ARYNews.tv | Urdu – Har Lamha Bakhabar

Tag: PSL4

  • کراچی کنگز کے تمام غیر ملکی کھلاڑی پاکستان میں کھیلنے کے لئے پرجوش

    کراچی کنگز کے تمام غیر ملکی کھلاڑی پاکستان میں کھیلنے کے لئے پرجوش

    کراچی: کراچی کنگز کے مالک سلمان اقبال نے کہا ہے کہ پاکستان سپرلیگ کے آٹھ میچز کراچی میں ہونا خوش آئند ہے، ہوم کراوڈ کے سامنے ٹیم کھیلے گی تو جوش عروج پرہوگا۔

    تفصیلات کے مطابق کراچی کنگز سمیت دیگر پی ایس ایل فرنچائزز سے کھیلنے والے کے تمام غیر ملکی کھلاڑی پاکستان میں کھیلنے کے لیے بے تاب ہیں اور انہوں نے کہا ہے کہ ہم اپنی ٹیم کے ساتھ پاکستان آرہے ہیں۔

    کراچی روانگی سے قبل اے آر وائی کے نمائندے سے گفتگو کرتے ہوئے  کہا کہ سوشل میڈیا پر ہم نے شائقین کا جوش دیکھا اس لیے اب ہم بھی پرجوش ہیں۔

    لیونگ اسٹون اور ایرن سمرز کہتے ہیں پاکستانی شائقین کرکٹ کے دیوانے ہیں انکے سامنے کھیلنا اچھا تجربہ ہوگا۔

    مزید پڑھیں: پی ایس ایل 4 میچز، کراچی کا متبادل ٹریفک پلان جاری

    کراچی کنگز کے اسکواڈ میں شامل غیرملکی کھلاڑیوں میں روی بوپارہ، بین ڈنک، کولن انگرام، لیام لیونگ اسٹون، کولن منرو، سکندر رضا اور ایرون سمرز شامل ہیں جو نیشنل اسٹیڈیم میں ہونے والے میچز میں اپنا کھیل پیش کریں گے۔

    سماجی رابطے کی ویب سائٹ پر غیر ملکی کھلاڑیوں نے شائقین کرکٹ کے لیے خصوصی پیغامات بھی ارسال کیے۔

    روی بوپارا نے بتایا کہ میں چار سال پاکستان آرہا ہوں اور کراچی کنگز کے ہوم گراؤنڈ پر شائقین کے سامنے ہوں گا۔

    کولن انگرام نے سماجی رابطے کی ویب سائٹ پر ابوظہبی سے کراچی روانگی کی تصویر شیئر کی۔

    یہ بھی پڑھیں: پی ایس ایل فائنل راؤنڈ کے لیے ٹیموں کی کراچی آمد کا سلسلہ شروع

    یاد رہے کہ کراچی کنگز پلے آف مرحلے کا پہلا میچ 10 مارچ کو کوئٹہ گلیڈی ایٹرز کے خلاف نیشنل اسٹیڈیم میں کھیلے گی، شائقین کرکٹ اپنی ٹیم کو ہوم گراؤنڈ پر دیکھنے کے لیے بے تاب ہیں۔

  • پی ایس ایل فائنل راؤنڈ کے لیے ٹیموں کی کراچی آمد کا سلسلہ شروع

    پی ایس ایل فائنل راؤنڈ کے لیے ٹیموں کی کراچی آمد کا سلسلہ شروع

    کراچی: پاکستان سپر لیگ کے سیزن فور میں فائنل راؤنڈ کھیلنے کے لیے ٹیموں کی کراچی آمد کا سلسلہ شروع ہوگیا ہے۔

    تفصیلات کے مطابق پی ایس ایل کے لیے اسٹارز کی کہکشاں پاکستان میں سجنے کو تیار ہیں، آسٹریلیا کے شین واٹسن چودہ سال بعد ایکشن میں دکھائی دیں گے۔

    کوئٹہ گلیڈی ایٹرز کے کپتان سرفراز احمد کہتے ہیں شائقین گراؤنڈ میں آئیں اور کرکٹ کو سپورٹ کریں، سرفراز احمد ایئرپورٹ پہنچے تو فینز نے گھیرلیا اور سیلفیاں بنائیں۔

    آسٹریلیا کے شین واٹسن کا چودہ سال بعد پاکستان آنے کے لیے تیار ہیں، کراچی کنگز کے غیرملکی کھلاڑی کولن منرو، انگرم اور لیونگ اسٹن بھی پاکستان آرہے ہیں۔

    پشاور زلمی کے کپتان ڈیرن سیمی اور پولارڈ بھی نیشنل اسٹیڈیم میں شائقین کا لہو گرمائیں گے۔

    پی ایس ایل 4 : چوتھا مرحلہ مکمل، غیر ملکی کھلاڑی پاکستان اڑان بھرنے کو تیار

    پاکستان سپرلیگ کا چوتھا مرحلہ دو روز قبل ابوظہبی میں مکمل ہوگیا جس کے بعد اب بقیہ تمام میچز کراچی کے نیشنل اسٹیڈیم میں کھیلے جائیں گے۔

    ملتان سلطانز کی ٹیم پلے آف مرحلے سے باہر ہوگئی جبکہ کراچی کنگز، پشاور زلمی، کوئٹہ گلیڈی ایٹرز، لاہور قلندرز، اسلام آباد یونائیٹڈ کی ٹیمیں ٹرافی حاصل کرنے کے لیے مقابلے کریں گی۔

    نیشنل اسٹیڈیم کراچی میں ہونے والے پی ایس ایل میچز کے لیے بھرپور انتظامات کیے جارہے ہیں، گراؤنڈ میں کمانڈ اینڈ کنٹرول روم بھی فعال کردیا گیا ہے۔

  • پی ایس ایل 4 میچز، کراچی کا متبادل ٹریفک پلان جاری

    پی ایس ایل 4 میچز، کراچی کا متبادل ٹریفک پلان جاری

    کراچی: شہر قائد میں منعقد ہونے والے پی ایس ایل سیزن فور کے میچز کی مناسبت سے ٹریفک پولیس نے متبادل ٹریفک پلان جاری کردیا۔

    تفصیلات کے مطابق کراچی کے نیشنل اسٹیڈیم میں پی ایس ایل سیزن فور کے شیڈول میچز 9، 10، 11، 13 اور 15 جبکہ فائنل 17 مارچ کو کھیلا جائے گا جس کے تحت مختلف شاہراؤں پر امن و امان کی صورتحال کے پیش نظر ٹریفک کی روانی متاثر ہوگی۔

    کراچی ٹریفک پولیس کی جانب سے متبادل راستوں کا تعین جبکہ اسٹیڈیم جانے والے شائقین کے لیے پارکنگ کے انتظامات اور شٹل سروس پوائنٹس کا تعین کیا گیا ہے۔

    اسٹیڈیم جانے والے شائقین کے لیے پارکنگ کی سہولت گلشن اقبال مین واقع حکیم سعید پارک، اردو یونیورسٹی گراؤنڈ اور اتوار بازار بالمقابل بیت المکرم مسجد  کے قریب ہوگی۔

    ڈسٹرکٹ سینٹرل اور ویسٹ پارکنگ

    ضلع وسطی اور غربی کے وہ رہائشی جو اسٹیڈیم جانا چاہتے ہیں انہیں براستہ نیپا اور لیاقت آباد نمبر 10 سے حسن اسکوائر اور پھر یونیورسٹی روڈ پر مقرر کیے گئے مقامات پر گاڑی یا موٹر سائیکل پارک کرنے کی سہولت دی جائے گی جبکہ ایکسپو سینٹر سے بذریعہ شٹل سروس شائقین کو نیشنل اسٹیڈیم پہنچایا جائے گا۔

    ڈسٹرکٹ ملیر اور ایسٹ پارکنگ

    ضلع ملیر اور شرقی کے رہائشی صفورا گوٹھ سے نیپا چورنگی پہنچیں گے جس کے بعد اُن کی گاڑیوں کو سہراب گوٹھ ، گلشن چورنگی کی طرف موڑا جائے گا جہاں پر پارکنگ کی سہولت موجود ہوگی جس کے بعد انہیں بذریعہ شٹل ایکسپو سینٹر لایا جائے گا اور پھر یہاں سے دوسری بس میں اسٹیڈیم پہنچیں گے۔

    مزید پڑھیں: پی ایس ایل 4 : چوتھا مرحلہ مکمل، غیر ملکی کھلاڑی پاکستان اڑان بھرنے کو تیار

    دوسری جانب ڈسٹرکٹ ایسٹ اور ملیر کے رہائشی غریب نواز فٹبال گراؤنڈ نزد ملینئیم مال کے قریب اپنی گاڑی پارک کرسکیں گے جس کے بعد انہیں بحریہ یونیورسٹی سے بذریعہ شٹل اسٹیڈیم لایا جائے گا۔

    ڈسٹرکٹ جنوب ، سٹی، کورنگی

    کورنگی، ڈٰیفنس اور شہر سے آنے والے رہائشی براستہ شاہراہ فیصل اور پھر شارع قائدین سے اللہ والی چورنگی کے بعد سوسائٹی سگنل سے پیپلزسیکریٹریٹ چورنگی سے یونیورسٹی روڈ ہوتے ہوئے ایکسپو سینٹر کے گیٹ نمبر 1 پر گاڑی کھڑی کر کے تلاشی دے کر گیٹ نمبر 2 سے اسٹیڈیم جا سکیں گے۔

    شاہراہ فیصل، ڈرگ روڈ، راشد مہناس روڈ اور نیپا سے یونیرسٹی روڈ سے آنے والے تمام افراد بھی اپنی گاڑیاں ایکسپو سینٹر گیٹ نمبر 1 پر کھڑی کرسکیں گے۔

    متبادل راستے

    شاہراہ فیصل سے کارساز جانے والے براستہ سرشاہ سلیمان روڈ کے ذریعے اپنی منزل تک پہنچ سکیں گے۔

    کارساز، ڈرگ روڈ، شاہرہ فیصل سے بائیں جانب راشد منہاس روڈ، ملینیئم مال سے نیپا اور ائیرپورٹ سے آنے والے حضرات بھی ڈرگ روڈ سے راشد منہاس نیپا والا راستہ اختیار کرسکتے ہیں۔

     راشد منہاس روڈ سے ڈالمیا جانے والی سڑک پر گاڑیوں کو جانے کی اجازت نہیں ہوگی، اسی طرح  نیپا ، عسکری IV، ڈرگ روڈ سے شارع فیصل یا ملینیم ، نیپا سے صفورا یا گلشن چورنگی سے سہراب گوٹھ کا راستہ اختیار کر سکتے ہیں ۔

    یونیورسٹی روڈ سے نیو ٹاؤن اسٹیڈیم روڈ کے موڑ سے عام پبلک کو جانے کی اجازت نہیں ہوگی، متبادل روٹ کے تحت جیل چورنگی سے شہید ملت یا پیپلز سیکریٹریٹ چورنگی کا راستہ اختیار کیا جاسکتا ہے۔

    ٹریفک پولیس نے آغا خان ہسپتال اور لیاقت نیشنل ہسپتال آنے والے حضرات سے اپیل کی ہے کہ وہ نیو ٹاؤن تھانہ کی طرف سے آئیں  وہاں موجود ٹریفک پولیس کا عملہ مکمل رہنمائی اور تعاون کے لیے موجود ہوگا۔

    یونیورسٹی روڈ، شہید ملت روڈ اور راشد منہاس روڈ ٹریفک کے لیے کھلے رہیں گے۔ ضلع وسطی،شرقی،ملیر،ضلع جنوبی اور ضلع غربی کے رہائشی لیاری ایکسپریس وے کے دونوں جانب استعمال کرسکتے ہیں۔

    اسی طرح ٹریفک پولیس نے بھاری ٹریفک کے حوالے سے بھی انتظامات کیے جن کے مطابق سہراب گوٹھ سے نیپا، لیاقت آباد نمبر 10 سے حسن اسکوائر اور پیپلزسیکریٹریٹ چورنگی سے یونیورسٹٰ روڈ پر ہیوی ٹریفک کا داخلہ بالکل بند ہوگا۔

    یہ بھی پڑھیں: پی ایس ایل 4، کراچی میچز کا سیکیورٹی پلان مرتب، شائقین کے لیے ہدایت نامہ جاری

    کراچی ٹریفک پولیس نے عوام سے گزارش ہے کہ وہ زحمت و پریشانی سے بچنے کےلئے قانون نافذ کرنے والے اداروں اور ٹریفک پولیس سے مکمل تعاون کریں اور بالخصوص اپنی گاڑیوں /موٹر سائیکلوں کو کسی سروس روڈ یا مین روڈ پر کھڑی نہ کریں بلکہ دئیے گئے پارکنگ مقامات پر ہی پارک کریں ۔

    یاد دہانی

    اسٹیڈیم جانے والے شائقین کو ٹکٹ کے ساتھ اصل شناختی کارڈ بھی رکھنا ہوگا بصورت دیگر انہیں شٹل سروس میں داخلے کی اجازت نہیں دی جائے گی۔

    ٹریفک پولیس نے شہریوں سے اپیل کی ہے کہ وہ کسی بھی پریشانی کی صورت میں مددگار نمبر 1915 اور واٹس ایپ نمبر 03059266907  پر رابطہ کر کے اپ ڈیٹ حاصل کرسکتے ہیں۔

    یاد رہے کہ کراچی کے نیشنل اسٹیڈیم میں کھیلے جانے والے ان میچز میں پاکستان کے مایہ ناز کھلاڑیوں سمیت نامور غیر ملکی کھلاڑی حصہ لیں گے ۔

  • پی ایس ایل 4 : چوتھا مرحلہ مکمل، غیر ملکی کھلاڑی پاکستان اڑان بھرنے کو تیار

    پی ایس ایل 4 : چوتھا مرحلہ مکمل، غیر ملکی کھلاڑی پاکستان اڑان بھرنے کو تیار

    ابوظہبی: پاکستان سپرلیگ سیزن فور میں کھیلنے والے بیشتر غیرملکی کھلاڑی پاکستان میں کھیلنے کو تیار ہوگئے، آسٹریلیا کے شین واٹسن نے بھی 14 برس بعد کراچی آنے کا اعلان کردیا۔

    تفصیلات کے مطابق پاکستان سپرلیگ کا چوتھا مرحلہ گزشتہ روز ابوظہبی میں مکمل ہوگیا جس کے بعد اب بقیہ تمام میچز کراچی کے نیشنل اسٹیڈیم میں کھیلے جائیں گے۔

    ملتان سلطانز کی ٹیم پلے آف مرحلے سے باہر ہوگئی جبکہ کراچی کنگز، پشاور زلمی، کوئٹہ گلیڈی ایٹرز، لاہور قلندرز، اسلام آباد یونائیٹڈ کی ٹیمیں ٹرافی حاصل کرنے کے لیے مقابلے کریں گی۔

    مزید پڑھیں: پی ایس ایل سیزن فور کا تیسرا مرحلہ مکمل، کھلاڑیوں کی شاندار پرفارمنس

    پی ایس ایل کے لیے پاکستان میں ہوگی اسٹارزکی بھرمار ہوگی،  کوئٹہ گلیڈی ایٹرزکے شین واٹسن چودہ سال بعد پاکستان آئیں گے اور شائقین کو جارحانہ کھیل دکھائیں گے۔

    گلیڈی ایٹرز کے ہی ڈی جے براوو نے بھی پاکستان آنے کا اعلان کردیا جبکہ کراچی کنگز کے اسٹارز کولن منرو، انگرام، لیونگ اسٹن بھی نیشنل اسٹیڈیم کراچی میں اپنا کھیل پیش کریں گے۔

    یہ بھی پڑھیں: پی ایس ایل 4 : دوسرا مرحلہ مکمل، کوئٹہ گلیڈی ایٹرز کی سرفرازی، کراچی کنگز کا شاندار کم بیک

    پشاورزلمی کے کپتان ڈیرن سیمی سمیت پوری ٹیم کراچی آئے گی، غیر ملکی کھلاڑی پولارڈ بھی پاکستان آنے کو تیار ہیں جبکہ اسلام آباد یونائیٹڈ کے لیوک رانکی نے بھی پاکستان آنے پر رضا مندی ظاہر کردی۔

    یاد رہے کہ گزشتہ روزپاکستان سپر لیگ کا یواے ای میں گروپ مرحلہ ختم ہوگیا، پوائنٹس ٹیبل پر سرفراز احمد کی کوئٹہ گلیڈی ایٹرز 14 پوائنٹس کے ساتھ سرفہرست جبکہ پشاور زلمی 12، اسلام آباد یونائیٹڈ 8، کراچی کنگز 8 ، لاہور قلندرز 6 اور ملتان سلطانز 4 پوائنٹس کے ساتھ بالترتیب دوسری، تیسری، چوتھی، پانچویں اور چھٹی پوزیشن پر ہیں۔

    پی ایس ایل 4: کھلاڑیوں کی انفرادی کارکردگی

    بلے بازوں میں کوئٹہ گلیڈی ایٹرز کے شین واٹسن 332 رنز بنا کر سرفہرست ہیں، انہوں نے تین نصف سنچریاں اسکور کیں جبکہ سنچری بنانے کا اعزاز کراچی کنگز کے کولن انگرام کے پاس ہے علاوہ ازیں لیام لیونگ اسٹن نے بھی جارحانہ بلے بازی کر کے رنز کا انبار لگایا۔

    یہ بھی پڑھیں: پی ایس ایل 4، کراچی میچز کا سیکیورٹی پلان مرتب، شائقین کے لیے ہدایت نامہ جاری

    باؤلرز میں حسن علی 18 وکٹیں لے کر سرفہرست کے جبکہ کراچی کنگز کے نوجوان باؤلر عمر خان نے بھی اب تک 10 وکٹیں حاصل کر کے  اپنی صلاحیتوں کا لوہا منوایا۔

  • پی ایس ایل 4 :‌ گلیڈی ایٹرز کی سرفرازی کا سفر جاری، اسلام آباد یونائیٹڈ کو شکست

    پی ایس ایل 4 :‌ گلیڈی ایٹرز کی سرفرازی کا سفر جاری، اسلام آباد یونائیٹڈ کو شکست

    ابوظہبی: پاکستان سپرلیگ کے 26ویں میچ میں کوئٹہ گلیڈی ایٹرز نےاسلام آباد یونائیٹڈ کو 43 رنز سے شکست دے کر ایک اور فتح اپنے نام کرلی۔

    تفصیلات کے مطابق پاکستان سپرلیگ اپنے اختتام کی جانب کامیابی سے گامزن ہے، پی ایس ایل سیزن فور کے چوتھے مرحلے کا چوتھا میچ ابوظہبی کے شیخ زاہد اسٹیڈیم میں اسلام آباد یونائیٹڈ اور کوئٹہ گلیڈی ایٹرز کی ٹیموں کے مابین کھیلا گیا۔

    اسلام آباد یونائیٹڈ کے کپتان محمد سمیع نے سرفراز احمد کو پہلے بیٹنگ کی دعوت دی، کوئٹہ گلیڈی ایٹرز کو اوپننگ کا آغاز اچھا نہ مل سکا اور 24 کے مجموعی اسکور پر ہی اہم کھلاڑی واٹسن آؤٹ ہوکر پویلین روانہ ہوئے، ایک وقت میں یونائیٹڈ کے باؤلرز سرفراز الیون پر حاوی نظر آئے تاہم احمد شہزاد نے عمدہ بلے بازی کا مظاہرہ کرتے ہوئے 73 رنز بنائے اور ٹیم کو مشکلات سے نکالا اور اسکور بورڈ پر 180 رنز کا ہندسہ سجایا۔

    عمر اکمل کے آؤٹ ہونے کے بعد کوئی بھی کھلاڑی زیادہ دیر وکٹ پر نہ ٹک سکا اور مجموعی اسکور میں صرف 5رنز اضافے کے ساتھ ہی 5 کھلاڑی احمد شہزاد، سرفراز احمد، ڈیوائن براوو،سہیل تنویر اور فواد احمد آؤٹ ہوئے۔ ڈیبیو کرنے والے گلیڈی ایٹرز کے کھلاڑی اعظم خان بھی صرف 12 رنز بنا کر پویلین روانہ ہوئے۔

    اسلام آباد اننگز

    گلیڈی ایٹرز نے اسلام آباد یونائیٹڈ کو جیت کے لیے 181 رنز کا ہدف دیا جس کے تعاقب میں سمیع الیون نے شاندار آغاز کیا۔

    اسلام آباد یونائیٹڈ کو اوپنگ پارٹنر شپ 62 رنز کی ملی، پہلے آؤٹ ہونے والے کھلاڑی ڈلپورٹ تھے جنہوں نے 25 رنز بنائے، بعد ازاں سالٹ اور آصف علی بھی تین رنز اضافے کے بعد 65 کے مجموعی اسکور پر آؤٹ ہوئے۔

    لک رونکی شاندار اننگز کھیلنے کے بعد 43 گیندوں پر 64 رنز بنا کر آؤٹ ہوئے ، انہیں فواد احمد نے پویلین کی راہ دکھائی، یہ آؤٹ اسلام آباد یونائیٹڈ کے لیے بدقسمتی ثابت ہوا کیونکہ سمت پٹیل اور فہیم اشرف بھی 2 رنز اضافے کے بعد 111 کے مجموعی اسکور پر آؤٹ ہوئے۔

    شاداب خان نے جارحانہ بیٹنگ کی کوشش کی تو وہ بھی 8 کے انفرادی اور 125 کے مجموعی اسکور پر واپس چلے گئے۔

    اسلام آباد یونائیٹڈ کی جانب سے لک رونکی 64 رنز بنا کر نمایاں بلے باز رہے جبکہ گلیڈی ایٹرز کے فواد احمد 3 کھلاڑیوں کو آؤٹ کر کے نمایاں باؤلر رہے، علاوہ ازیں سہیل تنویر اور محمد حسنین نے دو دو وکٹیں حاصل کیں۔

    گلیڈی ایٹرز اننگز

    قبل ازیں گلیڈی ایٹرز نے بیٹنگ کا آغاز کیا تو ٹیم کو مشکلات کا سامنا کرنا پڑا مگر احمد شہزاد اور روسو نے 46 رنز کی شراکت داری قائم کر کے پوزیشن مستحکم کی تاہم تیرہویں اوور میں روسو 23 کے انفرادی اور 108 کے مجموعی اسکور پر پویلین روانہ ہوئے بعد ازاں عمر اکمل بھی 152 کے مجموعی اسکور پر پویلین روانہ ہوئے۔

    اوپنر احمد شہزاد نے 75 رنز کی شاندار اننگز کھیلی اور باؤنڈری لائن پر کیچ آؤٹ ہوئے، یوں 162 کے مجموعی اسکور پر گلیڈی ایٹرز کی پانچ وکٹیں گریں۔ ایک رن اضافے کے بعد ہی کپتان سرفراز احمد بھی آؤٹ ہوئے اور پھر 164 ڈیوائن براوو بھی پویلین لوٹ گئے بعد ازاں سہیل تنویر ، فواد احمد بھی  پر آؤٹ ہوئے۔

    کوئٹہ گلیڈی ایٹرز کے 6کھلاڑی مجموعی اسکور میں 17 رنز کا اضافہ بھی نہ کرسکے، آؤٹ ہونے والوں میں عمر اکمل، سرفراز احمد، احمد شہزاد اور ڈیوائن براوو ، سہیل تنویر، فواد احمد شامل تھے۔

    کوئٹہ گلیڈی ایٹرز پہلے ہی فائنل فور میں جگہ بناچکی ہے جب کہ اسلام آباد یونائیٹڈ پوائنٹس ٹیبل پر تیسری پوزیشن پر ہے۔ کوئٹہ گلیڈی ایٹرز کی جانب سے قومی ٹیم کے سابق کپتان معین خان کے بیٹے اعظم خان پی ایس ایل میں ڈیبیو کررہے ہیں۔

    اسکواڈ

    کوئٹہ گلیڈی ایٹرز

    شین واٹسن، احمد شہزاد، روسو، عمر اکمل، سرفراز احمد (کپتان)، ڈیوائن براوو، اعظم خان (ڈیبیو)، محمد نواز، سہیل تنویر، محمد حسنین، فواد احمد

    اسلام آباد یونائیٹڈ

    لک رانکی، پھل سالٹ، کیمرون ڈیلپورٹ، سُمت پٹیل، آصف علی، شاداب خان، فہیم اشرف، محمد سمیع (کپتان)، رضوان حسین، عماد بٹ، ظفر گوہر

    مزید پڑھیں: پی ایس ایل 4: مصباح کی شاندار بیٹنگ، زلمی کے ہاتھوں‌ قلندرز کو شکست

    قبل ازیں ابوظہبی کے شیخ زاہد نیشنل اسٹیڈیم میں ہی لاہور قلندرز اور پشاور زلمی کے درمیان میچ کھیلا گیا تھا جس میں مصباح الحق نے شاندار ذمہ دارانہ بیٹنگ کا مظاہرہ کرتے ہوئے سیمی الیون کو فتح سے ہم کنار کرایا تھا۔

    گزشتہ روز کوئٹہ گلیڈی ایٹرز نے ملتان سلطانز کو شکست دی کر پلے آف مرحلے سے باہر کردیا تھا۔

    سرفراز الیون کے اوپنر شین واٹسن نے شاندار بیٹنگ کا مظاہرہ کرتے ہوئے 55 گیندوں پر 6 چوکوں اور 6 چھکوں کی مدد سے 91 رنز کی ناقابلِ شکست اننگز کھیلی تھی جبکہ احمد شہزاد نے بھی نصف سنچری اسکور کی تھی۔

  • پی ایس ایل 4، کراچی میچز کا سیکیورٹی پلان مرتب، شائقین کے لیے ہدایت نامہ جاری

    پی ایس ایل 4، کراچی میچز کا سیکیورٹی پلان مرتب، شائقین کے لیے ہدایت نامہ جاری

    کراچی: ایڈیشنل آئی جی ڈاکٹر امیر شیخ نے کہا ہے کہ پی ایس ایل کے لیے سیکیورٹی پلان مرتب کرلیا، اسٹیڈیم کے دورازے میچ شروع ہونے سے دو گھنٹے قبل بند ہوجائیں گے، شہری ٹکٹ کے ساتھ شناختی کارڈ بھی لائیں۔

    کراچی کے نیشنل اسٹیڈیم میں رینجرز حکام کے ہمراہ پریس کانفرنس کرتے ہوئے ڈاکٹر امیر شیخ نے پی ایس ایل میچز کے انعقاد پر شہر قائد کے مکینوں کو مبارک باد پیش کی۔اُن کا کہنا تھا کہ پی ایس ایل میچز کا انعقاد سندھ پولیس، رینجز اور قانون نافذ کرنے والے اداروں پر اعتماد کا ثبوت ہے۔

    ایڈیشنل آئی جی کا کہنا تھا کہ کراچی میں  مختلف آپریشنز چل رہے ہیں، پی ایس ایل کے حوالے سے سیکیورٹی پلان مرتب کرلیا مگر یہ ابھی حتمی نہیں ہے ضرورت پڑنے پر اسے تبدیل کیا جاسکتا ہے۔

    مزید پڑھیں: پی ایس ایل کے لاہورمیں شیڈول تمام میچزکراچی منتقل

    اُن کا کہنا تھا کہ 50 کے قریب ایس پیز، 800 خواتین اور 13 ہزار  پولیس اہلکار اسٹیڈیم کے اطراف تعینات ہوں گے،اطراف میں سے سی سی ٹی وی کیمرے بھی اپ گریڈ ہوگئے اور اس حوالے سے مانیٹرنگ روم بھی بنا دیا گیاہے۔

    اُن کا کہنا تھا کہ اسٹیڈیم کو محفوظ بنانے کےلیےہم نےریہرسل بھی کی جبکہ محکمہ صحت،کےالیکٹرک سمیت تمام اداروں سے مسلسل رابطے میں بھی ہیں۔

    اسٹیڈیم آنے والے شائقین کے لیے ایڈیشنل آئی جی کا پیغام

    ڈاکٹر امیر شیخ کا کہنا تھا کہ مخصوص پوائنٹس سے شہریوں کو اسٹیڈیم لانے کے لیے شٹل سروس کا اہتمام کیا گیا ہے جس میں سفر کرنے کے لیے ٹکٹ اور شناختی کارڈ لازم ہوگا۔

    یہ بھی پڑھیں: پی ایس ایل 4: کراچی شہر کو دلہن کی طرح سجا دیا گیا، ہیلتھ ایکشن پلان بھی تیار

    اسی سے متعلق: پی ایس ایل 4: نیشنل اسٹیڈیم کراچی میں تیاریاں عروج پر، کمانڈ اینڈ کنٹرول روم فعال

    اُن کا کہنا تھا کہ میچ شروع ہونے سے دو گھنٹے قبل میچ کے دروازے بند کردیے جائیں گے، شہری زحمت سے بچنے کے لیے دی جانے والی ہدایات پر ضرور عمل کریں اور اداروں کے ساتھ تعاون کریں۔

  • پی ایس ایل 4: مصباح کی شاندار بیٹنگ، زلمی کے ہاتھوں‌ قلندرز کو شکست

    پی ایس ایل 4: مصباح کی شاندار بیٹنگ، زلمی کے ہاتھوں‌ قلندرز کو شکست

    ابوظہبی: پاکستان سپرلیگ سیزن فور کے 25ویں میچ میں مصباح الحق کی شاندار بیٹنگ کی بدولت پشاور زلمی نے لاہور قلندرز کو 6 وکٹوں سے شکست دے کر فتح اپنے نام کرلی۔

    تفصیلات کے مطابق پاکستان سپرلیگ کا 25 واں میچ ابوظہبی کے شیخ زاہد اسٹیڈیم میں پشاور زلمی اور لاہور قلندرز کی ٹیموں کے مابین کھیلا گیا۔

    پشاور زلمی کے کپتان ڈیرن سیمی نے ٹاس جیت کرپہلے فیلڈنگ کا فیصلہ کرتے ہوئے لاہور قلندرز کو بیٹنگ کی دعوت دی۔ لاہور قلندرز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 124 رنز اسکور کیے۔

    ہدف کے تعاقب میں پشاور زلمی کو ابتدا سے ہی مشکلات کا سامنا کرنا پڑا، امام الحق 6 کے مجموعی اسکور پر پویلین روانہ ہوئے، بعد ازاں کامران اکمل 8، عمر امین اور ڈاؤسن 12 کے مجموعی اسکور پر پویلین لوٹ گئے تھے۔

    کیورن پولارڈ بھی 8 رنز اضافے کے بعد 20 کے مجموعی اسکور پر کلین بولڈ ہوئے، بعد ازاں کپتان ڈیرن سیمی اور مصباح الحق نے محتاط انداز میں بیٹنگ کرتے ہوئے شراکت داری قائم کی اور اپنی ٹیم کو فتح کے قریب لے گئے۔

    پشاور زلمی کے کھلاڑیوں اور ٹیم مینیجمنٹ نے مصباح الحق کی واپسی پر سلیوٹ مار کر اُن کا استقبال کیا۔

    پشاور زلمی کے کپتان ڈیرن سیمی آخری اوور میں نصف سنچری سے چار قدم دور آؤٹ ہوئے جبکہ مصباح الحق نے 55 گیندوں کا سامنا کرتے ہوئے 2 چھکوں اور 4 چوکوں کی مدد سے 59 رنز کی ناقابل شکست اننگز کھیلی۔

    زلمی کی جانب سے مصباح 59 ، کپتان سیمی 46 کے ساتھ نمایاں بلے باز جبکہ شاہین شاہ آفریدی 3 وکٹیں لے کر نمایاں گیند باز رہے۔

    قبل ازیں پشاور زلمی کی دعوت پر لاہور قلندرز نے بیٹنگ کا آغاز کیا تو حارث سہیل کے علاوہ کوئی بھی کھلاڑی خاطر خواہ کارکردگی نہ دکھا سکھا، زمان الیون کی پہلی وکٹ 12 ،  دوسری 18،  تیسری 36،  چوتھی 54، پانچویں 86، چھٹی 99 اور ساتویں 108 کے مجموعی اسکور پر گری۔

    قلندرز کی جانب سے حارث سہیل 43 ڈی ویسی 26 اور عمیر مسعود 22 بنا کر نمایاں بلے باز رہے جبکہ پشاور زلمی کے ٹائمل ملز نے3 ، ثمین گل نے 2 ، وہاب ریاض اور ڈاؤسن نے ایک ایک وکٹ حاصل کی۔

    پوائنٹس ٹیبل پر پشاور زلمی 10 پوائنٹس کے ساتھ دوسرے نمبر پر ہےجبکہ لاہور کی ٹیم 6 پوائنٹس کے ساتھ پانچویں پوزیشن پر ہے۔

    پشاور زلمی نے پلیئنگ الیون میں 2 تبدیلیاں جبکہ لاہور قلندرز نے 5 کھلاڑی تبدیل کیے ہیں۔

  • پی ایس ایل 4: نیشنل اسٹیڈیم کراچی میں تیاریاں عروج پر، کمانڈ اینڈ کنٹرول روم فعال

    پی ایس ایل 4: نیشنل اسٹیڈیم کراچی میں تیاریاں عروج پر، کمانڈ اینڈ کنٹرول روم فعال

    کراچی: نیشنل اسٹیڈیم کراچی میں پی ایس ایل فور کے میچوں کی تیاریاں تیزی سے جاری ہیں، کمانڈ اینڈ کنٹرول روم فعال کر دیا گیا۔

    تفصیلات کے مطابق کراچی میں شیڈول پی ایس ایل فور کے میچز کے لیے شاندار انتظامات کیے جارہے ہیں، نیشنل اسٹیڈیم میں کیمرے لگا دیے گئے، کمانڈ اینڈ کنٹرول روم سے سب کچھ مانیٹر ہوگا۔

    اسٹیڈیم کے داخلی اور خارجی راستوں کے علاوہ پارکنگ اور اسٹینڈ میں بھی کیمرے نصب کردیے گئے، آئی سی سی کے سیکیورٹی ماہرای این ڈیوڈ نے بھی انتظامات پر اطمینان کا اظہار کیا، ایونٹ کے لیے پرجوش براڈ کاسٹرز بھی کراچی پہنچ گئے۔

    پی ایس ایل کے پاکستان میں ہونے والے تمام میچز لاہور سے کراچی منتقل کردئیے گئے ہیں، 9 ماچ کو کراچی میں لاہور قلندرز اور اسلام آباد یونائیٹڈ کا میچ ہوگا۔

    خیال رہے کہ کراچی پولیس بھی میچز کے سلسلے میں سیکورٹی پلان بنا چکی ہے، اے آئی جی امیر شیخ نے کہا کہ کراچی پولیس کرکٹ میچوں کی میزبانی کے لیے پوری طرح تیار ہے۔

    پاکستان سپر لیگ کی ٹیموں کی کراچی آمد سے متعلق شیڈول جاری

    دوسری جانب وزیراعلیٰ سندھ مراد علی شاہ کا کہنا تھا کہ پاکستان بھرسے آنے والےعوام کے لئے مناسب انتظامات کریں گے۔

    دس مارچ کو کراچی کنگز اور کوئٹہ گلیڈی ایٹرز کی ٹیمیں مدمقابل آئیں گی، 11 مارچ کو نیشنل اسٹیڈیم کراچی میں 2 میچز کھیلے جائیں گے، لاہور قلندرز اور ملتان سلطانز کا میچ دوپہر 2 بجے شروع ہوگا جبکہ کراچی کنگز اور پشاور زلمی شام 7 بجے مدمقابل ہوں گی۔

    پی ایس ایل سیزن فور کا کوالیفائر 13 مارچ کو کراچی میں ہوگا، 14 مارچ کو پہلا ایلیمنیٹر، 15 مارچ کو دوسرا ایلیمنیٹر کھیلا جائے گا، فائنل میچ 17 مارچ کو نیشنل اسٹیڈیم کراچی میں کھیلا جائے گا۔

  • پی ایس ایل 4 :‌ کراچی کنگز کی فتح، پلے آف تک رسائی

    پی ایس ایل 4 :‌ کراچی کنگز کی فتح، پلے آف تک رسائی

    ابوظہبی: پاکستان سپرلیگ کے 24ویں میچ اور انتہائی اہم میچ میں کراچی کنگز نے ملتان سلطانز کو شکست دے کر پلے آف مرحلے تک رسائی حاصل کرلی۔

    تفصیلات کے مطابق پی ایس ایل چوتھے مرحلے میں داخل ہوگیا جس کے تحت آج کا دوسرا میچ کراچی کنگز اور ملتان سلطانز کی ٹیموں کے مابین ابوظہبی کے انٹرنیشنل اسٹیڈیم میں کھیلا گیا۔

    کراچی کنگز کے کپتان کی دعوت پر ملتان سلطانز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 118 رنز بنائے، حماد اعظم 29 اور شعیب ملک 26 کے ساتھ نمایاں بلے باز رہے جبکہ کراچی کنگز کے باؤلرز عثمان شنواری نے 4 اور عمر خان نے تین وکٹیں حاصل کیں۔

    ہدف کے تعاقب میں کراچی کنگز کی جانب سے بیٹنگ کا آغاز بابر اعظم اور کولن منرو نے کیا، عماد الیون کی پہلی وکٹ 21 کے مجموعی اسکور پر گری، آؤٹ ہونے والے کھلاڑی منرو تھے جنہوں نے 11 رنز بنائے۔

    چھٹے اوور میں بابر اعظم 36 کے مجموعی اسکور پر آؤٹ ہوئے، بعد ازاں انگرام اور لیونگ اسٹون نے محتاط انداز میں بیٹنگ کرتے ہوئے اسکور کو آگے بڑھایا، 82 کے مجموعی اسکور پر انگرام اور افتخار احمد آؤٹ ہوئے جبکہ 112 پر محمد رضوان آؤٹ ہوئے۔

    کراچی کنگز نے آخری اوور کی دوسری بال پر 5 وکٹوں سے فتح اپنے نام کی، لیونگ اسٹون نے چھکا مار کر نہ صرف ٹیم کو فتح دلوائی بلکہ اپنی نصف سنچری بھی مکمل کی۔

    کراچی کنگز کےلیونگ اسٹون نےناقابل شکست53رنز کی اننگز کھیلی جبکہ انگرام 31 کے ساتھ دوسرے نمایاں بلے باز رہے، ملتان سلطانز کے محمد الیاس نے تین کھلاڑیوں کو آؤٹ کیا۔

    قبل ازیں  ملتان سلطانز نے پہلے بیٹنگ کی تو انہیں اچھا آغاز نہ مل سکا اور عثمان شنواری نے عمر صدیق کو 5 کے مجموعی اسکور پر پویلین کی راہ دکھائی، اگلے ہی اوور میں جے چارلیس بھی شنواری کا شکار بنے۔

    ملک الیون کے تیسرے کھلاڑی جیمز ونس کو عمر خان نے چوالیس کے مجموعی اسکور پر کلین بولڈ کر کے پویلین کی راہ دکھائی، کپتان شعیب ملک 26 کے انفرادی اور 75 کے مجموعی اسکور پر آؤٹ ہوئے 6 رنز اضافے کے بعد کرسچن بھی عمر خان کا شکار بنے۔

    حماد اعظم اور عرفان کو عثمان شنواری نے اپنے چوتھے اوور کی آخری دو گیندوں پر پویلین کی راہ دکھائی، 18 اوورز کے اختتام تک ملتان سلطانز نے 7 وکٹوں کے نقصان پر 104 رنز اسکور کیے۔

    عثمان شنواری کو شاندار باؤلنگ کرانے پر مین آف دی میچ کا اعزاز دیا گیا۔

    ملتان سلطانز کا کوئی بھی کھلاڑی زیادہ دیر تک وکٹ پر نہ رک سکا، حماد اعظم 29 اور کپتان شعیب ملک 26 کے ساتھ نمایاں بلے باز رہے جبکہ ملک الیون کے چار کھلاڑی ڈبل فیگرز میں بھی داخل نہ ہوسکے۔

    وکٹیں گرنے کی ترتیب

    سلطانز کی وکٹیں بالترتیب 5، 17، 44، 75، 81، 102، 102 پر گریں

    کرکٹ کی دنیا میں ابھرتے ہوئے کراچی کنگز کے کھلاڑی عمر خان نے چار اوورز میں بائیس رنز دے کر تین کھلاڑیوں کو آؤٹ کیا جبکہ عثمان شنواری نے چار اوورز میں 15 رنز دے کر چار وکٹیں حاصل کیں۔

    اسکواڈ

    کراچی کنگز

    بابر اعظم، کولن منرو، کولن انگرام، لیام لیونگ اسٹون، افتخار احمد، محمد رضوان، عماد وسیم (کپتان)، آرون سمرز، عامر یامین، عمرخان، عثمان شنواری

    ملتان سلطانز

    جیمز ونس، عمر صدیق (وکٹ کیپر)، جانسن چارلس، شعیب ملک (کپتان)، حماد اعظم، ڈینئل کرسچن، محمد الیاس، محمد عباس، کرس گرین ، عرفان خان

    محمد عامر کی وطن واپسی

    فاسٹ باؤلر محمد عامر کی والدہ شدید علیل اور انتہائی نگہداشت وارڈ میں داخل ہیں جس کے باعث وہ دبئی سے وطن واپس آرہے ہیں، کراچی کنگز کی انتظامیہ نے انہیں پاکستان جانے کی اجازت دے دی۔

  • پی ایس ایل فور، پاکستان بھرسے آنے والےعوام کے لئے مناسب انتظامات کریں گے: مرادعلی شاہ

    پی ایس ایل فور، پاکستان بھرسے آنے والےعوام کے لئے مناسب انتظامات کریں گے: مرادعلی شاہ

    کراچی : وزیراعلیٰ سندھ مراد علی شاہ نے کہا ہے کہ پاکستان بھرسے آنے والےعوام کے لئے مناسب انتظامات کریں گے.

    ان خیالات کا اظہار وزیراعلیٰ سندھ مراد علی شاہ نے میڈیا سے گفتگو کرتے ہوئے کیا. ان کا کہنا تھا کہ گزشتہ سال ایک میچ مانگا تھا، رواں سال 8 میچ کراچی مل گئے.

    [bs-quote quote=”پاک فوج کو کریڈٹ جاتا ہے، جس کی وجہ سے بڑا ایونٹ ہو رہا ہے” style=”style-8″ align=”left” author_name=”مراد علی شاہ”][/bs-quote]

    وزیراعلیٰ سندھ نے کہا کہ عوام کے لئے مناسب انتظامات کریں گے، پی ایس ایل جیسے ہی شروع ہوگا شہر کو سجایا جائے گا.

    وزیر اعلیٰ سندھ کا کہنا تھا کہ میں نے ابھی تک کسی کودعوت نہیں دی، مصروفیات کے باعث میچ نہیں دیکھ سکوں گا.

    انھوں نے کہا کہ پاک فوج کو کریڈٹ جاتا ہے، جس کی وجہ سے بڑا ایونٹ ہو رہا ہے، امن وامان کوبرقراررکھنےکی کوشش کریں گے، بجلی سستی ہوجائےتوپی ایس ایل کےبعدبھی روشنی برقراررہےگی.

    مزید پڑھیں: پی ایس ایل 4: کراچی شہر کو دلہن کی طرح سجا دیا گیا، ہیلتھ ایکشن پلان بھی تیار

    انھوں نے کہا کہ کراچی کنگز فائنل میں آئی تو خوشی ہوگی، البتہ جیتے کوئی بھی، یہ جیت پاکستان کی ہوگی.

    یاد رہے کہا کہ اس برس پی ایس ایل کے آٹھ میچز پاکستان میں ہونا طے پائے تھے. تین میچز لاہور، پانچ کراچی میں منعقد ہونے تھے، البتہ شیڈول میں تبدیلی کے بعد تمام میچز کراچی میں منعقد ہوں گے.