اسلام آباد: وفاقی وزیر داخلہ چوہدری نثار کا کہنا ہے کہ عالمی سطح پر پاکستان کی ساکھ کی بہتری کے لئے ملک میں کرکٹ کا انعقاد معاون ثابت ہوگا، ہم لوگوں کے جھوٹ کا مقابلہ سچ بول کر کریں گے.
تفصیلات کے مطابق وزیر داخلہ کا اپنے حلقے کا دورہ ہرکہ، پاپین بنگلہ اور دیگر مقامات پر عوام، اکابرین اور منتخب نمائندوں سے گفتگو کرتے ہوئے کہا کہ پاکستان میں حکومت کرنا مشکل ترین کام ہے۔ جہاں ایک طرف مسائل کا انبار ہے وہاں دوسری طرف عوامی توقعات ہیں مگر اللہ تعالی کے فضل و کرم سے مسلم لیگ ن عوام سے کیے وعدے پورے کر رہی ہے۔ 2017 کے پاکستان اور ماضی کے پاکستان میں واضح فرق ہے اور اس میں مزید بہتری آئے گی۔
وزیر داخلہ کا پی ایس ایل سے متعلق کہنا تھا کہ ملک میں کرکٹ ہوگی تو اس سے پاکستان کی ساکھ بہترہوگی، ہر چیز پر سیاست اور پوائنٹ سکورنگ کرنا نا مناسب ہے۔
چوہدری نثار نے کہا ہے جنہوں نے اس ملک اور عوام کے لیے کچھ نہیں کیا اور اپنے دورحکومت میں نااہلی کی مثالیں قائم کی وہ الزام تراشیوں اور بہتان بازی کا سہارا لے کر اپنی ناکامیوں پر پردہ ڈالنے اور عوام کو گمراہ کرنے کی کوشش کرتے ہیں۔ کوئی جتنا جھوٹ بولے گا ہم اتنا سچ بولیں گے اور فیصلہ عوام کرے گی۔
انھوں نے مزید کہا کہ ہماری نیت ٹھیک اور ہاتھ صاف ہیں، نہ پہلے کسی آزمائش سے گبھرائے ہیں اور نہ آئندہ ہمارے قدم ڈگمگائیں گے، سیاست کو بطور تجارت یا اپنی ذاتی تجوریاں بھرنے کے لیے نہیں بلکہ عوامی خدمت سمجھ کر کرتے ہیں۔
علاقے میں ترقیاتی کاموں کا حوالہ دیتے ہوئے وزیر داخلہ نے کہا کہ اپنے بتیس سالہ دور سیاست اور خصوصا اپنے دور حکومت میں انہوں نے علاقے بھر میں ترقیاتی کاموں کا جال بچھایا اور قدم قدم پر اپنی خدمت کے نشان چھوڑے ہیں، جو پارٹیاں بدل کر اور اپنا سیاسی قبلہ تبدیل کرکے بار بار اقتدار میں آئے ان کو علاقے میں ترقی کی ایک اینٹ رکھنے کی بھی توفیق نہ ہوئی۔
علاقے کے اکابرین اور معززین کو مخاطب کرتے ہوئے وزیر داخلہ نے زور دیتے ہوئے کہا کہ وہ علاقے کے عوام کے مسائل کی نشاندہی اور انکے حل میں اپنا بھرپور کردار ادا کریں ۔ انہوں نے کہا کہ علاقے کے منتخب رہنما پولیس، محکمہ مال اور دیگر سرکاری محکموں سے کرپشن ، اقربا پروری وغیرہ جیسے مسائل کا خاتمہ کرنے میں اپنا کردار ادا کریں اور ہر کام میں انصاف اور اپنے مذہبی اصول ملحوظ خاطر رکھیں۔
انہوں نے کہا کہ نچلی سطح پر کرپشن کا عوام کے تعاون اور مدد سے ہی قلع قمع کیا جا سکتا ہے۔
وزیر داخلہ سے بات چیت کے دوران اہل علاقہ نے ملکی امور پر بات کی اور وزیر داخلہ کے سامنے اپنے مسائل بھی بیان کیے۔
واضح رہے کہ گذشتہ روز ڈی جی آئی ایس پی آر آصف غفور نے کہا کہ پی ایس ایل کا فائنل ہو یا پھر کوئی اور ایونٹ سیکیورٹی کی ذمہ داری پاک فوج کی ہے۔
