Tag: PSL

بابر اعظم نے گزشتہ روز ٹی 20 کیریئر کی 11 ویں سنچری بنائی وہ اس فارمیٹ میں 10 سے زائد سنچریاں بنانے والے پہلے ایشیائی بیٹر بن گئے ہیں۔

پی ایس ایل 9 میں گزشتہ روز اسلام آباد یونائیٹڈ کے خلاف پشاور زلمی کے کپتان بابر اعظم نے ناقابل شکست سنچری اسکور کی۔ یہ ان کی ٹی ٹوئنٹی فارمیٹ میں کیریئر کی 11 ویں سنچری تھی۔ اس سنچری کے ساتھ انہوں نے ایک نیا ریکارڈ بنا ڈالا۔

سابق قومی کپتان ٹی ٹوئنٹی کرکٹ میں 10 سے زائد سنچریاں اسکور کرنے والے دنیا کے دوسرے جب کہ ایشیا کے پہلے بلے باز بن گئے ہیں۔ ان سے آگے اب صرف ویسٹ انڈیز کے لیجنڈ بلے باز کرس گیل ہیں جنہوں نے 463 ٹی 20 میچوں میں 22 سنچریاں بنا رکھی ہیں۔

پشاور زلمی کے کپتان بابر اعظم کی گزشتہ روز اسلام آباد یونائیٹڈ کے خلاف بنائی گئی سنچری پی ایس ایل میں ان کی دوسری سنچری تھی اس سے قبل انہوں نے گزشتہ سیزن میں بھی سنچری اسکور کی تھی۔

 

View this post on Instagram

 

A post shared by Peshawar Zalmi (@peshawarzalmipk)

بابر اعظم بین الاقوامی ٹی 20 میچوں میں 3 سنچریاں اسکور کرنے کا اعزاز رکھتے ہیں، اس کے علاوہ وہ لنکا پریمیئر لیگ (ایل پی ایل) میں ایک، وائٹلٹی بلاسٹ اور نیشنل ٹی 20 کپ میں 2، 2 سنچریاں بالترتیب سمر سیٹ اور سینٹرل پنجاب کے لیے اسکور کر چکے ہیں۔

بابراعظم کے بعد سابق بھارتی کپتان ویرات کوہلی سب سے زیادہ سنچریاں بنانے والے دوسرے ایشیائی کھلاڑی ہیں جنہوں نے ٹی20 کرکٹ میں 8 مرتبہ 100 یا اس سے زائد رنز کی اننگز کھیلی۔

پی ایس ایل 9 میں لاہور قلندر تو جیت کو ترس رہی ہے ان کے اہم کھلاڑی فخر زمان کا بلا بھی نہیں چل رہا ہے جس پر سابق کرکٹرز نے اہم تجزیہ کیا ہے۔

 

View this post on Instagram

 

A post shared by Pakistan Super League (@thepsl)

پاکستان سپر لیگ کی دفاعی چیمپئن لاہور قلندرز نے اب تک پانچ میچ کھیلے ہیں اور ایک بھی فتح حاصل نہیں کرسکی ہے جب کہ اس کے جارح مزاج بلے باز فخر زمان اتنے ہی میچز میں صرف 70 رنز ہی بنا پائے ہیں۔ ان کا بیٹ رنز کیوں نہیں اگل رہا۔ ایک مقامی نجی ٹی وی چینل کے اسپورٹس پروگرام میں سابق کرکٹرز نے اہم تجزیہ پیش کیا ہے۔

سابق کرکٹر تنویر احمد کا کہنا ہے کہ فخر زمان کی شاٹ سلیکشن اچھی نہیں اور ان کے پاس صرف چند مخصوص شاٹس ہیں وہ ایک ہی جانب کھیلتے اور کراس مارتے ہیں جب کہ غیر ملکی کرکٹر سیدھا کھیل کر بڑی اننگز کھیل جاتے ہیں۔

ان کا کہنا تھا کہ حیرت ہے کہ فخر اتنے عرصے سے انٹرنیشنل کرکٹ کھیل رہے ہیں مگر اب تک اپنا گیم ڈیولپ نہیں کر سکے بہت جلد ٹریپ ہو جاتے ہیں۔

تنویر احمد نے کہا کہ جس دن فخر کا دن ہوگا اس دن وہ مارتا چلا جائے گا لیکن ایک ہی جگہ شاٹ کھیلے گا اور حیرانی اس بات پر بھی ہے کہ یہ ٹیم میں اوپنر ہے اور اس کے پاس چاروں طرف شاٹ نہیں ہیں تو وہ کس طرح لمبی اننگ کھیلے گا یا فارم کو واپس لائے گا۔

انہوں نے یہ بھی کہا کہ لاہور قلندرز کے پاس مڈل آرڈر بالکل نہیں ان کے صرف ڈوسن اور صاحبزادہ فرحان ہی رنز کر رہے ہیں ٹورنامنٹ میں رہنے کے لیے انہیں کچھ نہ کچھ کرنا پڑے گا۔

سابق کرکٹر خرم منظور نے کہا کہ فخر زمان ایسا کھلاڑی نہیں تھا بلکہ اچھا خاصا پلیئر تھا لیکن مکی آرتھر نے اس کو ایسا بنا دیا جب اس کو اوور ریٹڈ کیا گیا اور پیغام دیا گیا کہ تم جس طرح بھی کھیلو ٹیم سے باہر نہیں ہوگے تو اس کے بعد وہ کئی اننگ کے بعد ایک دو اننگ میں چلتا ہے لیکن اس بگاڑ میں اس کا کوئی قصور نہیں ہے۔

ان کا کہنا تھا کہ اسی پیٹرن پر وہ لیگ بھی کھیل رہا ہے اگر اگلے دو میچوں میں وہ بڑے رنز کر گیا تو سب سے زیادہ اسی کی واہ واہ ہو رہی ہوگی۔

پی ایس ایل میں لاہور قلندرز کی مسلسل شکستوں نے سابق کرکٹرز کو بھی مایوس کر دیا ہے اور ان کا کہنا ہے کہ اس کے لیے اب دعائیں ہی کی جا سکتی ہیں۔

پاکستان سپر لیگ مسلسل دو بار جیتنے اور نویں ایڈیشن میں دفاعی چیمپئن کے طور پر شریک لاہور قلندرز گزشتہ روز بھی جیت کا مزا نہ چکھ سکی اور پشاور زلمی سے میچ ہارنے کے بعد مسلسل پانچویں شکست کو گلے لگایا۔

لاہور قلندرز مسلسل پانچواں میچ ہار کر ٹورنامنٹ سے باہر ہونے کے خطرے سے دوچار ہو گئی ہے اس صورتحال پر سابق کرکٹرز کا کہنا ہے کہ لاہور قلندرز کے لیے اب دعائیں ہی کی جا سکتی ہیں۔

اے آر وائی نیوز کے پروگرام ہر لمحہ پرجوش میں گفتگو کرتے ہوئے سابق ٹیسٹ کرکٹر باسط علی نے اس کی ذمے داری قلندرز کی پلاننگ اور بولرز پر عائد کی اور کہا کہ قلندرز نے سات بولرز کو استعمال کیا اور  سب پر ہی رنز پڑے۔ کپتان شاہین اور حارث کی کارکردگی اچھی نہیں رہی جس کی وجہ سے ٹیم کا مورال نیچے گیا۔

باسط علی کا کہنا تھا کہ اس وقت لاہور قلندرز کی صورتحال ٹورنامنٹ میں ایسی ہے کہ اب صرف اس کے لیے دعائیں ہی کی جا سکتی ہیں۔

سابق وکٹ کیپر بیٹر کامران اکمل نے کہا کہ لاہور قلندرز کے بیٹنگ آرڈر میں مسئلہ ہے، سکندر رضا کو بہتر استعمال نہیں کیا گیا۔ اسے اگر ٹورنامنٹ میں رہنا ہے تو اگلے پانچوں میچز نہ صرف جیتنا بلکہ بہتر رن ریٹ کے ساتھ جیتنا ہوں گے۔

واضح رہے کہ پی ایس ایل 9 کی پوائنٹس ٹیبل پر ملتان سلطانز 5 میں سے 4 میچز جیت کر سر فہرست ہے۔ کوئٹہ گلیڈیئٹر نے 6 پوائنٹ کے ساتھ دوسری، کراچی کنگز اور پشاور زلمی نے بالترتیب تیسری اور چوتھی پوزیشن سنبھال رکھی ہے۔ اسلام آباد یونائیٹڈ ایک فتح اور 2 پوائنٹ کے ساتھ پانچویں جب کہ لاہور قلندر بغیر کسی پوائنٹ کے سب سے آخر چھٹے نمبر پر ہے۔