ARYNews.tv | Urdu – Har Lamha Bakhabar

Tag: psl5

  • کراچی کنگز کی سیمی فائنل میں رسائی، اسلام آباد یونائیٹڈ کو شکست

    کراچی کنگز کی سیمی فائنل میں رسائی، اسلام آباد یونائیٹڈ کو شکست

    کراچی: پی ایس ایل فائیو کے 28ویں میچ میں کراچی کنگز نے اسلام آباد یونائیٹڈ کو 4 وکٹوں سے شکست دے کر سیمی فائنل میں جگہ بنالی،  اسلام آباد یونائیٹڈ ناک آؤٹ مرحلے سے باہر ہوگئی۔

    تفصیلات کے مطابق کراچی میں کھیلے جانے والے میچ میں اسلام آباد یونائیٹڈ کی جانب سے دیا جانے والا 137 رنز کا ہدف کراچی کنگز نے آخری اوور میں 6 وکٹوں کے نقصان پر حاصل کرلیا، شرجیل خان نے 37 رنز کی جارحانہ اننگز کھیلی۔

    کراچی کنگز کی پہلی وکٹ 60 رنز پر گری جب شرجیل خان 37 رنز بنا کر عاکف جاوید کی گیند پر ایل بی ڈبلیو آؤٹ ہوئے، شرجیل کی اننگز میں 4 چھکے اور تین چوکے شامل تھے۔

    بابر اعظم 19 رنز بنا کر پویلین لوٹ گئے، کیمرون ڈیلپورٹ کو 11 رنز پر شاداب خان نے بولڈ کیا، کپتان عماد وسیم 26 رنز بنا کر نمایاں رہے۔

    افتخار احمد 1 رن بنا کر آؤٹ ہوئے، والٹن 11 رنز بنا کر رومن رئیس کا شکار بنے، کرس جارڈن 6 اور عمید آصف 13 رنز بنا کر ناٹ آؤٹ رہے۔

    اسلام آباد یونائیٹڈ کی جانب سے شاداب خان نے دو کھلاڑیوں کو پویلین کی راہ دکھائی، رومن رئیس اور عاکف جاوید نے ایک، ایک وکٹ حاصل کی۔

    قبل ازیں اسلام آباد یونائیٹڈ نے مقررہ اوورز میں 6 وکٹوں کے نقصان پر 136 رنز بنائے اور کراچی کنگز کو جیت کے لیے 137 رنز کا ہدف دیاتھا۔

    اسلام آباد یونائیٹڈ کی پہلی وکٹ 35 رنز پر گری، اوپنر رضوان حسین 17 رنز بنا کر عمید آصف کی گیند پر والٹن کو کیچ دے بیٹھے۔

    فل سالٹ 25 رنز بنا کر پویلین لوٹ گئے، حسین طلعت نے 37 رنز کی اننگز کھیلی، کپتان شاداب خان 12 رنز بنا کر ارشد اقبال کا نشانہ بنے۔

    کولن انگرام 14 رنز بنا کر رن آؤٹ ہوئے، آصف علی 2 رنز بنا کر جارڈن کی گیند پر اسامہ میر کو کیچ دے بیٹھے۔

    کراچی کنگز کی جانب سے عمید آصف، کرس جارڈن، عماد وسیم، ارشد اقبال اور افتخار احمد نے ایک، ایک وکٹ حاصل کی۔

    اس سے قبل کراچی کنگز نے ٹاس جیت کر اسلام آباد یونائیٹڈ کو پہلے بیٹنگ کی دعوت دی تھی۔

    کراچی کنگز کے کپتان عماد وسیم کا کہنا تھا کہ اچھی جگہ پر بولنگ کریں گے تو نتیجہ اچھا آئے گا، اسلام آباد کو ہرا کر سیمی فائنل میں جگہ بنانا چاہتے ہیں، ایلکس ہیلز کی جگہ کیمرون ڈیلپورٹ کو ٹیم میں شامل کیا ہے۔

    اسلام آباد یونائیٹڈ کے کپتان شاداب خان کا کہنا تھا کہ ہم ٹاس جیت جاتے تو پہلے بیٹنگ ہی کرنا چاہتے تھے، کوشش کریں گے کراچی کنگز کو بڑا ہدف دیں۔

    فائنل الیون

  • ملتان سلطانز نے پشاور زلمی کو 3 رنز سے شکست دے دی

    ملتان سلطانز نے پشاور زلمی کو 3 رنز سے شکست دے دی

    کراچی: پی ایس ایل فائیو کے 27ویں میچ میں ملتان سلطانز نے پشاور زلمی کو 3 رنز سے شکست دے دی۔

    تفصیلات کے مطابق کراچی میں کھیلے جانے والے میچ میں ملتان سلطانز کی جانب سے دئیے جانے والے 155 رنز کے تعاقب میں پشاور زلمی کی ٹیم 7 وکٹوں کے نقصان پر 151 رنز بناسکی۔

    امام الحق کی 56 رنز کی اننگز بھی پشاور زلمی کو شکست سے نہ بچاسکی، عمر امین 29 اور شعیب ملک 30 رنز بنا کر نمایاں رہے۔

    کامران اکمل 2 رنز بنا کر محمد عرفان کی گیند پر بولڈ ہوگئے، وہاب ریاض 3 رنز بناسکے، حیدر علی 1 رن بنا کر علی شفیق کا نشانہ بنے۔

    حماد اعظم کو 7 رنز پر سہیل تنویر نے پویلین روانہ کیا، عادل امین 7 اور حسن علی ایک رن بنا کر ناٹ آؤٹ رہے۔

    ملتان سلطانز کی جانب سے سہیل تنویر نے تین کھلاڑیوں کو پویلین کی راہ دکھائی، علی شفیق نے دو، محمد عرفان اور معین علی نے ایک، ایک وکٹ حاصل کی۔

    اس سے قبل ملتان سلطانز نے مقررہ اوورز میں 6 وکٹوں کے نقصان پر 154 رنز بنائے اور پشاور زلمی کو جیت کے لیے 155 رنز کا ہدف دیاتھا۔

    ملتان سلطانز کی جانب سے ذیشان اشرف نے 52 رنز کی شاندار اننگز کھیلی، کپتان شان مسعود 28 رنز بنا کر حسن علی کی گیند پر عمر امین کو کیچ دے بیٹھے۔

    روحیل نذیر 14 رنز بنا کر پویلین لوٹ گئے، معین علی بغیر کوئی رن بنائے راحت علی کی گیند پر بولڈ ہوگئے، روی بوپارا 5 رنز بنا کر محمد عامر خان کا شکار بنے۔

    شاہد خان آفریدی 13 گیندوں پر 19 رنز بنا کر وہاب ریاض کی گیند پر عمر امین کو کیچ دے بیٹھے، خوشدل شاہ نے 30 رنز کی ناقابل شکست اننگز کھیلی۔

    پشاور زلمی کی جانب سے راحت علی نے تین کھلاڑیوں کو پویلین کی راہ دکھائی، حسن علی اور وہاب ریاض ایک، ایک وکٹ حاصل کرسکے۔

    اس سے قبل پشاور زلمی نے ٹاس جیت کر ملتان سلطانز کو پہلے بیٹنگ کی دعوت دی تھی، وہاب ریاض کا کہنا تھا کہ ٹیم میں کوئی اوورسیز کھلاڑی شامل نہیں ہے۔

    وہاب ریاض کا کہنا تھا کہ ہمارے لیے یہ میچ اہم ہے، کوشش کریں گے کہ ملتان سلطانز کی ٹیم کو کم سے کم اسکور میں آؤٹ کریں۔

    شان مسعود کا کہنا تھا کہ ہم ٹاس جیت جاتے تو پہلے فیلڈںگ ہی کرتے، پشاور زلمی کو بڑا ہدف دینے کی کوشش کریں گے۔

    فائنل الیون

  • کرونا کا خوف، رائلی روسو اور کارلوس بریتھ ویٹ وطن روانہ

    کرونا کا خوف، رائلی روسو اور کارلوس بریتھ ویٹ وطن روانہ

    کراچی: کرونا وائرس کے پیش نظر پی ایس ایل میں شریک دو غیرملکی کھلاڑی اپنے وطن روانہ ہوگئے۔

    تفصیلات کے مطابق کرونا وائرس کے خطرے کے پیش نظر پشاور زلمی کے ویسٹ انڈین کھلاڑی کارلوس بریتھ ویٹ اور ملتان سلطانز کے رائلی روسو بھی وطن روانہ ہوگئے۔

    رائلی روسو کا کہنا تھا کہ بدقسمتی سے پی ایس ایل کا مزید حصہ نہیں ہوں گا، ملتان سلطانز کی نمائندگی کرنا میرے لیے اعزاز کی بات ہے، پاکستانیوں کی میزبانی پر ان کا شکریہ ادا کرتا ہوں، پی ایس ایل میں شرکت یادگار تجربہ رہا۔

    واضح رہے کہ پی سی بی نے کرونا وائرس کے پیش نظر پاکستان سپر لیگ فائیو میں شامل تمام غیرملکی کھلاڑیوں کو واپس جانے کی پیشکش کی تھی۔

    مزید پڑھیں: کرونا وائرس، بنگلہ دیش کرکٹ ٹیم کا دورہ پاکستان منسوخ

    پی سی بی کا کہنا تھا کہ پی ایس ایل ٹیمیں انٹرنیشنل کھلاڑیوں کے بجائے مقامی کھلاڑیوں کو لے سکتی ہیں۔

    پشاور زلمی کی ٹیم میں حماد اعظم کو شامل کیے جانے کا امکان ہے اور پی ایس ایل کے نئی پلیئنگ کنڈیشنز کے مطابق ٹیمیں مقامی کھلاڑیوں کو شامل کرسکتی ہیں۔

    یاد رہے کہ بنگلہ دیش کرکٹ بورڈ نے بھی کرونا وائرس کے پیش نظر ٹیم کو پاکستان نہ بھیجنے کا فیصلہ کیا ہے جس کے سبب تیسرے مرحلے کے تمام میچز منسوخ ہوگئے ہیں۔

  • ٹیم کی کامیابی پر خوش ہوں، بابر دنیا کا نمبر ون کھلاڑی ہے، عماد وسیم

    ٹیم کی کامیابی پر خوش ہوں، بابر دنیا کا نمبر ون کھلاڑی ہے، عماد وسیم

    کراچی: کراچی کنگز کے کپتان عماد وسیم کا کہنا ہے کہ ٹیم کی کامیابی پر خوش ہوں، بابر اعظم دنیا کا نمبر ون کھلاڑی ہے۔

    تفصیلات کے مطابق پی ایس ایل میں کراچی کنگز کے کپتان عماد وسیم کا کہنا ہے کہ ٹیم کی کامیابی پر خوش ہوں، شرجیل خان نے کمال کی اننگز کھیلی ہے۔

    عماد وسیم کا کہنا ہے کہ ہم آخری دونوں میچز بھی جیتنے کی کوشش کریں گے۔

    کراچی کنگز کے اوپنر شرجیل خان کا کہنا تھا کہ بیٹ پر اچھی گیند آرہی تھی، پراعتماد تھا، ایک چانس بھی ملا، آگے میچ اہم ہیں کوشش کروں گا اچھی کارکردگی دکھاؤں۔

    مزید پڑھیں: کراچی کنگز نے لاہور قلندرز کو 10 وکٹوں سے شکست دے دی

    واضح رہے کہ کراچی کنگز نے لاہور قلندرز کو 10 وکٹوں سے باآسانی شکست دی، لاہور قلندرز کی جانب سے دیا جانے والا 151 رنز کا ہدف کراچی کنگز نے 17.1 اوورز میں حاصل کیا۔

    شرجیل خان نے 74 اور بابر اعظم نے 67 رنز کی ناقابل شکست اننگز کھیلی، شرجیل خان کو شاندار کارکردگی پر میچ کا بہترین کھلاڑی قرار دیا گیا۔

    کراچی کنگز 9 پوائنٹس کے ساتھ پوائنٹس ٹیبل پر دوسرے نمبر پر آگئی ہے، پہلے نمبر پر ملتان سلطانز کی ٹیم براجمان ہے۔

  • کراچی کنگز نے لاہور قلندرز کو 10 وکٹوں سے شکست دے دی

    کراچی کنگز نے لاہور قلندرز کو 10 وکٹوں سے شکست دے دی

    کراچی: پی ایس ایل فائیو کے 26ویں میچ میں کراچی کنگز نے لاہور قلندرز کو باآسانی 10 وکٹوں سے شکست دے دی۔

    تفصیلات کے مطابق کراچی میں کھیلے جانے والے میچ میں کراچی کنگز نے لاہور قلندرز کی جانب سے دیا جانے والا 151 رنز کا ہدف 17.1 اوور میں بغیر کسی نقصان کے حاصل کرلیا۔

    شرجیل خان نے 74 اور بابر اعظم نے 69 رنز کی ناقابل شکست اننگز کھیلی۔

    لاہور قلندرز کی جانب سے کوئی بھی بولر وکٹ حاصل نہیں کرسکا، لاہور قلندرز کی ٹیم نے میچ میں تین کیچز بھی ڈراپ کیے۔

    اس سے قبل لاہور قلندرز نے مقررہ اوورز میں 5 وکٹوں کے نقصان پر 150 رنز بنائے اور کراچی کنگز کو جیت کے لیے 151 رنز کا ہدف دیا تھا۔

    لاہور قلندرز کے کپتان سہیل اختر نے 68 رنز کی شاندار اننگز کھیلی، فخر زمان 17 رنز بنا کر عمید آصف کی گیند پر بولڈ ہوگئے۔

    کرس لین کو 5 رنز پر ارشد اقبال نے پویلین روانہ کیا، بین ڈنک 9 رنز بنا کر عمید آصف کی گیند پر اسامہ میر کو کیچ دے بیٹھے، سمیت پٹیل 5 رنز بنا کر کرس جارڈن کا نشانہ بنے۔

    لاہور قلندرز کے آل راؤنڈر محمد حفیظ 35 رنز بنا کر ناٹ آؤٹ رہے، ڈیوڈ ویزے نے 5 رنز بنائے۔

    کراچی کنگز کی جانب سے عمید آصف اور ارشد اقبال نے 2، 2 وکٹیں حاصل کیں، کرس جارڈن ایک وکٹ حاصل کرسکے۔

    اس سے قبل کراچی کے نیشنل اسٹیڈیم میں کھیلے جانے والے میچ میں کراچی کنگز نے ٹاس جیت کر لاہور قلندرز کو بیٹنگ کی دعوت دی تھی۔

    کراچی کنگز کے کپتان عماد وسیم کا کہنا تھا کہ لاہور قلندرز سے شکست کا بدلہ لیں گے، ٹیم میں تین تبدیلیاں کی ہیں، وکٹ بہت اچھی ہے، جیتنے کی بھرپور کوشش کریں گے، شائقین کی بھرپور سپورٹ حاصل ہے۔

    لاہور قلندرز کے کپتان سہیل اختر کا کہنا تھا کہ ہمارا پلان بھی ٹاس جیت کر فیلڈنگ کا تھا، ٹیم میں ایک تبدیلی کی گئی ہے۔

    فائنل الیون

  • انسانی جانیں کرکٹ سے زیادہ ضروری ہیں، وسیم خان

    انسانی جانیں کرکٹ سے زیادہ ضروری ہیں، وسیم خان

    کراچی: پی سی بی کے چیف آپریٹنگ آفیسر وسیم خان کا کہنا ہے کہ انسانی جانیں کرکٹ سے زیادہ ضروری ہیں، اسٹیڈیم میں شائقین کی آمد پر پابندی کا فیصلہ سندھ حکومت کی مشاورت سے کیا گیا۔

    تفصیلات کے مطابق پی سی بی کے چیف آپریٹنگ آفیسر وسیم خان نے میڈیا سے گفتگو کرتے ہوئے کہا کہ کرونا وائرس کے پیش نظر اسٹیڈیم میں شائقین کی آمد پر پابندی کا فیصلہ سندھ حکومت کی مشاورت سے کیا گیا ہے، ابھی میچز منتقل کرنے کا کوئی ارادہ نہیں ہے۔

    انہوں نے کہا کہ دنیا بھر میں اس طرز کے اقدامات کیے جاتے رہے ہیں، بنگلہ دیش سیریز سے متعلق ابھی کوئی فیصلہ نہیں ہوا ہے، شائقین کی آمد پر پابندی سندھ حکومت کی ہدایت پر لگائی گئی ہے۔

    وسیم خان کا کہنا ہے کہ پاکستان کپ کے حوالے سے ابھی کوئی فیصلہ نہیں ہوا ہے، 24 گھنٹوں میں مزید فیصلے لیے جاسکتے ہیں۔

    مزید پڑھیں: کراچی، پی ایس ایل کے میچز میں شائقین کی آمد پر پابندی عائد

    وسیم خان کا کہنا تھا کہ لیگ کے لاہور میں آئندہ میچز کے حوالے سے پی سی بی، پنجاب حکومت سے رابطے میں ہےاور اس حوالے سے پی سی بی صوبائی حکومت کی ہدایات پرمکمل عمل کرے گا۔

    انہوں نے کہا کہ اس حوالے سے ٹکٹوں کی واپسی پی سی بی کی ری فنڈ پالیسی کے تحت بذریعہ ٹی سی ایس مراکز پر ہوگی مزید تفصیلات جلد جاری کردی جائیں گی۔

    واضح رہے کہ سندھ حکومت نے پی ایس ایل کے میچز میں شائقین کی آمد پر پابندی عائد کردی ہے، وزیراعلیٰ سندھ کا کہنا تھا کہ کل کے میچز بند اسٹیڈیم میں ہوں گے، ہم میچز کروارہے ہیں لیکن مزید رسک نہیں لے سکتے۔

  • کراچی، پی ایس ایل کے میچز میں شائقین کی آمد پر پابندی عائد

    کراچی، پی ایس ایل کے میچز میں شائقین کی آمد پر پابندی عائد

    کراچی: سندھ حکومت نے پی ایس ایل کے میچز میں شائقین کی آمد پر پابندی عائد کردی۔

    تفصیلات کے مطابق کرونا وائرس کے پیش نظر سندھ حکومت نے پی ایس ایل کے میچز میں شائقین کی آمد پر پابندی عائد کردی، وزیراعلیٰ سندھ کا کہنا ہے کہ صرف آج کے میچ میں شائقین ہوں گے۔

    وزیراعلیٰ سندھ مراد علی شاہ کا کہنا ہے کہ کل سے میچز بند اسٹیڈیم میں ہوں گے، ہم میچز کروا رہے ہیں لیکن مزید رسک نہیں لے سکتے۔

    مراد علی شاہ کا کہنا ہے کہ کل میچ ہوگا لیکن شائقین کو جانے کی اجازت نہیں ہوگی، شائقین کو ٹکٹس کے پیسے واپس کردئیے جائیں گے۔

    واضح رہے کہ کل نیشنل اسٹیڈیم میں پشاور زلمی اور ملتان سلطانز کے درمیان میچ کھیلا جائے گا۔

    چیف ایگزیکٹو پی سی بی وسیم خان کا کہنا ہے کہ کرکٹ میں صحت اور حفاظت کو ہمیشہ ترجیح دی جاتی ہے، پی سی بی کھلاڑیوں، آفیشلز، تماشائیوں، میڈیا، سروس پرووائئیڈرز اور سیکیورٹی اہلکاروں کی صحت اور حفاظت کا مکمل خیال رکھتا ہے۔

    وسیم خان نے کہا کہ حکومت سندھ کی سفارش کے بعد پی سی بی نے احتیاطی تدابیر اختیار کرتے ہوئے فیصلہ کیا ہے کہ کراچی میں شیڈول آئندہ میچز خالی نیشنل اسٹیڈیم میں منعقد ہوں گے۔

    چیف ایگزیکٹو پی سی بی نے مزید کہاکہ پی سی بی کراچی کے فینز سے ہمدردی رکھتا ہے جنہوں نے ایچ بی ایل پی ایس ایل 2020 کے ابتدائی میچوں سمیت گذشتہ ایڈیشن کے 8 میچوں میں بڑھ چڑھ کر حصہ لیا تھا تاہم حکومتِ سندھ کی سفارش کے بعد ہمارے لیے بطور احتیاطی تدابیر یہ فیصلہ کرنا ضروری تھا۔

    انہوں نے کہاکہ اس ضمن میں پی سی بی کھلاڑیوں اور ٹیموں کے ساتھ مکمل رابطے میں ہے اوراس حوالے سے انہیں مکمل باخبر رکھا جارہا ہے۔ وسیم خان نے کہا کہ کھلاڑیوں کی حفاظت ہماری ذمہ داری ہے اور ہم اس سلسلے میں ان کے تعاون کے مشکور ہیں۔

    چیف ایگزیکٹو پی سی بی نے کہاکہ 10 مارچ کو کراچی میں میچز شیڈول کے مطابق کروانے کا فیصلہ حکومتِ سندھ کی مشاورت سے ہی کیا گیا تھا۔انہوں نے کہا کہ پی سی بی ہمیشہ مقامی حکومت کی مشاورت سے فیصلے کرتا ہے ۔

    وسیم خان نے کہاکہ لیگ کے لاہور میں آئندہ میچز کے حوالے سے پی سی بی، پنجاب حکومت سے رابطے میں ہےاور اس حوالے سے پی سی بی صوبائی حکومت کی ہدایات پرمکمل عمل کرے گا۔

    انہوں نے کہا کہ اس حوالے سے ٹکٹوں کی واپسی پی سی بی کی ری فنڈ پالیسی کے تحت بذریعہ ٹی سی ایس مراکز پر ہوگی مزید تفصیلات جلد جاری کردی جائیں گی۔

  • ملتان سلطانز اور کوئٹہ گلیڈی ایٹرز کا اہم میچ بارش کی نذر

    ملتان سلطانز اور کوئٹہ گلیڈی ایٹرز کا اہم میچ بارش کی نذر

    لاہور: پی ایس ایل فائیو میں ملتان سلطانز اور کوئٹہ گلیڈی ایٹرز کا اہم میچ بارش کی نذر ہوگیا۔

    تفصیلات کے مطابق لاہور میں بارش کے سبب ملتان سلطانز اور کوئٹہ گلیڈی ایٹرز کا میچ منسوخ کردیا گیا، دونوں ٹیموں کو ایک ایک پوائنٹ دے دیا گیا۔

    کوئٹہ گلیڈی ایٹرز کے ٹورنامنٹ میں 7 پوانٹس ہوگئے جبکہ ملتان سلطانز 12 پوائنٹس کے ساتھ ٹاپ پوزیشن پر برقرار ہے۔

    کوئٹہ گلیڈی ایٹرز کی ٹیم اپنا آخری میچ اتوار کو کراچی کے نیشنل اسٹیڈیم میں کراچی کنگز کے خلاف کھیلے گی۔

    واضح رہے کہ پی ایس ایل فائیو میں اب تک ملتان سلطانز کی ٹیم پلے آف مرحلے میں رسائی حاصل کرنے میں کامیاب رہی ہے، کوئٹہ گلیڈی ایٹرز کے اگلے مرحلے میں رسائی کے امکانات بہت کم ہوگئے ہیں۔

    کوئٹہ گلیڈی ایٹرز کی ٹیم ایونٹ میں 8 میچ کھیل کر آخری پوزیشن پر ہے، شین واٹسن، جیسن رائے، احمد شہزاد، کپتان سرفراز احمد کارکردگی میں تسلسل نہیں دکھا سکے ہیں۔

    یاد رہے کہ کل کراچی کے نیشنل اسٹیڈیم میں کراچی کنگز اور لاہور قلندرز کی ٹیمیں مدمقابل آئیں گی، اس سے قبل لاہور قلندرز نے کراچی کنگز کو شکست دی تھی۔

  • کراچی کنگز میں انجرڈ عامر یامین کی جگہ وقاص مقصود شامل

    کراچی کنگز میں انجرڈ عامر یامین کی جگہ وقاص مقصود شامل

    لاہور: پی ایس ایل میں کراچی کنگز کے آل راؤنڈر عامر یامین ہیمسٹرنگ انجری کے باعث پی ایس ایل سے باہر ہوگئے ان کی جگہ وقاص مقصود کو ٹیم میں شامل کرلیا گیا ہے۔

    تفصیلات کے مطابق کراچی کنگز نے انجری کے باعث پی ایس ایل فائیو سے باہر ہونے والے آل راؤنڈر عامر یامین کی جگہ بائیں ہاتھ کے فاسٹ بولر وقاص مقصود کو اسکواڈ میں شامل کرلیا۔

    انجری کا شکار 29 سالہ عامر یامین کے ایم آر ائی اسکین کا جائزہ لینے کے بعد ڈاکٹر نے انہیں آرام کا مشورہ دیا۔

    پی ایس ایل فائیو میں آل راؤنڈر عامر یامین نے کراچی کنگز کی جانب سے 3 میچوں میں 3 وکٹیں حاصل کی تھیں تاہم اس دوران وہ کسی بھی میچ بیٹنگ نہیں کرسکے تھے، متبادل کھلاڑی 32 سالہ وقاص مقصود کے نام کی منظوری پی ایس ایل کی ٹیکنیکل کمیٹی نے دی ہے۔

    مزید پڑھیں: ابھی کچھ نہیں کہہ سکتے پہلے نمبر پر کون ہوگا، عماد وسیم

    پی ایس ایل ٹیکنیکل کمیٹی میں پی سی بی کے چیف ایگزیکٹو آفیسر وسیم خان، بازید خان، مرینہ اقبال، سمیر کھوسہ اور ڈاکٹر سہیل سلیم شامل ہیں۔

    واضح رہے کہ وقاص مقصود اس سے قبل پی ایس ایل فور میں اسلام آباد یونائیٹڈ کی نمائندگی کرچکے ہیں، انہوں نے ایونٹ میں 2 میچز کھیلے تھے۔

    یاد رہے کہ کل کراچی کے نیشنل اسٹیڈیم میں کراچی کنگز اور لاہور قلندرز کی ٹیمیں مدمقابل آئیں گی، اس سے قبل لاہور قلندرز نے کراچی کنگز کو شکست دی تھی۔

  • کوشش کریں گے بین ڈنک کی چیونگم واپس لے لیں، وہاب ریاض

    کوشش کریں گے بین ڈنک کی چیونگم واپس لے لیں، وہاب ریاض

    لاہور: پی ایس ایل سیزن فائیو میں پشاور زلمی کے کپتان وہاب ریاض نے کہا ہے کہ کوشش کریں گے بین ڈنک سے چیونگم واپس لے لیں۔

    تفصیلات کے مطابق پشاور زلمی کے کپتان وہاب ریاض نے میڈیا سے گفتگو کرتے ہوئے کہا کہ کوئی بھی ٹیم فائنل 4 میں آسکتی ہے، کوشش ہے کل کا میچ جیت کر فائنل 4 میں جگہ پکی کریں۔

    وہاب ریاض کا کہنا تھا کہ بین ڈنک نے جتنی اننگز کھیلی ہیں بڑی اچھی کھیلی ہیں۔

    صحافی نے سوال کیا کہ بین ڈنک بہت فارم میں ہیں ان کے خلاف کیا پلان ہے جس پر وہاب ریاض کا کہنا تھا کہ ’کوشش کریں گے بین ڈنک کی چیونگم واپس لے لیں۔‘

    مزید پڑھیں: لاہور قلندرز کی کامیابی نے پوائنٹس ٹیبل پر ہلچل مچادی

    دوسری جانب بین ڈنک کا کہنا تھا کہ چیونگم کھانے میں کچھ خاص نہیں ہے، میں بس گراؤنڈ کے اندر پرسکون رہنے کی کوشش کرتا ہوں، اسے شاید ویڈیوز میں زیادہ دکھایا جارہا ہے۔

    بین ڈنک کا کہنا تھا کہ ببل گم بری عادت ہے، مجھے اسے روکنا چاہئے لیکن میں صرف پرسکون رہنے کے لیے ایسا کرتا ہوں تاکہ جو ٹارگٹ ہے اس پر فوکس کرسکوں۔

    انہوں نے کہا کہ فوکس اگلے تین میچز پر ہے، ٹیم نے ایک گروپ بننے کے لیے بہت محنت کی ہے، مینجمنٹ اور کھلاڑیوں نے یہی کوشش کی کہ ایک یونٹ بن جائے اور پھر گروپ کی شکل میں سب اچھا کھیلیں۔

    واضح رہے کہ کل پشاور زلمی اور لاہور قلندرز کے درمیان مقابلہ ہوگا، پوائنٹس ٹیبل پر پشاور زلمی 9 پوائنٹس کے ساتھ دوسرے اور لاہور قلندرز 6 پوائنٹس کے ساتھ پانچویں نمبر پر موجود ہے۔