ARYNews.tv | Urdu – Har Lamha Bakhabar

Tag: PSL

PSL News in Urdu- پاکستان سپر لیگ یعنی پی ایس ایل سے متعلق تازہ ترین خبریں

کراچی کنگز، پشاور زلمی  ملتان سلطانز

لاہور قلندرز، اسلام آباد یونائیٹڈ کوئٹہ گلیڈی ایٹرز

PSL is a cricket league played in Pakistan with Islamabad, Karachi, Multan, Peshawar, Multan

کراچی کنگز

  • اسلام آباد یونائیٹڈ ایک بار پھر پی ایس ایل کی فاتح

    اسلام آباد یونائیٹڈ ایک بار پھر پی ایس ایل کی فاتح

    کراچی: پاکستان سپر لیگ کے فائنل میں اسلام آباد یونائیٹڈ نے 3 وکٹوں سے فتح حاصل کر کے ایک بار پھر چیمپئن بننے کا اعزاز اپنے نام کرلیا، یونائیٹڈ کے بلے باز لک رونکی اور شاداب خان نے شاندار کھیل کا مظاہرہ کیا۔

    تفصیلات کے مطابق پاکستان سپر لیگ کے تیسرے ایڈیشن کا فائنل میچ پشاور زلمی اور اسلام آباد یونائیٹڈ کی ٹیموں  کے مابین کراچی کے نیشنل اسٹیڈیم میں کھیلا گیا، زلمی کی قیادت ڈیرن سیمی جبکہ یونائیٹڈ کی قیادت جے پی ڈومینی نے کی۔

    زلمی اننگز خلاصہ

    پشاور زلمی نے بیٹنگ کا آغاز کیا تو کامران اکمل اور آندرے فلیچر میدان میں آئے، سیمی الیون کو اوپننگ کا آغاز اچھا نہ مل سکا اور پہلی وکٹ 12 کے مجموعی اسکور پر اُس وقت گری جب کامران اکمل صرف ایک رن بنا کر پویلین لوٹے بعد ازاں محمد حفیظ بھی 8 کے انفرادی اور 26 کے مجموعی اسکور پر پویلین روانہ ہوئے۔

    سیمی الیون کی تیسری وکٹ 38 کے مجموعی اسکور پر گری جب فلیچر 21 رنز کی اننگز کھیل کر پویلین لوٹے، بعد ازاں کرس جورڈن اور ڈوسن نے 52 رنز کی پارٹنر شپ بنائی اور اسی وقت چوتھی وکٹ بھی گری، پانچویں آؤٹ ہونے والے کھلاڑی سعد نسیم تھے بعد ازاں سیمی بھی گیارہ رنز بعد پویلین روانہ ہوئے اور پھر عمید آصف بھی بغیر کھاتہ کھولے پہلی ہی بال پر آؤٹ ہوئے۔

    پشاور زلمی کے آل راؤنڈر وہاب ریاض نے14گیندوں پر28رنز  ناٹ آؤٹ کی شاندار اننگز کھیلی اور ٹیم کو مستحکم پوزیشن فراہم کی، علاوہ ازیں کرس جارڈن 36 ، لیام ڈوسن33 رنزبناکرنمایاں بلے باز رہے جبکہ آندرےفلیچر 21،محمدحفیظ8،ڈیرن سیمی اورحسن علی نے6،6رنزبناسکے، سعدنسیم نے صرف 2 رنز بنائے جبکہ کامران اکمل ایک رن اورعمیدآصف بغیرکوئی رن بنائےآؤٹ ہوئے۔ 

    اسلام آباد یونائیٹڈ کی جانب سے شاداب خان نے 3 جبکہ حسین طلعت اور سمت پٹیل نے  2، 2 اور محمد سمیع، فہیم اشرف نے ایک ، ایک وکٹ حاصل کی۔

    ہدف کے تعاقب میں اسلام آباد یونائیٹڈ کی بیٹنگ کا خلاصہ

    ہدف کے تعاقب میں اسلام آباد یونائیٹڈ نے بیٹنگ کا آغاز کیا تو لک رونکی نے جارحانہ کھیل کا مظاہرہ کرتے ہوئے 26 گیندوں پر 52 رنز بنائے، یونائیٹڈ کا پہلا کھلاڑی 96 کے مجموعی اسکور پر آؤٹ ہوا۔

    بعد ازاں والٹن مجموعی اسکور میں 1 رن کا اضافہ ہونے کے بعد آؤٹ ہوئے، جے پی ڈومینی 102، صاحبزادہ فرحان 112، سمت پٹیل 115، شاداب خان 116، حسین طلعت 148 کے مجموعی اسکور پر آؤٹ ہوئے۔

    ایک وقت میں پشاور زلمی میچ میں بھرپور طریقے سے واپس آگئی تھی تاہم کامران اکمل نے آصف علی کا آسان کیچ ڈراپ کیا جس کے بعد انہوں نے اگلے ہی اوور میں دو چھکوں کی مدد سے 26 رنز حاصل کیے اور ٹیم کو فتح دلوائی۔

    یونائیٹڈ کے لک رونکی 52، صاحبزادہ فرحان 44 اور آصف علی، 26 رنز ناٹ آؤٹ کے ساتھ نمایاں بلے باز رہے جبکہ زلمی کے باؤلر حسن علی، وہاب ریاض، کرس جورڈن نے 2 ، 2 اور عمید آصف نے ایک وکٹ حاصل کی۔

    اسلام آباد یونائیٹڈ اننگز

    سترہواں اوور (وہاب ریاض): پہلی ہی گیند پر حسین طلعت کلین بولڈ ہوکر پویلین لوٹے، آخری گیند پر فہیم اشرف نے فاتحانہ چھکا مار کر ٹیم کو پی ایس ایل کا ایک بار پھر اعزاز دلوایا۔

    سولہواں اوور (حسن علی): آصف علی نے یکے بعد دیگرے دو چھکے مارنے کے بعد میچ کی صورتحال تبدیل کی اور اختتام پر اسکور برابر کردیا۔

    پندرہواں اوور (عمید آصف): 11 رنز اضافے کے بعد مجموعی اسکور 127/6 تک پہنچا، کامران اکمل نے چوتھی گیند پر آصف علی کا آسان کیج ڈراپ کیا۔

    چودہواں اوور (حسن علی): پہلی ہی بال پر سمت پٹیل 10 کے انفرادی اور 115 کے مجموعی اسکور پر پویلین روانہ ہوئے، آخری بال پر کرس جورڈن نے شاندار کیچ لے کر شاداب خان کو بھی پویلین بھیجا، اوور اختتام پر مجموعی اسکور 116/6 تک پہنچا۔

    تیرہواں اوور (کرس جورڈن): 3 رنز اضافے کے بعد مجموعی اسکور 115/4 تک پہنچا۔

    بارہواں اوور (وہاب ریاض): آخری گیند پر صاحبزادہ فرحان 44 کے انفرادی جبکہ 112 کے مجموعی اسکور پر پویلین لوٹے، یوں اوور اختتام پر ٹیم کا مجموعی اسکور 112/6 تک پہنچا۔

    گیارہواں اوور (کرس جورڈن): تیسری گیند پر یونائیٹڈ کے کپتان جےپی ڈومینی آؤٹ ہوئے، 6 رنز اضافے کے بعد مجموعی اسکور 106/3 تک پہنچا۔

    دسواں اوور (عمید آصف): پہلی ہی بال پر والٹن بغیر کھاتہ کھولے پویلین روانہ ہوئے، تین رنز اضافے کے بعد مجموعی اسکور 100/2 تک پہنچا۔

    نواں اوور (کرس جورڈن): لک رونکی 52 کے انفرادی جبکہ 96 کے مجموعی اسکور پر پویلین روانہ ہوئے، 14 رنز اضافے کے بعد مجموعی اسکور 97/1 تک پہنچا۔

    آٹھواں اوور (عمید آصف): 9 رنز اضافے کے بعد مجموعی اسکور 83 تک پہنچا۔

    ساتواں اوور (وہاب ریاض): 8 رنز اضافے کے بعد مجموعی اسکور 74/0 تک پہنچا۔

    چھٹا اوور (عمید آصف): پشاور زلمی کے لیے یہ اوور اچھا ثابت ہوا کیونکہ اس میں صرف 3 رنز ہی بن سکے، اختتام پر مجموعی اسکور 66/0 تک ہپنچا۔

    پانچواں اوور (وہاب ریاض): 8 رنز اضافے کے بعد مجموعی اسکور 63/0 تک پہنچا۔

    چوتھا اوور (ڈوسن): 16 رنز اضافے کے بعد مجموعی اسکور 55/0 تک پہنچا۔

    تیسرا اوور (حسن علی): ایک چھکے ، دو چوکوں کی مدد سے 17 رنز بنے، جس کے بعد مجموعی اسکور 40/0 تک پہنچا۔

    دوسرا اوور (ثمین گل): ایک چھکے اور چار سنگلز کے بعد مجموعی اسکور 23/0 تک پہنچا۔

    ہدف کے تعاقب میں یونائیٹڈ نے بیٹنگ کا آغاز کیا تو لک رونکی اور صاحبزادہ فرحان میدان میں آئے جبکہ پہلا اوور حسن علی نے کرایا، مصباح الیون کے بلے بازوں نے پہلے ہی اوور میں 2 چھکے مار کر مجموعی اسکور 14/0 تک پہنچایا۔

    پشاور زلمی اننگز

    بیسواں اوور (فہیم اشرف): وہاب ریاض نے ذمہ دارانہ بیٹنگ کرتے ہوئے آخری اوور میں 11 رنز حاصل کیے اور ٹیم کا مجموعی اسکور 148 تک پہنچا۔

    انیسواں اوور (محمد سمیع): وہاب ریاض نے ایک چھکے اور ایک چوکے کی مددسے ٹیم کا مجموعی اسکور 137/9 تک پہنچایا۔

    اٹھارواں اوور (فہیم اشرف): پانچویں گیند پر حسن علی 6 کے انفرادی اور 121 کے مجموعی اسکور پر پویلنی روانہ ہوئے، آخری بال پر چوکے کے بعد مجموعی اسکور 125/4 تک پہنچا۔

    سترہواں اوور (محمد سمیع): لیام ڈوسن 33 کے انفرادی جبکہ 117 کے مجموعی اسکور پر کلین بولڈ ہوکر پویلین روانہ ہوئے، اختتام پر مجموعی اسکور 118/8 تک پہنچا۔

    سولہواں اوور (شاداب خان): ڈیرن سیمی 6 کے انفرادی اسکور پر ایل بی ڈبلیو ہوکر پویلین روانہ ہوئے، اگلی ہی گیند پر عمید آصف بھی ایل بی ڈبلیو ہوکر پویلین روانہ ہوئے، 2 رنز اضافے کے بعد مجموعی اسکور 112/7 تک پہنچا۔

    پندرہواں اوور (حسین طلعت): پہلی ہی بال پر باؤلر نے سعد نسیم کو پویلین کی راہ دکھائی، اوور اختتام پر مجموعی اسکور 110/5 تک پہنچا۔

    چودہواں اوور (عماد بٹ): 8 رنز اضافے کے بعد مجموعی اسکور 101/4 تک پہنچا۔

    تیرہواں اور (حسین طلعت): زلمی کے بلے باز جورڈن 26 گیندوں پر 36 رنز بنا کر 90 کے مجموعی اسکور پر پویلین لوٹے، اختتام پر ٹیم کا مجموعی اسکور 93/4 تک پہنچا۔

    بارہواں اوور (فہیم اشرف): 5 رنز اضافے کے بعد مجموعی اسکور 83/3 تک پہنچا، کرس جورڈ ن 30 اور ڈوسن 21 کے ساتھ وکٹ پر موجود ہیں۔

    گیارہواں اوور (عماد بٹ): 5 رنز اضافے کے بعد مجموعی اسکور 78/3 تک پہنچا۔

    دسواں اوور (شاداب خان): ایک چھکے کی مدد سے اوور میں 11 رنز حاصل کیے جس کے بعد مجموعی اسکور 73/3 تک پہنچا۔

    نواں اوور (فہیم اشرف): 9 رنز اضافے کے بعد مجموعی اسکور 62/3 تک پہنچا۔

    آٹھواں اوور (شاداب خان): ایک چھکے اور چار رنز کے بعد زلمی کا مجموعی اسکور 53/3 تک پہنچا۔

    ساتواں اوور (سمت پٹیل): 5 رنز اضافے کے بعد مجموعی اسکور 43/3 تک پہنچا۔

    چھٹا اوور (شاداب خان): آخری بال پر فلیچر 21 کے انفرادی اور 38 کے مجموعی اسکور پر پویلین روانہ ہوئے، اوور میں پشاور زلمی کی ٹیم صرف دو رنز کا اضافہ کرسکی۔

     پانچواں اوور (سمت پٹیل) پہلی ہی گیند پر نئے آنے والے بیٹسمین محمد حفیظ 8 کے انفرادی اور 25 کے مجموعی اسکور پر آؤٹ ہوئے، 10 رنز اضافے کے بعد مجموعی اسکور 36/2 تک پہنچا،

    چوتھا اوور (محمد سمیع): ایک چھکے اور ایک چوکے کے بعد اختتام پر مجموعی اسکور 26/1 تک پہنچا۔

    تیسرا اوور (سمت پٹیل): دو چوکوں اور ایک سنگل کے بعد چوتھی گیند پر کامران اکمل ایک کے انفرادی اور 12 کے مجموعی اسکور پر پویلین روانہ ہوئے، اختتام پر مجموعی اسکور 13/1 تک پہنچا۔

    دوسرا اوور (محمد سمیع): ایک رن اضافے کے بعد مجموعی اسکور 2/0 تک پہنچا۔

    پشاور زلمی کی جانب سے اننگز کا آغاز کامران اکمل اور آندرے فلیچر نے کیا جبکہ پہلا اوور اسلام آباد یونائیٹڈ کے سمت پٹیل نے کیا، اوور اختتام پر ٹیم کا مجموعی اسکور 1/0 تک پہنچا۔

    ایوارڈ

     لیوک رانکی کو پی ایس فائنل میں شاندار نصف سنچری اسکور کرنے پر میچ کا بہترین کھلاڑی قرار دیا گیا، بہترین وکٹ کیپر کا ایوارڈ ملتان سلطانز کے کمار سنگاکارا کے حصہ میں آیا، فہیم اشرف نے پی ایس ایل تھری کے بہترین بولر کا اعزاز اپنے نام کیا، مین آف دی ٹورنامنٹ کا اعزاز بھی لیونک رانکی لے اڑے، کامران اکمل کو بہترین بلے باز کے اعزاز سے بھی نوازا گیا۔

    ٹاس

    ٹاس کے بعد گفتگو کرتے ہوئے پشاور زلمی کے کپتان کا کہنا تھا کہ ٹیم میں کوئی تبدیلی نہیں کی گئی، کوشش ہے کہ جیت کے تسلسل برقرار رکھیں اور شائقین اچھی کرکٹ دیکھ سکیں۔

    اسلام آباد یونائیٹڈ کے کپتان جے پی ڈومینی کا کہنا تھا کہ ٹاس جیت کرپہلے فیلڈنگ ہی کرتے، پشاور زلمی کے چیلنج کیلئے تیار ہیں، ٹیم میں تبدیلی کے حوالے سے اُن کا کہنا تھا کہ ایلکس ہیلزکی جگہ چیڈوک والٹن ٹیم میں شامل کیا گیا ہے۔

    اُن کا کہنا تھا کہ پاکستان میں کرکٹ کی واپسی بہت بڑی کامیابی ہے، اسٹیڈیم میں موجود شائقین کا جوش قابل دید ہے، اتنی بڑی تعداد میں پرجوش شائقین کی موجودگی میں کھیلنا بہت بڑا چیلنج ہے۔

  • غیرملکی کھلاڑی اردوسیکھ گئے، سیمی نے پاکستان کا نعرہ لگا دیا

    غیرملکی کھلاڑی اردوسیکھ گئے، سیمی نے پاکستان کا نعرہ لگا دیا

    کراچی : پاکستان کے مہمان بننے والے عالمی کھلاڑیوں نے اردو کے ساتھ ساتھ پشتو زبان کے الفاظ بھی سیکھ لیے۔ اختتامی تقریب میں پاکستان زندہ باد کا زوردار نعرہ بھی لگا دیا۔

    تفصیلات کے مطابق پی ایس ایل کھلینے کیلئے کراچی آنے والے غیر ملکی کھلاڑیوں پاکستانیوں کی بہترین میزبانی کا اثر ہوگیا۔ بین الاقوامی کھلاڑی پاکستان کے رنگ میں رنگ گئے، پشتو اور اردو میں بات کرکے لوگوں کے دل جیت لئے۔

    نیشنل اسٹیڈیم میں پی ایس ایل کی اختتامی تقریب میں پشاور زلمی کے ڈیرن سیمی نے تماشائیوں کو مخاطب کرتے ہوئے کہا کہ کیسے ہو کراچی ۔ جس پر لوگوں نے تالیاں بجا کر ان کا خیر مقدم کیا۔

    مزید پڑھیں: پی ایس ایل فائنل، اختتامی تقریب میں سیمی، فلیچر اور حسن علی جھوم اٹھے

    ڈیرن سیمی نے مہمان نوازی پر پاکستانیوں کا شکریہ بھی ادا کیا اور جاتے ہوئے پاکستان زندہ باد کا نعرہ بھی لگایا، کھچاکھچ بھرے اسٹیڈیم میں جے پی ڈومینی نے بھی کراچی والوں کو سلام پیش کیا، کرکٹ کے دیوانے کراچی والوں کے جذبے کو عالمی کھلاڑیوں نے خوب سراہا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔  

  • پی ایس ایل فائنل: اختتامی تقریب میں سیمی، فلیچر اور حسن علی جھوم اٹھے

    پی ایس ایل فائنل: اختتامی تقریب میں سیمی، فلیچر اور حسن علی جھوم اٹھے

    کراچی: پاکستان سپرلیگ کے فائنل میچ سے قبل رنگا رنگ اختتامی تقریب منعقد کی گئی جس میں وزیراعظم شاہد خاقان عباسی، وزیراعلیٰ سندھ، چیئرمین پی سی بی، ڈی جی رینجرز سمیت دیگر معزز شخصیات اور شائقین کرکٹ نے بڑی تعداد میں شرکت کی۔

    تقریب سے خطاب کرتے ہوئے پاکستان کرکٹ بورڈ کے چیئرمین نجم سیٹھی کا کہنا تھا کہ  خصوصاً کراچی والوں اور پاکستانیوں سب کو میرا سلام ہو، آپ سب کی خواہش اور دعائیں اللہ نے قبول کیں اور اللہ کے فضل سے آج 9 سال بعد نیشنل اسیٹڈیم میں میچ ہورہا ہے۔

    [bs-quote quote=”آج دنیا کو نظر آرہا ہے کہ کراچی محفوظ ترین شہر ہے، یکم، دو اور تین اپریل کو ویسٹ انڈیز کی ٹیم بھی کراچی آرہی ہے” style=”default” align=”left” author_name=”نجم سیٹھی” author_job=”چیئرمین پی سی بی” author_avatar=”https://arynewsudweb.wpengine.com/wp-content/uploads/2018/03/Najam60x60.jpg”][/bs-quote]

    اُن کا کہنا تھا کہ  آج دنیا کو نظر آرہا ہے کہ کراچی امن پسند شہر ہے، بہادر پولیس، رینجرز ، پاک فوج اور سیکیورٹی ایجنسیز نے ہمیں محفوظ کیا اور وزیراعلیٰ سندھ نے انتھک محنت کرکے ہمارا ساتھ دیا۔

    نجم سیٹھی کا کہنا تھا کہ سیکیورٹی اداروں اور حکومت کا تعاون نہ ہوتا تو ہم یہ دن نہ دیکھ پاتے، یکم،2 اور 3 اپریل کو پھر نیشنل اسٹیڈیم میں میچ ہوگا کیونکہ ویسٹ انڈیز کی ٹیم کراچی آرہی ہے۔

    ابھرتی ہوئی نوجوان پاکستانی گلوکارہ آئمہ بیگ نے اپنی پرفارمنس سے شاندار سماں باندھا۔

    بعد ازاں جل بینڈ کے گلوکار فرحان سعید اسٹیج پر آئے اور انہوں نے نہ صرف حاضرین بلکہ پشاور زلمی کے کھلاڑی حسن علی اور کپتان ڈیرن سیمی کو بھی جھومنے پر مجبور کردیا۔

    تیسرے پرفارم کرنے والے گلوکار شہزاد رائے تھے جنہوں نے کراچی کنگز کا نغمہ گایا تو اسٹیڈیم میں بیٹھے شائقین کا جوش قابل دید تھا، ستارہ امتیاز حاصل کرنے والے گلوکار کی جاندار پرفارمنس نے لوگوں کو جھومنے پر مجبور کردیا۔

    اسلام آباد یونائیٹڈ کے بلے باز جے پی ڈومینی کو اسٹیج پر مدعو کیا گیا تو انہوں نے سلام کرنے کے بعد کراچی والوں کو سلام پیش کیا، اُن کا کہنا تھا کہ تمام کھلاڑی پی ایس ایل کےفائنل کیلئے تیار ہیں۔

    پاکستان کے معروف پاپ میوزیکل بینڈ اسٹرنگز نے ایسی شاندار پرفارمنس دی کہ پشاور زلمی کے کپتان سیمی، اوپنر اینڈری فلیچر اور حسن علی اسٹیج پر جھومتے نظر آئے، مہمان کھلاڑیوں کو رقص کرتے دیکھ کر شائقین کا ولولہ اور زیادہ بڑھ گیا۔

    پشاور زلمی کے کپتان ڈیرن سیمی کو اسٹیج پر مدعو کیا گیا تو انہوں نے اردو میں کراچی والوں کا حال چال پوچھا، اُن کا کہنا تھا کہ یہاں پشاورزلمی کے سپورٹرز بڑی تعداد میں موجود ہیں، امید ہے کراچی کے شائقین کو اچھی کرکٹ دیکھنے کو ملے گی۔

    ڈیرن سیمی نے اپنے مخصوص لہجے میں پخیرراغلے ، کیسے ہو کراچی کے الفاظ ادا کیے تو اسٹیڈیم شور سے گونج اٹھا، انہوں نے اپنی بات کے اختتام پر پاکستان زندہ باد کا نعرہ بھی لگایا۔

    مزید پڑھیں: پی ایس ایل فائنل: پی کے بھی میچ دیکھنے پہنچ گیا

    پاکستان سپر لیگ کے آفیشل گانے گانے والے گلوکار علی ظفر نے بھی شاندار پرفارمنس کا مظاہرہ کیا۔

    تقریب میں معزز شخصیات کی شرکت

    پی ایس ایل فائنل دیکھنے کے لیے کراچی کے نیشنل اسٹیڈیم میں ڈی جی آئی ایس پی آر میجر جنرل آصف غفور، ڈی جی رینجرز سندھ میجر جنرل محمد سعید، وزیر اعظم شاہد خاقان عباسی، وزیر مملکت برائے بانی و بجلی عابد شیر علی، وزیر اعلیٰ سندھ مراد علی شاہ، صوبائی وزیر ناصر حسین شاہ، پیپلزپارٹی رہنما سعید غنی، گورنر سندھ محمد زبیر جبکہ کراچی کنگز کے مالک سلمان اقبال اور  دیگر  معززین بھی اسٹیڈیم میں موجود تھے۔

    وزیراعلیٰ سندھ سےچیئرمین پی سی بی نجم سیٹھی کی ملاقات ہوئی جس میں انہوں نے مراد علی شاہ کا شکریہ ادا کرتے ہوئے کہا کہ ‘آپ کی وجہ سے کا خواب شرمندہ تعبیر ہوا‘۔

    وزیراعظم کی نیشنل اسٹیڈیم آمد کے بعد آئی جی سندھ اے ڈی خواجہ نے  کی فائنل کےسیکیورٹی اقدامات پربریفنگ دی اور تمام اقدامات پر تفصیلی طور پر آگاہ کیا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • پی ایس ایل فائنل، شائقین کیلئے آخری وقت میں بڑی خوش خبری

    پی ایس ایل فائنل، شائقین کیلئے آخری وقت میں بڑی خوش خبری

    کراچی : پاکستان سپرلیگ کے تیسرے ایڈیشن کا فائنل آج کراچی کے نیشنل اسٹیڈیم میں دفاعی چیمپئین پشاور زلمی اور اسلام آباد یونائیٹڈ کے درمیان کھیلا جائے گا، جس کے لیے تمام ترانتظامات مکمل کرلیے گئے ہیں، عوام کی بڑی تعداد کے پیش نظر پاکستان کرکٹ بورڈ نے اسٹیڈیم میں داخلے کا وقت دو گھنٹے بڑھا دیا۔

    تفصیلات کے مطابق کراچی میں 9 سال بعد آج کرکٹ کا میلہ سجے گا، جس میں دنیائے کرکٹ کے نامور کھلاڑی اپنی صلاحیتوں کے جوہر دکھائیں گے، پی ایس ایل تھری کے فائنل میچ میں پشاور زلمی اور اسلام آباد یونائیٹڈ کے درمیان ٹاکرا ہوگا۔

    اپ ڈیٹ

    دونوں ٹیموں کے کھلاڑیوں کو سخت سیکیورٹی حصار میں ہوٹل سے اسٹیڈیم لایا گیا جبکہ وزیر اعلیٰ سندھ سمیت مختلف معروف شخصیات بھی اسٹیڈیم پہنچ چکی ہیں۔

    شائقین کرکٹ کے لیے نیشنل اسٹیڈیم کے دورازے سہہ پہر12 بجے کھول دیے گئے اور پارکنگ سے اسٹیڈیم کے قریب تک شائقین کو لے جانے کے لیے شٹل سروس چلائی جارہی ہے، عوام کی بڑی تعداد اسٹیڈیم پہنچنے سے رہ گئی جس کے پیش نظر پاکستان کرکٹ بورڈ نے داخلے کا وقت دو گھنٹے بڑھاتے ہوئے اسے شام 5 بجے کے بجائے 7 بجے تک کردیا۔

    سیکورٹی انتظامات

    پی ایس ایل فائنل کے لیے سخت سیکورٹی انتظامات کیے گئے، 8 ہزار سے زائد پولیس اہلکاروں سمیت رینجرز اور دیگر قانون نافذ کرنے والے ادارے سیکورٹی کے فرائض انجام دے رہے ہیں۔

    سیکورٹی پلان کے مطابق مخصوص شاہراوں کو ٹریفک کے لیے بند کیا گیا جبکہ میچ دیکھنے کے لیے آنے والے شائقین کو کسی قسم کی مشکلات کا سامنا نہ کرنا پڑے اس کے لیے 1600 اہلکاروں نے ٹریفک کا نظام سنبھالا ہے۔

    ٹریفک پلان

    ٹریفک پلان کے مطابق پی ایس ایل فائنل کے موقع پر نیشنل اسٹیڈیم آنے والی 4 اہم سڑکیں عام ٹریفک کے لیے بند ہیں، کار ساز شارع فیصل سے اسٹیڈیم آنے والی سڑک ٹریفک کے لیے بند جبکہ لیاقت آباد 10 نمبر سے اسٹیڈیم تک کی سڑک کو بھی رکاوٹیں لگا کر بند کیا گیا۔

    نیوٹاؤن سے اسٹیڈیم جانے والے شارع کو بھی عام ٹریفک کے لیے بند کیا گیا جبکہ میلینئم مال سے ڈالمیا روڈ بھی ٹریفک کے لیے بند ہے، نیپا سے جیل چورنگی تک یونیورسٹی روڈ جبکہ کشمیر روڈ اور نیو ایم اے جناح روڈ بھی ٹریفک کے لیے بند ہے۔

    پارکنگ پلان

    راشد منہاس روڈ سے میچ دیکھنے کے لیے آنے والے شہری غریب نواز گراؤنڈ اور ڈالمیا میں گاڑیاں پارک کرنے کی جگہ فراہم کی گئی جبکہ نیپا سے آنے والے شہری اردو یونیورسٹی اور حکیم سعید گراؤنڈ میں گاڑیاں پارک کرنے کی ہدایت دی گئی۔

    علاوہ ازیں یونیورسٹی روڈ پر بیت المکرم مسجد کے پاس گراؤنڈ میں گاڑیاں پارک کی گئی ہیں جبکہ  کشمیر روڈ پراسپورٹس کمپلیکس اور چائنا گراؤنڈ بھی پارکنگ کے اتنظامات کیے گئے اور  نیو ایم اے جناح روڈ پر میرعثمان پارک بھی پارکنگ کی سہولت فراہم کی گئی ہے۔

    نیشنل اسٹیڈیم میں کنٹرول روم

    پاکستان سپرلیگ کے آخری معرکے کے لیے نیشنل اسٹیڈیم میں کنٹرول روم بنایا گیا، اسٹیڈیم کے اندر اور باہر80 کیمروں کی مدد سے نقل وحرکت کا جائزہ لیا جارہا  ہے جس کے لیے کنٹرول روم میں 20 ایل سی ڈیر نصب کی گئی ہیں۔

    ضروری ہدایات

    پاکستان سپرلیگ کا فائنل دیکھنے کے لیے آنے والے ٹکٹ ہولڈرز اپنا اصل شناختی کارڈ ساتھ لائیں جبکہ کسی اور کے نام والے ٹکٹ پراپنا اصل شناختی کارڈ دکھانا ہوگا اور ٹکٹ جس کے نام پرہے اس کے شناختی کارڈ کی کاپی لازمی ساتھ لانا ہوگی۔

    اسٹیڈیم میں پاور بینک، اسلحہ ، چھری، چاقو، نیل کٹر، سگریٹ، ماچس اورلائٹر لے جانے پرپابندی ہوگی جبکہ قومی اورٹیم پرچم کےعلاوہ کوئی اورجھنڈا اسٹیڈیم لے جانے کی اجازت نہیں ہوگی۔

    اسٹیڈیم میں باہر سے کھانے کی کوئی بھی چیز لے جانے کی اجازت نہیں ہوگی صرف اسٹیڈیم میں موجود اسٹالز سے کھانے پینے کی چیزیں خریدیں جاسکتی ہیں۔

    رنگا رنگ اختتامی تقریب شام چھ بجے شروع ہوگی

    پی سی بی اعلامیے کے مطابق سیزن تھری کا اختتام یادگار بنانے کے لیے پی ایس ایل تھری کے فائنل کے موقع پر شائقین کرکٹ ایک ٹکٹ میں دومزے لیں گے، اختتتامی تقریب چھ بجے شروع ہوگی جبکہ میچ کا آغاز آٹھ بجے ہوگا، اس رنگا رنگ تقریب میں ملک کےمعروف گلوکار پرفارم کریں گے۔

    خیال رہے کہ اسلام آباد یونائیٹڈ نے پی ایس ایل کا افتتاحی ایڈیشن جیتا تھا جبکہ دوسرا ایڈیشن پشاور زلمی کے نام رہا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • پی ایس ایل فائنل: پی کے بھی میچ دیکھنے پہنچ گیا

    پی ایس ایل فائنل: پی کے بھی میچ دیکھنے پہنچ گیا

    کراچی: پاکستان سپر لیگ کے تیسرے ایڈیشن کا فائنل آج نیشنل اسٹیڈیم میں کھیلا جائے گا، اس موقع پر پاکستانی پی کے اور چاچا پاکستانی بھی جوش و خروش کے ساتھ میچ دیکھنے کے لیے پہنچ گئے۔

    تفصیلات کے مطابق کشمیر روڈ کمپلکس سے نیشنل اسٹڈیم کی جانب رواں دواں شہریوں میں سے ایک نے ’پی کے‘ کا روپ دھارا ہوا تھا‘ اور اس نے اپنا نام پاکستانی پی کے رکھا ہے۔

    اس پاکستانی پی کے کا ہیلمٹ بھی ہرے رنگ کا ہے جس پر پاکستان کے پرچم بنے ہوئے ہیں جبکہ اس نے گلے میں بہت سے تسبیحات اور اسی نوعیت کی دیگر اشیا بھی ڈالی ہوئی ہیں۔

    پی کے سے جب سوال کیا گیا کہ وہ فائنل میں کس ٹیم کو سپورٹ کررہے ہیں تو ان کا کہنا تھا کہ وہ پی ایس ایل کو سپورٹ کررہے ہیں‘ انہوں نے ایک دلچسپ انکشاف کیا کہ پشاور زلمی کے ڈیرن سیمی کا تعلق ان کے ’گولے‘ سے ہے ‘ اس لیے وہ ان کا پسندیدہ کھلاڑی ہے۔

    واضح رہے کہ پاکستان سپر لیگ کا فائنل اسلام آباد یونائیٹڈ اور پشاور زلمی کے مابین کراچی کے نیشنل اسٹیڈیم میں منعقد کیا جائے گا، جسے دیکھنے کے لیے وزیراعظم پاکستان شاہد خاقان عباسی، وزیراعلیٰ سندھ، بلاول بھٹو زرداری سمیت عوام بڑی تعداد میں پہنچ گئے ہیں۔

    مزید پڑھیں: پی ایس ایل فائنل: کراچی میں ٹی شرٹس کی ریکارڈ فروخت

    کسی بھی ناخوشگوار واقعے سے نمٹنے کے لیے سیکیورٹی کے سخت حفاظتی اقدامات کیے گئے ہیں اور شہریوں کو مختلف مقامات سے مخصوص شٹل سروسز کے ذریعے اسٹیڈیم پہنچایا جارہا ہے جبکہ گراؤنڈ جانے والے عوام کو متنبہ کیا گیا ہے کہ وہ داخلے کا ٹکٹ اور اپنا اصل شناختی کارڈ ساتھ رکھیں۔

    کراچی میں 9 برس بعد انٹرنیشنل کرکٹ کی واپسی پر شائقین کرکٹ کا جوش دیدنی ہے، گذشتہ روز شہر قائد میں اس قدر جوش و خروش تھا کہ پی ایس ایل کی چاند رات معلوم ہورہی تھی اور ہر شخص اپنی پسندیدہ ٹیم کے حق میں نعرے لگا رہا تھا۔

    یہ بھی پڑھیں: پی ایس ایل فائنل: سیکورٹی انتظامات مکمل‘ اسٹیڈیم جانےوالےشائقین کےلیےخصوصی ہدایات

    علاوہ ازیں پی ایس ایل کے فائنل کی تیاریوں کے معاملے میں کراچی کی مارکیٹوں میں بڑی تعداد میں ٹی شرٹس فروخت ہوئیں جبکہ ہوٹلوں میں بکنگ فل اور کرائے کی گاڑیاں نایاب ہوگئیں، گزشتہ دو روز میں کروڑوں روپے کی اشیاء فروخت ہوئیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • پی ایس ایل کے کامیاب انعقاد پرقوم کومبارکباد پیش کرتا ہوں‘ وزیراعظم

    پی ایس ایل کے کامیاب انعقاد پرقوم کومبارکباد پیش کرتا ہوں‘ وزیراعظم

    اسلام آباد: پاکستان سپرلیگ کے کامیاب انعقاد پر وزیراعظم شاہد خاقان عباسی نے قوم کو مبارکباد دیتے ہوئے کہا کہ پی ایس ایل نے قوم کو نئی خوشی اورجذبہ دیا ہے۔

    تفصیلات کے مطابق وزیراعظم شاہد خاقان عباسی نے اپنے بیان میں کہا ہے کہ کراچی میں پی ایس ایل کا فائنل شہر کے عالمی تشخص میں تبدیلی لائے گا۔

    وزیراعظم پاکستان نے پی ایس ایل کے کامیاب انعقاد پرقوم کو مبارکباد پیش کرتے ہوئے کہا کہ پی ایس ایل نے قوم کونئی خوشی اورجذبہ دیا ہے، حکومت ان خوشیوں کوبڑھانے کے لیے اسی جذبے سے کام کرتی رہے گی۔

    انہوں نے کہا کہ پی ایس ایل کے انعقاد میں صوبائی حکومت کا تعاون شامل ہے جبکہ اس میں مسلح افواج اور قانون نافذ کرنے والے اداروں کا اہم کردار ہے۔

    وزیراعظم شاہد خاقان عباسی نے کہا کہ کراچی کے امن اور خوشیوں کی بحالی میں نوازشریف کا ویژن شامل ہے، نوازشریف اور ویژن کے تحت حکومت قوم کو خوشیاں واپس لوٹا رہی ہے، معیشت کی بحالی، قیام امن، کھیلوں کا فروغ حکومتی کارکردگی کا ثبوت ہیں۔

    انہوں نے کہا کہ مسلم لیگ ن کی حکومت نے ہمیشہ ملک کواندھیروں سے نکال کرروشنیوں سے ہمکنارکیا، حکومت ان خوشیوں کوبڑھانے کے لیے اسی جذبے سے کام کرتی رہے گی۔

    دوسری جانب وزیراعلیٰ سندھ نے سماجی رابطے کی ویب سائٹ ٹویٹر پراپنے پیغام میں کہا کہ کراچی میں پی ایس ایل کا جشن دیکھ کر خوشی ہورہی ہے، میگاایونٹ کے لیے تعاون کرنے والوں کا شکرگزارہوں۔

    مراد علی شاہ نے مزید کہا کہ کراچی میں پی ایس ایل فائنل کرانے کا وعدہ پورا کردیا، ایک سال پہلے کراچی میں پی ایس ایل فائنل کا وعدہ کیا تھا، امید ہے کہ کراچی میں مزید کرکٹ بھی ہوگی۔

    واضح رہے کہ پاکستان سپرلیگ کے تیسرے ایڈیشن کا فائنل آج کراچی کے نیشنل اسٹیڈیم میں دفاعی چیمپئین پشاور زلمی اور اسلام آباد یونائیٹڈ کے درمیان کھیلا جائے گا جس کے لیے تمام ترانتظامات مکمل کرلیے گئے ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • چاہتے ہیں پی ایس ایل کا فائنل یادگار بن جائے، شاہد آفریدی

    چاہتے ہیں پی ایس ایل کا فائنل یادگار بن جائے، شاہد آفریدی

    کراچی : پی ایس ایل کی ٹیم کراچی کنگز کے صدر شاہد آفریدی نے کہا ہے کہ کراچی کا اسٹیڈیم انٹرنیشنل کرکٹ کا انتظار کررہا تھا، چاہتے ہیں پی ایس ایل کا فائنل یادگار بن جائے۔

    ان خیالات کا اظہار انہوں نے اے آر وائی نیوز کے پروگرام اعتراض ہے میں خصوصی گفتگو کرتے ہوئے کیا، شاہد آفریدی نے کہا کہ کراچی میں فائنل ہونا بڑی بات ہے۔

    کراچی کنگز فائنل میں ہوتی تو اور اچھا ہوتا، خوشی ہوتی ہے میرا تجربہ کھلاڑیوں کے کام آئے، کراچی کنگز کی پرفارمنس اس مرتبہ پچھلے دو سال سے بہتر رہی ہے۔

    کراچی کنگز کی شکست پر تبصرہ کرتے ہوئے ان کا کہنا تھا کہ دو سے تین میچز ہم فیلڈنگ کی وجہ سے ہارے، فاسٹ بولرز کی کچھ جگہ پر بولنگ اچھی نہیں رہی، کسی دوسرے کے کام میں نہیں بولتا اپنی کارکردگی پر توجہ دی، پشاور زلمی شروع میں میچز ہاری جس پر حیرت ہوئی۔

    ایک سوال کے جواب میں شاہدآفریدی نے کہا کہ خواہش تھی کہ پاکستان میں اہل خانہ کے سامنے میچ کھیلوں، فی الحال ڈاکٹرز نے آرام کا مشورہ دیا ہے کوشش ہوگی کل کا فائنل دیکھوں۔

    کراچی میں حالات بہت بہتر ہیں، فائنل کھیلنےوالی دونوں ٹیمیں بہت اچھی ہیں، چاہتے ہیں پی ایس ایل کا فائنل یادگار بن جائے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔  

  • پی ایس ایل فائنل: کراچی میں ٹی شرٹس کی ریکارڈ فروخت

    پی ایس ایل فائنل: کراچی میں ٹی شرٹس کی ریکارڈ فروخت

    کراچی : پی ایس ایل کے فائنل کی تیاریوں کیلئے کراچی کی مارکیٹوں میں خریداری عروج پر پہنچ گئی، ہوٹلوں میں بکنگ فل اور کرائے کی گاڑیاں نایاب ہوگئیں، گزشتہ دو روز میں کروڑوں روپے کی اشیاء فروخت ہو گئیں۔

    تفصیلات کے مطابق پی ایس ایل تھری کا فائنل ہونے میں صرف ایک روز باقی رہ گیا، کراچی کے شہریوں کا جوش وخروش عروج پر پہنچ گیا، بازاروں میں پی ایس ایل کے حوالے سے خریداری زور و شور سے جاری ہے۔

    پی ایس ایل فائنل کے موقع پر کراچی میں کاروبارمیں زبردست تیزی دیکھنے میں آرہی ہے، شہر کے تمام ہوٹل بک ہوگئے، شائقین کا مارکیٹوں میں غیرمعمولی رش ہے ۔

    پی ایس ایل کی مختلف ٹیموں کی ٹی شرٹس، بیجز، ٹوپیاں اور دیگر مصنوعات کی فروخت جاری ہے، مارکیٹ ذرائع کے مطابق دو روز میں 25کروڑ روپے سے زائد کا ریکارڈ کاروبارہوا۔

    اس کے علاوہ پاکستان سپر لیگ کی چھ ٹیموں میں شامل غیر ملکی کھلاڑیوں کی تصاویر کو خیرمقدمی بینروں کے ساتھ شہر کی دیواروں کو سجایا گیا ہے۔

    شہر رنگ برنگی روشنیوں سے جگمگا رہا ہے۔ مارکیٹوں میں کرکٹ کے شائقین اپنی اپنی پسند کی ٹیموں کی ٹی شرٹس اور بیجز خریدنے میں مصروف نظر آرہے ہیں۔

    شہر میں جوش و خروش واضح طور پر دیکھا جاسکتا ہے۔ زینب مارکیٹ، ایمپریس مارکیٹ، ڈینسو ہال سمیت شاید ہی کوئی بڑی مارکیٹ ہو جہاں پی ایس ایل کی ٹی شرٹس فروخت نہ ہو رہی ہوں۔

    پی ایس ایل فائنل کے موقع پر نیشنل کرکٹ اسٹیڈیم کی تزئین و آرائش کے ساتھ صدر سے نیشنل اسٹیدیم کے تمام راستوں کو صاف کر دیا گیا، جس کو دیکھ کر کراچی کے رہائشی شکر ادا کررہے ہیں کہ پی ایس ایل کی وجہ سے ہی سہی کراچی کی سنی تو گئی۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • پاکستان کرکٹ کےلئے بہترین ملک ہے، زلمی کپتان ڈیرن سیمی

    پاکستان کرکٹ کےلئے بہترین ملک ہے، زلمی کپتان ڈیرن سیمی

    کراچی : پشاور  زلمی کے کپتان ڈیرن سیمی نے کہا ہے کہ ٹائٹل کا دفاع کرنے کی بھرپور کوشش کرینگے، شاہد آفرید ی کا متبادل نہیں ہوں وہ تو چمپئین ہیں، پاکستان کرکٹ کے لئے بہترین ملک ہے۔

    ان خیالات کا اظہار انہوں نے نیشنل اسٹیڈیم کراچی میں پریس کانفرنس سے خطاب کرتے ہوئے کیا،  ڈیرن سیمی نے کہا کہ سو فیصد فٹ نہیں ہوں البتہ جس طرح لاہور میں کھیلا ایسے ہی کل بھی گراؤنڈ میں اتروں گا، ٹائٹل کا دفاع کرنے کی بھرپور کوشش کرینگے۔

    پاکستان میں تماشائیوں کے جوش و خروش سے جذبہ ملتا ہے، کراچی میں پختون بہت ہیں، امید شاہد آفریدی تو چمپئین ہیں جن کو نہ صرف پاکستان بلکہ دنیا بھرمیں عزت ملتی ہے، ہم دونوں بھائیوں کی طرح ہیں۔

    ایک سوال کے جواب میں ان کا کہنا تھا کہ لیوک رونکی فارم میں ہے تو کامران اکمل بھی اپنی بہترین فارم میں ہیں، کامران اکمل پشاور زلمی کا مؤثر ہتھیار ہے، ہم نے کل کے لئے میچ پلان بنایا ہوا ہے امید ہے اس پر عمل کرکے میچ میں کامیابی حاصل کریں گے۔

    ڈیرن سیمی کا کہنا تھا کہ پاکستان میں انٹرنیشنل کرکٹ کی بحالی پرخوش ہوں یہ ملک کرکٹ کے لئے بہترین ہے، مجھے خوشی ہے کہ ہماری ٹیم دورہ کررہی ہے،امید ہے وہ میچز بھی اچھے ہوں گے۔

    ڈیرن سیمی کا اہلیان کراچی کیلئے اردو میں اظہار تشکر

    اس سے قبل ڈیرن سیمی نے سوشل میڈیا پر ایک ویڈیو شیئر کی جس میں وہ کراچی کے ایک ریستوران میں بیٹھے بریانی کھارہے ہیں، ویڈیو کی خاص بات یہ ہے کہ انہوں نے اردو زبان میں کراچی والوں کی محبت کا شکریہ ادا کیا ہے۔

    اپنے پیغام میں ڈیرین سیمی کا کہنا تھا کہ ’کراچی آپ سب کا بہت بہت شکریہ، کراچی کی بہترین بریانی کھائی اور مجھے بہت مزہ آیا ‘۔ اس سے قبل ڈیرن سیمی نے کراچی کے شائقین کرکٹ کو اسٹیڈیم میں پشاور زلمی کی شرٹ پہن کر آنے اور انہیں سپورٹ کرنے کا پیغام جاری کیا تھا جسے پورے ملک میں بے حد سراہا گیا۔

  • کل فائنل کوئی بھی ٹیم جیتے، جیت پاکستان کی ہوگی: سہیل انور سیال

    کل فائنل کوئی بھی ٹیم جیتے، جیت پاکستان کی ہوگی: سہیل انور سیال

    کراچی: وزیر داخلہ سندھ سہیل انور سیال کا کہنا ہے کہ کل پاکستان سپر لیگ کا فائنل کوئی بھی ٹیم جیتے، جیت پاکستان کی ہوگی۔

    تفصیلات کے مطابق وزیر داخلہ سندھ سہیل انور سیال نے نیشنل اسٹیڈیم کا دورہ کیا اور تمام سیکیورٹی انتظامات کا جائزہ لیا۔

    اسٹیڈیم کے دورے کے بعد اسٹیڈیم کے باہر میڈیا سے گفتگو کرتے ہوئے وزیر داخلہ کا کہنا تھا کہ رینجرز، پولیس اور سندھ حکومت نے مل کر پی ایس ایل فائنل کی تیاری کی ہے۔

    انہوں نے کہا کہ کراچی میں 9 سال بعد کرکٹ بحال ہوئی ہے۔ وزیر اعلیٰ سمیت تمام لوگ اسٹیڈیم میں میچ دیکھنے آئیں گے۔

    وزیر داخلہ کا کہنا تھا کہ اسٹیڈیم میں سب مل کر میچ دیکھیں گے تو دنیا میں اچھا تاثر جائے گا۔ ’کل پی ایس ایل کا فائنل کوئی بھی ٹیم جیتے، جیت پاکستان کی ہوگی‘۔

    سہیل انور سیال کا مزید کہنا تھا کہ رینجرز، پولیس اور فوج سمیت 15 ہزار اہلکار سیکیورٹی پر معمور ہوں گے۔ ’پورے شہر کو پیغام دیناچاہتا ہوں کہ کل صبر کا مظاہرہ کریں‘۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔