لاہور : پنجاب میں پی ایس ایل کے آٹھویں سیزن کے میچز کے انعقاد کا مسئلہ حل ہوگیا، چیئرمین پی سی بی نے میچز کرانے کا اعلان کردیا۔
تفصیلات کے مطابق چیئرمین پی سی بی نجم سیٹھی نے کہا ہے کہ پی ایس ایل کے میچز شیڈول کے مطابق لاہور اور راولپنڈی میں ہی ہوں گے۔
اپنے ایک بیان میں ان کہنا ہے کہ نگراں وزیراعلیٰ پنجاب سیکیورٹی اخراجات برداشت کرنے پر مان گئے ہیں، پاکستان کرکٹ بورڈ نگراں وزیراعلیٰ پنجاب کی شکرگزار ہے۔
تازہ ترین اطلاعات کے مطابق پنجاب حکومت اور پی سی بی کے درمیان معاملات طے پاگئے ہیں، اس حوالے سے نگراں حکومت پنجاب کا کہنا ہے کہ پی سی بی ٹیموں کے روٹس کی لائٹس خریدے گی۔
پنجاب حکومت لائٹس کے علاوہ تمام اخراجات اٹھائے گی، سال2022میں لائٹس کی مد میں پنجاب حکومت نے60کروڑ روپے خرچ کیے تھے، رواں سال بھی لائٹس کی مد میں اخراجات50کروڑ سے زائد تھے۔
واضح رہے کہ گزشتہ دنوں پنجاب حکومت نے پی ایس ایل کے لیے 50 کروڑ روپے دینے سے معذرت کرلی تھی۔ ذرائع کا بتانا تھا کہ حکومت پی سی بی کو اخراجات تب دے گی جب پی سی بی صوبائی حکومت کو 25کروڑ روپے ادا کرے گا جبکہ پنجاب حکومت پی ایس ایل میچز پر اب تک 45 کروڑ روپے خرچ کرچکی ہے۔
گزشتہ روز پنجاب کی نگراں حکومت نے سیکیورٹی کے لیے 45 کروڑ روپے کا مطالبہ کیا تھا تو بورڈ اور فرنچائز نے مذکورہ رقم دینے سے صاف انکار کردیا تھا۔
پی ایس ایل کے لاہور اور پنڈی میں میچز، نجم سیٹھی کا وزیراعظم سے رابطہ
بعد ازاں وزیراعلیٰ پنجاب محسن نقوی کی زیر صدارت کابینہ کا اجلاس ہوا جس میں فیصلہ کیا گیا کہ صوبائی حکومت ان میچز کے لیے 25 کروڑ روپے ادا کرے گی۔
ٹیموں کی نقل وحرکت کے دوران ماہر نشانہ باز بھی اہم تنصیبات پر تعینات کیے جائیں گے، اہلکار نیشنل اسٹیڈیم، کراچی ایئرپورٹ اور متعین روٹس پر تعینات ہوں گے،ٹیموں کی نقل وحرکت کے دوران فضائی نگرانی بھی کی جائے گی جبکہ نیشنل اسٹیڈیم کے باہر خصوصی کمانڈ اینڈ کنٹرول بس موجود ہوگی۔
ڈی آئی جی سکیورٹی اینڈ ایمرجنسی سروسز ڈویژن کے ترجمان کے مطابق گاڑیاں پارک کرنے کے لیے پارکنگ گلشن اقبال میں یونیورسٹی روڈ پر بیت المکرم مسجد کے قریب حکیم سعید گراؤنڈ کو پارکنگ کے لیے مختص کیا گیا ہے جبکہ نیشنل کوچنگ سینٹر سے ملحقہ چائنا گرائونڈ صرف وی آئی پی ویز کی گاڑیوں کی پارکنگ کے لیے مختص ہوگا۔
