ڈھاکہ / دہلی / لندن / پیرس: جموں و کشمیر کی حیثیت تبدیل کرنے کے بھارتی یکطرفہ فیصلے کیخلاف دنیا بھر میں مظاہروں کا سلسلہ جاری ہے۔ مظاہرین نے مودی سرکار کیخلاف شدید نعرے بازی کرتے ہوئے کشمیر سے متعلق فیصلہ واپس لینے کا مطالبہ کیا ہے۔
تفصیلات کے مطابق باھرتی لوک سبھا میں آرٹیکل 370کے نفاذ کیخلاف مختلف ممالک میں احتجاج کیا جارہا ہے، اس سلسلے میں بنگلہ دیش کے دارالحکومت ڈھاکہ میں زبردست احتجاجی مظاہرہ کیا گیا۔
سیکڑوں افراد نعرے لگاتے ہوئے سڑکوں پر نکل آئے۔ مظاہرے میں مقبوضہ کشمیر سے متعلق مودی حکومت کے فیصلے کی سخت الفاظ میں مذمت کی گئی۔
شرکاء سے خطاب کرتے ہوئے اسلامی اندولن بنگلہ دیش کے رہنما مولانا ذکریا نے کہا کہ بھارت نے دنیا بھر کے مسلمانوں کا دل دکھایا اور انہیں ناراض کیا ہے۔
دوسری جانب دہلی میں کمیونسٹ پارٹی نے بھی بھارتی حکومت کے فیصلے کیخلاف احتجاج کیا۔ مظاہرین نے مودی سرکار سے کشمیر سے متعلق فیصلہ واپس لینے کا مطالبہ کیا۔
اس کے علاوہ بھارتی پنجاب میں بھی مودی سرکار کے خلاف بڑا مظاہرہ کیا گیا، امریکا اور برطانیہ میں کشمیر میں حالیہ بھارتی دہشت گردی کیخلاف احتجاجی مظاہرہ کیا گیا، شرکاء نے مودی سرکار کے خلاف زبردست نعرے بازی کی۔
علاوہ ازیں کشمیر کونسل ای یو نے بھی برسلز میں احتجاجی کیمپ لگانے کا اعلان کردیا، پاکستان بار کونسل نے بھارتی اقدام کیخلاف کل ہڑتال کرنے کا اعلان کیا ہے۔
اس کے علاوہ بھارتی اقدام کےخلاف پیرس میں ایفل ٹاور پر بھی بڑا مظاہرہ کیا گیا، ایفل ٹاورکی فضا”مودی دہشت گرد”کےنعروں سے گونج اٹھی، شرکاء نے مقبوضہ کشمیر کی خصوصی حیثیت کے خاتمے کا اقدام نامنظور کے نعرے لگاتے ہوئے اقوام متحدہ سے مطالبہ کیا کہ کشمیریوں کو ان کا جائز حق دیا جائے۔
