قومی ٹیم کے فاسٹ بولر حسن علی نے کہا ہے کہ گرین جرسی دوبارہ پہننا کسی خواب سے کم نہیں ہے۔
پاکستان کے فاسٹ بولر حسن علی کی قومی ٹیم میں واپسی پر پاکستان کرکٹ بورڈ کی جانب سے ایک ویڈیو شیئر کی گئی ہے جس میں بولر نے اپنی واپسی کو خواب قرار دیا ہے۔
حسن علی نے کہا کہ گرین جرسی دوبارہ پہننا کسی خواب سےکم نہیں ہے اور انجری کے بعد کم بیک آسان نہیں تھا، لیکن میرے لیے گرین شرٹ پھر سے پہننا ایک اعزاز ہے۔
پاکستان کے فاسٹ بولر نے کہا کہ انجری کے بعد ہر کھلاڑی کو ایک پلٹ فارم چاہیے ہوتا ہے جہاں وہ اپنی فٹنس شو کرے وہ موقع کراچی کنگز سے ملا جہاں میں نے اپنی پرفارمنس دی اور پاکستان سپر لیگ (پی ایس ایل) میں پرفارمنس کا صلہ ہی ملا ہے۔
انہوں نے مزید کہا کہ انسان کی فطرت ہے تنقید برداشت نہیں کرپاتا، میں اپنی اہلیہ کا شکر گزار ہوں انہوں نے ری ہیب کے دوران اور ہر فیز میں ہمیشہ مجھے سپورٹ کیا ہے۔
اس سے قبل انہوں نے کہا تھا کہ میں ورلڈ کپ میں پاکستان کے لیے کھیلنا اور ملک کے لیے جیتنا چاہتا ہوں، میرے لیے اب ہر میچ ایک موقع ہے اور میں اپنا سو فیصد حصہ دوں گا۔
واضح رہے کہ 30 سالہ فاسٹ بولر نے پاک بنگال سیریز کے پہلے ٹی 20 میں شاندار بولنگ کرتے ہوئے پانچ وکٹیں حاصل کیں اور ٹی 20 میں یہ کارنامہ انجام دینے والے چوتھے پاکستانی بولر بن گئے۔
https://urdu.arynews.tv/sarfaraz-ahmed-playfully-takes-credit-for-hasan-alis-strong-comeback/
