتا ہے جس کے باعث رش بڑھ جاتا ہے۔
ایک ہفتے میں 51 لاکھ زائرین کی مسجد نبویؐ آمد
وزارت کے مطابق مسجد الحرام میں آنے سے قبل اپنا سامان کمرے یا ہوٹل میں رکھیں محض ضروری شناختی دستاویز وغیرہ ہی اپنے پاس رکھیں اضافی سامان حرمین میں لانے سے گریز کریں۔
