Tag: PSL

ملتان سلطانز کو بڑا دھچکا لگ گیا، اہم کھلاڑی بقیہ پی ایس ایل سے باہر ہو گئے۔

ابتدائی میچ جیتنے والی ملتان سلطانز کو پی ایس ایل 9 میں انجری کا بڑا دھچکا لگا ہے کیونکہ اولی سٹون کمر کی انجری کے باعث باہر ہو گئے ہیں۔

انگلش فاسٹ باؤلر منگل کو اسلام آباد یونائیٹڈ کے خلاف اپنے ڈیبیو میچ کے دوران انجری کا شکار ہوئے اور اپنا چوتھا اوور مکمل نہ کر سکے۔

اس انجری کے بعد ملتان سلطانز آئندہ میچوں میں سٹون کے متبادل کا فیصلہ کرے گی۔

مزید برآں محمد رضوان کی قیادت میں سلطانز نے غیر معمولی کارکردگی کا مظاہرہ کیا ہے، جو اس وقت لگاتار تین جیت کے ساتھ پوائنٹس ٹیبل پر سرفہرست ہے۔

ان کا اگلا چیلنج پشاور زلمی کے خلاف ہے، جہاں ان کا مقصد اپنی جیت کا سلسلہ برقرار رکھنا ہے۔ اپنے پچھلے میچ میں سلطانز نے لاہور قلندرز کو شکست دی تھی۔

پی ایس ایل 9 میں اسلام آباد یونائیٹڈ کی نمائندگی کرنے والے عماد وسیم اپنے روایتی رنگ میں نظر نہیں آ رہے تین میچوں میں نہ ان کا بلا چلا اور نہ ہی بولنگ سے دھاک بٹھائی۔

عماد وسیم بطور آل راؤنڈر پاکستان کرکٹ کے علاوہ ڈومیسٹک اور لیگز کرکٹ میں خدمات انجام دیتے ہیں جو بیٹ اور بال سے اپنی ٹیم کی جیت میں اہم کردار ادا کرتے ہیں۔ پاکستان سپر لیگ میں کئی برس تک کراچی کنگز کا اہم حصہ رہنے والے عماد اس سیزن میں اسلام آباد یونائیٹد کی نمائندگی کر رہے ہیں لیکن ان کی کارکردگی بجھی بجھی ہے۔

رواں پی ایس ایل میں اب تک اسلام آباد یونائیٹڈ نے افتتاحی میچ جیتنے کے بعد لگاتار دو میچ ہارے ہیں۔ عماد وسیم ان میں صرف 9 رنز بنا سکے ہیں جب کہ ایک وکٹ حاصل کی ہے اور یہ کارکردگی ان جیسے کھلاڑی کے شایان شان نہیں۔

عماد وسیم کی اسی کارکردگی پر اے اسپورٹس کے پروگرام دی پویلین میں گفتگو کرتے ہوئے سابق کپتان محمد حفیظ نے کہا کہ عماد وسیم کو ہم نے ڈومیسٹک، پھر پاکستان اور پی ایس ایل میں کراچی کنگز کے ساتھ کھیلتے دیکھا اس وقت اس کی جو باڈی لینگویج ہے اس سے پہلے ہم نے اسے اس طرح بجھا بجھا نہیں دیکھا۔

انہوں نے کہا کہ عماد وہ کھلاڑی ہے جو میچ میں خود کو پورا انوالو رکھتا ہے وہ کافی عرصے تک کراچی کنگز کا حصہ رہا ہے ہوسکتا ہے فرنچائز کی تبدیلی اس کی وجہ ہو۔

حفیظ نےکہا کہ عماد ایک سینئر کھلاڑی ہے لیکن بطور کرکٹر عماد کی جو باڈی لینگویج نظر آ رہی ہے وہ نہ تو بیٹر اور نہ ہی بولنگ میں پُر اعتماد نظر آ رہا ہے جب کہ فیلڈنگ میں بھی اس کی انوالومنٹ دکھائی نہیں دے رہی۔

مصباح الحق نے کہا کہ عماد کی فارم کا مسئلہ ہے اس کا گزشتہ سیزن کراچی کے ساتھ بہت اچھا گیا تھا ہر میچ میں رنز کیے وہ اس سال اب تک نظر نہیں آیا جب کہ اسلام آباد کو بطور بیٹر اس کی پرفارمنس درکار ہے۔ عماد کی کوالٹی ہے کہ وہ ہر سچویشن میں حالات کے مطابق کھیل سکتا ہے، اس میں اعتماد کی کمی نظر آ رہی ہے۔

اظہر علی نے کہا کہ فارم سے زیادہ عماد کے ساتھ فٹنس کا ایشو لگتا ہے وہ فیلڈنگ بھی ایسی جگہ کر رہے ہیں جہاں وہ زیادہ انوالو نہ ہوں۔

پی ایس ایل 9 میں اسلام آباد یونائیٹڈ افتتاحی میچ جیتنے کے بعد لگاتار دو میچز ہار گئی ہے ماہرین کرکٹ کا کہنا ہے کہ یہ اسمارٹ کرکٹ نہیں کھیل رہے۔

اے اسپورٹس کے پروگرام دی پویلین میں اسلام آباد یونائیٹڈ کی کارکردگی کا مکمل جائزہ لیتے ہوئے سابق کپتان اظہر علی نے کہا کہ ایسا لگتا ہے کہ وہ پچ کنڈیشن کا درست اندازہ نہیں کر پا رہے ہیں، جو بڑی ٹیمیں ہوتی ہیں وہ پچ دیکھ کر ہی یہ اندازہ کر لیتی ہیں کہ اس پچ پر اتنا اسکور قابل دفاع ہوگا لیکن اسلام آباد یونائیٹڈ کے ساتھ ایسا نظر نہیں آ رہا ہے ان کا پچ کے مطابق اسکور نہیں ہوتا ہے اور اس وقت وہ اسمارٹ کرکٹ نہیں کھیل رہے ہیں۔

سابق کپتان مصباح الحق نے کہا کہ ٹی ٹوئنٹی میں جیت  کے لیے آپ کو چھوٹے چھوٹے فیز پلان کرنا ہوتے ہیں کہ اگلے دو تین اوور میں کیسے کھیلنا ہے کس کھلاڑی نے وکٹ پر ٹھہرنا ہے اور کس نے بولر پر اٹیک کرنا ہے ہر اوور کو پلان کے مطابق کھیلنا پڑتا ہے اس کے بغیر آپ لمبا اسکور نہیں کر سکتے اور اسلام آباد کے ساتھ اسی پلاننگ کی کمی نظر آ رہی ہے۔

ایک اور سابق کپتان محمد حفیظ نے کہا کہ کوئٹہ کی منیجمنٹ اور کپتان بدلا تو ہمیں ٹیم میں تبدیلی نظر آ رہی ہے لیکن یونائیٹڈ کا ہر سال سپورٹنگ اسٹاف بدلتا ہے ہیڈ کوچ تبدیل ہوتا ہے لیکن کھیلنے کا طریقہ وہی پرانا چلا آ رہا ہے۔ شاداب تین سال سے کپتان ہے لیکن ٹیم اسمارٹ کرکٹ کھیل نہیں پا رہی ہے جو موجودہ وقت کی ضرورت ہے۔