کراچی : پاک سرزمین پارٹی کے سربراہ مصطفیٰ کمال نے احتجاج کا دائرہ کراچی کے دیگر علاقوں تک بڑھانے کا اعلان کرتے ہوئے کہا کہ حکمران سمجھ رہے ہیں، احتجاج کے بعد یہاں سے چلے جائیں گے۔

تفصیلات کے مطابق پاک سرزمین پارٹی کی احتجاجی تحریک تیسرے روز میں داخل ہوگئی ہے، پی ایس پی کے سربراہ مصطفیٰ کمال نے احتجاج کا دائرہ کراچی کے دیگر علاقوں تک بڑھانے کا اعلان کرتے ہوئے کہا ہمارے پاس ہزاروں کارکنان ہیں، کراچی سے کشمور تک اپنی طاقت کا مظاہرہ کرسکتے ہیں۔

مصطفیٰ کمال کا کہنا تھا کہ حکمران سمجھ رہے ہیں، احتجاج کے بعد یہاں سے چلے جائیں گے، آپ جتنی دیر لگائیں گے، اتنی زیادہ شرمندگی کرنا پڑے گی، جمہوری طریقے سے اپناحق مانگ رہے ہیں، حقوق کے لیے غیرجمہوری طریقے نہیں اپنائیں گے، کسی کی املاک کو نقصان نہیں پہنچائیں گے۔

انھوں نے مزید کہا کہ پی ایس پی چاروں صوبوں کی جماعت بن رہی ہے، حکمران جیسا برتاؤ کریں گے، ہمارا رویہ بھی ویسا ہی ہوگا۔

پاک سرزمین پارٹی 12 مقامات پر احتجاجی کیمپ لگائے گی

ترجمان پاک سرزمین پارٹی کے مطابق ہفتے کی شام پانچ بجے عوامی حقوق کے حصول کے لیے شہر کے بارہ مقامات پر احتجاجی کیمپ لگائے جائیں گے، جن علاقوں میں کیمپ لگائے جائیں گے، ان میں نیپا چورنگی، نمائش چورنگی، کورنگی ڈھائی نمبر ، اسٹار گیٹ، لیاقت آباد دس نمبر، یوپی موڑ ، 5اسٹار چورنگی، اورنگی نمبر پانچ، بڑا بورڈ، بلدیہ ٹاؤن، قائدآباد اور ریگل چوک شامل ہیں۔

مزید پڑھیں : مصطفیٰ کمال کا پریس کلب کے باہر بیٹھنے کا اعلان

یاد رہے کہ پاک سر زمین پارٹی نے6 اپریل سے اپنی احتجاجی تحریک کا آغاز کیا تھا اور پارٹی کے سربراہ مصطفیٰ کمال کراچی پریس کلب کے باہر غیر معینہ مدت کے لیے بیٹھ گئے تھے، احتجاج کے دوران عوامی مسائل کو اجاگر کیا جائے گا اور صاحبان اقتدار پر کراچی کے مسائل حل کرنے کے لیے سخت دباؤ ڈالیں گے۔